रोमी 12
12
माम्चु़नीडा इनीमा त्वारो़म जु़ल्नी
1आमा द्वादीबुङ वा-ल्वाकनी, माम्चु़नीका गानीलाई रिखाम बोनिमी। मेम्मिमका गानी इनी सिपा मिरो़मलाई सेपा नुङ माम्चु़नीडा ग्वामु घ्रेट्पा बेसाका इनीमा त्वारो़म गुमीडा ग्वाक्नी र्वाक्साका गो छो़म र्वाङु। इनीमा न-गोका बोमु बासिक्पा आच्छाङाकाम सो़रलोले वो ओराम ङा सो़। 2सु़म्दिसेरडाम मु़चु़मिम होप्माम दु़म्मु मेमाल्नी, लावो इनी त्वाकु नगोलाम ख्लोसिट्निमा जो़पा दु़म्तो लक्नी। मेप्माम दु़म्मु चाप्नी माला, माम्चु़नीकु जो़पा नुङ गेर्सी द्वाक्पा ल्वा, मा माम्चु़नीकु न हेप्माम बु, मेराम होप्माम दु़म्मु बासिक्पा ल्वा हाम बु र्वाक्साका गानी इनी न-गोडा छाम्मु चापा दु़म्नी।
3माम्चु़नीका ग्वाङ्डिमिम दिदामलामका गो गानीलाई र्वाक्तोङा बेउ, त्वापलाई डोक्पु मेमिम्सिट्नी लावो माम्चु़नीका गानी खोत्लेलाई ग्वाक्निमिम थो़र होम्साका इनी त्वाप हेप्माम बुनी मेराम होम्साका कोङङा मिम्सिट्नी। 4#१ कोर १२:१२इकीमा मिरो़मडा हापा अंगमिम बुमी लोवो मेर्मिमकु खारी खोत्लेकाम कोलेङा मिबु, लावो खोत्लेकाम वाङ वाङ बु। 5मेम्साका ङा गुइ हापा बुइ लोवो गुइ ख्रीष्टकाम कोलेङा मिरो़म सो़ मा गुइ खोत्लेङा कोले कोङमीकु अंग सो़।
6 #
१ कोर १२:४-११
माम्चु़नीका उनीमा दिदामका गुइलाई ग्वाक्साडामिम वाङ वाङ राप्लावालाम उनीमा खारी बिइ। माम्चु़नीलाम जेमुचापा त्वाकु थो़रलु़सीडा गुमीलाम जेसी। 7थो़रलु़पामिमलाई ख्लो़पाका जो़होमका ख्लो़यु़नु़, माम्चु़नीकु सीसि सीमु चापाका सीसि सीट्नु़म बुनु़। 8मु़चु़मिमकु सो हन्बेट्पा राप्लावा ल्वापाका सो हन्बेट्नु़, खेरेला दु़म्पा मु़चु़मिमलाई ख्लो़मु राप्लावा ल्वापाका न-गोलामका ख्लो़यु़नु़, मण्डलीडाम ङाचो़ दु़म्मु राप्लावा ल्वापामिमका न-गोलामका ङाचो़कु खारी बु़नु़, न-थो़म रेम्बोमु राप्लावा ल्वापाका गेर्सी द्वाक्साका न-थो़म रेम्बु़नु़।
9मु़चु़कु मिक्सीलामडा रेम्बेपा रिखाम मेएँ लावो आच्छाङाकाम बेपा दु़म्नी। मेजो़पा ल्वा ङेट्निमा जो़पा ल्वा बेनिम बानी। 10त्वाकु वा-ल्वाक होम्साका रिखाम बेबेनी, त्वापडाम वो वाङमिमलाई हापा डोक्पु मिम्नी। 11इनी सो हन्बेसाका खारी बेनी, भ्रेपा मेदु़म्नी। इनीमा न-गोलामङा सो हन्बेसाका ङाचो़कु खारी बेनिम बानी। 12गानी इनी नगोडा हाम-हुम लन्थानिमिम ल्वाडा गेर्सी द्वाक्नी, दु़खा थारीडा इम्सिसाका बानी मा हेल्लो लोवो सो़म्दी बेनिम बानी। 13ङाचो़ येशू ख्रीष्टकु सेपा मु़चु़मिमकु खेरेलाडा ख्लो़नी, नेमडा रोक्पा बोच्चो़मिमकु चापे-डुपे बेनी।
14गानीलाई दु़खा ग्वाक्पामिमलाई जि ग्वाक्नी, लावो वाइतो मेबेट्नी।#मत्ती ५:४४; लूक ६:२८ 15गेर्सी द्वाक्पामिमनुङ गेर्सिट्नी। ख्रापामिमनुङ ख्राप्नी। 16त्वाप-त्वापगोडा दु़साका बानी, इनी त्वापङा डोक्पु मेलिसिट्नी लावो खोत्लेनुङ याक्के दु़म्साका बानी मा त्वापङा हापा थेट्पा मेलिसिट्नी।#हितो ३:७
17कोङनिमका गानीलाई मेजो़पा बेन्नी र्वाक्साका मेरामलाई वो मेजो़पा मेबेनी। खोत्ले मु़चु़मिमका डोक्पु मिम्मिडिम ल्वाडा कोङङा न सोक्नी। 18चाम्निमिमसम्म खोत्लेनुङ दु़साका बानी। 19द्वादीबुङ वा-ल्वाकनी, गानीलाई मेजो़पा बेपामिमडला गानी वो मेजो़पा मेबेनी, मेर्मिम माम्चु़नीकु ल्वाड्डा ङा जु़ल्नी। हेङालोने माम्चु़नीकु सिजेमडा र्याक्मा बु, “निया बेपा खारी आमा सो़। गो ङा मेरामकु फुलु़ सोक्पु।”#व्य ३२:३५ 20मिप्रङमाका र्वामी, “इनीमा स्वाक्चिमो मु़चु़ क्रु़म सिडाम बु माला मेरामलाई पोमु ग्वाक्नी, मेराम कोरा सिडाम बु माला मेरामलाई कु थो़ट्नी। आरे बोनिलो इनीमा स्वाक्चिमो मु़चु़काम क्रो़मका मुकु थु़र्मु बुसिमिम कोतिमङा दु़म।”#हितो २५:२१-२२ 21मेजो़पा ल्वाका गानीलाई घ्ल्वामु मेचाप्सु़नु़, लावो मेजो़पा ल्वालाई जो़पा ल्वाका घ्ल्वानी।
Currently Selected:
रोमी 12: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
