यूहन्ना 20
20
येशू सिमुलाम बम्गेम्डिम
(मत्ती २८:१-८; मर्कूस १६:१-८; लूका २४:१-१२)
1नेप्सुङनेम नेमसोसोकाङा मरियम मग्दलिनी सु़लु़मथो़ लस्ता। मेम्मा सु़लु़मगोनो हुखोपडाम लुङ मेसिन्डा मेबायावाम गुका ल्वास्तु़। 2गु पत्रुस नुङ येशूका छो़म रिखाम बेम्डिम कोङमी सीसिपाकाडा ओन्तो रोक्तामा र्वाक्ता, “मेर्मिमका ङाचो़लाई सु़लु़मलाम लम्डी रेछा, मा गुमीलाई बान्ते जु़ल्मिडी, मेराम गुइ मेच।”
3मेम्मा पत्रुस नुङ कोङमी सीसिपा सु़लु़मथो़ लाम्दिच्ची। 4मेर्चिप कोयो-कोयोङा ओन्तोलेट्ची लावो मे कोङमी सीसिपा पत्रुसडाम लाम बक्तु़मा सु़लु़मनो ङादो रोक्थिड्डा। 5गुका सु़लु़मगोनो कुम्स्तामा रेप्डु़लो प्लु़ट्मा सुतीकाम येशूकु साङखिम कोङङा बुतासिक्पा ल्वास्तु़, लावो गु मेगोनो मेहुङावा। 6सिमोन पत्रुस मेरामकु चङचङ रोक्ता मा सु़लु़मगोनो हुङ्डा। गुका वो प्लु़ट्मा सुतीकु साङखिम कोङङा बुतासिक्पा ल्वास्तु़। 7येशूकु बुइभाल बट्मा ये ने मे सुतीकु येडाम वाङङा प्लेम्थाट्मा बाइडा। 8मेम्मा सु़लु़मडा ङादो रोक्फाट्पा सीसिपा वो चङ्डा मेगोनो हुङ्डा। गुका मे ल्वास्तु़मा थो़रबु़डु़। 9हेङालोने येशू सिमुलामका बम्गेमुङा बासी र्वाक्पा माम्चु़नीकु सिजेम मेर्मिमका आथावो थेसिथेट्मिडिम मेबायावा।
मरियम मग्दलिनीकाडा येशू रेम्बेम्सिम्डिम
(मत्ती २८:९-१०; मर्कूस १६:९-११)
10मेकोतिमा मे सीसिपाचिप उचीमा नेम ख्लोसिट्ची। 11लावो मरियम सु़लु़मकु पाखानो येम्तासिड्डामा ख्राप्तोङा लेड्डु़। ख्राप्तो गुका कुम्स्तामा सु़लु़मगोनो रेप्डु़, 12मा येशूकु मिरो़म बाइडामडा बुबुयाम नले पाह्रीचो़चिप ल्वास्तु़। कोले येशूकु बुइ बाट्पाथो़ मा कोङमी ने खेल बाट्पाथो़ गन्तासिट्पा बाच्ची।
13मेर्चिपका र्वाक्ची, “ए वा छापा, हेङा ख्राम्नामिम?”
गुका र्वाक्ता, “मेर्मिमका आमा ङाचो़लाई लम्डी रेछा, मा गुमीलाई बान्ते जु़ल्मिडिम बु मेराम गो मेचक्पु।” 14मेराम थारीका गु चङथो़ ख्लोस्ता मा येशू येम्तासिट्मिडिम ल्वास्तु़, लावो गुमी येशू र्वाक्साका मेछेडु़वा।
15येशूका गुलाई र्वाम्डी, “ए वा छापा, गाना हेङा ख्राप्तोङा लेना? मा सु़लाई माल्तोङा लेनामिम?”
गुका गुमीलाई बगैंचा रेपा मु़चु़ र्वाक्पा मिम्डु़मा र्वाक्ता, “वाआ, गानी गुमीलाई ओलामका लक्निम माला बान्ते जु़ल्निम बु सो़नीका मा गो गुमीलाई लक्पुमी।”
16येशूका र्वाम्डी, “मरियम!”
गु येशूथो़ ख्लोस्तामा हिब्रू ल्वाडा र्वाक्ता “रब्बोनी” मेराम र्वाक्मा “सीपा।”
17येशूका गुलाई र्वाम्डी, “गोलाई मेजेट्ङी, हेङालोने गो पापकाडा ख्लोङसिङ्डोम मिबु। लावो आमा ल्वाकमिमकाडा लक्सामा र्वाका, ‘गो आमा पाप नुङ इनीमा पापकाडा मा आमा माम्चु़नी नुङ इनीमा माम्चु़नीकाडा लक्तोङा लेट्पु’।”
18मरियम मग्दलिनी सीसिपामिमकाडा लस्तामा ओराम सेला र्वाक्ता, “गो ने ङाचो़लाई ल्वाउतोमी।” मेम्मा गुमीका गुलाई र्वाम्डिम ल्वा मेर्मिमनुङ सो़यु़डु़।
सीसिपामिमकाडा येशू रेम्बेम्सिम्डिम
(मत्ती २८:१६-२०; मर्कूस १६:१४-१८; लूका २४:३६-४९)
19नेप्सुङनेम नेम्थाका यहूदी ङाउमिमडाम ङिमुका सीसिपामिमका लाम्चोको ख्लुट्मिडिमा कोदेप बाम्डी। येशू रोम्डिमा मेर्मिमकु थेतेडा येम्सिम्डी, मा र्वाम्डी, “न-गो भ्रसीनु़।” 20अकोति र्वाम्डिमा गुमीका मेर्मिमलाई उनी ल्वा नुङ फेटफेट रेम्बेट्मिडी। ङाचो़लाई ल्वाम्डिमा सीसिपामिम छो़म गेर्सिद्वाम्डी।
21येशूका आथावो र्वाम्डी, “न-गो भ्रसीनु़। पापका गोलाई थु़र्ङिडिमिम होम्साकाङा गो गानीलाई वो थु़र्निनी।” 22आकोति र्वाम्डिमा गुमीका मेर्मिमडला सामका होट्मिडिमा र्वाम्डी, “माम्चु़नी-पेल रनी। 23कोङनिमकु छु़ल गानी हेम्सानी माला मेर्मिमकु छु़ल हेम्सी, मेर्मिमकु छु़ल गानी मेहेम्सानी माला मेर्मिमकु छु़ल मेहेम्सी।”#१६:१९; १८:१८
थोमाकाडा येशू रेम्बेम्सिडिम
24येशू रोम्डिलो को-न (१२) सीसिपामिमगोडाम कोले दिदुमस र्वाक्मा थोमा ने मेर्मिमनुङ मेबायावा। 25मेम्मिमका वाङमिम सीसिपामिमका गुनुङ र्वाम्डी, “गुकु ङाचो़लाई ल्वात्तोको।”
लावो गुका र्वाक्ता, “गो उनीमा ल्वाडा काँटीकु पार मेल्वाथु़म नुङ काँटीका होट्माडा आमा ब्रेप्चो मेफिक्थु़मसम्म गो थो़र मेलु़ङु।” 26लेतलेम चङडा सीसिपामिम आथावो नेमगोनो बाम्डी, मा थोमा वो मेर्मिमनुङ बाइडा। लाम्चोको ख्लु़ट्मा बाइडा लोवो येशू रोम्डिमा मेर्मिमकु थेतेडा येम्सिक्साका र्वाम्डी, “न-गो भ्रसीनु़।” 27मेम्मा गुमीका थोमालाई र्वाम्डी, “इमा ब्रेप्चो आसिन्डा फिका, मा आमा ल्वा रेप्डा। इमा ल्वा फिडामा आमा फेटफेटगोनो फिका। इमा नडा मेमुर्सा, थो़रलु़या।”
28थोमाका गुमीलाई र्वाक्ता, “आमा ङाचो़, आमा माम्चु़नी।”
29येशूका मेरामलाई र्वाम्डी, “गाना गोलाई ल्वाङ्डिमका गोडला थो़रलु़न्नाम। उहेमका गोलाई मेल्वासाका थो़रलु़मी मेर्मिम आलाकाम सो़।”
हेङा ओराम जो़पा-सेला र्यास्ताम
30येशूका वाङमिम वो हापा यु़मखारीमिम उनी सीसिपामिमकु ङादोडा रेम्बेम्डी, मेर्मिम ओराम खाजेमडा र्याक्मा मिबु। 31येशूङा माम्चु़नीकु तारापाचो़ ख्रीष्ट, मा थो़र बेसाका उनीमा नङडा गानी त्वारो़म ल्वामु चाम्निनु़ र्वाक्साका ओर्मिम ल्वा र्यास्ताम।
Currently Selected:
यूहन्ना 20: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
