रोमी 2
2
माम्चु़नीकु निया
1मेम्मिमका वाङमिमकु निया बेपा मु़चु़नी, गो मुमा मान्थिम बुङु र्वामु मेल्वानी, हेङालोने उहेम ल्वाडा गानी वाङमिमलाई मुमा बेनिमी मेराम खारी इनी त्वाका वो बोनी मा मुमाचो़ दु़म्नी।#मत्ती ७:१; लूक ६:३७ 2आरेप्माम खारी बेपामिमडला माम्चु़नीका जो़होमका निया बोमी र्वाक्साका गुइ चडिम बु। 3ए मु़चु़नी, गानी आरेप्माम खारी बेपामिमलाई मुमा बेनिमी मा गानी वो मेप्माम ङा खारी बोनी माला, हाम माम्चु़नीकु नियालामका लुङल्याङु र्वाक्पा गानी मिम्सिनी? 4डे माम्चु़नीका गानीडला न-थो़म रेम्बेसाका इनीमा छु़ललाम ख्लोनिमी र्वाक्पा मेचनिमा, हाम उनीमा न-थो़म, इम्सीलाई हाम ना हामकाम मिम्नी? 5लावो इनीमा न-गो लुङ होप्माम बेन्निमा गुमीथो़ ख्लोसिमु न मेबेनिवा। मेम्मिमका माम्चु़नीकु निया रेम्बेसिक्पा मेराम छोक्चोकाम नेम गानी छो़म डोक्पु देन्दे ल्वानी। 6हेङालोने गुमीका खोत्ले मु़चु़मिमलाई उमा खारी होम्साका पुरस्कार ग्वामी।#भज ६२:१२; हितो २४:१२ 7याक्के दु़म्साका जो़पा खारी बेपाम्बाट्पा, माम्चु़नीकु यु़म-झ्वाक्सी, जो़पा दु़म्सी नुङ हेल्लो वो मेसिपा त्वारो़म माल्मी। मेर्मिमलाई माम्चु़नीका हेल्लो वो मेसिपा त्वारो़म ग्वामी। 8लावो रिबुसी किट्पा, त्वाकाम कोङङा जो़पा बोमु माल्पा, आच्छाङाकाम ल्वा मेथो़पा, मा मेजो़पा खारी बेपामिमडला माम्चु़नीका उनी छोक्चो हान्मी। 9मेजो़पा खारी बेपा खोत्ले मु़चु़मिमगोडा खोत्लेडाम ङादो यहूदीमिम मा वाङसामाडला दु़खा नुङ ङिमलु़पा थारीमिम रो। 10लावो माम्चु़नीकु जो़पा खारी बेपा यहूदीमिमलाई ङादो मा वाङसामामिमलाई वो गुमीका डोक्पु बोमी मा न-भ्रसी बेन्मी। 11हेङालोने माम्चु़नीका सु़लाई वो चोमिक्सी मेबोमी।#व्य १०:१७
12माम्चु़नीकु डु़म्ला मेथेसाका उहेमका छु़ल बेम्डिम बु, मेर्मिम मेराम डु़म्ला मान्थिङा पुयु़लुमी मा डु़म्लागोडा बासाका छु़ल बेम्डी माला मेर्मिमका वो मेराम डु़म्लालामकाङा देन्दे ल्वामी। 13हेङालोने डु़म्ला थो़साका कोङङा मु़चु़मिम माम्चु़नीकु ङादोडा जो़पा न-गोकाम मेदु़म्मी, लावो डु़म्ला होम्साका दोपा मु़चु़ङा माम्चु़नीका जो़पा न-गोकाम मिम्मी। 14वाङ सामामिमनुङ यहूदीमिमकु डु़म्ला मिबु। लावो मेर्मिमका डु़म्लाडाम होम्साकाङा खारी बोमी माला आरेसाका बोमिमिम ल्वाङा त्वाकु डु़म्ला होप्माम र्वाक्पा रेम्बोमी। 15डु़म्लाका र्वाक्ताम ल्वामिम उनी त्वाकु नगोडा र्याक्मा बु र्वाक्पा मेर्मिमकु नेप्चीका रेम्बु़, मा मेर्मिमकाम त्वाकु नेप्चीका मेर्मिमलाई याङलो मुमा बेडु़मी मा याङलो जो़पा र्वामी। 16मु़चु़मिमका थक्साका जु़ल्मिडिम ल्वा ने माम्चु़नीका निया बोमिमिम नेम खोत्ले मु़चु़मिमगोडा येशू ख्रीष्टलाम रेम्बोमी। ओर्मिम ल्वा गो दो़उतोम जो़पा-सेला होप्माम ङा दु़म।
यहूदीमिम नुङ डु़म्ला
17लावो गानी गो यहूदी ङा र्वाक्साका डु़म्लाडा थो़रलु़नी मा माम्चु़नीलाई छेपु र्वाक्साका डोक्पु लिन्सिनी। 18गुमीका गानी हाम बोनिमिम द्वामी र्वाक्पा चनी मा डु़म्लालाम सीसिट्निम जो़पा ल्वामिमकु दुथाम वो चनी। 19नका मेल्वापामिमलाई क्रिपा मा तुकुम्चिमडाम ओल गो ङा सो़ र्वाक्साका र्वानी। 20नेप्ची मान्थिम मु़चु़मिमलाई सीपा, थेसिमेथेट्पामिमलाई सीपा गुकु ङा र्वानी। माम्चु़नीकु डु़म्ला गुकुनुङ बु मेम्मिमका सीसिमु बासिक्पा ल्वा खोत्ले गुकु चकु र्वाक्साका र्वानी। 21आरेसाका गानी वाङमिमलाई सीपा इनी त्वाप ने मेसीसिक्पा? वाङमिमलाई खुसि मेनु़ र्वाक्पा मा त्वाकाङा खुपा? 22वाङमिमलाई नाम्सु़रु़ मेबेनी र्वाक्पामिमका त्वाका ङा नाम्सु़रु़ बोनी? ङाटामिम घ्राम्सिक्पामिमका ङाटामिम भ्रेसाका खाप्ची डु़म्नी? 23माम्चु़नीका ग्वाक्साड्डामिम डु़म्ला गुइनुङ बु र्वाक्साका गानी डोक्पु लिन्सिनी, हाम गानी मेरामङा डु़म्लाका र्वामिमिम होङङा मेबोनी मा? 24हेङालोने माम्चु़नीकु सिजेमडा र्याक्मा बु, “गानी यहूदीलामङा वाङसामामिम गोडा माम्चु़नीलाई डक्साका जेन्निम बाइडा।”#यशै ५२:५
25डु़म्ला होम्साका दोनी माला ने खिरिरि क्रिप्सी आच्छाङा जो़पा ङा दु़म, लावो डु़म्ला होम्साका मेदोनी माला गानी खिरिरि क्रिप्सी बोनिमिम वो खिरिरि क्रिप्सी मेबोनिमिम कोतिमङा दु़म। 26खिरिरि मेक्रिपा मु़चु़का डु़म्ला होम्साका दो माला हाम मेराम माम्चु़नीकु ङादोडा खिरिरि क्रिपा कोतिमङा मेएँ मा? 27गानी खिरिरि क्रिपा यहूदीमिम खिरिरि मेक्रिपा वाङसामामिमलाम मुमा बेन्ला सो़न्सिनी हेङालोने गानी र्याक्मा डु़म्ला बाट्पा मा खिरिरि क्रिपा लोवो गानी डु़म्ला होम्साका मेदोनी माला खिरिरि मेक्रिपा वाङसामामिम ने डु़म्ला होम्साका दोमी। 28पाखालाम कोङङा यहूदी लिसिक्पा ने आच्छाङाकाम यहूदी मेएँ, मेम्साकाङा पाखाडा ल्वासिक्पा खिरिरि क्रिप्सी नुङ मिरो़मडाम ल्वा वो आच्छाङाकाम मेएँ। 29नगोलामका यहूदी दु़म्पा कोङङा यहूदी सो़, मा आच्छाङाकाम खिरिरि क्रिप्सी ने नगोडा दु़म्पा ल्वा सो़, ओराम ने माम्चु़नी-पेललाम दु़म्पा ल्वा सो़, डु़म्लाडा र्यासिट्पा ल्वा मेएँ। आरेप्माम मु़चु़लाई मु़चु़का मेएँ, माम्चु़नीका जो़पा मिम्मी।#व्य ३०:६
Currently Selected:
रोमी 2: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
