रोमी 14
14
त्वाप-त्वापगोडा मुमा बे मेबेनी
1 #
कल २:१६
याक्के थो़रनुङमा मु़चु़लाई हुनाखाना बेनी, लावो गुका जेमिम ल्वाडा मुमा बेसाका रिबुसी मेकिट्नी। 2कोङनिम थो़रलु़पाका खोलेम थोक पेसी नु़ र्वाक्साका थो़र बु़, लावो याक्के थो़रनुङमा थो़रलु़पाका ने घ्रेनेम-योचु़म कोङङा पु़। 3खोलेम थोक पेपाका घ्रेनेम-योचु़म कोङङा पेपा थो़रलु़पालाई मेजो़पा मेमिम्नु़। मेम्साकाङा मेपेपाका पेपालाई मुमा मेबेट्नु़ हेङालोने मे याक्के थो़रनुङमा थो़रलु़पामिमलाई वो माम्चु़नीका येट्मिडिम सो़। 4वाङमिमकु डु़ल्चो़काम निया बेपा गानी सु़ मा? उमा नेमहपकाङा डु़ल्चो़कु खारी बेसी जो़पा बु डे मेएँ र्वाक्साका निया बोमी। जो़होमका खारी बोमु मेचापा डु़ल्चो़लाई ङाचो़काङा जो़होमका खारी बोमु चापा दु़म्बेन्मी।
5कोङनिमका कोलेममिम नेम वाङमिम नेमडाम डोक्पु मिम्मु चाप्सु़, लावो कोङनिमका खोत्ले नेम कोहोप्मामङा मिम्डु़। मेम्मिमका खोत्ले मु़चु़का त्वा-त्वाहोम नगोडा त्वाका थो़र बेम्मा ल्वाडा आच्छाङा मिम्मु बासी। 6कोलेममिम नेमडाम वो कोङमी नेम डोक्पु मिम्पा मु़चु़का माम्चु़नीलाई डोक्पु बेपा नका मेम बु़। खोत्लेम थोक पेपाका माम्चु़नीकाम लागि ङा पु़ हेङालोने मेरामका माम्चु़नीलाई आलासो़ र्वा। खोलेम थोक मेपेपाका वो माम्चु़नीकाम लागिङा मेपु़ मा मेरामका वो माम्चु़नीलाई आलासो़ र्वा। 7गुइ सु़ वो त्वाकाम लागि मेजेडी मा त्वाकाम लागि मेसिइ। 8गुइ नु़इ लोवो ङाचो़काम लागि ङा नु़इ मा सिइ लोवो ङाचो़काम लागि ङा सिइ। मेम्मिमका गुइ सिइ लोवो नु़इ लोवो ङाचो़काम लागिङा सो़। 9सिपा नुङ नु़पा खोत्ले मु़चु़काम लागि येशू ख्रीष्ट सिम्डी मा आथावो बम्गेम्डी। हेङालोने गुमी सिपा नुङ नु़पा खोत्लेकाम ङाचो़ दु़म्मु लागि मेम बेम्डी। 10मेम माला गानी इनीमा त्वाकु थो़रलु़पा वा-ल्वाकमिमलाई हेङा मुमा बेनिमी? हेङा इनीमा वा-ल्वाकलाई मेजो़पा मिम्निमिम? गुइ खोत्लेङा माम्चु़नीकु निया बेपा खोमडा येम्सिमु बासी।#२ कोर ५:१० 11माम्चु़नीकु सिजेमडा र्याक्मा बु,
“ङाचो़का र्वामी,
‘गो सिमुलाम बङ्गेङडोम होम्साका आच्छाङा र्वाङु,
खोत्ले मु़चु़मिमका आमा ङादोडा क्रचु़खुम बोमी।
खोत्लेका गोलाई माम्चु़नी र्वामिमा आमा नङ कोमी’।”#यशै ४५:२३
12मेम्मिमका गुइ बिइडिम खोत्ले खारीकु दुथाम माम्चु़नीनुङ त्वाकाङा सो़मु बासी।
पोमु थोककु दुथाम सु़काम वो न मेनो़बेट्नी
13मेम्मिमका गुइ सु़लाई वो मुमा बेसी मेनु़। गानी त्वाकु थो़रलु़पा वा-ल्वाकमिमगोडा छु़ल रेट्पा नुङ मेर्मिमलाई मेजो़पा बेपा ल्वा हेल्लो वो मेबेउ र्वाक्पा न बेनी। 14ङाचो़ येशूडा थो़र बेउतोमका गो ओराम ल्वा आच्छाङा चक्पु, बाम वो पोमुथोक त्वापङा मेसेपा मेदु़म। लावो कोङनिमका हाम-हुम पोमुथोक मेसेपा मिम्डु़ माला उमा लागि मेराम मेसेपा ङा दु़म। 15गानी पोनिमिम पोमुथोकका थो़रलु़पा वा-ल्वाकमिमकु न नो़ माला गानी मेर्मिमलाई रिखाम बोनिमिम मेदु़म। ख्रीष्ट उनी त्वापङा सिसाका सेल्मिडिम मु़चु़लाई इनीमा पेसी-डुसीकु ल्वाका पुयु़मेलुबेट्नु़। 16मेम्मिमका गानी जो़पा लु़न्निम ल्वालाई वाङमिमका मेजो़पा र्वामु मेल्वामिनु़। 17हेङालोने माम्चु़नीकु किब्दी र्वाक्मा पोमु-डुमुकाम लागि मेएँ, लावो माम्चु़नी-पेललाम रोक्पा जो़पा न-गो, न-भ्रसी, मा सेपा दु़म्साका गेर्सी द्वाक्तो बुमु सो़। 18उहेम मु़चु़का आरेसाका ख्रीष्टकु खारी बु़, मेरामका माम्चु़नीलाई गेर्सिबेडु़ मा मु़चु़मिमका वो जो़पा मिम्मी।
19मेम्मिमका गुइ न-भ्रसी बेट्पा नुङ थो़रलु़पामिमका त्वाप-त्वापगोडा सो हन्बेट्पा ल्वाडा कोङङा न सोकी। 20पोमुडुमुकाम लागि माम्चु़नीकु खारी पुयु़ मेलुबेट्नी। खोत्लेङा पोमुडुमुमिम सेपा दु़म मा पेसी नु़, लावो कोङनिमलाई माम्चु़नीकु लाम्दीडा लाम्दिमु भोपा पोमुथोक पोमु ने मेजो़पाङा सो़। 21सो़ पोमु, डु़ डुमु, वाङमिम मेजो़पा खारी बिइलो वाङमिम थो़रलु़पामिमलाई मेजो़पा बु़ माला ने मेपोमु, मेडुमुङा, मा मेबोमुङा जो़पा दु़म सो़। 22मेम्मिमका पोमु-डुमुडा बाट्पा थो़र, गानी नुङ माम्चु़नीगोडा कोङङा जु़ल्नी। उहेम मु़चु़ उ त्वाकाङा जो़पा बु र्वाक्पा मिम्डु़म ल्वाका उ त्वापलाई मुमा मेबेडु़, मेराम मु़चु़ ने आलाकाम सो़। 23लावो कोङनिमका ने उमा न गोडा मुर्सिक्तो पु़ माला मेराम मुमा बेन्ला सो़सी, हेङालोने गुका थो़रलु़साका पु़डु़म मेएँ। थो़र मेलु़साका बेम्मा खोत्ले ल्वा ने छु़ल सो़।
Currently Selected:
रोमी 14: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.