थु़र्मा 5
5
हननिया नुङ सफीरा
1हननिया र्वाक्मा कोङ मु़चु़ नुङ उ नाइमे सफीराका वो किचो़ उची ये-द भ्रेट्ची। 2लावो गुका उ नाइमेकु मुलु़लामका मेरामकु थि किचो़ उमा त्वाकाम लागि थक्साका जु़ल्स्ता। मेम्मा घ्लेट्पा थि रेड्डु़मा थु़र्मामिमकु ल्वाड्डा ग्वाक्तु़मी। 3लावो पत्रुसका र्वाक्ता, “हननिया, हेङा इमा न-गो शैतानलाई ग्वाक्साका माम्चु़नी-पेलनुङ लिमा थेट्ना, मा इमा ये-द भ्रेट्नाम खउलुङ किचो़ जु़ल्सिट्ना? 4मे ये-द मेभ्रेथु़म वो इमा त्वाकाम ङा बाइडा, मा भ्रेट्नाम खउलुङ वो इमाङा बाइडा, मा आरेप्माम खारी बेपा ल्वा हेसाका इमा नड्डा रोक्ता? गाना मु़चु़नुङ मेएँ, माम्चु़नीनुङ लिमा थेट्नाम बु।”
5ओराम ल्वा थो़स्तु़मा हननिया क्वायु़ पुलु़ झार्स्ता, मा सिडा। मेकोतिमा ओराम ल्वा थो़पा खोत्लेङा छो़म ङिम्डी। 6स्वालामिम रोम्डिमा मेरामलाई साङखिमका दिल्साका पाखाथो़ कुर्मिडिमा ख्लुम्डी, मा मेरामलाई क्लु़म्मिडी।
7हाम दु़स्ताम बाइडा, मेराम उ नाइमेका मेचक्साका ङा सु घण्टा चङडा गु वो मेसिन्डा रोक्ता। 8मेकोतिमा पत्रुसका मेरामनुङ वो हिलाबु़डु़, “गोनुङ सो़या, गाची ये-द मेकोतिडाङा भ्रेट्चिम?” मेकोतिमा गुका र्वाक्ता, “मेकोतिडाङा।”
9पत्रुसका र्वाक्ता, “गाची निफिका हेसाका डे माम्चु़नी-पेलनुङ लिमा थेन्मु मुलु़ बेच्ची? रेप्डा, इमा वोचु़लाई क्लु़म्पामिम लाम्चोकोडा ङा रोम्फाम्डिम बु, मा मेर्मिमका गाना वो मेम्साका ङा कुर्नामिमा पाखा लनामी।”
10मेकोतिलोङा मे सफीरा पत्रुसकु खेल फार्यु़ पुलु़ झार्स्ता, मा सिल्याड्डा। मेकोतिमा स्वालामिम मेगोडा रोम्डी। मेराम सिप्ल्याक्पा ल्वाम्डी, मा कुर्साका पाखा ख्लुम्डी। मेम्मा उ वोचु़ फार्डाङा क्लु़म्मिडी। 11खोत्ले मण्डली नुङ ओराम ल्वा थो़पा खोत्ले छो़म ङिम्डी।
थु़र्मामिमका हापा मु़चु़मिमलाई सबेट्मिडिम
12थु़र्मामिमकु ल्वालामका हापा छेखोपमिम नुङ यु़मखारीमिम मु़चु़मिमगोडा दु़म्मु चो़म्डु़, मा थो़रलु़पा खोत्लेङा ‘सोलोमनकु डोक्पु पिन्दी’ र्वाक्माडा खोम्सिम्डिम बाइडा। 13मु़चु़मिमका थु़र्मामिमकु दुथाम जो़पा ङा जेम्थाल्मिडी, लावो थु़र्मामिमकाडा रोमु मेर्मिम ङिम्थाल्मिडी। 14माम्चु़नीडा थो़रलु़पा वोस्चो़-मेसेममिम हापा ङा मेर्मिमनुङ काम्सिमु चो़म्मिडी, 15मु़चु़मिमका नो़पामिमलाई लाम्दी-गुदीबाडे रेट्मिडी, मा पत्रुस रोलो उ पेल कोङङा लोवो मेर्मिमगोडाम कोङ-कोङडला दु़म्नु़ र्वाक्साका उनी अम्खोप नुङ खाटबाडे जु़ल्थाल्मिडी।
16यरूशलेमकु होनोलाम-आथो़लामबाडेम शहरलामका वो हापा मु़चु़मिमका नो़पामिम नुङ मुनाङपेलका दु़खा ग्वाक्पामिम मेसिन्डा रेन्थाल्मिडी, मा मेर्मिम खोत्लेङा सम्थाल्मिडी।
थु़र्मामिमलाई दु़खा ग्वाम्डिमिम
17डोक्पु ङाउ डु़म्लाचो़ नुङ गुनुङ बाट्पा सदुकीमिम उनी नो़ मेनु़यावामका थु़र्मामिमकु कोर्थो़लाम बम्डी। 18मेकोतिमा मेर्मिमलाई चु़म्मिडिमा खोत्लेकु चखोप झ्यालखानडा चम्डी। 19लावो माम्चु़नीकु कोले पाह्रीचो़का सिन्था मे झ्यालखानकु लाम्चोकोमिम होल्साका मेर्मिमलाई पाखानो ख्लुक्तु़मी, मा र्वाक्ता, 20“लक्निमा सो़रनेमडा लाले त्वारो़मकु दुथाममिम खोत्ले ल्वा मु़चु़मिमलाई थो़बेट्निमी।”
21ओराम थो़म्डिमा मेर्मिम नेमसोसोका ङा सो़रनेमगोनो हुम्डी, मा सीमु चो़म्मिडी। डोक्पु ङाउ डु़म्लाचो़ नुङ गुनुङ बाट्पामिम घ्रो़म्दीनेमडा रोम्डी, मा मेर्मिमका डोक्पु घ्रो़म्दी मेराम र्वाक्मा इस्राएलीमिमकु खोत्ले ङाउमिमकु घ्रो़म्दी येट्मिडी, मा मे थु़र्मामिमलाई झ्यालखानलामका रेन्मु र्वाक्साका मु़चु़मिम थु़र्मिडी। 22लावो मे सिपाहीमिमका थु़र्मामिमलाई झ्यालखानगोडा मेडार्मिवामा ख्लोसिक्साका रोम्डी, मा र्वाम्डी, 23“झ्यालखान जो़होमका ख्लु़न्थाट्मा, मा सिपाहीमिम लाम्चोकोडा येम्तासिट्पा ङा गुकु डार्तोको। लावो लाम्चोको होल्तोकोलो मेगोनो सु़वो मेडार्कुमिवा।” 24सो़रनेमडाम कप्तान नुङ ङाउ डु़म्लाचो़मिमका ओराम ल्वा थो़म्डिमा ङाङाया दु़म्मिडी। मेकोतिमा ओराम चङ्डा हाम दु़म र्वाक्साका मिम्मिडी।
25कोले मु़चु़ रोक्तामा मेर्मिमनुङ र्वाक्ता, “थो़नी, गानी झ्यालखानडा चक्निमिम मु़चु़मिमका ने सो़रनेमगोडा येम्तासिट्मिमा मु़चु़मिमलाई सीमिहोम बुमी।” 26मेकोतिमा कप्तान नुङ सिपाहीमिम लम्डिमा थु़र्मामिमलाई मेयाल्साका फिट्मिडी, हेङालोने मु़चु़मिमका लुङका ओम्किमी र्वाक्साका मेर्मिम ङिम्डी। 27मेर्मिमका मे थु़र्मामिमलाई डोक्पु घ्रो़म्दीडा रेट्मिडिमा येम्सिबेट्मिडी, मा डोक्पु ङाउ डु़म्लाचो़का मेर्मिमनुङ हिलाबु़डु़, 28“येशूकु नङडा हाम वो मेसीनिमी र्वाक्साका गुकु गानीनुङ र्वाक्तोकोम मेएँ? लावो इनी सीसिका ने खोत्ले यरूशलेम ङा लिबेट्नी, मा मे येशूलाई गानी सेट्निम र्वाक्साका आकीमा बुइडला उन्मु माल्नी।”#मत्ती २७:२५
29लावो पत्रुस नुङ थु़र्मामिमका र्वाम्डी, “मु़चु़मिमका र्वामिमिम ने मेएँ, माम्चु़नीका र्वामिमिम ङा गुकु थो़मु बासी। 30गानी क्रूसडा चेट्निमा सेट्निम येशूलाई इकी ङाउ-खुउकु माम्चु़नीका सिमुलाम फम्डिम बु। 31इस्राएलीमिमकु छु़ल उनी न-गोलाम मिम्सिक्साका ख्लोसिबेन्मु लागि मा उनी छु़ल हेम्सामुमि र्वाक्साका माम्चु़नीका गुमीलाई कोम्डिमा उनी जो़प ल्वालाम जु़ल्साका हप नुङ सेल्पा दु़म्बेट्मिडी। 32गुकु ओर्मिम खोत्ले ल्वा आकी मिक्सीका ङा ल्वात्तोकोम बु, मा गुमीका र्वामिमिम थो़पामिमलाई माम्चु़नीका ग्वाम्डिम उनी पेलका वो मेराम सो़मी।”
33मेर्मिमका ओराम थो़म्डिमा छो़म उनी छोक्चो बक्ता, मा थु़र्मामिमलाई सेन्मु न बेम्डी। 34लावो यहूदीमिमकु डु़म्ला सीपा नुङ मु़चु़मिमका डोक्पु मिम्थाल्मिडिम गमलिएल र्वाक्मा फरिसीका डोक्पु घ्रो़म्दीडा येम्स्तामा थु़र्मामिमलाई घरिकोङ पाखानो थु़र्नी बु़डु़मी। 35मेकोतिमा गुका डोक्पु घ्रो़म्दीडाम मु़चु़मिमनुङ र्वाक्ता, “इस्राएलडाम मु़चु़नी, ओर्मिम मु़चु़लाई गानी हाम बोमु खाम्निमिम बु, मेराम इनी त्वाका ङा जो़होमका मिम्नी सो़! 36हेङालोने ओरामडाम किचो़ ङादो वो थुदासका डोक्पु मु़चु़ लिस्तामा ब्ल सङ (४००) कोति मु़चु़मिम मेरामनुङ लाम्दिम्डी। चङडा मेराम मु़चु़ सेट्मिडी, मा गुनुङ लाम्दिपामिम खोत्ले ङा फोन्सिम्डी, मा मेकोतिङा दाम्मिडी। 37मेकोतिमा ओराम मु़चु़डाम चङडा मु़चु़मिम ङार्मु थारीका गालीलडाम यहूदा र्वाक्मा रोक्ता, मा हापा मु़चु़मिम गुनुङ लाम्दिम्डी। मेकोतिमा मेराम वो सेट्मिडी, मा मेरामनुङ लाम्दिपामिम फोन्सिम्डी, मा मेकोतिङा दाम्मिडी। 38ओम्लो दु़म्पा ल्वाकु दुथाम गो गानीनुङ र्वाङु, ओर्मिम मु़चु़डाम वाङ बानी, मा ओर्मिमलाई डिट्नी, हेङालोने ओराम खारी मु़चु़मिमका उनी नका बेम्डिम माला ने मेकोतिङा दाम्मा ल। 39लावो ओराम माम्चु़नीलाममिम माला ने गानी भोम्मु मेचाम्नी, मेएँ माला गानी ने माम्चु़नीकु कोर्थो़लाम बनिमिम दु़म।”
40मेर्मिमका गुका र्वाक्ताम ल्वा बिम्सिम्डी। मेर्मिमका थु़र्मामिमलाई गोनो येट्मिडिमा याल्मिडी, मा “आनेपडाम्मा येशूकु नङडा को सि वो मेजेनी वो” बेसाका डिन्सोम्डिमी। 41माम्चु़नीका मेर्मिमलाई येशूकु नङडा नाप्छु़न्ला सो़म्सिमु घ्रेट्पा दु़म्बेट्मिडी र्वाक्तो गेर्सिक्तो मेर्मिम मे डोक्पु घ्रो़म्दीलामका लुम्डिमा लम्डी। 42मेर्मिमका हेल्लो लोवो सो़रनेमडा नुङ नेम-नेमडा येशू ङा ख्रीष्ट सो़ र्वाक्साका सीमु नुङ जो़पा-सेला दो़मु मेडिट्मिवा।
Currently Selected:
थु़र्मा 5: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
