यूहन्ना 19
19
येशूलाई सेन्मु लागि ग्वाम्डिम
(मत्ती २७:१५-३१; मर्कूस १५:६-२०; लूका २३:१३-२५)
1मेकोतिमा पिलातसका येशूलाई कोक्तेकु याल्खोपका याल्बेड्डु़मी। 2सिपाहीमिमका चु़कु मुकुट बेनेबेम्डिमा गुमीलाई खुसिबेट्मिडी। मेम्मा गेगेम-चक्लेम रङ्गकाम ये फसिबेट्मिडी, 3मा उनी फार्डा कुदु़मार रोम्डिमा “यहूदीमिमकु हपकाम सो़र दु़म्नु़, रो़र दु़म्नु़!” र्वाक्तो गुमीलाई उनीमा फोसु़डा याल्मिडी।
4पिलातस आथावो पाखानो लुक्तामा र्वाक्ता, “रेप्नी, येशूलाई गो इनीमाडा फित्तोङा लेट्पु। गुका ख्लो़ड्डु़म ल्वा गो हाम वो मेडारुवा, मेराम गानी चक्नी र्वाक्पा आमा न बु।” 5येशूका चु़काम मुकुट खुतासिसाका नुङ गेगेम-चक्लेम रङ्गकाम ब्लाङमा-ये फतासिसाका पाखानो लुम्डी। मेम्मा पिलातसका र्वाक्ता, “रेप्नी, ओराम मु़चु़।”
6ङाउ डु़म्लाचो़मिम नुङ सो़रनेम लपा सिपाहीमिमका येशूलाई ल्वाम्डी मेडे येम्डी, “मेरामलाई क्रूसडा चेट्नी, मेरामलाई क्रूसडा चेट्नी।”
लावो पिलातसका मेर्मिमलाई र्वाक्ता, “गानीङा ओरामलाई लक्निमा क्रूसडा चेट्नी। हेङालोने ओराम मु़चु़का ख्लो़ड्डु़म गो हाम वो मेडारुवा।”
7यहूदीमिमका र्वाम्डी, “आकीमा कोले डु़म्ला बु, मेराम होम्साका ओराम मु़चु़ सिमुङा बासी, हेङालोने गु माम्चु़नीकु तारापाचो़ र्वाक्साका उ त्वाकाङा र्वाक्ताम बु।”
8ओराम ल्वा थो़स्तु़मा पिलातस ङादोमडाम वो छो़म ङिड्डा। 9मेम्मा आथावो ओगानेमगोनो हुङ्डा, मा येशूलाई हिलाबु़डु़, “गाना बान्तेम?” लावो येशूका गुलाई हाम वो मेतुकु़मिवा। 10पिलातसका गुमीलाई र्वाक्ता, “गाना गोनुङ ल्वा बोमु मेद्वानामिम? गानालाई डिन्सोमु लोवो गानालाई क्रूसडा चेन्मु लोवो साखाम गोनुङ बु र्वाक्पा गाना मेचना?”
11येशूका र्वाम्डी, “माम्चु़नीका गानीलाई ग्वाक्निमका कोङङा गोडला इनीमा साखाम बुमिम। मेम्मिमका इनीमा ल्वाडा गोलाई ग्वाक्पाका छो़म डोक्पु छु़ल बु़डु़म बु।”
12मेकोतिमा पिलातसका येशूलाई डिन्सोमु न बु़डु़। लावो यहूदीमिम आरे र्वाक्तो येम्डी, “मेराम मु़चु़लाई डिन्सोट्नी माला गानी कैसरकु ङोप्सो़ मेएँ। सु़का गो हप र्वाक्साका जे, मेराम कैसरकु कोर्थो़लाम ब।”
13पिलातसका ओराम ल्वा थो़स्तु़मा येशूलाई पाखानो फिड्डु़। मेम्मा गु ‘लुङकु पाटी’ (हिब्रू ल्वाडा मेरामलाई गब्बथा र्वामी) र्वाक्मा बायडा नियाचो़ गन्पा गन्खोपडा गन्डा। 14सेल्सिमुनेमकु चाडकाम लागि झो़म्जो़ल्सिट्पा नेम्फु बिलि बाइडा। पिलातसका यहूदीमिमलाई र्वाक्ता, “रेप्नी, इनीमा हप।”
15लावो मेर्मिमका डोक्पु लो़लामका येत्तो र्वाम्डी, “ओरामलाई लक्नी, ओरामलाई क्रूसडा चेट्नी।”
पिलातसका हिलाबु़डु़, “हाम गो इनीमा हपलाई क्रूसडा चेन्मु?”
ङाउ डु़म्लाचो़मिमका र्वाम्डी, “कैसर कोङङा आकीमा हप।”
16मेकोतिमा पिलातसका येशूलाई क्रूसडा चेन्मु लागि सिपाहीमिमकु ल्वाडा ग्वाक्तु़मी। मेम्मा सिपाहीमिमका येशूलाई उनी ल्वाडा रम्डी।
क्रूसडा येशू चेट्मिडिम
(मत्ती २७:३२-४४; मर्कूस १५:२१-३२; लूका २३:२६-४३)
17गुमीका उनी त्वाकु क्रूस त्वाकाङा कुर्साका बुइसेर र्वाक्मा बायथो़ लम्डी, मेरामलाई हिब्रू ल्वाडा गल्गथा र्वामी। 18मेसिन्डा मेर्मिमका गुमीलाई क्रूसडा चेट्मिडी। वाङमिम नले मु़चु़चिपलाई वो गुमीनुङङा क्रूसडा चेट्मिडिची। येशूलाई थेतेडा बेसाका कोले उनीमा होनोलाम कोङमी उनीमा आथो़लाम।
19पिलातसका कोङ छेखोप येशूकु बुइकुडला केप्डु़म बाइडा। मेसिन्डा: “नासरतडाम येशू यहूदीमिमकु हप” र्याक्मा बाइडा। 20यहूदीमिम हापाका ओराम छेखोप डाट्मिडी, हेङालोने येशूलाई क्रूसडा चेट्मिडिम खोम शहरकु फार्डाङा बाइडा। मेराम छेखोप हिब्रू, ल्याटिन नुङ ग्रीक ल्वाडा र्याक्मा बाइडा। 21यहूदीमिमकु ङाउ डु़म्लाचो़मिमका पिलातसलाई र्वाम्डी, “‘यहूदीमिमकु हप’ र्वाक्साका मेएँ, ‘ओरामका गो यहूदीमिमकु हप र्वाक्ता’ र्वाक्साका र्याक्नी।”
22पिलातसका र्वाक्ता, “गो हाम र्याक्तो, र्याक्तो।”
23सिपाहीमिमका येशूलाई क्रूसडा चेट्मिडिमा येशूकु ये-सेम रम्डिमा खोत्लेलाई लिट्पा बेसाका ब्ललेका दो़म्डी। मेर्मिमका येशूकु ब्लाङमा-ये वो रम्डी, लावो मेराम ब्लाङमा-ये ने हालाम हायु़ कोलेङा बाइडा।
24मेर्मिमका उनी त्वाप-त्वापडा आरे र्वाबेम्डी, “ओराम मेआ़क्सी, ओराम सु़का ल्वापा र्वाक्साका चिठ्ठा ओप्डी।” माम्चु़नीकु सिजेमडाम ओराम ल्वा रोथिनु़ र्वाक्साका आरे दु़स्ताम:
“मेर्मिमका आमा ये-सेम दो़म्डी,
उनी त्वाप-त्वापडा दो़म्डी,
मा आमा ये-सेमकाम लागि चिठ्ठा ओम्मिडी।”#भज २२:१८
मेम्मिमका सिपाहीमिमका आरे बेम्डी।
25येशूकु क्रूस फार्डा येशूकु माम, उनीमा चेम, क्लोपासकु नाइमे मरियम नुङ मरियम मग्दलिनी येम्तासिट्पा बाम्डी। 26येशूका उनीमा माम नुङ गुमीका द्वाम्डिम उनीमा सीसिपालाई उनी फार्डा येम्तासिट्पा ल्वाम्डिमा उनीमा मामलाई र्वाम्डी, “वा छापा, मेराम इनीमा तारापाचो़।” 27मेम्मा मे सीसिपालाई वो र्वाम्डी, “गुमीलाई इमा माम।” मेम्लो आथाम मे सीसिपाका येशूकु मामलाई उ त्वाकु नेमडाङा लडु़।
येशूकु साम लस्ताम
(मत्ती २७:४५-५६; मर्कूस १५:३३-४१; लूका २३:४४-४९)
28खोत्ले खारी बोम्सोमु दु़स्ता र्वाक्पा येशूका चम्डिमा माम्चु़नीकु सिजेम होङ्ङा रोथिनु़ र्वाक्साका गुमीका र्वाम्डी, “कोरा लु़डा।”#भज ६८:२१; २२:१५ 29मेसिन्डा जु़र्पा अङ्गूरकु बिलामनुङमा कोले सोजाम बाइडा। मेम्मा मेर्मिमका मेसिन्डा खाबा प्लु़म्साका हिसप र्वाक्मा धक्साकु ग्रेमडा मेराम सम्डिमा कोक्साका येशूकु सिड्डा ग्वामी। 30येशूका मेराम दो़प्मिडिमा र्वाम्डी, “हुक्ता।” मेम्मा कुम्सिम्डिमा उनीमा साम लस्ता।
31मेनेम झो़म्जो़ल्सिट्पानेम बाइडा, उ दिकाम डोक्पु ङेम्सिमुनेम बाइडा। ङेम्सिमुनेम सिपा मिरो़ममिम क्रूसडला मेदु़म्मिनु़ र्वाक्पा यहूदीमिमकु न बाइडा। मेम्मिमका मेर्मिमकु खेल चमुमा उनीमा मिरो़म थान्मु र्वाक्साका पिलातसनुङ र्वाम्डिम-र्वाम्डिमङा बेम्डी। 32मेम्मा सिपाहीमिम रोम्डिमा येशूनुङ क्रूसडा चेन्सिक्पाचिपकाम खेल चम्साम्डिची। 33लावो मेर्मिम येशूकाडा रोम्डिलो गुमी बासीङा सिम्डिम डार्मिडी। मेम्मा मेर्मिमका येशूकु खेल मेचम्साक्मिवा। 34मेम मेबेसाका कोले सिपाहीका येशूकु फेटफेटडा जातेका सुक्तु़, मा मेलामका सिसि नुङ कु हास्ल्याड्डा। 35गानी वो थो़रबोमु चाप्नी र्वाक्साका ओराम ल्वापा मु़चु़का सो़यु़डु़म सो़। गुका सो़यु़डु़म ल्वा आच्छाङा, मा गुका सो़यु़डु़म ल्वा आच्छाङा र्वाक्साका गुका च। 36“कोले वो उनीमा सेर मेज” र्वाक्पा माम्चु़नीकु सिजेम होङ्ङा रोम्थिमु आरे दु़स्ताम।#प्रस १२:४६; गन्ती ९:१२; भज ३४:२० 37आथावो माम्चु़नीकु सिजेमका र्वा, “उहेमलाई जातेका सुम्डी, मेरामलाई मेर्मिमका रेम्मी।”#जक १२:१०; रेम्बे १:७
येशू क्लु़म्मिडिम
(मत्ती २७:५७-६१; मर्कूस १५:४२-४७; लूका २३:५०-५६)
38मेकोतिमा चङ्डा, अरिमाथिया देलडाम योसेफका पिलातसकाडा येशूकु सिपा मिरो़म बियु़डु़। यहूदीकु ङिमुका योसेफ मेचहोमका येशूकु कोले सीसिपा बाइडा। पिलातसका लमु ग्वाक्तु़मा गु रोक्तामा उनीमा सिपा मिरो़म लडु़। 39ङादो येशूलाई सिन्था क्रो़म्डा रोक्पा निकोदेमस वो योसेफनुङ बाइडा। गुका सु-सु ३३ किलो कोकोवा मूर्र नुङ एलवा र्वाक्मा मसला रेड्डु़म बाइडा। 40आरेसाका यहूदीमिमका मु़चु़ क्लु़म्मिलो बोमिमिम होङ्ङा मेर्चिपका येशूकु सिपा मिरो़म मसला नुङ सुतीकु साङखिमका दिल्ची। 41येशू क्रूसडा चेट्मिडिम बायडा कोले बगैंचा बाइडा। मेसिन्डा सु़ वो मेक्लु़म्थेङा बाट्पा कोले लाले सु़लु़म बाइडा। 42मेनेम यहूदीमिमकाम झो़म्सिक्पानेम बाइडामका, मा फार्डाङा सु़लु़म बाइडामका मेर्चिपका मेराम सु़लु़मडाङा येशू जु़ल्ची।
Currently Selected:
यूहन्ना 19: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
