रोमी 9
9
माम्चु़नीका थुट्मिडिम यहूदीमिम
1गो र्वामु खापुमिम ल्वा आच्छाङाकाम सो़। गो ख्रीष्टकु मु़चु़, मा गो लिमा मेथेट्पु। माम्चु़नी-पेल साखामगोडा बाट्पा नेप्चीका गो लिमा मेथेट्पु र्वाक्साका आमा दुथाम सो़यु़। 2आमा द्वादीबुङ इस्राएली वा-ल्वाकमिमकाम लागि आमा थो़मबोक घ्रु़पा बु। 3आमा इस्राएली वा-ल्वाकमिमका त्वारो़म ल्वामिवा माला ख्रीष्टलाम गो वाङ दु़म्पा वाइतो बेला सो़सिङु लोवो गेर्सी द्वाक्ङुवा। मेर्मिमका त्वारो़म ल्वामिनु़ र्वाक्पा आमा छो़म न बु। 4मेर्मिम इस्राएलीमिम सो़, मा माम्चु़नीका मेर्मिमलाई उनीमा त्वाकु चो़-चु़सु़ दु़म्बेट्मिडी मा उनी त्वाकु यु़म-झ्वाक्सी मेर्मिमडला रेम्बेम्डी। मेम्मा मेर्मिमनुङ सो़रख्रेप्मिडी, मा डु़म्ला ग्वाम्डी, उनीमा लाले-पाङके बोमु वो सीट्मिडी, गुमीका याचे जेम्डिम ल्वा मेर्मिमका डार्मिडी।#प्रस ९:४ 5मेर्मिम छो़म नङ दोपा बेप-पापकु चो़-चु़सु़मिम सो़, ख्रीष्ट उनी त्वाप वो ओराम सामागोडा गम्डी। गुमी ने खोत्लेडला साखाम थो़पा मा हेल्लो लोवो नङ कोसिक्पा माम्चु़नी बुमी। आमेन।
6हाम माम्चु़नीकु सिजेम हाम ना हामकाम दु़स्ता मा? मेएँ, हेङालोने इस्राएलडा गक्पा र्वाक्साका आच्छाङा खोत्ले इस्राएली र्वामु मेझाम, 7अब्राहामकु खोत्ले चो़-चु़सु़मिम माम्चु़नीका याचे जेम्डिम चो़-चु़सु़ मेएँ। हेङालोने माम्चु़नीकु सिजेमडा आरेसाका र्याक्मा बु, “इसहाकलाम गक्पा चो़-चु़सु़ङा इमा चो़-चु़सु़ दु़म्मी।”#उत २१:१२ 8ओराम र्वाक्मा ने, मिरो़मलामका गक्पामिम ने माम्चु़नीकु चो़-चु़सु़ मेएँ, लावो माम्चु़नीका ग्वानिनी र्वाक्साका याचे जेम्डिम कोङङा अब्राहामकु चो़-चु़सु़मिम सो़। 9हेङालोने माम्चु़नीका याचे जेम्डिम बाइडा, “र्वाक्मा थारीका ङा आथावो गो रोङुलो साराका तारापाचो़ कक्सु़।”#उत १८:१०
10आकोति कोङङा मेएँ, रिबेकाका वो इकीमा ङाउ-खुउ इसहाकलामका निची तारापाचो़ कस्तु़। 11लावो चो़च्चो़चिप गमु ङादोङा मेर्चिपगोडाम कोलेका जो़पा मा कोङमीका मेजो़पा बोमु ने खारीलामका मेएँ, लावो माम्चु़नीका छेट्मिडिम होम्साका दु़म्नु़ र्वाक्साका सो़। 12रिबेकालाई आरे र्वाक्मा बाइडा, “वाका ल्वाककाम चापेडुपे बु़।”#उत २५:२३ 13माम्चु़नीकु सिजेमडा आरेसाका र्याक्मा बु, “याकूबलाई रिखाम बेउतो, लावो एसावलाई छेकुरेम वाइरेम बेउतो।”#मला १:२-३ 14मेम माला गुइ हाम र्वामु? हाम माम्चु़नीका निया मेबोमी मा? मेम ने मेएँ! 15गुमीका मोशानुङ र्वाम्डिम बु, “सु़डाम आमा थो़म भ्रो़ गो मेरामडला न-थो़म रेम्बेउ मा सु़लाई रिखाम बोमु द्वाक्पु मेरामलाई रिखाम बेउ।”#प्रस ३३:१९ 16मेम्मिमका माम्चु़नीका गुलाई मु़चु़कु न होम्साका येट्मिमडिम मेएँ, लावो उनीमा त्वाकु दिदामका येट्मिडिम सो़। 17माम्चु़नीकु सिजेमडा मिश्रडाम फारो हपकु दुथाम आरेसाका र्वाक्मा बु, “आमा यु़म गानालाम रेम्बेसाका सुबुडा खोत्लेथो़ आमा नङ सो़मिनु़ र्वाक्पा नका गो गानालाई हप दु़म्बेट्निम बु।”#प्रस ९:१६ 18मेम्मिमका माम्चु़नीका सु़डला न-थो़म रेम्बोमु न बोमी मेरामडला ङा न-थो़म रेम्बोमी मा गुमीका उहेम मु़चु़कु न-गो लुङ होप्माम दु़म्बेन्मु न बोमी मेरामलाई मेम ङा बोमी।
क्वाकु सोजाम बनेबेपा मु़चु़ नुङ सोजाम
19कोङनिमका र्वामु चाम्मी, “हेङा माम्चु़नीका मु़चु़मिमलाई मुमा बेन्मी? हेङालोने माम्चु़नीकु नगोडाम ल्वा सु़का भोम्मु चाप्सु़ मा?” 20ए मु़चु़नी, माम्चु़नीकु कोर्थो़लाम जेपा इनीमा साखाम मिबु। क्वाकु सोजामका गोलाई हेङा आरेप्माम बनेबेङ्डी र्वा मा?#यशै २९:१६; ४५:९ 21कोदेप ङोल्मा क्वा कोङनिम डोक्पु खारीडा मोक्पा मा कोङनिम याक्के खारीडा मोक्पा सोजाम बनेबेपा साखाम क्वाकु सोजाम बनेबेपा मु़चु़नुङ मेदु़म मा?#यर १८:१-१०; २ तिमो २:२०-२१
22मेम्साकाङा माम्चु़नीनुङ वो उनीमा छोक्चो हाट्पा नुङ निया बेपा साखाम गुमी नुङ बु। लावो उनी छोक्चो हान्मु नुङ पुयु़लुबेन्मु घ्रेट्पा मु़चु़मिमलाई वो हापा इम्सिसाका लथाट्मिडी। 23मेम्मा गुइडला छो़म डोक्पु यु़म नुङ गुमीनुङ बाट्पा यु़म-झ्वाक्सी रेम्बोमु न बेम्डी। गुइ उनीमा न-थो़म रेम्बेपा सोजाम दु़स्ती। 24गुमीका येसाड्डामिम ने गुइ ङा सो़। गुमीका यहूदीमिमलाई कोङङा मेयेट्मिवा लावो वाङसामागोडाम मु़चु़मिमलाई वो येट्मिडी। 25माम्चु़नीका र्वाम्डिम ल्वा होशे र्वाक्मा माम्चु़नीलाम जेपा मु़चु़का आरेसाका र्याक्तु़म बु,
“उहेम मु़चु़ आमा मु़चु़ मेएँ
मेर्मिमलाई गो आमा मु़चु़ दु़म्बेत्तोमी,
ङादो रिखाम मेबेम्मामिमलाई वो
ओम्लो रिखाम बेउमी।”#होशे २:२३
26“मेम्मा गानी आमा मु़चु़ मेएँ
र्वाक्मामिम ङा हेल्लो लोवो दु़म्पाम बाट्पा
माम्चु़नीकु चो़-चु़सु़ र्वाक्साका छेला सो़सिनी।”#होशे १:१०
27माम्चु़नीलाम जेपा यशैयाका इस्राएलीमिमकु दुथाम आरे र्वा, #यशै १०:२२-२३“इस्राएलीकु चो़-चु़सु़मिम दिरिदिनडाम सेक्रे कोतिङा दु़म्मी लोवो कोङनिमका कोङङा सेल्सिमु ल्वामी। 28हेङालोने ङाचो़का सु़म्दिसेरडा दालाङा देन्दे ग्वाक्साका दु़म्सोमी।” 29यशैयाका ओराम ल्वा वो ङादोङा सो़यु़डु़म बु, “खोत्लेडाम डोक्पु यु़मनुङमा मिप्रङमाका इकीमा लागि कोङनिम चो़-चु़सु़मिम मेजु़ल्मिवाम माला ने गुइ सदोम नुङ गमोराडाम मु़चु़ होप्माम दु़म्सिवा।”#यशै १:९
यहूदी नुङ थो़र
30गो र्वामु माल्तोम ल्वा ओराम ङा सो़। वाङसामामिम माम्चु़नीकु न-गो होम्साका मेदोपा मु़चु़ बाम्डी। लावो मेर्मिम ने थो़रलु़सीलामका माम्चु़नीकु ङादोडा जो़पा न-गोकाम मु़चु़ दु़म्मिडी। 31लावो इस्राएलीमिमका ने माम्चु़नीकु जो़पा डु़म्ला ख्लक्साका माम्चु़नीकु ङादोडा जो़पा न-गोकाम दु़म्मु माल्मिडी लोवो दु़म्मु मेचाप्मिवा। 32हेङालोने मेर्मिमका थो़रमेलु़साका डु़म्लालाम कोङङा माम्चु़नीकु ङादोडा जो़पा दु़म्मु माल्मिडिम बाइडा। आरेसाका डु़म्ला होम्साका दोसाका मेर्मिमका ख्रीष्टलाम मेडेङा ल्वापा राप्लावाडा थो़रमेलु़मिवा। मेम्मिमका मेर्मिमकाम लागि ख्रीष्ट ने खेल तुक्पा लुङ होप्माम दु़म्मिडी। 33ख्रीष्टकु दुथाम माम्चु़नीका र्वाम्डिम होङङा माम्चु़नीकु सिजेमडा र्याक्मा बु, “रेप्नी, गो सियोनडा कोले साम्फ्ले लुङ जु़ल्पु, उहेम लुङडा मु़चु़मिमका खेल तुमी, मेरामका मेर्मिमलाई चार्सु़मी, लावो गुमीडा थो़रलु़पामिम सु़ वो क्रो़म लु़मु बासिक्पा मेदु़म्मी।”#यशै २८:१६
Currently Selected:
रोमी 9: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
