मत्ती 20
20
अङ्गूर येडा खारी बेपा मु़चु़मिमकु सीसि-सो़म्दी
1“पाह्री-किब्दी उ अङ्गूर येडा खारी बेपा मु़चु़मिम भ्रेमु लागि नेमसोसोकाङा लक्पा ये-दकु मु़चु़ होप्माम सो़। 2मेकोतिमा कोलेमकाम खारीकु को मतोकु खउलुङ ग्वानिनी बु़डु़मा मु़चु़मिमलाई उ अङ्गूर येडा थु़र्स्तु़मी।
3“नेम सोङडामा गु (९) जेस्ताम बिलि आथावो बजारबाडे लस्तालो हाम वो खारी मेबेसाका मु़चु़मिम येम्तासिट्पा गुका ल्वास्तु़। 4मेकोतिमा गुका मेर्मिमलाई र्वाक्ता, ‘गानी वो आमा अङ्गूर येडा खारी बेप्डा लक्नी। गानी ल्वामु बासिट्पा खउलुङ गो ग्वानिनी।’ 5मेम्मा खारी बेप्डा मेर्मिम अङ्गूर येडा लम्डी।
“आथावो गु नेम्फुम को-न (१२) जेस्ताम बिलि नुङ सु (३) जेस्ताम थारीका मेम्साकाङा खारी बेपा मु़चु़मिमलाई भ्रेयु़डु़मिमा उ अङ्गूर येडा थु़र्स्तु़मी। 6ने-नेम्थाका ङो (५) जेस्तालो आथावो गु बजारबाडे लस्ता, मा मु़चु़मिमलाई येम्तासिट्पा ल्वास्तु़मी। गुका मेर्मिमलाई हिलाबु़डु़, ‘गानी हेङा हाम वो मेबेसाका नेम्तोम आसिन्डा बुनिम बुनिमिम?’
7“मेर्मिमका गुनुङ र्वाम्डी, ‘गुकुलाई सु़का वो खारी बोमु लागि मेभ्रेकिमिवा।’
“ये-दकु मे मु़चु़का मेर्मिमलाई र्वाक्ता, ‘गानी वो लक्निमा आमा अङ्गूर येडा मु़चु़मिमनुङ खारी बेनी।’
8“ने-नेम्थाका मे अङ्गूर येकु मु़चु़का उ खारी बेपा मु़चु़मिम रेपा मु़चु़लाई आरे बु़डु़, ‘खारी बेपा मु़चु़मिमलाई येडामिमा चङडा रोक्पामिमलामका खउलुङ ग्वामु चो़म्साका ङादो रोक्पामिमलाई ग्वाकामी।’#लेवी १९:१३; व्य २४:१५
9“ङो (५) जेस्तालो आथाम खारी बोमु चो़म्पामिम रोम्डिमा खोत्लेका नेम्तोमकाम खउलुङ ल्वाम्डी। 10खोत्लेडाम ङादो खारी बोमु चो़म्पा खारीचो़मिमका ने हापा खउलुङ ल्वाकु र्वाक्पा मिम्सिम्डिमा रोम्डिम बाइडा। लावो मेर्मिमका कोलेमकाम खउलुङ कोङङा ल्वाम्डी। 11मेर्मिमका उनी खउलुङ रम्डिमा अङ्गूर येकु मु़चु़कु कोर्थो़लाम जेमु चो़म्मिडी, 12‘मे चङडा रोक्पा मु़चु़मिमका को घण्टा कोङङा खारी बेम्डी लोवो गुकु नेमतोम नेप्सुङडा ख्याक्साका खारी बेपालाई ग्वाक्तिकिम कोतिङा हापा खउलुङ मेर्मिमलाई ग्वाक्निमी।’
13“लावो मे अङ्गूर येकु मु़चु़का मेर्मिमगोडाम कोलेलाई र्वाक्ता, ‘ङोप्सो़, गो गानालाई खउलुङडा सेट्निम मिबु। हाम गाना कोलेमकाम को मतो खउलुङडा खारी बोमु बिन्सिट्नाम मेएँ मा? 14इमा खउलुङ रङामा लक्सा। चङडा रोक्पा खारीचो़मिमलाई वो गानालाई ग्वाक्निमी कोतिङा खउलुङ ग्वामु आमा न बु। 15आमा त्वाकु खउलुङलाई हे बेबेद्वा मेमङा बोमु आमा मुलु़गोडा मिबु मा? गो वाङमिमडला न-थो़म रेम्बेउलो इमा नो़ मेनु़मिम?’
16“आरेसाका याक्के मु़चु़मिम दिफु डोक्पु दु़म्मी, मा डोक्पु मु़चु़मिम दिफु याक्के दु़म्मी।”#मत्ती १९:३०; मर्क १०:३१; लूक १३:३०
येशूका उनी सिमुकु दुथाम आथावो सो़म्डिम
(मर्कूस १०:३२-३४; लूका १८:३१-३४)
17येशू यरूशलेमथो़ लक्तोङा बेम्डिलो गुमीका को-न (१२) उनी सीसिपामिमलाई कोङङा कोर्थो़ लम्डिमा र्वाम्डी, 18“गुइ यरूशलेमथो़ लक्तोङा बिइ। मेसिन्डा मिनीचो़लाई ङाउ डु़म्लाचो़मिम नुङ डु़म्ला सीपा पातु़म्रीमिमकु ल्वाड्डा भ्रेन्मी। मेर्मिमका गुलाई मुमा बेन्मिमा सेन्मु बासी र्वामी। 19मेकोतिमा गुलाई नालेडान्मु, कोक्तेकु रिवाका याल्मु, मा क्रूसडा चेन्मु मेर्मिमका वाङसामाकाडा ग्वामी। लावो सुलेम नेम गु सिमुलाम बगे।”
याकूब नुङ यूहन्नाकु मामका येशूनुङ र्वाक्ताम
(मर्कूस १०:३५-४५; लूका २२:२४-२७)
20मेकोतिमा जब्दियाकु नाइमेका उ तारापाचो़चिपलाई रेड्डु़चिमा येशूकाडा रोक्ता। उनी ङादोडा क्रचु़खुम बु़डु़मा गुमीलाम न-थो़म रेम्बेला सो़सिड्डा। 21येशूका गुलाई हिलाबेम्डी, “इमा लागि हाम बोमु बासी?” मेर्चिपकु मामका र्वाक्ता, “इनीमा किब्दीडा इनीमा ध्वायु़म डोक्पु गन्खोपडा आमा तारापाचो़चिप कोलेलाई इनीमा जो़पलाम नुङ कोलेलाई इनीमा पेलाम गन्बेट्नीका।”
22लावो येशूका मेर्चिपलाई र्वाम्डी, “गाची हाम बेत्तोङा लेन्ची, मेराम मेचची। गो डुमु खापुमिम मेभ्रपा दु़खाकु कान्चु़रेलामका हाम गाची डुमु चाम्ची मा?” मेर्चिपका र्वाक्ची, “चाम्चुकु।”
23गुमीका मेर्चिपलाई र्वाम्डी, “मेभ्रपा आमा कान्चु़रेलामका गाची आच्छाङा डुमु चाम्ची। लावो आमा जो़पलाम नुङ पेलाम गन्मु ग्वाक्पा आमा मुलु़गोडा मिबु। आमा पापका छेट्मिडिम मु़चु़मिमकाम लागि गुमीका मेराम खोम बनेबेम्जो़ल्मिडिम बु।”
24ओराम ल्वा थो़म्डिमा मेर्चिप वा-ल्वाकचिपडाम को धु़म (१०) सीसिपामिमकाम छो़म उनी छोक्चो बक्ता। 25लावो येशूका मेर्मिमलाई र्वाम्डी, #लूक २२:२५-२६“वाङसामामिमकु साखामचो़मिम उनी न होम्साका कोङङा मु़चु़मिमडला साखाम थो़पा बुमी, मा मेर्मिमकु डोक्पुमिमका मु़चु़मिमडला साखाम थो़मी। 26गानीगोडा ने मेप्माम मेदु़म। गानीगोडा उहेमका डोक्पु दु़म्मु न बु़, मेरामका डु़ल्चो़का होङङा इनीमा चापे-डुपे बोमु बासी। 27गानीगोडाम उहेमका ङादो दु़म्मु न बु़, मेराम डु़ल्चो़ दु़म्मु बासी।#मत्ती २३:११; लूक २२:२६ 28मिनीचो़ चापे-डुपे बेला सो़सिप्डा मेएँ, चापे-डुपे बेप्डा नुङ उमा त्वाकु साम फ्यामुमा हापा मु़चु़मिमकु थि सोक्साका सेल्मु लागि योक्ताम सो़।”
मिक्सीका मेल्वापा नले मु़चु़लाई येशूका ल्वापा दु़म्बेट्मिडिम
(मर्कूस १०:४६-५२; लूका १८:३५-४३)
29येशू उनी सीसिपामिमनुङ यरीहो शहर डिसाका लक्तोङा बेम्डिलो छो़म सेर्पा मु़चु़ उनी चङचङ लाम्दिम्डी। 30लाम्दी फार्डा गन्तासिट्पा मिक्सीका मेल्वापा नले मु़चु़का येशू मेराम लाम्दीभाल लक्तोङा लेन्मी र्वाक्पा थो़च्ची। मेम्मा आरे र्वाक्तो येमु चो़म्ची, “ङाचो़, दाऊदकु तारापाचो़#२०:३० ख्रीष्टकाम कोले नङ, गुचुकुडला न-थो़म रेम्बेनी।”
31सेर्पा मु़चु़का मेर्चिपलाई भुर्मिडिमा लिवा बाबेट्मिडी, लावो मेर्चिपका आरे र्वाक्तो आथावो छो़म डोक्पु लो़लामका येच्ची, “ङाचो़, दाऊदकु तारापाचो़, गुचुकुडला न-थो़म रेम्बेनी।”
32मेकोतिमा येशू येम्सिम्डी, मा मेर्चिपलाई येट्मिडिचिमा र्वाम्डी, “इचीमा लागि गो हाम बेउनु़ र्वाक्पा इचीमा न बु?”
33मेर्चिपका गुमीनुङ र्वाक्ची, “ङाचो़, आची मिक्सीका ल्वापा दु़म्मु न बु।”
34मेर्चिपडाम येशूकु थो़म भ्रो़स्ता, मा मेर्चिपकु मिक्सी लु़प्मिडी। मेर्चिप उची मिक्सीका ल्वापा दु़म्ल्याक्ची, मा गुमीनुङ लाम्दिच्ची।
Currently Selected:
मत्ती 20: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
