मत्ती 26
26
ङाउ डु़म्लाचो़मिमका येशू सेन्मु मुलु़ बेम्डिम
(मर्कूस १४:१-२; लूका २२:१-२; यूहन्ना ११:४५-५३)
1येशूका ओर्मिम खोत्ले ल्वा सो़मु दु़म्मिडिमा उनी सीसिपामिमलाई र्वाम्डी, 2“आनेपकु नलेमका सेल्सिमुनेमकु चाड रो र्वाक्पा ने गानी चनिमिम बु, मा मिनीचो़ क्रूसडा चेन्मु लागि उ स्वाक्चिमो मु़चु़मिमकु ल्वाडा ग्वाला सो़सी।”#प्रस १२:१-२७ 3मेकोतिमा यहूदीमिमकु ङाउ डु़म्लाचो़मिम, यहूदी ङाउमिम, कैयाफा र्वाक्मा डोक्पु ङाउ डु़म्लाचो़कु ओगानेमडा घ्रो़म्मिडी। 4मेम्मा मेल्वाहोमका येशूलाई चु़म्मु, मा सेन्मु मुलु़ बेम्डी। 5मेर्मिमका र्वाम्डी, “लावो सेल्सिमुनेमकु चाडकाम थारीका ने मेएँ, मेएँ माला ने मु़चु़मिम ङाल्तो येमी-दुमी।”
बेथानिया देलडा कोले मेसेमका येशूलाई भ्रपा मुर्नेम्पा तेल क्लक्साड्डु़म
(मर्कूस १४:३-९; यूहन्ना १२:१-८)
6येशू बेथानिया देलडा ङादो जोनका बेड्डु़म सिमोनकु नेमडा बाम्डी। 7मेकोतिलो कोले मेसेम सिङ्गमरमरकु सोजामडा#२६:७ छो़म जो़पा, मा हापा थिकाम सोजाम। छो़म हापा थिकाम भ्रपा मुर्नेम्पा तेल रेड्डु़मा येशूकाडा रोक्ता। गुमीका जाम पोमु खाप्मिडिलो मे मेसेमका मेराम तेल येशूकु बुइडला अयु़डु़।#लूक ७:३७-३८ 8ओराम ल्वाम्डिमा उनी सीसिपामिमकाम छोक्चो बक्ता, मा मेर्मिमका र्वाम्डी, “आकोम हापा थिकाम तेल हेङा ब्लाम-ब्लाम बु़मिम? 9हेङालोने ओराम भ्रपा मुर्नेम्पा तेल हापा थिडा भ्रेसाका मेराम खउलुङ उनी हाम वो मेबाट्पामिमलाई ग्वामु झाप्सावा।”
10मेर्मिमका आरे र्वाम्डिम चम्डिमा येशूका र्वाम्डी, “हेङा गानी ओराम मेसेमकु गो नो़बेन्सानिमिम? गुका ने आमा लागि जो़पा खारी बु़डु़म बु। 11हेङालोने उनी हाम वो मेबाट्पा मु़चु़मिम ने हेल्लो लोवो गानीनुङङा दु़म्मी। लावो गो ने गानीनुङ हेल्लो लोवो मेदु़म्ङु।#व्य १५:११ 12गुका ओ भ्रपा मुर्नेम्पा तेल गोडला असाका क्लु़म्मु लागि आमा मिरो़म झो़म्सिबेड्डु़म बु। 13आच्छाङा गो गानीलाई र्वाङु, खोत्ले सु़म्दिसेरडा बा-बान्ते ओराम जो़पा-सेला थो़बेन्मी, मेसिन्डा ओराम मेसेमका बु़डु़म खारीकु दुथाम सो़मी, मा मिम्मी।”
येशूलाई भ्रेन्मु यहूदा बिसिड्डाम
(मर्कूस १४:१०-११; लूका २२:३-६)
14मेकोतिमा को-न (१२) सीसिपामिमगोडाम यहूदा इस्करियोत र्वाक्मा कोले सीसिपा ङाउ डु़म्लाचो़मिमकाडा लस्ता, 15मा हिलाबु़डु़, “गो येशूलाई इनीमा ल्वाड्डा बोन्सानिनी माला गोलाई हाम ग्वामु इनीमा न बु?” मेर्मिमका गुलाई सु धु़म (३०) मत्तोकु खउलुङ ग्वाम्डी।#जक ११:१२ 16मेम्लो आथाम यहूदाका येशूलाई मेर्मिमकु ल्वाड्डा बेसाक्पा खाप रेम्मु चो़म्डु़।
येशूका उनी सीसिपामिमनुङ सेल्सिमुनेमकु ग्रुला पेम्डिम
(मर्कूस १४:१२-२६; लूका २२:७-२३; यूहन्ना १३:२१-३०; १ कोरिन्थी ११:२३-२५)
17लङखाम मान्थिम सो़बेम पेपा चाड चो़म्स्तामनेम सीसिपामिम येशूकाडा रोम्डिमा हिलाबेम्डी, “इनीमा लागि सेल्सिमुनेम ग्रुला बान्ते खोकुमिम?”
18गुमीका मेर्मिमलाई र्वाम्डी, “गानी शहरनो गो छेत्तोम कोले मु़चु़काडा लक्नी, मा मेरामलाई र्वाक्नी, ‘सीपाका र्वामी, आमा थारी रोक्फाड्डाम बु। गो आमा सीसिपामिमनुङ इमा नेमडा सेल्सिमुनेमकु चाडकाम ग्रुला पेउ’।” 19येशूका मेर्मिमलाई र्वाम्डिम होम्साकाङा सीसिपामिमका बेम्डी, मा ग्रुला खोम्डी।
20नेम्थाका येशू उनी सीसिपामिमनुङ ग्रुला पेप्डा टेबल फार्यु़ गन्मिडी। 21ग्रुला पेत्तोङा लेट्मिडिलो गुमीका र्वाम्डी, “आच्छाङा गो गानीलाई र्वाङु, गानीगोडाम कोलेका गोलाई भ्रेन्ङी।” 22मेर्मिमकाम छो़म उनी गो मेभ्रसावा, मा गुमीनुङ हिलाबेम्डी, “ङाचो़, गो ने मेराम मु़चु़ मेएँ, मेडे?”
23येशूका र्वाम्डी, “थालडा गोनुङ सो़बेम पोमु लागि#२६:२३ ग्रीक बाइबलडा: “सो़बेम सोजामडा कोयो लु़पाका” र्याक्मा डार्सी। डो़पाका गोलाई भ्रेन्ङी।#भज ४१:९ 24मिनीचो़ ने माम्चु़नीकु सिजेमका र्वाक्ताम होम्साका सिमुङा बासी। लावो मिनीचो़लाई भ्रेट्पा ने हाउरेमा! मेराम मु़चु़ ने मेगक्सावामङा उमा लागि जो़पा दु़प्सावा।”
25मेम्मा गुमीलाई भ्रेट्पा यहूदाका हिलाबु़डु़, “सीपा, गो ने मेराम मु़चु़ मेएँ, मेडे?” गुमीका मेरामलाई र्वाम्डी, “अँ, गाना इ त्वाकाङा र्वाक्तोङा बोना।”
26मेर्मिमका ग्रुला पेत्तोङा लेट्मिडिलो येशूका सो़बेम चक्मिडिमा जेट्मिडी। मेम्मा आलासो़ ग्वाम्डिमा उनी सीसिपामिमलाई मे सो़बेम ग्वाक्तो र्वाम्डी, “ओराम रनिमा पेनी, ओराम आमा मिरो़म सो़।”
27मेम्मा कान्चु़रे जेट्मिडिमा आलासो़ ग्वाम्डी, मा उनी सीसिपामिमलाई आरे र्वाक्तो ग्वाम्डी, “गानी खोत्लेका ओराम डुनी। 28हेङालोने ओराम माम्चु़नीनुङ उनीमा मु़चु़मिमकाम लाले सो़रख्रेप्सीकु आमा सिसि सो़। हापा मु़चु़मिमकाम छु़लमिम हेम्मु लागि सासेसाका ओराम हासी।#प्रस २४:८; यर ३१:३१-३४ 29गो गानीलाई र्वाङु, आमा पापकु किब्दीडा गानीनुङ मेडुमिमसम्म अङ्गूरकु ओराम बिलाम हेल्लो वो मेडु।”
30मेकोतिमा कोले कोमु काम्सो बेम्डिमा मेर्मिम गुमीनुङ जैतून पोप्चङथो़ लम्डी।
पत्रुसका गुमीलाई मेछेपु र्वा र्वाक्साका येशूका सो़म्डिम
(मर्कूस १४:२७-३१; लूका २२:३१-३४; यूहन्ना १३:३६-३८)
31येशूका उनी सीसिपामिमलाई र्वाम्डी, “आनेप सिन्था गोडला हाम दु़म मेरामका गानी खोत्लेका गोलाई ङेन्ङिनी। हेङालोने माम्चु़नीकु सिजेमका आरे र्वा, ‘रेपा-क्रिपा मु़चु़लाई गो सेट्पु, मा भेन्दामिम फोन्सिमी।’#जक १३:७ 32लावो गो सिमुलाम बम्गेङुमा गानीडाम ङादो गालील क्षेत्रनो लङु।”#मत्ती २८:१६
33पत्रुसका गुमीलाई र्वाक्ता, “गानीलाई हाम दु़म मेरामका गानीलाई खोत्लेका ङेनिमी लोवो गो ने गानीडला थो़रलु़मु हेल्लो वो मेडिट्पु।”
34येशूका पत्रुसलाई र्वाम्डी, “आच्छाङा गो गानालाई र्वाङु, थामा सिन्था स्वारेपो ओमु ङादो सुकखेप गाना गोलाई मेछेपु र्वाना।”
35पत्रुसका गुमीलाई र्वाक्ता, “गानीनुङ सिमुङा बासी लोवो गो गानीलाई मेछेपु हेल्लो वो मेर्वाङु।” मेम्मा वाङमिम सीसिपामिमका वो मेमङा र्वाम्डी।
गेतसमनी र्वाक्मा खोमडा येशूका सो़म्दी बेम्डिम
(मर्कूस १४:३२-४२; लूका २२:२९-४६)
36मेकोतिमा येशू उनी सीसिपामिमनुङ गेतसमनी र्वाक्मा खोमडा लम्डी, मा उनी सीसिपामिमलाई र्वाम्डी, “गानी आसिन्डाङा बात्तो बेनी, गो होनोट्नो लङुमा सो़म्दी बेउ।” 37गुमीका पत्रुस नुङ जब्दियाकु तारापाचो़चिप याकूब नुङ यूहन्नालाई गुमीनुङङा लम्डी। गुमी छो़म मेभ्रम्सिट्मिवा, मा उनी न-गो खेमल्यामु चो़म्डु़। 38मेम्मा गुमीका उनी सीसिपामिमनुङ र्वाम्डी, “आमा साम लक्पा कोतिङा आमा न-गो मेभ्रसिक्पा बु। गानी आसिन्डा बानी मा मेअम्साका गोनुङङा चङचङया बानी।” 39गुमी किचो़ होनोक्थो़ लम्डिमा खुम्बु बेसाका आरे र्वाक्तो सो़म्दी बेम्डी, “आमा पाप, नु़ माला ओराम दु़खाकु कान्चु़रे गोलामका हेमसाङनी। लावो आमा न होम्साका ने मेएँ, इनीमा न होम्साका बेनी।”
40मेकोतिमा येशू उनी सीसिपामिमकाडा ख्लोम्सिम्डी, मा मेर्मिमलाई अम्चेट्पा डार्मिडी। गुमीका पत्रुसलाई र्वाम्डी, “हाम गानी को घण्टा वो मेअम्साका गोनुङ चङचङया बुमु मेचाप्निवा? 41चङचङया बानी, मा मेजो़पा ल्वाका इनीमा न मेछाम्सिनु़ र्वाक्साका सो़म्दी बेनी। आच्छाङा इनीमा न-गोका ने बोमु मालु़, लावो मिरो़मङा मेचापा बु।”
42आथावो येशू नखेपडा लम्डिमा सो़म्दी बेम्डी, “आमा पाप, गो ओराम मेडुथु़म मेनु़ङा माला इनीमा न होम्साका दु़म्नु़।” 43गुमी उनी सीसिपामिमकामथो़ ख्लोम्सीम्डिमा रोम्डिलो मेर्मिमलाई अम्चेट्पाङा डार्मिडी, हेङालोने उनी अमका मेर्मिम उनी मिक्सी ह्वामु मेचापा बाम्डी। 44गुमीका मेर्मिमलाई पार्जो़ल्मिडिमा सुकखेपडा लक्साका आथावो मेम्साकाङा सो़म्दी बेम्डी।
45मेकोतिमा गुमी उनी सीसिपामिमकाडा ख्लोम्सीम्डिमा र्वाम्डी, “गानी आथावो अम्ल्याक्पाङा बुनी, मा ङेन्सिनिम बुनी? रेप्नी, मिनीचो़ छु़लचो़मिमकु ल्वाड्डा ग्वाला सो़सिक्पा थारी रोक्फाड्डाम बु। 46बक्नी, लक्सी। रेप्नी, गोलाई चु़म्बेट्पा मु़चु़ आसिन्डाङा बु।”
येशूलाई चु़म्मिडिम
(मर्कूस १४:४३-५०; लूका २२:४७-५३; यूहन्ना १८:३-१२)
47येशू जेत्तोङा बेम्डिलो को-न (१२) सीसिपामिमगोडाम कोले यहूदा र्वाक्मा रोक्ता। ङाउ डु़म्लाचो़मिम नुङ ङाउमिमका थु़र्मीडिम छो़म सेर्पा मु़चु़ गुनुङ बाम्डी। मेर्मिमका कातु़रु़मिम नुङ डु़लु़म्चो़मिम कुर्थाम्डी। 48गुमीलाई चु़म्बेट्पा यहूदाका ङादोङा आरे र्वाक्तामा मेर्मिमलाई छेखोप ग्वाक्तु़मिम बाइडा: “चुप्पा बेसाका गो उहेमलाई सेव साट्पु मेराम मु़चु़लाई गानी छेनिमा चु़म्नी।” 49येशूकाडा यहूदा लस्ल्याड्डा, मा र्वाक्ता, “ए सीपा, सेव!” मेम्मा गुमीलाई चुप्पा बु़डु़।
50येशूका यहूदालाई र्वाम्डी, “ङोप्सो़, गाना हाम बेप्डा रोक्नाम, मेराम बे।” मेकोतिमा मु़चु़मिमका येशूलाई जेट्मिडिमा चु़म्मिडी। 51मेकोतिलोङा येशूनुङ बाट्पामिमगोडाम कोलेका उ कातु़रु़ थास्तु़मा डोक्पु ङाउ डु़म्लाचो़कु डु़ल्चो़लाई ओप्डु़, लावो उ नोफ्ला कोङङा क्रिप्साड्डु़।
52येशूका मेरामलाई र्वाम्डी, “इमा कातु़रु़ उ दापगोयु़ फिका। कातु़रु़ मोक्पामिम कातु़रु़काङा सेन्ला सो़म्सिमी। 53ख्लो़ला सो़म्सिमुकाम लागि गो आमा पापनुङ र्वामु चापु, मा गुमीका को-न (१२) पल्टनडाम वो हापा पाह्रीचो़मिम थु़र्थामी र्वाक्पा हाम गाना मेचना?#२६:५३ को पल्टनडा ६०,०० कोति सिपाहीमिम दु़म्थाल्मिडी। 54लावो मेम दु़स्ता माला आरे दु़म्मुङा बासी र्वाक्साका माम्चु़नीकु सिजेमका र्वामिम हेसाका रोथी मा?”
55मे सेर्पा मु़चु़लाई येशूका र्वाम्डी, “हाम गो कोर्थो़लाम बक्पा ङिमलु़पा मु़चु़ मा! कातु़रु़मिम नुङ डु़लु़म्चो़मिम रेसाका गोलाई चु़म्डा रोक्निम? गानी गोलाई हेङा सो़रनेमगोडा मेचु़म्ङिनिवा? सीत्तो हेल्लो लोवो गो मेसिन्डाङा बाङडोम बाइडा।#लूक १९:४७; २१:३७ 56लावो माम्चु़नीकु सिजेमडा माम्चु़नीलाम-जेपामिमका र्याम्डिम ल्वा रोम्थिमु लागि ओर्मिम खोत्ले दु़म्तोङा लेडु़।” मेकोतिमा सीसिपामिम खोत्लेका गुमीलाई पार्जो़ल्मिडिमा स्वाम्डी।
डोक्पु-घ्रो़म्दीकु ङादोडा येशू
(मर्कूस १४:५३-६५; लूका २२:५४-५५,६३-७१; यूहन्ना १८:१३-१४,१९-२४)
57मेकोतिमा येशूलाई चु़म्पा मु़चु़मिमका डोक्पु ङाउ डु़म्लाचो़ कैयाफाकु नेमडा गुमीलाई लम्डी। मेसिन्डा डु़म्ला सीपा पातु़म्रीमिम नुङ यहूदी ङाउमिम खोम्सिम्डिम बाइडा। 58लावो पत्रुस ने होनो-होनो बासाका डोक्पु ङाउ डु़म्लाचो़कु देल्फुसम्मङा येशूकु चङचङ लस्ता। मेम्मा मेसिन्डा हाम दु़म र्वाक्साका रेम्मु लागि गु मेगोडा लस्तामा लपा मु़चु़मिमनुङ बाइडा।
59ङाउ डु़म्लाचो़मिम नुङ खोत्ले डोक्पु-घ्रो़म्दीका येशूलाई सेन्मु लागि लिमा थेसाका येशूकु कोर्थो़लाम सो़पामिमलाई माल्मु चो़म्मिडी। 60हापा मु़चु़मिम रोम्डिमा येशूकु दुथाममिम लिमा ल्वा सो़म्डी, लावो येशूलाई सेन्मु बासिक्पा ल्वा डोक्पु-घ्रो़म्दीका हाम वो मेडार्मिवा। चङडा नले मु़चु़ रोक्ची, 61मा र्वाक्ची, “ओराम मु़चु़का ‘माम्चु़नीकु सो़रनेम फाल्साका गो सुलेमका आथावो बनेबोमु चापु’ र्वाक्ता।”#यूह २:१९
62मेकोतिमा डोक्पु ङाउ डु़म्लाचो़ बक्तामा येशूलाई र्वाक्ता, “गाना हाम वो मेर्वानामिम? इमा दुथाम गाना हाम र्वाना?” 63लावो येशू वायवाय बाम्डी। डोक्पु ङाउ डु़म्लाचो़का गुमीलाई र्वाक्ता, “गो गानालाई र्वाङु, गाना माम्चु़नीकु चो़ ख्रीष्ट माला हेल्लो लोवो बाट्पाम बाट्पा माम्चु़नीकु नङडा कसम पेसाका गुकुनुङ सो़या।”
64येशूका मेरामलाई तुम्डी, “अँ, गानी र्वाक्निम होमङा सो़। लावो गो गानी खोत्लेलाई र्वाङु, दिफु मिनीचो़लाई खोत्लेडाम घ्ल्वापा माम्चु़नीकु जो़पलाम गन्पा, मा धामुलाम खासेडलामका योक्तोङा बेपा गानी ल्वानी।”#दान ७:१३
65मेकोतिमा डोक्पु ङाउ डु़म्लाचो़का उ ये आ़स्तु़, मा र्वाक्ता, #लेवी २४:१६“ओरामका माम्चु़नीलाई डक्साका जेस्ता। ओरामकु दुथाम आथावो सो़पा मु़चु़ हाउ बासी मा? रेप्नी, ओरामका माम्चु़नीलाई डक्साका जेस्ताम गानी थो़न्ल्याट्निम बु। 66इनीमा मुलु़ हाम बु?” मेर्मिमका र्वाम्डी, “गु सिमुका घ्रेट्पा बु।”
67मेकोतिमा मेर्मिमका येशूकु कलडा थक्सी बेट्मिडी, मा मुठिमका याल्मिडी, मा याङका लपटाका याल्तो,#यशै ५०:६ 68र्वाम्डी, “ख्रीष्ट, माम्चु़नीलाम गुकुनुङ जेसा। सु़का याल्ना?”
पत्रुसका येशूलाई मेछेपु र्वाक्ताम
(मर्कूस १४:६६-७२; लूका २२:५६-६२; यूहन्ना १८:१५-१८,२५-२७)
69मेराम थारीका पत्रुस पाखानो देल्फुडा गन्तासिट्डाम बाइडा। कोले डु़ल्चो़मे रोक्तामा र्वाक्ता, “गाना वो गालीलडाम येशूनुङ बान्ना।”
70लावो पत्रुसका खोत्ले मु़चु़मिमकु ङादोडा आरे र्वाक्साका मेछेपु र्वाक्ता, “गाना हाम सो़त्तोङा लेना, गो ने मेचक्पु।”
71पत्रुस मेलाम लस्तामा लाम्चोको फार्डा कोङमी डु़ल्चो़मेका गुलाई ल्वास्तु़मा मेसिन्डाम मु़चु़मिमलाई र्वाक्ता, “ओराम मु़चु़ नासरतडाम येशूनुङ बाइडा।”
72पत्रुसका कसम पेत्तो आथावो मेछेपु र्वाक्ता, “गो मेराम मु़चु़लाई मेछेपु।”
73घरिकोङका मेसिन्डा बाट्पा मु़चु़मिम पत्रुसकाडा रोम्डिमा र्वाम्डी, “आच्छाङा गाना येशूनुङ लाम्दिपामिमगोडाम कोले दु़म्मु बासी, हेङालोने इमा जेसीकाङा रेम्बु़।”
74मेम्मा पत्रुसका उ त्वापलाईङा वाइतो बेन्सिक्तो र्वाक्ता, “मेराम मु़चु़लाई गो मेछेमु।” मेकोतिलोङा स्वारेपो ओक्ल्याड्डा।
75मेकोतिमा येशूका आरे र्वाम्डिम ल्वा पत्रुसका मिम्डु़, “स्वारेपो ओमु ङादो गाना गोलाई सुकखेप मेछेपु र्वाना।” मेम्मा गु पाखानो लस्तामा हुलाख्राम बु़डु़।
Currently Selected:
मत्ती 26: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
