मत्ती 19
19
वोचु़-मोचु़ डिन्बोमु नुङ लालीकुन्दा बोमुकु दुथाममिम सीसि
(मर्कूस १०:१-१२)
1येशूका ओर्मिम ल्वा जेमु दु़म्मिडिमा गुमी गालीललामका यर्दन ब्लोकुकाम होम्बुनोम यहूदिया इलाकाथो़ लम्डी। 2छो़म सेर्पा मु़चु़ उनी चङचङ लम्डी, मा मेसिन्डा गुमीका मेर्मिम मु़चु़लाई सबेट्मिडी।
3कोले-नले फरिसीमिम उनी न छाम्मु लागि रोम्डी। मेर्मिमका हिलाबेम्डी, “हाम कोङनिम मु़चु़का कोङनिम ल्वाकु दुथाम उ मोचु़लाई डिन्मु डु़म्लाका ग्वाकु़?”
4लावो गुमीका र्वाम्डी, “माम्चु़नीकु सिजेमडाम हाम गानी डाट्निम मिबु? प्रङपा माम्चु़नीका सु़म्दिमोलो ‘मेर्चिपलाई वोस्चो़ नुङ मेसेम बनेबेम्डी।’#उत १:२७; ५:२ 5मेम्मा र्वाम्डी, ‘मेम्मिमका मु़चु़का उ माम-पाप डिडु़, मा उ नाइमेनुङ बु, मा मेर्चिप नले कोलेङा दु़म्ची।’#उत २:२४ 6आथाडा आनो मेर्चिप नले मेएँ, कोलेङा दु़म्चिम बु। मेम्मिमका माम्चु़नीका उहेमलाई कोले दु़म्बेट्मिडिचिम बु, मेर्चिपलाई मु़चु़का मेफ्वामिनु़।”
7फरिसीमिमका गुमीनुङ हिलाबेम्डी, “डिड्डु़म र्वाक्साका मु़चु़का र्याकु़मा मोचु़लाई ग्वाकु़मा डिन्मु चाप्सु़ र्वाक्पा हेङा मोशाका डु़म्लाडा र्याक्तु़म?”#व्य २४:१-४; मत्ती ५:३१
8गुमीका मेर्मिमलाई र्वाम्डी, “इनी न-गो लुङ होप्माम बाइडामका मोचु़लाई डिन्मु नु़ र्वाक्साका मोशाका गानीलाई र्वाक्ताम सो़। लावो सु़म्दिमोलो ने मेप्माम मेबायावा। 9गो गानीलाई र्वाङु, उ मोचु़का नाम्सु़रु़ मेबु़ लावो गुलाई डिसाका उहेमका वाङमिम मेसेमलाई लालीकुन्दा बु़, मेराम मु़चु़का नाम्सु़रु़ बु़।”#मत्ती ५:३२; १ कोर ७:१०-११
10सीसिपामिमका गुमीलाई र्वाम्डी, “वोचु़-मोचु़गोडा आरेप्माम दु़म माला ने लालीकुन्दा मेबोमुङा जो़पा दु़म।”
11येशूका मेर्मिमलाई र्वाम्डी, “खोत्ले मु़चु़का ओराम सीसि रमु मेचाम्मी। माम्चु़नीका मेम्साका बुमु चापा दु़म्बेट्मिडिमिमका कोङङा आरे बोमु चाम्मी। 12हेङालोने कोङनिम मु़चु़ गमिलोङा चो़ कमु मेचापा गमी, याङ मु़चु़लाई वाङमिमका चो़ कमु मेचापा बनेबोमी। मेम्मा याङ मु़चु़ ने माम्चु़नीकु किब्दीकाम लागि लालीकुन्दा मेबेपा मुलु़ बोमी। उहेमका ओराम सीसि रमु चाप्सु़, मेरामका रङु़नु़।”
येशूका चो़च्चो़मिमलाई जि ग्वाम्डिम
(मर्कूस १०:१३-१६; लूका १८:१५-१७)
13येशूका चो़च्चो़मिमडला ल्वा जु़ल्साका सो़म्दी बोमिनु़ र्वाक्साका मु़चु़मिमका मेर्मिमलाई उनीमाडा रेट्मिडी। लावो सीसिपामिमका मे मु़चु़मिमलाई भुर्मिडी।
14लावो येशूका र्वाम्डी, “चो़च्चो़मिमलाई आमाडा रोमु ग्वाक्नी, मेर्मिमलाई मेभोप्नी। हेङालोने पाह्री-किब्दी ने ओ चो़च्चो़मिम होप्मामकामङा सो़।” 15मेकोतिमा चो़च्चो़मिमडला येशूका ल्वा जु़ल्मिडिमा गुमी मेलामका लम्डी।
कोले स्वाला खाप्चीचो़
(मर्कूस १०:१७-३१; लूका १८:१८-३०)
16कोलेम कोले स्वाला येशूकाडा रोक्तामा हिलाबु़डु़, “ङाचो़, हेल्लो वो मेसिपा त्वारो़म ल्वामु लागि जो़पा खारी गो हाम बोमु बासी?” 17येशूका र्वाम्डी, “जो़पा हाम र्वाक्साका हेङा गोलाई हिलाबोङी? माम्चु़नी कोङङा जो़पा ने बुमी। हेल्लो वो मेसिपा त्वारो़म ल्वामु न बोना माला माम्चु़नीकु डु़म्ला होम्साका दोसा।”
18मेरामका गुमीनुङ हिलाबु़डु़, “बाम डु़म्ला?” येशूका र्वाम्डी, “मु़चु़ मेसेन्मु, नाम्सु़रु़ मेबोमु, मेखुमु, लिमा ल्वा मेसो़मु।#प्रस २०:१३-१६; व्य ५:१७-२० 19त्वाकु माम-पापलाई डोक्पु बोमु, मा त्वाकु साउखोरेलाई त्वापलाई होङङा रिखाम बोमु।”#प्रस २०:१२; व्य ५:१६; लेवी १३:१८
20मे स्वालाका गुमीनुङ र्वाक्ता, “ओर्मिम खोत्ले डु़म्ला होम्साका गो बेउतोम बु। वाङमिम गो हाम बोमु बासी?”
21येशूका मेरामलाई र्वाम्डी, “माम्चु़नीका न बोमिमिम होङङा जो़पा दु़म्मु न बोना माला लक्सामा गानानुङ बाट्पा खोत्ले भ्रेडामा मेराम खउलुङ उनी हाम वो मेबाट्पामिममलाई ग्वाकामी। मेम्मा पाह्रीला खाप्ची ल्वाना। मेकोतिमा आमा चङचङ लाम्दिया।”
22लावो मे स्वालाका ओराम ल्वा थो़स्तु़मा उ ङाली डक्साका लस्ता। हेङालोने मेरामनुङ हापा खाप्ची बाइडा।
23मेकोतिमा येशूका उनी सीसिपामिमनुङ र्वाम्डी, “आच्छाङा गो गानीलाई र्वाङु, पाह्री-किब्दीडा खाप्चीचो़ हुमु छो़म छो़। 24आथावो गो गानीलाई र्वाङु, चु़ल्बीकु ग्वाङलामका ऊँट लुमु छो़मिम होङङा माम्चु़नीकु किब्दीगोडा खाप्चीचो़ हुमु छो़।”
25ओराम ल्वा थो़म्डिमा सीसिपामिम छो़म ङाङाया दु़म्तो हिलाबेम्डी, “मेम माला सु़ सेल्सिमु चाप्सु़ मा?”
26येशूका मेर्मिमलाई किकिर्या रेप्तो र्वाम्डी, “ओराम बोमु मु़चु़मिमका मेचाम्मी, लावो माम्चु़नीका ने खोत्ले बोमु चाम्मी।”
27मेकोतिमा पत्रुसका र्वाक्ता, “ङाचो़, गानीनुङ गुकु लाम्दिमु लागि खोत्ले डित्तोकोम बु। गुकु ने हाम ल्वाकुमिम?”
28येशूका मेर्मिमलाई र्वाम्डी, “आच्छाङा गो गानीलाई र्वाङु, लाले सु़म्दिसेर दु़म्मिम थारीका, यु़म-झ्वाक्पा हप गन्खोपडा मिनीचो़ गन। मेकोतिलो आमा चङचङ लाम्दिपामिम वो को-न (१२) हप गन्खोपडा गन्मी, मा इस्राएलडाम को-न (१२) दोचो़मिमडला निया बोमी।#मत्ती २५:३१; लूक २२:३० 29मेम्मा उहेमका आमा लागि उ त्वाकु नेम, वा-ल्वाक लोवो, रिचो़ लोवो, माम-पाप लावो, चो़च्चो़मिम लोवो, ये-द लोवो डिड्डु़म बु, मेरामका को सङङा (१००) हापा ल्वासु़। मेम्मा हेल्लो वो मेसिपा त्वारो़म ल्वापा दु़म। 30लावो ङादो दु़म्पामिम हापा चङडा दु़म्मी, मा चङडा दु़म्पामिम हापा ङादो दु़म्मी।”#मत्ती २०:१६; लूक १३:३०
Currently Selected:
मत्ती 19: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
