थु़र्मा 26
26
1हप अग्रिपासका पावलनुङ र्वाक्ता, “गाना इमा त्वाकु दुथाममिम ल्वा जेमु चाम्ना।”
मेकोतिमा उमा ल्वा कोस्तु़मा पावल जेमु चो़म्डु़: 2“हप अग्रिपास, यहूदीमिमका खोत्ले मेजो़पा-ल्वामिमका गोलाई मुमा बेट्ङिडिमिम ल्वाकु दुथाम आनेप इनीमा ङादोडा जेमु ल्वाउतोमका गो छो़म आलाकाम मिम्सिङ्डोम बु। 3यहूदीमिमकु खोत्ले बादु़खाम नुङ रिबुसी गस्ताम ल्वाकु दुथाम ने गानी चन्ल्यानिमिम ङा बु। मेम्मिमका गो जेङुमिम जो़होमका थो़ङसाङनी र्वाङु।
4“गो आमा नेब्दीडा नुङ यरूशलेम शहरडा याक्केलोम ङा हेसाका बर्तो गेङ्डो र्वाक्पा ल्वा यहूदीमिमका चम्डिम बु। 5मेर्मिमका गो फरिसी बाङ्डो र्वाक्पा ल्वा माके आथामङा चम्डिम बु। गुकु फरिसीका यहूदी डु़म्ला छो़म चङको-चङको बासिक्साका बोकु। मेर्मिमका न सोम्डी माला ओराम ल्वाकु दुथाम गानीनुङ सो़मु चाम्मी।#थु़र्मा २३:६; फिलि ३:५
6“माम्चु़नीका आकीमा ङाउ-खुउमिमनुङ ङादो र्वाम्डिम ल्वा लथाक्तोमका ङा गो आसिन्डा इनीमा ङादोडा येम्सिमु बास्ताम बु। 7आकी को-न (१२) दोचो़मिमका मे माम्चु़नीका र्वाम्डिम ल्वा ल्वामुकाम लागि कोले न-थो़मकाम दु़म्मिडी, मा नेम्फु-सिन्था माम्चु़नीकु सो़रलोले बेम्थाल्मिडी। हप अग्रिपास, ओराम ल्वाकु दुथाम ङा यहूदीमिमका मेजो़पा ल्वामिमका मुमा बेट्ङिडिमिम बु। 8माम्चु़नीका सिपामिमलाई फमी र्वाक्पा ल्वा गानी हेङा थो़र मेलु़निमिम?
9 #
थु़र्मा ८:३; २२:४-५ “नासरतडाम येशूडा थो़रलु़पामिमलाई छो़म उनीमा थो़मतेर्सामुमिबासी र्वाक्पा गो वो मिम्तोम बाइडा। 10यरूशलेमडा गो मेम ङा बेउतो। डोक्पु डु़म्लाचो़मिमलामका साखाम ल्वासाका थो़रलु़पामिम हापालाई गो झ्यालखानडा चक्तोमी। मेर्मिमलाई सेट्मिडिलो गो वो मे सेट्पामिमलाम बाङसिङडो। 11मेकोतिमा खोत्ले घ्रो़म्दीनेमडा मेर्मिमलाई याल्तो ख्रीष्टलाई डक्साका जेबेत्तोमी। मेर्मिमडाम आमा छो़म छोक्चो बक्तामका मिक्सीका ङा मेल्वाउमिवा, मा वाङमिम नेब्दीकु शहर-शहरबाडे वो लङडोमा मेर्मिमकु छो़म उनीमा थो़मतेर्साक्तोमी।
12“कोलेम गो डोक्पु डु़म्लाचो़मिमलाम साखाम नुङ सेलाखाजेम ल्वाउतोमा दमस्कस शहरथो़ लङडोलो, 13हप अग्रिपास, नेम्फुबिलि पाह्रीलामका नेप्सुङडाम वो हापा झ्वाक्पा ओल योक्तोङा बेपा गो ल्वाउतो, मेराम गो मा गोनुङ लक्पामिमकु होनोलाम-आथो़लाम झ्वाक्तोङा लेड्डु़। 14गुकु खोत्ले क्वायु़ झार्तोकोलो हिब्रू ल्वालाम कोङ लो़लामका गोलाई आरे र्वाक्ताम थो़उतो, ‘शाऊल, शाऊल, गाना हेङा आमा थो़मतेर्नामिम? खानायु़प्ते डु़लु़म्चो़कु जु़जु़डा इमा फेमखेलका यानालो इ त्वाकाडा ङा मेनो?’
15“मेकोतिमा गो र्वाङ्डो, ‘ङाचो़, गानी सु़?’
“ङाचो़का गोनुङ र्वाम्डी, ‘गो येशू, गाना आमा थो़मतेर्तोङा लेना। 16बका, मा इमा त्वाकु खेलका येम्सा! गो गानालाई आमा डु़ल्चो़ नुङ आमा दुथाम सो़पा मु़चु़ दु़म्बेनी। मेम्मिमका गो इमाडा रेम्बेङ्सिङ्डोम बु। आमा दुथाम ल्वान्नाम ल्वा नुङ दिफु गो गानालाई रेम्बेनिमिम ल्वामिम खोत्ले गाना वाङमिम मु़चु़मिमलाई थो़बेन्मुमिबासी। 17गो गानालाई यहूदीमिम नुङ वाङसामामिमलामका सेल्नी, मा मेर्मिमकाडा ङा थु़र्नी, 18मा गाना मेर्मिमकु मिक्सी ह्वाक्साडामी, मेर्मिम तुकुम्चिमलामका ओलडा ख्लोम्सिमिनु़, मा शैतानकु यु़मलामका माम्चु़नीडा रोमिनु़। आरेसाका गोडला बोमिमिम उनी थो़रका मेर्मिमकु उनी छु़ल हेम्सी, मा माम्चु़नीका छेट्मिडिम मु़चु़मिमकु बाखोपडा मेर्मिमका बुमु ल्वामी।’
19“मेम्मिमका हप अग्रिपास, पाह्रीलाममिम मिक्सीलामडा ल्वाउतोम होङङा गो खारी बेउतो। 20ङादो दमस्कसडा, मा यरूशलेमडा मा खोत्ले यहूदिया नेब्दीडा बाट्पामिमलाई, मा वाङसामामिमलाई वो इनीमा छु़ल इनीमा न-गोलामका मिम्सिट्निमा माम्चु़नीडा ख्लोन्सिट्नी, मा मेराम ल्वा इनीमा खारीडा रेम्बेनी बेउतोमी।#थु़र्मा ९:२०,२८-२९ 21मेम्मिमका यहूदीमिमका गोलाई सो़रनेमगोडा चु़म्ङिडिमिमा सेन्मु माल्ङिडिमी। 22लावो गो ल्वाउतोम ल्वाकु दुथाम डोक्पु याक्के खोत्ले मु़चु़मिमनुङ सो़मु माम्चु़नीका गोलाई ओम्लोसम्म ख्लो़ङ्डिमिम बु। मोशा नुङ माम्चु़नीलाम-जेपामिमका र्वाम्डिम ल्वा कोङङा सो़त्तो ङा लेट्पु, 23मेर्मिमका आरे दु़म र्वाम्डिम बाइडा, ख्रीष्ट सिमु ङा बासी, मा सिमुलाम बग्गेट्पामिमडाम ङादोम दु़म्साका गुमीका यहूदीमिम नुङ वाङसामामिमलाई माम्चु़नीकु ओल होप्माम सिजेमकु दुथाम सो़मी।”#यशै ४२:६
24पावलका आरेसाका उमा त्वाकु दुथाममिम ल्वा र्वाक्तो लेड्डु़लो ङा किब्दी साखामचो़ फेस्तसका डोक्पु लो़लामका र्वाक्ता, “पावल गाना इ न मान्थिम दु़म्नाम बु। हापा ल्वामिम सीन्सिट्नामका गाना इ न मान्थिम दु़म्नाम बु।”
25लावो पावलका र्वाक्ता, “डोक्पु ङाचो़ फेस्तस, गो आमा न मान्थिम दु़म्ङोडोम मिबु, ननुङमाका आच्छाङाम ल्वा जेत्तो बेउमिम बु। 26गो हप अग्रिपासकु ङादोडा मेङिसाका जेत्तोङा लेट्पु, हेङालोने हपका उनी त्वाका ङा ओर्मिम ल्वाकु दुथाम चमी। ओराम ल्वा थसिसाका बेम्मा मेएँ, ओर्मिमगोडा कोल्ले वो ल्वा गुमीडाम थक्मा मिबु। 27हप अग्रिपास, हाम गानी माम्चु़नीलाम-जेपामिमडला थो़रलु़नी? गानी थो़र लु़नी र्वाक्पा गो मिम्तोम बु।”
28मेकोतिमा अग्रिपासका पावलनुङ र्वाक्ता, “हाम गाना गोलाई कति दु़पा ल्वाका येशूडा थो़रलु़पा दु़म्बेन्मु माल्ङिमिम?”
29पावलका र्वाक्ता, “कति दु़पा दु़म्नु़का हापा दु़पा ल्वाका दु़म्नु़ गानी कोङङा मेएँ, आनेप आमा ल्वा थो़पा खोत्ले ङा गो होप्माङा दु़म्मिनु़, लावो गो होम्साका सेल रिवाका बन्सिसाका ने मेएँ र्वाक्साका गो माम्चु़नीडा सो़म्दी बेउ।”
30मेकोतिमा हप अग्रिपास, उमा जाउमो ल्वाक बरनिकी, किब्दी साखामचो़ फेस्तस, नुङ मेसिन्डा बाट्पा खोत्ले ङा बम्डी। 31मेर्मिम मेलामका लम्डिलो उनी त्वाप-त्वापडा आरे र्वाबेम्डी, “ओराम मु़चु़का सेन्मु नुङ चमुका घ्रेट्पा हाम वो बु़डु़म मिबु।”
32मेकोतिमा अग्रिपासका फेस्तसनुङ र्वाक्ता, “ओरामका रोमी डोक्पु हप कैसरकाडा लङु मेर्वाकावाम माला ने डिसोक्पाका लोवो नु़यावा।”
Currently Selected:
थु़र्मा 26: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
