PURA' 17
17
Abpa' Rat Bang Batu
(Iap 20.1–13)
1 #
Iap 20.2–13
Idi amung lun Israil nenalan rat su luk ali-ali déi' Sin. Ideh mubuh maya' ecuk Tuhan. Idi ideh nelupo déi' Repidim. Iamo' na luk idi abpa' rupendeh. 2Idi ideh nengedureng ni Musa, kebaladeh, “Maré abpa' rupen kai.” Iamo' kebala Musa nedeh, “Ngudeh muyuh ngedureng negku? Ngudeh muyuh nutun Tuhan?”
3Idi lun Israil pelaba paring. Idi ideh nengedureng ni Musa, kebaladeh, “Ngudehké iko nguit nekai remuat rat bang bawang Masir, pad ngaté nekai, dengan anak-anak kai idi aya' kai ku paring?”
4Idi Musa nesembayang inan Tuhan, kesembayangneh, “Anun luk ruenku kuan pupu ini? Na mio ideh mitung negku ku batu!”
5Idi kebala Tuhan ni Musa, “Nalan rat pa kiung pupu ineh idi nguit pebaya' namu tuda'-tuda' lun rayeh rat arang lun Israil ineh. Idi teh nguit rukudmu luk nepimabpet Abpa' Nil idi nalan. 6Idi Ui tuped déi' pa luun pegkung batu luk déi' Sinai. Do' iko necat pegkung batu ineh, idi rat bang ineh abpa' remuat pad pupu ineh miak ngirup.” Kudeng ineh luk inau' Musa pa kiung lun rayeh Israil.
7Idi su ineh titen “Tutun” idi “Kedaluh,” ngaceku lun Israil pangeh nepekedaluh idi nenutun Tuhan, kebaladeh, “Inanké Tuhan arang tau, kian na?”
Bunu' Dengan Lun Amalek
8Idi lun Amalek nacing idi pebunu' nelun Israil déi' Repidim. 9Idi kebala Musa ni Yusak, “Mili' tuda'-tuda' burur iten tau, idi amé' pebunu' nelun Amalek nebpa. Ui miak tuped luun buduk surud ineh, idi ngimet rukud luk biré Allah kuanku.” 10Idi Yusak nenganau' maya' kudeng luk icuk Musa neneh idi iné' pebunu' nelun Amalek. Iamo' Musa, Arun, idi Hur pangeh numak luun buduk surud. 11Idi kareb Musa nengegenang langenneh, lun Israil metueh. Iamo' kareb ieh nengererep langenneh, lun Amalek metueh. 12Kareb ticu' Musa merur, idi didueh nengalap sebuleng batu inanneh tudo. Didueh nengegenang langenneh, sebuleng selipa idi sebuleng selipa, pad langenneh na rurep macing aco macep. 13Idi Yusak nengelaya' nelun Amalek.
14 #
Bad 25.17–19; 1 Sem 15.2–9 Idi kebala Tuhan ni Musa, “Ngayud amung ini mangun ku aceh terawé, idi mada' ni Yusak: Ui miak ngelaya' nelun Amalek pad ideh na teruayen!” 15Idi Musa nemudut aceh bubpun idi neneten ineh, “Tuhan ineh bedéraKu.” 16Kebalaneh, “Ngegenang ticu'mu pa luun bedéra Tuhan! Tuhan pebunu' nelun Amalek ineh macing ruked-ruked.”
Currently Selected:
PURA' 17: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
