मत्ती 22
22
लालीकुन्दाकु ग्रुलाकाम सीसि-सो़म्दी
(लूका १४:१५-२४)
1येशूका आथावो मेर्मिमनुङ सीसि-सो़म्दीलाम सो़म्डी, 2“पाह्री-किब्दी ने उ तारापाचो़कु लालीकुन्दाकाम ग्रुला खोक्पा कोले हप होप्माम सो़। 3ग्रुला पेप्डा येड्डु़मिम बोच्चो़लाई येड्डा गुका उ डु़ल्चो़मिमलाई थु़र्स्तु़मी। लावो मेर्मिम रोमु मेबिम्सिप्मिवा।
4“हपका आथावो वाङमिम उ डु़ल्चो़मिमलाई आरे र्वाक्साका थु़र्स्तु़मी, ‘येट्मा मु़चु़मिमलाई र्वाक्नी, ग्रुला थिबेत्तोम बु, जो़होमका डु़ल्मा आमा बेनोमिम नुङ बाछामिम फल्मा बु, खोत्ले बनेबेम्मा बु। लालीकुन्दाकाम ग्रुलाडा रोक्नी।’
5“लावो हपका येड्डु़मिम ल्वाडा न मेसोक्मिवा, मा कोले ब्याङसीथो़ लस्ता, कोले उ ब्यापारथो़ लस्ता। 6याङका हपकु डु़ल्चो़मिमलाई चु़म्मिडिमा सेम्ला बेट्मिडी, मा मेर्मिमलाई सेट्मिडी। 7मे हपकाम छो़म उ छोक्चो बक्ता। मेम्मा उ सिपाहीमिम थु़र्स्तु़मिमा डु़ल्चो़ सेट्पामिमलाई सेन्बेड्डु़मी, मा मेर्मिमकु शहरङा ख्याबेड्डु़मी।
8“मेकोतिमा गुका उ डु़ल्चो़मिमनुङ र्वाक्ता, ‘लालीकुन्दाकाम ग्रुला थिक्ताम बु, लावो येट्मा बोच्चो़मिम ने रोमु घ्रेट्पा मेदु़म्मिवा। 9लामख्रामिमबाडे लक्निमा गानी डार्निमिम खोत्ले मु़चु़लाई ग्रुला पेप्डा येट्नी।’ 10मेकोतिमा डु़ल्चो़मिम लाम्दीबाडे लम्डी, मा मेर्मिमका डार्मिडिम जो़पा मेजो़पा खोत्ले मु़चु़लाई खोप्मिडी। मेम्मा बोच्चो़मिमका लालीकुन्दा दु़स्ताम नेम देम्स्ता।
11“लावो बोच्चो़मिमलाई क्रो़म्डा हप रोक्तालो कोले मु़चु़का लालीकुन्दाडा लक्सिलो फसिक्पा ये-सेम मेफसिक्पा ल्वास्तु़। 12हपका मेरामलाई हिलाबु़डु़, ‘ए ङोप्सो़, लालीकुन्दाडा रोकिलो फसिक्पा ये-सेम मेफसिक्साका हेङा गाना आगोनो हुन्ना?’ मेराम मु़चु़का हाम वो र्वामु मेचाप्सु़वा।
13“मेकोतिमा हपका उ ख्लो़या-बाया बेपामिमलाई र्वाक्ता, ‘मेरामकु ल्वा-खेल बसाका मु़चु़मिम ख्राप्मिमिम नुङ उनी लि ख्रेन्मिमिम पाखानोम तुकुम्चिमगोडा घ्रोक्नी।’#मत्ती ८:१२; २५:३०; लूक १३:२८
14“हेङालोने येट्मामिम हापा बुमी, लावो छेसिक्पा कति कोङङा बुमी।”
कैसरलाई कर सोक्पा सीसि
(मर्कूस १२:१३-१७; लूका २०:२०-२६)
15मेकोतिमा फरिसीमिम मेलामका लम्डी, मा येशूका मेजो़पा हाम-हुम जेमिमिम ल्वाडा वायम डमु मुलु़ बेम्डी। 16मेर्मिमका उनी सीसिपामिमलाई हेरोद हपलाम बासिक्पा मु़चु़मिमनुङ येशूकाडा थु़र्मिडी। मेर्मिमका र्वाम्डी, “ए ङाचो़, गानी लिमा मेथेनी र्वाक्साका गुकु चकु। माम्चु़नीकु लाम्दी जो़होमका सीनिमी। गानी सु़लाम वो मेबान्सिनी, मा खोत्लेलाई कोहोङङा बोनी। 17मेम्मिमका गुकुनुङ र्वाक्नी, कैसरलाई#२२:१७ ङादोम रोमी डोक्पु हपकु नङ “कैसर” बाइडा। गु होप्माम हपमिमका मेराम नङ बाट्मिडी। कर सोमु बासी डे मेबासी?”
18लावो येशूका मेर्मिमकु मेजो़पा न चम्डिमा र्वाम्डी, “ए मिनी मिक्सीलामडा जो़पा लिसिक्पा मु़चु़नी, गानी हेङा वायम डमु माल्ङिनिमिम? 19कर सोक्पा सिक्का गोलाई रेम्बेट्ङिनी।”
मेर्मिमका कोले रोमी सिक्का गुमीलाई ग्वाम्डी। 20गुमीका मेर्मिमलाई हिलाबेम्डी, “आसिन्डा सु़कु ङाली नुङ नङ बु?”
21मेर्मिमका र्वाम्डी, “कैसरकाम” गुमीका मेर्मिमलाई र्वाम्डी, “कैसरकाम कैसरलाई ङा ग्वाक्नी, मा माम्चु़नीकाम माम्चु़नीलाई ङा ग्वाक्नी।” 22येशूका र्वाम्डिम ल्वाका मेर्मिम ङाङाया दु़म्मिडी, मा मेलामका लम्डी।
सिमुलाम बम्गेमुकु दुथाम हिलाहिसी
(मर्कूस १२:१८-२७; लूका २०:२७-४०)
23मेनेमङा सदुकीमिम येशूकाडा रोम्डी। मु़चु़ सिमुलाम बगे र्वाक्साका मेर्मिम थो़र मेलु़म्थाल्मिवा। मेर्मिमका हिलाबेम्डी,#थु़र्मा २३:८ 24“ङाचो़, मोशाका आरे र्वाक्ताम बु, ‘लालीकुन्दा बेपा मु़चु़ उ चो़ मेदु़म्साका सिडा माला उ ल्वाकका वादेल्मी लालीकुन्दा बेसाका वाकाम चो़ कम्सामु बासी।’#व्य २५:५,६ 25येतले वा-ल्वाकमिम बाम्डी। थाकुका लालीकुन्दा बु़डु़मा उ चो़ मेदु़म्साकाङा सिडा, मा लु़न्देका उ वादेल्मी लालीकुन्दा बु़डु़। 26मेम्मा चु़न्दे वो सिडा। चु़न्दे नुङ येतले ल्वाकमिम मेमङा दु़म्मिडी। 27मेर्मिम खोत्ले सिम्डिम चङडा मे मेसेम वो सिडा। 28मेम्मिमका सिमुलाम बम्गेमुनेम मेराम मेसेम सु़कु नाइमे दु़म? हेङालोने खोत्ले येतलेकाङा गुलाई लालीकुन्दा बेम्डी।”
29येशूका मेर्मिमलाई र्वाम्डी, “गानी जो़होमका थेसिथेट्निम मिबु। हेङालोने माम्चु़नीकु सिजेम नुङ उनीमा यु़मकु दुथाम गानी मेचनी। 30मु़चु़मिम सिमुलाम बम्गेमिलो लालीकुन्दा मेबोमी, मा लालीकुन्दा मेबोम्सामी। मेर्मिम ने पाह्रीलाम पाह्रीचो़मिम होप्मामङा दु़म्मी। 31सिपा बग्गेट्पाकु दुथाम माम्चु़नीका गानीलाई हाम र्वाम्डिम बु? 32‘गो अब्राहामकु माम्चु़नी, इसहाककु माम्चु़नी, मा याकूबकु माम्चु़नी’#प्रस ३:६ र्वाक्साका र्वाम्डिम ल्वा गानी डाट्निम मिबु? सिपामिमकु माम्चु़नी गुमी मेएँ, नु़पामिमकु माम्चु़नी गुमी।”
33ओराम थो़म्डिमा सेर्पा मु़चु़ उनीमा सीसिडा ङाङाया दु़म्मिडी।
खोत्लेडाम डोक्पु डु़म्ला
(मर्कूस १२:२८-३४; लूका १०:२५-२८)
34येशूका सि ख्लोक्साका सदुकीमिमलाई हाम वो र्वामु मेचापा बनेबेम्डी र्वाक्पा ल्वा फरिसीमिमका थो़म्डी। मेम्मा फरिसीमिम कोदेप खोम्सिम्डी। 35मेर्मिमगोडाम डु़म्ला छो़म थेट्पा कोलेका ओराम हिलाहिसीलामका येशूकु न छाम्मु माल्लु़,#लूक १०:२५-२८ 36“सीपा, मोशाकु डु़म्लागोडाम डोक्पु डु़म्ला उहेम डे?”
37येशूका मेरामलाई र्वाम्डी, “‘इमा मिप्रङमा माम्चु़नीलाई खोत्ले इमा न-गोका, खोत्ले इमा सामका, खोत्ले इमा नका रिखाम बे।’#व्य ६:५ 38खोत्लेडाम डोक्पु नुङ ङादोम डु़म्ला ओरामङा सो़। 39नक्नोम वो डोक्पुङा बु, ‘गाना इमा साउखोरेलाई इमा त्वापलाई होङङा रिखाम बे।’#लेवी १९:१८ 40खोत्ले डु़म्ला नुङ माम्चु़नीलाम-जेपामिमका र्याम्डिम सीसि ओर्चिप नले डु़म्लालामकाङा दु़स्ताम बु।”
ख्रीष्ट सु़कु चो़
(मर्कूस १२:३५-३७; लूका २०:४१-४४)
41फरिसीमिम कोदेप खोम्सिम्डिलो येशूका हिलाबेम्डी, 42“ख्रीष्टकु दुथाम गानी हाम मिम्नी? गु सु़कु चो़?” मेर्मिमका र्वाम्डी, “गु दाऊदकु चो़।”
43गुमीका मेर्मिमलाई र्वाम्डी, “मेम माला हेसाका माम्चु़नी-पेललाम दाऊदका ख्रीष्टलाई ‘आमा ङाचो़’#२२:४३ दाऊद हपका रोक्पा मसीहलाई उ चो़-चु़सु़डाम वो डोक्पु मिम्डु़म। र्वाबेट्मिडी? हेङालोने दाऊदका आरेसाका र्वाक्ताम बु,
44‘मिप्रङमाका आमा ङाचो़लाई र्वाम्डी,
“गो इमा मिक्सीकु-पिमिमलाई
इमा फेमखेलगोयु़ मेबेथु़मसम्म
गाना आमा जो़पलाम बाया”।’#भज ११०:१
45“दाऊदका ख्रीष्टलाई ‘आमा ङाचो़’ र्वा, मा हेसाका ख्रीष्ट दाऊदकु चो़ दु़म मा?” 46सु़का वो गुमीनुङ सि ख्लोमु मेचाप्मिवा। मेनेम आथाम खोत्ले मु़चु़मिम ङिम्डिमा सु़का वो गुमीनुङ हिलाबोमु मेचाप्मिवा।
Currently Selected:
मत्ती 22: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
