मत्ती 25
25
को धु़म (१०) कन्या मेसेममिमकु सीसि-सो़म्दी
1“पाह्री-किब्दी ने धिप्रीमिम कुर्साका लारेपालाई क्रो़म्डा लक्पा को धु़म (१०) कन्या मेसेममिमकु ल्वा होप्माम सो़।#लूक १२:३५ 2मेर्मिमगोडाम ङोले (५) नेप्चीनुङमा नुङ ङोले (५) नेप्ची मान्थिम मेसेममिम बाम्डी। 3नेप्ची मान्थिम ङोले मेसेममिमका उनी धिप्री कुर्मिडी, लावो हापा तेल ने मेकुर्मिवा। 4नेप्चीनुङमा ङोले मेसेममिमका ने धिप्री नुङ सोजामडा तेल वो कुर्मिडी। 5लारेपा रोमु छु़स्तामका मेर्मिमका मुकुपा बोमु चो़म्मिडी, मा अम्चेम्डी।
6“आधा सिन्था बिलि कोङनिमका डोक्पु लो़लामका आरे र्वाक्ता, ‘रेप्नी, लारेपा रोक्तोङा बु़, गुलाई क्रो़म्डा रोक्नी।’
7“मेकोतिमा मे कन्या मेसेममिम खोत्लेङा ङोम्सिम्डी, मा त्वा-त्वाहोम उनी धिप्री चाम्डी। 8नेप्ची मान्थिम कन्या मेसेममिमका नेप्चीनुङमा कन्या मेसेममिमलाई र्वाम्डी, ‘गुकुलाई किचो़ कोलोङ तेल ग्वाक्की का, आकी धिप्री सिमुङा खाप्डु़।’
9“नेप्चीनुङमा कन्या मेसेममिमका र्वाम्डी, ‘गानी नुङ गुकुलाई लिट्पा हापा तेल गुकुनुङ मिबु। तेल भ्रेट्पा मु़चु़काडा लक्निमा भ्रेनी।’
10“लावो नेप्ची मान्थिम मे कन्या मेसेममिम तेल भ्रेप्डा लम्डिलो लारेपा रोक्फाड्डा, मा झो़म्सिक्साका बाट्पा कन्या मेसेममिम ने लारेपानुङ लालीकुन्दाकु ग्रुला पेखोपगोनो हुम्डी। मेम्मा लाम्चोको ख्लुन्सिड्डा।
11“चङडा नेप्ची मान्थिम मे ङोले कन्या मेसेममिम वो रोम्डिमा, ‘ङाचो़, ङाचो़, लाम्चोको होल्साक्किनी’ र्वाक्तो हेलाबेम्डी।
12“लावो लारेपाका र्वाक्ता, ‘आच्छाङा गो गानीलाई र्वाङु, गानीलाई गो मेछेनिनी।’#लूक १३:२५
13“मेम्मिमका चङचङया बानी वो, हेङालोने मिनीचो़ योक्पा नेम लोवो थारी लोवो गानी मेचनी।
सो़नाकु सिक्काकाम सीसि-सो़म्दी
(लूका १९:११-२७)
14“पाह्री-किब्दी ने दोलेन्डा लक्पा कोङ मु़चु़का डु़ल्चो़मिमलाई उमा खाप्चीमिम पार्जो़ल्साका लक्पा होप्माम सो़। 15मेर्मिमका हाङको खउलुङ मोमु चाम्मी, मेराम होम्साका गुका कोलेलाई ङोले सो़नाकु खउलुङ, कोङमीलाई नले सो़नाकु खउलुङ, मा कोङमीलाई कोले सो़नाकु खउलुङ ग्वाक्जो़ल्लु़मिमा लस्ता।
16“ङोले सो़नाकु खउलुङ ल्वापा डु़ल्चो़का लस्तामा ब्यापार बोमु चो़म्ल्याड्डु़। मेम्मा ङोलेङा हापा खउलुङ डु़प्डु़। 17मेम्साकाङा नले सो़नाकु खउलुङ ल्वापाका वो आथावो नले खउलुङ डु़प्डु़। 18लावो कोले सो़नाकु खउलुङ रपा डु़ल्चो़का ने पोलु़म धायु़डु़मा उ नेमहपकु खउलुङ थक्जो़ल्लु़।
19“हापा चङडा मेर्मिमकु नेमहप ख्लोसिड्डा, मा उ खउलुङ हेसाका मोम्डी, मेराम हिसाब बिमु लागि मेर्मिमलाई येड्डु़मी। 20ङोले सो़नाकु खउलुङ रपा डु़ल्चो़का ङोलेङा हापा खउलुङ रेड्डु़, मा र्वाक्ता, ‘रेप्नी, ङाचो़, गानी गोलाई ङोले सो़नाकु खउलुङ ग्वाङ्डिनिम बाइडा, मेरामलामका ङोलेङा हापा खउलुङ डु़प्तोम बु।’
21“नेमहपका मेरामलाई र्वाक्ता, ‘जो़पा बेन्ना, थो़रलु़इमिम नुङ जो़पा डु़ल्चो़ गाना, याक्के ल्वाडाङा थो़रलु़इमिम दु़म्ना। गानालाई गो हापा डोक्पु ल्वामिम रेपा बनेबोनी। बिका, इमा नेमहपनुङ गेर्सा।’
22“नले सो़नाकु खउलुङ ल्वापा डु़ल्चो़ वो रोक्तामा र्वाक्ता, ‘ङाचो़, गानी गोलाई नले सो़नाकु खउलुङ ग्वाङ्डिनिम बाइडा। रेप्नी, गो नलेङा हापा खउलुङ डु़प्तोम बु।’
23“उ नेमहपका मेरामलाई र्वाक्ता, ‘जो़पा बेन्ना, थो़रलु़इमिम नुङ जो़पा डु़ल्चो़ गाना, याक्के ल्वाडाङा थो़रलु़इमिम दु़म्ना। गानालाई गो हापा डोक्पु ल्वामिम रेपा बनेबोनी। बिका, इमा नेमहपनुङ गेर्सा।’
24“मेकोतिमा कोले सो़नाकु खउलुङ ल्वापा डु़ल्चो़ रोक्तामा र्वाक्ता, ‘ङाचो़, मेख्लिनिवाम मा-के रु़पा, मा मेफोट्निवाम मा-के खोपा इनी सिपे-लेम्पेडा जु़ल्पा मु़चु़ गानी र्वाक्साका चक्तोम बाइडा। 25मेम्मिमका आमा ङिम लु़डामा मे इनीमा खउलुङ क्वागोयु़ थक्तो। रेप्नी, इनीमा खउलुङ आसिन्डा बु सो़।’
26“मे नेमहपका र्वाक्ता, ‘गाना रु़चो़ नुङ भ्रेपा डु़ल्चो़, मेख्लिउवाम मा-के गो रु़पु, मा मेफोट्पुवाम मा-के गो खोपु र्वाक्साका गाना चनाम बाइडा, 27मेम माला आमा खउलुङ लनावामा बैंकडा जु़ल्नावा, मा गो ख्लोसिसाका रोङुवालो मे खउलुङ उ चो़नुङ डारुवानी। 28मेम्मिमका ओरामलाई मे सो़नाकु खउलुङ रोट्निमा को धु़म (१०) सो़नाकु खउलुङ बाट्पालाई ग्वाक्नी। 29उहेमनुङ बु, मेरामका आथावो ल्वासु़, मा मेराम लिट्पा दु़म। लावो उहेमनुङ मिबु, मेरामनुङ बाट्पा वो रोन्ला सो़सी।#मत्ती १३:१२; मर्क ४:२५; लूक ८:१८ 30हाम्ता वो मेमोकिमिम मेराम डु़ल्चो़लाई मु़चु़मिम ख्राप्मी, मा उनी लि ख्रेन्मिमिम तुकुम्चिमगोडा#२५:३० यहूदीमिमका तुकुम्चिमलाई खादी र्वाक्पा मिम्मी। घ्रोन्सोट्नी।’#मत्ती ८:१२; २२:१३; लूक १३:२८
निया दु़म्मिम नेम
31“मिनीचो़#२५:३१ मिनीचो़ र्वाक्मा: खोत्ले मु़चु़काम लागि सेल्पा दु़म्मु माम्चु़नीका गुमीलाई थुट्मीडिम बु र्वाक्पा रेम्बोमु येशूका उनी त्वापलाईङा र्वाम्डिम नङ (दानिएल ७:१३-१४)। खोत्ले पाह्रीचो़मिमनुङ उ यु़म-झ्वाक्सीडा यो, मा हप दु़ममा डोक्पु उ गन्खोपडा गन।#मत्ती १६:२७; १९:२८ 32खोत्ले सामाडाम मु़चु़मिम उमा ङादोडा खोम्सिमी, मा रेपा-क्रिपा मु़चु़का छ्वाराडाम भेन्दालाई फ्वाकु़मिम होम्साका गुका मु़चु़मिमलाई फ्वाकु़मी। 33गुका भेन्दामिमलाई उ जो़पलामका, मा छ्वारामिमलाई पेलामका बु़मी।
34“मेकोतिमा हपका उ जो़पलाममिम मु़चु़मिमलाई र्वा, ‘आमा पापका जिनुङमा दु़म्बेट्निम मु़चु़नी, बिक्नी, सु़म्दिमोलोमङा इनीमा लागि दु़म्जो़ल्पा किब्दी रनी। 35हेङालोने गो क्रु़म सिपा बाङडो, गानी पोमु ग्वाङ्डिनी। कोरा सिपा बाङडो, डुमु ग्वाङ्डिनी। वाङथो़लाम रोक्पा बाङडो, इनीमा नेमडा येट्ङिडिनी। 36आमा ये-सेम मान्थिम बाङडो, ये-सेम फबेट्ङिडिनी। नो़पा बाङडो, रेप्ङिडिनी। झ्यालखानडा बाङडो, गोलाई क्रो़म्डा रोक्नी।’
37“माम्चु़नीकु न-गो होप्माम मु़चु़मिमका र्वामी, ‘ङाचो़, हेलो गानी क्रु़म सिन्निम ल्वात्तोकोमा पोमु ग्वाक्तोको? डे हेलो कोरा सिन्निम ल्वात्तोकोमा कु थो़त्तोको? 38गानी वाङथो़लाम रोक्पा हेलो ल्वात्तोकोमा आकीमा नेमडा बुमु येत्तोको? डे हेलो ये-सेम मान्थिम बान्निमा ये-सेम फबेत्तोको? 39हेलो गानी नो़पा बान्नी डे झ्यालखानडा बान्निमा क्रो़म्डा रोक्तोको?’
40“मेकोतिमा हपका मेर्मिमलाई र्वा, ‘आच्छाङा गो गानीलाई र्वाङु, गानी ओ आमा जाउमो, तारापा वा-ल्वाकमिमगोडाम खोत्लेडाम याक्के कोलेलाई ओराम बेन्निमङा गानी गोलाई बेङ्डिनिम सो़।’
41“मेकोतिमा हपका उ पेलाममिम मु़चु़मिमलाई र्वा, ‘माम्चु़नीलाम वाइतो ल्वापा मु़चु़नी, गोडाम होनो लक्नी। शैतान नुङ उ सेलाचो़मिमकाम लागि बनेदु़म्पा हेल्लो वो मेसिपा मुगोडा हुनी। 42हेङालोने गो क्रु़म सिपा बाङडो, गानी हाम वो पोमु मेग्वाङ्निवा। कोरा सिपा बाङडो, हाम वो डुमु मेग्वाङ्निवा। 43गो वाङथो़लाम रोक्पा बाङडो, गानी मेयेट्ङिनिवा, आमा ये-सेम मान्थिम बाङडो, फम्सिमु मेग्वाङ्निवा। नो़पा नुङ झ्यालखानडा बाङडो, गानी गोलाई मेरेप्ङिनिवा।’
44“मेर्मिमका वो र्वामी, ‘ङाचो़, गानी हेलो क्रु़म सिन्निम, कोरा सिन्निम, वाङथो़लाम रोक्निम, ये-सेम मान्थिम बान्निम, नो़पा बान्निम, झ्यालखानडा बान्निम ल्वात्तोकामा मेख्लो़कुवा?’
45“मेकोतिलो हपका र्वा, ‘आच्छाङा गो गानीलाई र्वाङु, गानी ओ आमा जाउमो, तारापा वा-ल्वाकमिमगोडाम खोत्लेडाम याक्के कोलेलाई ख्लो़मु मेबिन्सिट्निवामङा गोलाई ख्लो़मु मेबिन्सिट्निवाम सो़।’
46“मेर्मिम मु़चु़ हेल्लो लोवो देन्दे ल्वापाम बाट्पाडा लमी, लावो माम्चु़नीकु लाम्दीडा लाम्दिपा मु़चु़मिमका ने हेलो वो मेसिपा त्वारो़म ल्वामी।”#दान १२:२
Currently Selected:
मत्ती 25: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
