थु़र्मा 25
25
किब्दी साखामचो़ फेस्तसकु ङादोडा पावल
1किब्दी साखामचो़ फेस्तस जिल्लाडा रोक्ताम सुलेम चङडा कैसरिया शहरलामका यरूशलेम लस्ता। 2मेसिन्डाम डोक्पु डु़म्लाचो़मिम नुङ यहूदीमिमकु डोक्पु मु़चु़मिमका पावलकु कोर्थो़लाममिम ल्वा गुलाई थो़बेट्मिडी। 3पावललाई लाम्दीडा ङा सेन्मु मुलु़ बेम्डिमका गुकुडला न-थो़म रेम्बेसाका यरूशलेमडा येसाट्किनी र्वाक्साका मेर्मिमका फेस्तसनुङ र्वाम्डिम-र्वाम्डिम ङा बेम्डी। 4लावो किब्दी साखामचो़ फेस्तसका मेर्मिमनुङ र्वाक्ता, “पावल कैसरियाडा ङा चक्साका जु़ल्मा बु, मा गो वो दालाङा मेसिन्डा ख्लोसिङुमा लङु, 5मेम्मिमका गानीगोडाम डोक्पु मु़चु़मिम गोनुङ मेसिन्डा लमिनु़, मा पावलका बु़डु़म कोङनिम मेजो़पा-ल्वा बु माला गुलाई मुमा बेन्मिनु़।”
6लेतले, को धु़मनेम कोति यरूशलेमडा बाइडा मा किब्दी साखामचो़ फेस्तस कैसरिया ख्लोसिड्डा। मेरामकु दिकाम नेम ङा फेस्तस नियाबेपाकु गन्खोपडा गन्डामा पावललाई रेन्बेड्डु़मी। 7पावल मेसिन्डा रोक्तामा यरूशलेमलामका रोक्पा यहूदीमिम उ होनोलाम-आथो़लाम येम्सिम्डी, मा मेर्मिमका पावललाई हापा ङा मुमा बेट्मिडी। लावो मे मुमा बेट्मिडिम ल्वा आच्छाङा र्वाक्पा रेम्बोमु मेचाप्मिवा।
8पावलका उमा दुथाम ल्वा जेस्ता, “यहूदी डु़म्लाकु कोर्थो़लाम, सो़रनेमकु कोर्थो़लाम, मा रोमी साखामचो़कु कोर्थो़लाम गो हाम वो मेजो़पा खारी बेउतोम मिबु।”
9किब्दी साखामचो़ फेस्तसका यहूदीमिमलाई गेर्सिबेन्मु नका पावललाई र्वाक्ता, “हाम गाना यरूशलेमडा लमुमा मेसिन्डा आमा ङादोडा ओर्मिम ल्वाकु दुथाम निया दु़म्नु़ र्वाक्पा न बोना?”
10लावो पावलका र्वाक्ता, “गो रोमी हप कैसरकु अदालतडा येम्तासिङुमिम बु, आसिन्डा ङा आमा निया दु़म्मु बासी। यहूदीमिमलाई गो हाम वो मेजो़पा बेउतोमिम मिबु र्वाक्पा ल्वा ने गानी जो़होमका चनिमिम बु। 11गो सिमुका घ्रेट्पा कोङनिम खारी बेउतोम बु माला, गो सिमुडाम मेङिङु। लावो गो मेप्माम मेजो़पा खारी हाम वो बेउतोम मिबु माला सु़का वो गोलाई सेन्मु यहूदीमिमकु ल्वाड्डा ग्वामु मेचाप्सु़। कैसरका आमा रिबुसी ल्वाकु दुथाम रेम्साङिनु़ र्वाङु।”
12मेकोतिमा किब्दी साखामचो़ फेस्तसका मुलु़बोमु ख्लो़पामिमनुङ ल्वा हिलाबु़डु़मा र्वाक्ता, “गाना रोमी हप कैसरकाडा लमु न बेन्नामका गाना कैसरकाडा ङा लना।” 13कोलेम-नलेम चङडा किब्दी साखामचो़ फेस्तसनुङ घ्रो़म्डा हप अग्रिपास नुङ उमा जाउमो ल्वाक बरनिकी कैसरियाडा रोक्फाच्ची। 14मेर्चिप मेसिन्डा हापा ङा बाच्चिम चङडा फेस्तसका पावलकु रिबुसी ल्वाकु दुथाम मेराम हपलाई थो़बेत्तो र्वाक्ता, “किब्दी साखामचो़ फेलिक्सका चक्जो़ल्लु़म कोले मु़चु़ आसिन्डा बु। 15गो यरूशलेम लङडोलो ङाउ डु़म्लाचो़मिम नुङ यहूदीमिमकु एल्डरमिमका मेजो़पा-ल्वामिमका मुमा बेन्मुमा मेरामलाई देन्दे ग्वामु बासी र्वाम्डिम बाइडा। 16लावो गो मेर्मिमलाई मेजो़पा ल्वामिम बुइडला उन्ला सो़सिक्पाका उ कोर्थो़लाम बक्पामिमनुङ सि मेकोल्थु़म नुङ उ कोर्थो़लाम बक्पामिमकु दुथाम जेमेबेथु़म उहेम वो मु़चु़लाई मेडेङा देन्दे ग्वामु रोमी डु़म्लाडा मिबु बेउतोमिम बाइडा। 17मेर्मिम खोत्ले खोम्सिम्डिमा आसिन्डा रोम्डी, मा दाला-दाला बाङ्सिङ्डोमा उ दिकाम ङा गो निया बेपाकु गन्खोपडा गन्ङोडोमा पावललाई मेसिन्डा रेन्बेत्तोमी। 18पावलकु कोर्थो़लाम बक्पामिमका गुका बु़डु़म मेजो़पा खारीमिमलामका मुमा बेन्मी डे र्वाङडोम बाइडा, लावो मेर्मिमका मेम बोमु मेचाप्मिवा। 19उनी रिबुसी गस्ताम ल्वा ने उनीमा माम्चु़नीडा सो़रलोले बोमुकु दुथाम नुङ सिप्ल्याक्पा येशूकु दुथाम रेछा। पावलका ने येशू आथावो नु़पाङा बुमी र्वाक्साका र्वाक्ताम बाइडा। 20ओर्मिम ल्वाकु दुथाम गो हाम वो हिलाबोमु मेचापुवा। मेम्मिमका गो पावललाई यरूशलेमडा लक्साका मेसिन्डा उमा निया बिइलो नु़ र्वाङडोमा गुलाई हिला बेउतो। 21लावो पावलका रोमी डोक्पु हपका आमा रिबुसी ल्वाकु दुथाममिम निया मेबेसाक्थु़मसम्म आसिङा बुङु र्वाक्ता। मेम्मिमका गो पावललाई रोम शहरडा बाट्पा कैसर हपकाडा मेथु़र्थु़म जो़होमका आसिन्डा रेप्नी बेउतोमिम बु।” 22मेकोतिमा हप अग्रिपासका फेस्तसनुङ र्वाक्ता, “मेराम मु़चु़कु ल्वा गो वो थो़मु न बु।” फेस्तसका र्वाक्ता, “दिका थो़नी।”
पावल अग्रिपासकु ङादोडा येम्सिड्डाम
23उ दिकाम हप अग्रिपास नुङ उमा जाउमो ल्वाक बरनिकी ब्ल्वासिक्चिमा कमाण्डरमिमनुङ शहरडाम डोक्पु मु़चु़मिमलाई ङादो चङडा जु़ल्चिमा घ्रो़म्दीगोडा रोक्ची। मेकोतिमा किब्दी साखामचो़ फेस्तसका पावललाई रेट्नी बु़डु़मी मा रेट्मिडी। 24किब्दी साखामचो़ फेस्तसका र्वाक्ता, “हप अग्रिपास, मा आसिन्डा बाट्पा खोत्ले वा-ल्वाकनी, गानी ओराम मु़चु़लाई ल्वानी, ओरामकु कोर्थो़लाममिम मेजो़पा ल्वा खोत्ले यहूदीमिमका यरूशलेमडा नुङ आसिन्डा आमाडा रेट्मिडी। मेर्मिमका ओरामलाई सेन्मु बासी र्वाम्डिमा येम्डिम बाइडा। 25लावो सिमु बासिक्पा मेजो़पा खारी ओरामका हाम वो बु़डु़म गो मेडारुवा। मेकोतिमा उ त्वाका ङा वो रोमी हपका निया बोङसाङमिनु़ र्वाक्तामका, गो ओरामलाई मेसिन्डा थु़र्मु मुलु़ बेउतो। 26ओरामकु दुथाम गो डोक्पु हपलाई र्यामु बासिक्पा ल्वा हाम वो मिबु। मेम्मिमका गो ओराम मु़चु़लाई हप अग्रिपास नुङ गानी खोत्लेकु ङादोडा रेत्तोम बु, मा गानी ओरामलाई हिलाहिसी बेनी। मेम्मा कोङनिम ल्वा लुक्ता माला गो हाम-हुम र्यामु चापु। 27हेङालोने चक्मा मु़चु़लाई मेजो़पा ल्वामिमका मुमा बेट्माकु दुथाम रेम्मेबेसाका गुलाई डोक्पु हप कैसरकाडा थु़र्मु जो़पा मेलु़ङु।”
Currently Selected:
थु़र्मा 25: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
