रोमी 13
13
साखामचो़कु ल्वाड्डा बुमु
1साखामचो़मिमका र्वामिमिम गुइ खोत्लेका थो़मु बासी। हेङालोने माम्चु़नीलाम रोक्पा साखामडाम वाङमिम उहेम वो साखाम मेदु़म। खोत्ले साखामचो़मिमलाई माम्चु़नीकाङा थुट्मिडिम सो़। 2कोङनिमका साखामचो़कु कोर्थो़लाम जे माला गुका माम्चु़नीका र्वामिमिम ल्वाकु कोर्थो़लाम जेमिम दु़म। आरे बेपामिमका ने देन्दे ल्वामी 3हेङालोने साखामचो़मिमडाम ने जो़पा खारी बेपा मु़चु़का ने मेएँ, लावो मेजो़पा खारी बेपा मु़चु़मिम ङिमु बासी। हाम साखामचो़मिमडाम मेङिनी? मेम माला जो़पा खारी बेनी, मा मेर्मिमलाम हुनाखाना बेला सो़न्सिट्नी। 4हेङालोने मेर्मिम ने इनीमा लागि जो़पा खारी बेपा माम्चु़नीकु डु़ल्चो़मिम सो़। लावो गानी मेजो़पा खारी बोनी माला ने ङिनी, हेङालोने मेर्मिमका मेडेङा कातु़रु़ मेबिम्सिमी। मेर्मिम ने मेजो़पा खारी बेपामिमडला देन्दे रेट्पा माम्चु़नीकु डु़ल्चो़मिम सो़। 5माम्चु़नीलाम देन्दे मेल्वाउनु़ र्वाक्साका कोङङा मेएँ, लावो आरे बोमु ने जो़पाङा सो़ र्वाक्पा त्वाकु जो़पा नेप्चीका मिम्साका वो गानी साखामचो़मिमका र्वामिमिम थो़मु बासी।
6 #
मत्ती २२:२१; मर्क १२:१७; लूक २०:२५ मेम्मिमका वो गानी कर सोमु बासी। हेङालोने साखामचो़मिम माम्चु़नीकाम लागि खारी बेपा मु़चु़ दु़म्साका उनीमा खारी बोमिमिम बुमी। 7सोमु बासिक्पा खोलेम थोक सोक्थाट्नी– कर सोमु बासिक्पालाई कर, कुथेर सोमु बासिक्पालाई कुथेर सोक्नी। मेम्साकाङा डोक्पु बोमु बासिक्पामिमलाई डोक्पु बेनी मा मेर्मिमका र्वामिमिम ल्वा थो़नी।
त्वाप-त्वापगोडा रिखाम बेबोमु
8रिखाम बेबोमुडाम वाङमिम ल्वाडा गानी सु़काम वो जेर मेपेनी। हेङालोने त्वाकु साउखोरेलाई रिखाम बोनी माला डु़म्लाका हाम र्वा मेराम होम्साका खोत्ले बोनिमिम दु़म। 9“गाना नाम्सु़रु़ मेबे, मु़चु़ मेसेडा, मेखुया, रारी मेबे” कोङङा ने मेएँ, वाङ डु़म्लाका र्वाक्ताम खोत्ले ल्वा ने “गाना त्वापलाई होम्साका साउखोरेलाई रिखाम बे” र्वाक्मा ल्वागोडा बु।#प्रस २०:१३-१५,१७; व्य ५:१७-१९; लेवी १९:१८ 10रिखाम बेपाका वाङमिमकाम लागि मेजो़पा मेबु़मी। मेम्मिमका रिखाम बोमु ङा डु़म्लाका र्वाक्ताम ल्वा बोम्सोमु सो़।
11रेप्नी, ओम्लो हेप्माम थारी रोक्तोङा बु़ र्वाक्साका गानी वो चनिम ङा बु। ङिमालाम ङोसिक्पा थारी दु़स्ताम बु, हेङालोने गुइ ङादो थो़रलुइडिम थारीडाम वो सेल्सिक्पा थारी फार्डाङा रोक्ताम बु। 12तुकुम्चिम हुक्तामा ओल रोमु खाप्डु़म बु। मेम्मिमका तुकुम्चिमगोडा बाट्पा मु़चु़मिमकाम होप्माम खारी बोमु डिसाका मेरामनुङ क्वाल्बा बोमु लागि ओलकु सेनामिम होङङा झो़म्सिडी। 13मेम्मिमका ओलडा बोमु घ्रेट्पा बेसाका खारी बिइ, एलेङगी बेपा, डु़सेवा, मेजो़पा न-गोका दोपा, नाम्सु़रु़, क्वाल्बा, नाचु़र बेसी मेनु़। 14मेम बोमु डिसाका जो़पा ये फम्सिक्मा होम्साका येशू ख्रीष्टकु जो़पा बासीदोसीडा लाम्दीइ। त्वाकु छु़लनुङमा मिरो़मडाम नसीहोमका मेदोसी।
Currently Selected:
रोमी 13: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.