रोमी 8
8
माम्चु़नी-पेललाम ल्वापा त्वारो़म
1मेम्मिमका ख्रीष्ट येशूडा थो़रलु़पामिमलाई माम्चु़नीका देन्दे मेग्वामी। 2हेङालोने ख्रीष्ट येशूलाम त्वारो़म ल्वापा, माम्चु़नी-पेलकु डु़म्लाका छु़ल नुङ सिमुलाम रेट्पा डु़म्लाडाम गोलाई सेल्ङिडिमिम बु। 3छु़लनुङमा मु़चु़कु बादीखामका डु़म्ला होम्साका दोसाका बोमु मेचापा ल्वा माम्चु़नी उनी त्वाकाङा बेम्डी। माम्चु़नीका उनीमा त्वाकु तारापाचो़लाई छु़लचो़ मु़चु़ होप्माम दु़म्बेसाका थु़र्मिडी, मेम्मा मु़चु़मिमकु छु़ल हेम्मु लागि उनीमा तारापाचो़कु मिरो़म सासेसाका देन्दे ग्वाम्डी। 4त्वाकु मिरो़मडाम बादीखाम होम्साका मेएँ लावो माम्चु़नी-पेल होम्साका दोपामिमकाम लागि डु़म्लाका र्वाक्ताम ल्वा रोक्थिड्डाम बु। 5त्वाकु मिरो़मडाम बादीखाम होम्साका दोपामिमका मिरो़मकु बादीखामथो़ न सोकु़ लावो माम्चु़नी-पेल होम्साका दोपामिमका माम्चु़नी-पेल होम्साका ङा दोमु न सोकु़। 6मिरो़मडाम नसीहोमका दोपा मु़चु़ सिमुलाम ख्लकु़। लावो माम्चु़नी-पेल होम्साका दोपा मु़चु़का ने त्वारो़म नुङ नभ्रसी ल्वासु़। 7मिरो़मडाम नसीहोमका दोपा मु़चु़ माम्चु़नीकु कोर्थो़लाम बमिम दु़म। हेङालोने गुका डु़म्ला होम्साका बु़डु़म मेदु़म मा डु़म्ला होम्साका दोमु वो मेचाप्सु़। 8त्वाकु मिरो़मडाम नसीहोम बेपा मु़चु़का माम्चु़नीलाई गेर्सिबेन्मु मेचाप्सु़।
9आच्छाङा माम्चु़नीकु पेल गानीगोडा बुमी माला गानी त्वाकु मिरो़मगोडाम साखामडा मेएँ माम्चु़नी-पेलकु साखामगोडा दु़म्नी। कोङनिमनुङ ख्रीष्टकु पेल मिबु माला गु ख्रीष्टकाम दु़म्मु ङा मेचाप्सु़। 10ख्रीष्ट गानीगोडा बुमी माला छु़ल बेन्निमका इनीमा मिरो़म सिडाम लोवो माम्चु़नीकु ङादोडा जो़पा न-गोकाम दु़म्निमका इनीमा त्वारो़म ने हेल्लो लोवो दु़महोम बु। 11ख्रीष्टलाई सिमुलाम फम्खेट्पा माम्चु़नी-पेल गानीगोडा बुमी माला, मेराम पेलका इनीमा सिपा मिरो़मलाई वो सिमुलाम त्वारो़म ग्वानिमी।#१ कोर ३:१६
12मेम्मिमका वा-ल्वाकनी, इकीमा मिरो़मडाम नसीहोमका बोमु ङा बासी र्वाक्पा मिबु। 13हेङालोने इनीमा नसीहोमका दोनी माला गानी सिनी। लावो माम्चु़नी-पेलकु यु़मका इनीमा मिरो़मडाम बादु़खाम पार्नी माला गानी त्वारो़म ल्वानी, 14मा माम्चु़नी-पेलका रेम्बोमिमिम लाम्दीडा लाम्दिपा मु़चु़मिम ङा माम्चु़नीकु चो़-चु़सु़मिम सो़। 15हेङालोने गुइलाई डु़ल्चो़ दु़म्बेसाका आथावो ङिम लु़बेट्पा पेल मेएँ लावो गुइलाई माम्चु़नीका डु़ल्साड्डामिम जाउमो तारापाचो़ दु़म्बेट्पा माम्चु़नी-पेल ल्वास्तिमका गुइ माम्चु़नीलाई #गला ४:५-७“अब्बा, पाप” र्वाक्साका सो़म्दी बिइ।#मर्क १४:३६; गला ४:६ 16मेराम ने गुइ माम्चु़नीकु चो़-चु़सु़ र्वाक्साका माम्चु़नी-पेलका इकीमा पेलनुङ सो़म्डिम सो़। 17गुइ उनीमा चो़-चु़सु़ माला, ने उनीमा खुन्चु़म ल्वापा वो गुइ ङा सो़। माम्चु़नीलाममिम खुन्चु़म ल्वापा मा ख्रीष्टनुङ बोम्था खुन्चु़म ल्वापा सो़। गुमीनुङङा गुइ वो दु़खा इम्डी माला उनीमा यु़म-झ्वाक्सीडा गुइ वो दु़म्सी।
चङडा रोक्पा यु़म-झ्वाक्सी
18ओम्लो गुइ इम्डिमिम दु़खानुङ गुमीका गुइडला दिफु रेम्बोमिमिम यु़म झ्वाक्सी थो़म्मु मेघ्रेट्पा बु। 19सु़म्दिसेरडा प्रङ्सिट्पा खोत्लेम थोकका माम्चु़नीकु तारापाचो़मिम रेम्बेसिक्पा थारी नगोडा छो़म लन्थामी। 20हेङालोने प्रङसिट्पा ने हाम ना हामकाम दु़स्ताम बाइडा। लावो आरे दु़स्ताम ने उ त्वाप ङा दु़स्ताम मेएँ। प्रङ्स्ताम ल्वामिमका हाम हुम लन्थामिनु़ र्वाक्साका माम्चु़नीका आरे बेम्डिम बाइडा।#उत ३:१७-१९ 21प्रङसिट्पामिम पुयु़लुक्सीडाम वाङ दु़म्साका माम्चु़नीकाम चो़-चु़सु़मिमनुङ वाङ दु़म्सीडा कोले दु़म्मी। 22चो़च्चो़ कमु खापा मेसेमका हिम्बा इम्डु़मिम होम्साकाङा ओम्लोसम्म प्रङसिट्पामिमका वो दु़खा इम्तोङा बोमी र्वाक्पा गुइ चडिम बु।
23प्रङसिट्पा कोङङा मेएँ, माम्चु़नी-पेलका चङडा रेट्पा न भ्रसी ल्वामु लागि गुइ वो नगोनो दु़खा इम्तोङा बिइ। इकीमा माम्चु़नीका उनीमा त्वाकु तारापाचो़ दु़म्बेसामी मा इकीमा मिरो़म पुयु़लुमुलाम सेल्सामिनु़ र्वाक्साका गुइ लथाडी।#२ कोर ५:२-४ 24हेङालोने गुइ हाम हुम ल्वामु लागि ङा माम्चु़नीका गुइलाई सेल्साड्डामी। हाम हुम ल्वाउनु़ र्वाक्साका नगोडा लन्थामु सो़। मु़चु़का ङादोङा ल्वामु दु़स्तु़म ल्वा गुका नगोडा मेलथाडु़। ङादोङा दु़स्ताम ल्वा सु़का लथाडु़ मा? 25लावो गुइ मेल्वासिवाम ल्वा डार्पा न बिइ माला गुइ मेराम ल्वामु लागि इम्सिक्साका नगोडा लथाडी।
26गुइ याक्के थो़रनुङमा दु़म्सिमिम थारीका माम्चु़नी-पेलका ख्लो़सामी। हेसाका सो़म्दी बोमु बासिक्पा मेराम गुइ मेचमिम थारीका माम्चु़नी-पेल त्वाकाङा सो़मुङा मेयु़ट्पा बेसाका सो़म्दी बोमु ख्लो़सामी। 27माम्चु़नीका मु़चु़कु नगोडा हाम बु मेराम ल्वा चमी मा माम्चु़नी-पेलका हाम र्वामु माल्लु़म बु मेराम वो गुमीका चमी। हेङालोने माम्चु़नी-पेलका थो़रलु़पामिमकाम लागि माम्चु़नीकु न होम्साका सो़म्दी बेसाक्सामी। 28माम्चु़नीलाई रिखाम बेपा मा गुमीका उनीमा त्वाकु न होम्साका छेट्मिडिम मु़चु़मिमकाम लागि खोत्ले ल्वाडा माम्चु़नीका जो़पा दु़म्बेन्मी र्वाक्साका गुइ चडिम बु। 29उहेम-उहेमलाई माम्चु़नीका छेट्मिडिम बु, मेर्मिमलाई गुमीका उनीमा तारापाचो़ ख्रीष्ट येशू होप्माम दु़म्बेन्मु लागि हापा वा-ल्वाकमिमगोडाम खोत्लेडाम ङादोम तारापाचो़ ने येशू ख्रीष्टङा दु़म्मिनु़ र्वाक्साका गुमीलाई थुट्मिडी। 30गुमीका ङादोङा छेट्मिडिम मु़चु़मिमलाई वो येट्मिडी मा मेर्मिमलाई उनीमा ङादोडा जो़पा नगोकाम दु़म्बेट्मिडी। मेम्मा जो़पा न-गोकाम दु़म्पामिमलाई गुमीका यु़म-झ्वाक्सी ल्वापा वो दु़म्बेट्मिडी।
येशू ख्रीष्टडा माम्चु़नीकु रिखाम
31गुइ ओराम ल्वाकु दुथाम हाम र्वामु चाप्सी मा? माम्चु़नी गुइलाम बाम्सिमी माला इकीमा कोर्थो़लाम सु़ बमु चाम्सु़? 32माम्चु़नीका उनीमा तारापाचो़लाई वो मेडिट्मिवा मा इकीमा लागि सासेट्मिडी। इकीमा लागि उनीमा तारापाचो़ङा सासेट्पा माम्चु़नीका गुमीनुङ बाट्पा खोलेम थोक गुइलाई मेग्वाक्सामी मा? 33माम्चु़नीका छेट्मिडिम मु़चु़लाई सु़का मुमा बेन्मु चाप्सु़ मा? माम्चु़नी उनी त्वाकाङा मुमा मान्थिम दु़म्बेट्मिडिम बु। 34मेम्मिमका मेर्मिमलाई देन्दे ग्वामु चापा सु़ वो मेदु़म्मी हेङालोने ख्रीष्ट ङा मेर्मिमकु खोमडा देन्दे ल्वासाका सिम्डिम बु। गुमी सिम्डिम कोङङा मेएँ, मेरामडाम डोक्पु खारी ने गुमी सिमुलाम बम्गेम्डी। ओम्लो गुमी माम्चु़नीकु जो़पलाम बुमी मा इकीमा लागि माम्चु़नीनुङ सो़म्दी बेप्साक्पा मु़चु़ दु़म्मिडिम बु। 35गुइडला रोक्पा मिम्ताम-सो़र्ताम, दु़खा थारीका, ङिमलु़पा थारीका, पोमुकु दु़खाका, फम्सिमुकु दु़खाका, सेन्ला सो़सिपा थारीका, ङिमलु़पा थारीकु कातु़रु़का, ओर्मिम उहेम ल्वाका गुइलाई येशू ख्रीष्टकु रिखामलाम वाङ बोमु चाप्सा मा? 36माम्चु़नीकु सिजेमडा र्याक्मा बु,#भज ४४:२२
“गुकु गानीडला थो़रलु़त्तोकोमका इनीमा लागि हेल्लो लोवो सेन्मु माल्की,
गुकु फल्ला सो़सिमु खापा भेन्दा होप्माम ङा सो़।”
37ओर्मिम खोत्ले ल्वा दु़म लोवो गुइलाई रिखाम बेपा ख्रीष्टलामका ङा ओर्मिम ल्वाडा गुइ घ्ल्वास्तिम बु। 38हेङालोने उहेम ल्वाका वो ख्रीष्टकु रिखामलामका गुइलाई वाङ बोमु मेचाप्सा र्वाक्पा गुइ चडिम बु। ना सिमुलामका ना त्वारो़मका ना पाह्रीचो़मिमका ना मुनाङपेलमिमका ना ओम्लोम नुङ दिफु दु़म्पा ल्वामिमका, ना कोङनिम यु़मका, 39ना येप्पालाम ल्वाका, ना घ्लु़म्पा ल्वाका, ना प्रङसिड्डाम खोत्ले ल्वाका, येशू ख्रीष्टनुङ बाट्पा माम्चु़नीकु रिखामलामका गुइलाई वाङ बोमु मेचाप्सा।
Currently Selected:
रोमी 8: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
