रोमी 10
10
1वा-ल्वाकनी, इस्राएलीमिम सेल्सिमु ल्वामिनु़ र्वाक्साका आमा न-गोलाम ङा माम्चु़नीडा छो़म सो़म्दी बेउ। 2मेर्मिमकाम माम्चु़नीकु दुथाम जो़होमका सो़रलोले बेपा न बु, गो ओराम ल्वाकु दुथाम सो़पा बुङु। लावो हेसाका बेपा र्वाक्साका मेर्मिमका मेचमी। 3हेङालोने माम्चु़नीलाम रोक्पा जो़पा नकु दुथाम मेथेसाका मेर्मिमका त्वाकु न-गो होम्साका जो़पा दु़म्मु माल्मी। मेम्साका मेर्मिम माम्चु़नीकु जो़पा न-गोडाम साखामगोडा मेदु़म्मिवा। 4हेङालोने थो़रबेपामिम जो़पा न-गोकाम दु़म्मु चाप्मिनु़ र्वाक्साका डु़म्लाका माल्लु़म ल्वा ने येशू ख्रीष्टकाङा बेम्सोम्डी।
खोत्लेकाम लागि सेल्सी
5मोशाका र्वाक्ताम बु, “माम्चु़नीकु डु़म्ला होम्साका दोपा मु़चु़ङा जो़पा न-गोकाम दु़म्साका बु।”#लेवी १८:५ 6लावो थो़रलाम माम्चु़नीकु ङादोडा जो़पा न-गोकाम दु़म्मु लागि उनीमा सिजेमका आरे र्वा, #व्य ३०:१२-१४“नगोडा आरे मेर्वाका, सु़ पाह्री ल?” (लोवो येशूलाई धाली सो़न्मु र्वाक्साका) 7त्वाकु नडा आरेप्माम वो मेमिम्नी, “खादीगोयु़ सु़ लक्पा?” (लोवो ख्रीष्टलाई सिमुलाम गेले खेन्मु र्वाक्साका)। 8लावो ओरामका हाम र्वा? “सिजेम इनीमा फार्डाङा बु, इनीमा सिड्डाङा मा इनीमा नगोडा बु।” थो़रकु दुथाम गुकु थो़बेन्कुमिम जो़पा-सेला ओराम ङा सो़। 9गानी इनीमा त्वाकु सिकाङा येशू ङा ङाचो़ र्वाक्साका सो़नी मा माम्चु़नीका गुमीलाई सिमुलाम फम्खेट्मिडिम र्वाक्साका इनीमा नगोलामका थो़रलु़नी माला गानी सेल्सिनी। 10हेङालोने गुइ नगोलामका थो़रलु़साका ङा माम्चु़नीकु ङादोडा जो़पा न-गोकाम दु़म्सी। मेम्मा गुइ थो़रलु़इडिम ल्वा त्वाकु सिकाङा सो़साका सेल्सिडी। 11माम्चु़नीकु सिजेमका र्वा, “गुमीडला थो़रलु़पा मु़चु़का हेल्लो वो उनी क्रो़म लुमु मेबासी।”#यशै २८:१६ 12यहूदी नुङ वाङसामाडा हाम वो वाङ मिबु। गुमी गुइ खोत्लेकाम कोलेङा माम्चु़नी बुमी मा गुमीडा सो़म्दी बेपा खोत्लेलाई हापा जि ग्वामी। 13माम्चु़नीकु सिजेमका र्वा, “ङाचो़कु नङडा सो़रलोले बेपामिम खोत्ले सेल्सिमी।”#योए २:३२
14लावो गुमीडा थो़रमेलु़साका हेसाका येन्मी मा? उनीमा नङकु दुथाम थो़म्डिमङा मिबु माला हेसाका गुमीडला थो़रलु़मी? कोङनिमका मेथो़बेसाका हेसाका उनीमा दुथाम थो़मी मा? 15थो़बेट्पा मु़चु़ मेथु़र्थु़म हेसाका थो़बेन्मुमी? माम्चु़नीकु सिजेमडा र्याक्मा बु, “जो़पा-सेला थो़बेट्पामिमकु खेल हाङको जो़पा!”#यशै ५२:७
16लावो जो़पा-सेला थो़पामिम खोत्लेका ने थो़रमेलु़मिवा, हेङालोने माम्चु़नीलाम जेपा यशैयाका आरे र्वाक्ताम बु, “ए ङाचो़, गुकु थो़बेत्तोकोम जो़पा-सेला डा सु़का थो़र बु़डु़म बु मा?”#यशै ५३:१ 17थो़रलु़सी ने हाम थो़स्तिम बु मेरामलाम रो मा हाम थो़सी मेराम ख्रीष्टकु सिजेमलाम रो। 18मेम माला हाम मेर्मिमका थो़म्डिम मिबु? मेएँ मेर्मिमका थो़म्डी।
“मेर्मिमकु लो़लाम खोत्ले सु़म्दिसेरडा फोन्सिड्डा
मा मेर्मिमका र्वाम्डिम ल्वा सुबु बिर्खोपसम्म रोक्थिड्डा।” #भज १९:४
19मेम माला, “हाम इस्राएलीमिमका ओराम जो़पा-सेला थेसिमेथेट्मिवा?” थेसी ने थेट्मिडी, लावो मेराम होम्साका मेबेमिवा। माम्चु़नीका मोशालाम र्वाम्डिम बाइडा,#व्य ३२:२१
“उहेम कोङ डोक्पु सामा मेएँ मेर्मिमलाई छेपुमी मा गानी मेर्मिमडला नाचु़र बेपा दु़म्बेनिनी।
नेप्ची मान्थिम सामामिमलाई दिदाम रेम्बेसाका गो इनीमा छोक्चो फन्सानिनी।”
20माम्चु़नीलाम जेपा यशैयाका माम्चु़नीका र्वाम्डिम ल्वा मेङिसाका र्याक्तु़म बु,
“गोलाई माल्मु ङा मेमाल्पाका डार्ङिडिमी,
रेम्मु मेमाल्पामिमकाडा वो गो रेम्बेसिङडो।”#यशै ६५:१
21इस्राएलकु दुथाम गुका आरे र्वाक्ताम बु,
“आमा ल्वा मेथो़पा मा आमा कोर्थो़लाम बक्पा मु़चु़मिमलाई येन्मु लागि नेम्तोम गो आमा ल्वा हम्तो।”#यशै ६५:२
Currently Selected:
रोमी 10: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
