मत्ती 21
21
येशू यरूशलेमगोनो हुम्डिम
(मर्कूस ११:१-११; लूका १९:२८-४०; यूहन्ना १२:१२-१९)
1येशू नुङ उनी सीसिपामिम यरूशलेम फार्डा रोम्फाम्डी, मा जैतून पोप्चङडलाम बेथफागे देलडा रोम्डी। येशूका नले उनी सीसिपालाई आरे र्वाम्डिमा थु़र्मिडी, 2“गाची होनो ङादोनोम देलडा लक्ची। मेसिन्डा रोथिन्ची मेडे कोले गधा उ चो़नुङमा बन्थाट्मा डार्ची। मेर्चिपलाई डिचिमा आमाडा फिची। 3कोङनिमका गाचीलाई हाम बोचिमिम र्वाक्साका हिलाबेम्डी माला ‘ङाचो़का ओराम चाहेबोमिमिम बु’ र्वाक्ची, मेम्मा मेर्मिमका गाचीलाई फिन्मु ग्वाचिमी।” 4माम्चु़नीलाम-जेपाका आरे र्वाक्ताम रोम्थिमु लागि आरे दु़स्ताम सो़,
5“सियोनकु जाउमोचो़लाई र्वाक्नी,#२१:५ यरूशलेमडाम मु़चु़मिम, खोत्ले इस्राएलीमिमलाई रेम्बु़। (यशै ६२:११; जक ९:९)
रेप्डा, इमा हप इमाडा बिक्तोङा बोमी,
याक्के दु़म्साका गधाडला हुसाका,
गधाकु चो़डलामका हुसाका बिक्तोङा बोमी।”#जक ९:९
6मे नले सीसिपाचिप लक्चिमा येशूका र्वाम्डिम होङङा बेच्ची। 7मेर्चिपका गधा नुङ उ चो़ फिच्ची, मा गधाकु चो़कु चङडला उची हुम-ये हम्ची। मेम्मा येशू मेडला हुम्डी। 8हापा मु़चु़मिमका येशूकु ङादो लाम्दीडा उनी हुम-ये हम्मिडी। मेम्मा वाङमिमका ने धक्साकु ग्रेम फल्मिडिमा लाम्दीभाल लेप्मिडी। 9येशू मु़चु़मिमकु थेतेडा बाम्डी, मा उनी होनोलाम-आथो़लाम बाट्पा खोत्ले मु़चु़मिमका आरे र्वाक्तो येम्डी,
“दाऊदकु तारापाचो़लाई होसन्ना!#२१:९ हिब्रू ल्वाडा “सेल्किनी।” आसिन्डा ने येशूलाई हुनाखाना बेम्डिम नुङ उनीमा नङ कोम्डिम रेम्बु़।
मिप्रङमाकु नङडा योक्पा गुमी जिनुङमा सो़!
येप्पा पाह्रीलाम माम्चु़नीलाई होसन्ना!”#भज ११८:२५-२६
10यरूशलेमगोनो येशू हुम्डिलो शहरडाम खोत्ले मु़चु़मिम छो़म येत्तो हिलाबेबेम्डी, “सु़ ओराम?” 11सेर्पा मु़चु़का र्वाम्डी, “गुमी गालीलडाम नासरत देललामका बिम्डिम माम्चु़नीलाम-जेपा येशू।”
येशूका सो़रनेम सेपा बेम्डिम
(मर्कूस ११:१५-१९; लूका १९:४५-४८; यूहन्ना २:१३-२२)
12येशू माम्चु़नीकु सो़रनेमगोडा हुम्डी। मेकोतिमा भ्रेपा-भ्रेट्पामिम खोत्लेलाई गुमीका खान्सोम्डी। मेम्मा खउलुङ फाट्पामिमकु टेबलमिम नुङ तुकतुकुरमिम भ्रेट्पामिमकु गन्खोपमिम चार्सोम्डी। 13गुमीका मेर्मिमलाई र्वाम्डी, “माम्चु़नीकु सिजेमडा र्याक्मा बु, ‘आमा सो़रनेम सो़म्दी बेखोप नेम दु़म, लावो गानी ने ओरामलाई खुचु़वामिमकु घ्रो़म्खोप बुडखुम बनेबेन्निम बु’।”#यशै ५६:७; यर ७:११
14मिक्सीका मेल्वापा नुङ खेल सोक्पा मु़चु़मिम सो़रनेमगोडा येशूकाडा रोम्डी, मा गुमीका मेर्मिमलाई सबेट्मिडी। 15लावो ङाउ डु़म्लाचो़मिम नुङ डु़म्ला सीपा पातु़म्रीमिमका गुमीका बेम्डिम हेल्लो वो मेल्वाम्मा खारीमिम ल्वाम्डी, मा चो़च्चो़मिमका वो सो़रनेमडा येत्तो, “दाऊदकु तारापाचो़लाई होसन्ना” र्वाक्पा थो़म्डी। मेम्मा मेर्मिमकाम उनी छोक्चो बक्ता। 16मेम्मा मेर्मिमका येशूलाई हिलाबेम्डी, “थो़त्तोङा लेना, चो़च्चो़मिमका हाम र्वाक्तोङा लेन्मी?”
येशूका र्वाम्डी, “थो़त्तोङा लेट्पु। माम्चु़नीकु सिजेमडा ओराम र्याक्मा हाम गानी हेल्लो वो डाट्निम मिबु?
‘चो़च्चो़मिम नुङ दु़दु़ डुपा चो़मिमकु सिलामका,
इनीमा नङ कोमु काम्सो ख्लुक्निम बु।’”#भज ८:२
17मेकोतिमा गुमीका मेर्मिमलाई डिन्जो़ल्मिडिम बेथानिया र्वाक्मा देलथो़ ख्लोम्सिम्डी, मा सिन्था मेसिन्डा बाम्डी।
येशूका बैससीकु धक्सालाई वाइतो बेट्मिडिम
(मर्कूस ११:१२-१४,२०-२४)
18उ दिकाम नेमसोसोका येशू यरूशलेम शहरथो़ लक्तोङा बेम्डिलो क्रु़म सिम्डी। 19लाम्दी फार्डा गुमीका कोले बैससीकु धक्सा ल्वाम्डी। मेरामकु मा बु डे र्वाक्साका गुमी मेसिन्डा लम्डी, लावो उ ब्लाम कोङङा बाइडा। मेकोतिमा गुमीका मे धक्सालाई र्वाम्डी, “आथाडा आनो हेल्लो वो इमा मा मेसिट्नु़।” मेम्मा बैससीकु धक्सा साट्ल्याड्डा।
20ओराम ल्वाम्डिमा उनी सीसिपामिम ङाङाया दु़म्तो र्वाम्डी, “ओराम बैससीकु धक्सा हाम दु़स्तामका साट्ल्याड्डाम?”
21येशूका र्वाम्डी, “गानीलाई गो आच्छाङा र्वाङु, गानी थो़रलु़नी, मा इनीमा नड्डा मेमुर्सिनी माला बैससीकु धक्सालाई गो बेउतोम होप्माम नुङ हापा डोक्पु खारी बोमु चाम्नी। ओराम पोप्चङलाई वो ‘होसामा दिरिदिनगोयु़ आल्सा’ र्वानी, मा मेमङा दु़म।#मत्ती १७:२०; १ कोर १३:२ 22गानी थो़रलु़नी माला सो़म्दीडा हाम बिनी, मेराम ल्वानी।”
यहूदी ङाउमिमका येशूकु साखाम मुर्मिडिम
(मर्कूस ११:२७-३३; लूका २०:१-८)
23येशू सो़रनेमगोडा हुम्डी, मा सीत्तोङा लेट्मिडी। मेकोतिलो ङाउ डु़म्लाचो़मिम नुङ ङाउमिम उनीमाडा रोम्डिमा र्वाम्डी, “ओर्मिम खारीमिम सु़का इमा मुलु़गोनो जु़ल्लु़म बु मा गाना बोनामिम? गानालाई सु़का ओराम साखाम ग्वाक्ना?”
24येशूका मेर्मिमलाई र्वाम्डी, “गो वो गानीलाई कोले ल्वा हिलाबेउ। मेराम ल्वा गोनुङ सो़न्नी माला उहेम साखामका ओर्मिम खारी बेत्तोङा बेउमिम, मेराम गानीनुङ सो़उ। 25यूहन्नाका कु-रु़दु़म ग्वाक्पा साखाम बालामका ल्वास्तु़म बाइडा? पाह्रीलामका डे मु़चु़मिमलामका डे?”
मेर्मिम त्वाप त्वापडा आरे र्वाबेम्डी, “हाम र्वामु, ‘पाह्रीलामका’ र्वाक्ति माला ‘गानी हेङा गुका र्वाक्ताम ल्वाडा थो़र मेलु़निवा?’ र्वा। 26लावो ‘मु़चु़लामका’ र्वाक्ति माला मु़चु़मिमकाम ङिम बु, हेङालोने खोत्ले मु़चु़मिमका यूहन्नालाई माम्चु़नीलाम-जेपा मु़चु़ र्वाक्साका थो़र लु़म्डिम बु।” 27मेम्मिमका मेर्मिमका र्वाम्डी, “गुकु ने मेचकु।”
येशूका मेर्मिमलाई र्वाम्डी, “उहेम साखामका ओराम खारी बेत्तोङा बेउमिम, मेराम गो वो मेसो़उ।”
नले तारापाचो़चिपकु सीसि-सो़म्दी
28“गानी हाम मिम्नी? कोले मु़चु़काम नले उ तारापाचो़ बाच्ची। ङाचो़ उ तारापाचो़काडा गु लस्तामा र्वाक्ता, ‘ए थाकु, आनेप गाना अङ्गूर येडा लक्सामा खारी बे।’ 29मेरामका उ पापलाई र्वाक्ता, ‘गो ने मेलङु, लावो चङडा उमा न ख्लोस्तामा लस्ता।’
30“मेकोतिमा उ छारिम तारापाचो़काडा गु लस्तामा मेमङा र्वाक्ता। मेरामका र्वाक्ता, ‘अउवो, लङु, पाआ।’ लावो मेलक्सावा।
31“ओर्चिप नलेडा पापका र्वाक्ताम होङङा उहेमका बु़डु़?” ङाउ डु़म्लाचो़मिम नुङ यहूदी ङाउमिमका र्वाम्डी, “उमा थाकुचो़।”
येशूका मेर्मिमलाई र्वाम्डी, “आच्छाङा गो गानीलाई र्वाङु, कर फक्पामिम नुङ छो़लो़मामिम गानीडाम ङादो माम्चु़नीकु किब्दीडा हुमी। 32हेङालोने कु-रु़दु़म ग्वाक्पा यूहन्ना माम्चु़नीका माल्मिमिम होम्साका गानीलाई दो़बेड्डा इनीमाडा रोक्ता। लावो गुका र्वाक्ताम ल्वाडा गानी थो़र मेलु़निवा। कर फक्पामिम नुङ वेश्यामिमका ने गुका र्वाक्ताम ल्वाडा थो़र लु़म्डी। मेर्मिमका थो़र बेम्डिम ल्वान्निमा वो गुका र्वाक्ताम ल्वाडा थो़र बोमु मेबिन्सिट्निवा, मा इनीमा छु़ललाम मेख्लोन्सिट्निवा।”#लूक ३:१२; ७:२९-३०
बोम्था बेपा मेजो़पा मु़चु़मिमकु सीसि-सो़म्दी
(मर्कूस १२:१-१२; लूका २०:९-१९)
33“कोङमी सीसि-सो़म्दी थो़नी। कोले ये-दकु मु़चु़का उ ये-दडा अङ्गूर ख्लियु़डु़। मेरामकु होनोलाम-आथो़लाम भोम्बेलका खिर्डु़मा अङ्गूर खाल्पा कोले लुङ जु़ल्लु़, मा कोले याक्सा बनेबु़डु़। मेम्मा बोम्था बेपा मु़चु़मिमलाई ग्वाक्जो़ल्लु़मा वाङमी नेब्दीथो़ लस्ता।#यशै ५:१-२ 34अङ्गूर प्रो़ट्पा थारी दु़स्तालो बोम्था बेपा मु़चु़काडा उ दो़दो़वा माल्ला गुका उ डु़ल्चो़मिमलाई थु़र्स्तु़मी।
35“लावो बोम्था बेपा मु़चु़मिमका उ डु़ल्चो़मिमलाई चु़म्मिडी, मा कोलेलाई डेप्मिडी, कोलेलाई सेट्मिडी, मा कोलेलाई लुङका याक्साका सेट्मिडी। 36मेम्मिमका दो़दो़वा माल्ला गुका हापा उ डु़ल्चो़मिमलाई थु़र्स्तु़मी, मा बोम्था बेपा मु़चु़मिमका मेर्मिमलाई वो ङादोममिमलाई होङङा बेम्डी। 37चङडा ‘आमा तारापाचो़लाई ने मेर्मिमका डोक्पु मिम्मी’ र्वाक्पा मिम्स्तामा, उमा तारापाचो़लाई मेर्मिमकाडा थु़र्स्तु़।
38“लावो बोम्था बेपा मु़चु़मिमका मे उमा तारापाचो़ बिक्तोङा बेपा ल्वाम्डिमा उनी त्वाप-त्वापडा आरे र्वाबेम्डी, ‘ये-द डार्पा मु़चु़ होनोङङा। रोक्नी, मेरामलाई सेडी, मा मेरामका डार्पा ये-द इकीमा ल्वाड्डा बिइ।’ 39मेम्मा मेर्मिमका गुलाई चु़म्मिडिमा अङ्गूर येलामका पाखाथो़ रो़रो़न्थु़त्तो लम्डी, मा मेरामलाई सेट्मिडी।
40“मेम्मिमका मे अङ्गूर येकु मु़चु़ रो, मा मे बोम्था बेपा मु़चु़मिमलाई हे बु़मी?”
41यहूदीमिमकु ङाउमिमका गुमीलाई र्वाम्डी, “गु रोमा मे बोम्था बेपा मेजो़पा मु़चु़मिमलाई सेडु़मी, मा अङ्गूर थोमिम थारीका दो़दो़वा गुलाई ग्वाक्पा बोम्था बेपा कोङमी मु़चु़मिमलाईङा उ अङ्गूर ये ग्वाकु़मी।”
42येशूका मेर्मिमलाई र्वाम्डी, “माम्चु़नीकु सिजेमडा ओराम ल्वा हाम गानी हेल्लो वो डाट्निम मिबु?
‘नेम चिर्पा मु़चु़मिमका पार्मिडिम लुङङा
नेमकु फारगोयु़म डोक्पु सुरलुङ दु़स्ता,
मिप्रङमाका आरे बेम्डी,
इकीमा मिक्सीलामडा ओराम ङाङाया दु़म्सीमिम बु।’#भज ११८:२२-२३
43“मेम्मिमका गो गानीलाई र्वाङु, माम्चु़नीकु किब्दी रोला सो़न्सिनी, मा ओरामकु मा सिन्बेट्पा मु़चु़मिमलाई माम्चु़नीका ग्वामी। 44उहेम मु़चु़ ओराम लुङडला आल, मेराम मु़चु़ स्याकारिसी, मा कोङनिमडला ओराम आल्स्ता माला मेरामलाई योप्डु़मा सेडु़।”
45ङाउ डु़म्लाचो़मिम नुङ फरिसीमिमका येशूकु सीसि-सो़म्दी थो़म्डी, मा आकीमा दुथामङा गुमीका ओराम सो़म्डिम र्वाक्पा मेर्मिमका चम्डी। 46मेर्मिमका येशूलाई चु़म्मु माल्मिडी, लावो सेर्पा मु़चु़डाम ङिम्डी। हेङालोने येशू माम्चु़नीलाम-जेपा मु़चु़ र्वाक्पा सेर्पा मु़चु़का मिम्मिडिम बाइडा।
Currently Selected:
मत्ती 21: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
