रोमी 1
1
सेव
1माम्चु़नीकु थु़र्मा दु़म्मु लागि येट्ङिडिमिम मा उनीमा जो़पा-सेला थो़बेन्मु लागि वाङ दु़म्ङोडोम येशू ख्रीष्टकु डु़ल्चो़ गो पावलका ओराम सेलाखाजेम र्याक्तोङा बेउ। 2हापा थ ङादोङा जो़पा-सेला गुमीका ग्वानिनी र्वाक्साका याचे जेम्डिम बाइडा। मेराम ल्वा माम्चु़नीलाम जेपामिमका उनीमा सिजेमडा र्याक्मिडिम बु। 3ओराम जो़पा-सेला ने माम्चु़नीकु द्वादीबुङ तारापाचो़ येशू ख्रीष्टकु दुथाम सो़। गुमी मु़चु़ दु़म्साका दाऊद हपकु दोचो़गोडा गम्डी। 4मेम्मा गुमी सिमुलाम बम्गेम्डिम ल्वाका माम्चु़नी-पेलकु यु़मलाम माम्चु़नीकु तारापाचो़ दु़म्मिडिम ल्वा रेम्बु़। गुमीङा इकीमा ङाचो़ येशू ख्रीष्ट सो़। 5इकीमा ङाचो़ येशू ख्रीष्टलामका माम्चु़नीका गोलाई दिदाम ग्वाक्साका उनीमा थु़र्मा दु़म्बेट्ङिडिमी। खोत्ले सामाडाम मु़चु़मिमका थो़रलु़मिनु़ मा गुमीका र्वामिमिम ल्वा थो़मिनु़ र्वाक्साका उनीमा नङडा खारी बेप्डा गोलाई थु़र्ङिडिमी। 6मेम्साकाङा गानीलाई वो मेर्मिमनुङ कोयोङा येशू ख्रीष्टकु मु़चु़ दु़म्मु येट्निमिम बु।
7रोम शहरडा बाट्पा गानी खोत्लेलाई माम्चु़नीका हापा रिखाम बेन्निमिमा उनीमा त्वाकु सेपा मु़चु़ दु़म्मु लागि येट्निमिम सो़: इकीमा माम्चु़नी पाप नुङ ङाचो़ येशू ख्रीष्टलामका गानी दिदाम नुङ न भ्रसी ल्वानिनु़।
पावलका रोम लक्पा छो़म न बु़डु़म
8खोत्लेडाम ङादो येशू ख्रीष्टलाम गानी खोत्लेकाम लागि गो माम्चु़नीलाई आलासो़ र्वाङु। हेङालोने येशू ख्रीष्टडाम इनीमा थो़रकु दुथाम सु़म्दिसेरडा खोत्लेथो़ थो़बेट्मा बु। 9उनीमा तारापाचो़काम जो़पा-सेला थो़बेन्मुडा छो़म न सोक्साका उनीमा खारी बेउ। गो गानीलाई प्ल्वान्निनिम मिबु लावो इनीमा लागि गो हेल्लो लोवो सो़म्दी बेउहोम बुङु। माम्चु़नी आमा दुथाम सो़पा बुमी। 10माम्चु़नीकु न होङङा गो इनीमाडा रोमु चापुनु़ र्वाक्साका छो़म सो़म्दी बेउ। 11माम्चु़नी-पेललाममिम जि गानीनुङ दो़साका ख्रीष्टडा हापा सोनुङमा दु़म्बेन्मु चापुनु़ र्वाक्साका गो गानीनुङ घ्रो़म्मु न बेउतोम बु। 12इनीमा थो़रका गोलाई मा आमा थो़रका गानीलाई गुइ त्वाप-त्वापगोडा सो हन्सी ल्वासिनु़ र्वाक्पा आमा न बु।
13द्वादीबुङ वा-ल्वाकनी, गो इनीमाडा हापा खेप रोक्पा न बेउतो लोवो ओम्लोसम्म रोमु चाप्तोम मिबु र्वाक्पा ल्वा गानी थेसिथेट्नी र्वाङु। वाङ सामामिमगोडा खारी बेउतोम होम्साका गानीगोडा वो खारी बेसाका मु़चु़मिमलाई ख्रीष्टडा रेट्पा आमा न बु।#थु़र्मा १९:२१ 14हेङालोने ग्रीक लोवो ग्रीक मेएँ लोवो, नेप्चीनुङमा लोवो नेप्ची मान्थिम लोवो, खोत्लेलाई जो़पा-सेला थो़बेन्मुङा बासिक्पा बु। 15मेम्मिमका गानी रोमडा बाट्पामिमलाई वो जो़पा-सेला थो़बेन्मु छो़म आमा न बु।
16जो़पा-सेला थो़बेन्मु गोलाई क्रो़म मेलु़, हेङालोने थो़र बेपा खोत्लेकाम लागि सेल्सिमु ल्वापा माम्चु़नीकु यु़म सो़, ङादो यहूदीमिमकाम लागि मा वाङ सामाकाम लागि वो सो़।#मर्क ८:३८ 17जो़पा-सेलाका मु़चु़लाई माम्चु़नीका उनीमा त्वाकु ङादोडा हेसाका जो़पा दु़म्बेन्मी र्वाक्पा रेम्बु़, मा माम्चु़नीनुङ जो़पा दु़म्पा ल्वा ने थो़रलामङा चो़म्सी, मा थो़रकाङा खोत्ले रेथिबेडु़। मेम्साकाङा माम्चु़नीकु सिजेमका र्वा, “उहेम मु़चु़ थो़रलामका माम्चु़नीकु ङादोडा जो़पा न-गोकाम दु़म, मेराम मु़चु़काङा त्वारो़म ल्वासु़।”#हब २:४
18पाह्रीलाम माम्चु़नी पापकाम छोक्चो मु़चु़मिमकु छु़ल नुङ मेजो़पा खारीकु कोर्थो़लाम रेम्बेसिड्डाम बु। मेर्मिमकाम उनीमा त्वाकु मेजो़पा खारीकाङा आच्छाङाकाम सीसि रिप्डु़म बु। 19माम्चु़नीका मेर्मिमलाई देन्दे ग्वामी, हेङालोने माम्चु़नीकु दुथाम मु़चु़का थेन्मु बासिक्पा ल्वा माम्चु़नीका त्वाकाङा मेर्मिमलाई छ्र्याङलो छ्याङलो दु़म्पा बेसाका रेम्बेट्मिडिम बु। 20सु़म्दिमोलो आथामङा माम्चु़नीका प्रङ्मिडिम खोत्लेमथोक रेप्साकाङा मेर्मिमका गुमीलाई जो़होमका छेमु चाम्मी। मिक्सीका मेल्वासिक्पा माम्चु़नी, हेल्लो लोवो दु़म्पाम बाट्पा उनीमा यु़म मा गुमी हेप्माम बुमी र्वाक्साका जो़होमका छेमु चाम्मी। मेम्मिमका मेर्मिमका वाङमिम ल्वा बेसाका माम्चु़नी मेछेकु र्वामु मेल्वामी।
21मेर्मिमका माम्चु़नीलाई छेसाका वो गुमीलाई डोक्पु मेमिम्मिवा, ना आलाङा र्वाम्डी। मेम्मा मेर्मिमकु नेप्ची हाम ना हामकाम दु़स्ता मा मेर्मिमकु न-गो तुकुम्चिम होप्माम दु़स्ता।#एफि ४:१७-१८ 22मेर्मिमका उनी त्वाप नेप्चीनुङमा बुङु र्वाक्पा मिम्मिडी लोवो नेप्ची मान्थिम दु़म्मिडी। 23मेर्मिमका हेल्लो लोवो बाट्पाम बाट्पा माम्चु़नीकु नङ कोमु बासिक्पाडा सिपामा लक्पा मु़चु़, सो़ब्दीपो नेब्दीपो, सिकेवा माङकेवा, सुसिसाका लाम्दिपा डोक्पु याक्के फुचु़-रोक्चु़मिमकु ङाटा सेव साट्मिडी#व्य ४:१६-१८।
24मेम्मिमका मेर्मिमकु नका बोमु माल्लु़म घ्रामलु़पा खारी बेसीडाङा माम्चु़नीका डिट्जो़ल्मिडी मा मेर्मिमका उनी त्वापगोडाङा क्रो़मलु़पा खारी बेम्डी। 25मेर्मिमका माम्चु़नीकु आच्छाङाकाम ल्वालाई लिमा ल्वानुङ फाट्मिडी, मा खोलेम थोक प्रङपा माम्चु़नीलाई मेएँ लावो गुमीका प्रङमिडिम थोकमिमलाई सेव साट्मिडी। लावो आलाकाम माम्चु़नीलाई हेल्लो लोवो डोक्पु बेसाका उनीमा नङ कोसिनु़। आमेन।
26मेम्मिमका माम्चु़नीका मेर्मिमलाई उनी घ्रामलु़पा न होम्साका खारी बोमु ग्वाम्डी। मेर्मिमका उनीमा त्वाकु वोचु़नुङ अम्मु डिसाका मेजो़पा नका मेसेम-मेसेम अम्मिडी। 27मेम्साका मेर्मिमकु वोचु़का वो त्वाकु मोचु़नुङ अम्मु डिसाका वोस्चो़का वोस्चो़नुङङा छो़म अम्पा नका घ्रामलु़पा खारी बेम्डी। मेर्मिमका त्वाकु मिरो़मका मेजो़पा खारी बेम्डिमका मेराम होप्मामङा देन्दे ल्वाम्डी।
28माम्चु़नीकु दुथाम चम्डिम ल्वा मेर्मिमका बोमु मेद्वाक्मिवामका गुमीका मेर्मिमलाई उनी मेजो़पा खारीङा बोमिनु़ र्वाक्साका डिट्जो़ल्मिडी। 29मेम्मिमकाङा मेर्मिम खोत्ले मेजो़पा खारी नुङ मेजो़पा नका देम्मिडिम बु। मेर्मिमका रारी बोमी, घ्राम्मी, नाचु़र बोमी, वाङमिलाई सेन्मी, क्वाल्बा बोमी, लु-फेले बोमी, लिमा थेन्मी, कोलेका कोङमीलाई ल्वा सिल्मी, 30मा वाङमिमलाई डक्साका जेमी, माम्चु़नीडाम घ्राम्सिमी, सु़लाई वो जो़पा मेबोमी, डोक्पु लिसिमी, डोक्पु ल्वा बोमी, मेजो़पा ल्वा माल्सा माल्सा ख्लुमी, मेर्मिमका माम पापकु ल्वा मेथो़मी। 31मेर्मिम नेप्ची मान्थिम बुमी मा बेउ र्वामिमिम ल्वा मेबोमी, मेर्मिम ने खेमजु़र मेबाट्पा नुङ रु़प्चु़मो लोक्ल्याक्पामिम सो़। 32आरेप्माम मु़चु़का ने सिमुङा घ्रेट्पा दु़म्मी र्वाक्पा माम्चु़नीलाममिम छो़म जो़पा डु़म्ला थो़त्तो थो़त्तोङा वो मेर्मिमका मेप्माम ङा खारी बोमी। मेकोति कोङङा मेएँ, आथावो कोर्थो़लाम मेप्माम खारी बेपालाई कोमी।
Currently Selected:
रोमी 1: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
