PURA' 18
18
Yitro Ngikak Ni Musa
1Idi Yitro, iban Musa luk imam déi' Midian, neninger ratnan luk inau' Allah kuan i Musa idi kuan lun Israil, kareb Ieh nenguit nedeh remuat rat bang bawang Masir. 2#Pur 2.21–22 Idi Yitro nenguit ni Sipora, awan Musa, luk ticanneh ineh, iné' ni Musa, 3#Kek 7.29 idi anak deléineh luk dueh, ieh ineh Gersom idi Elieser. (Kebala Musa, “Ui ini mangun ku lun sakai bang bawang baken”; idi ieh neneten ngadan sebuleng anakneh, Gersom. 4Idi teh kebalaneh, “Allah tamanku nengedengan negku, pad ui nepuit ratnan pelapet raca' Masir”; idi ieh neneten ngadan sebuleng anakneh, Elieser.) 5Yitro nenated awan idi dueh anak deléi Musa nacing neneh déi' su luk ali-ali, su luk inan Musa nelupo muneng ku pegkung Allah. 6Ieh pangeh nengecuk mada' ni Musa, “Ui, ibanmu Yitro, amé' namu idi nguit awanmu dengan anakneh luk dueh.” 7Petacu Musa iné' papu' neneh. Idi ieh netekunal pa kiungneh, idi nemuen neneh. Idi didueh nengitun ulun didueh. Idi petacu didueh nesemuet bang lepo Musa. 8Idi Musa nemada' ni Yitro ratnan amung luk inau' Tuhan kuan raca' Masir idi anak itinneh, pelé Ieh nemuit nelun Israil ratnan amung susa' luk nepetulu nedeh arang dalan, idi kudeng apeh Tuhan nemuit nedeh. 9Yitro pelaba awang niat kareb ieh neninger bala ineh, 10kebalaneh, “Ngubur Tuhan luk pangeh nemuit nemuyuh ratnan imet raca' Masir idi anak itinneh luk nenaban nemuyuh. 11Nekini ui kali' Tuhan meluun rayeh ratnan amung allah baken, ngaceku Ieh pangeh nemuit nelun Israil rat bang imet lun Masir, kareb lun Masir ineh megateh niat nedeh.” 12Idi Yitro nemaré luk sabpen idi luk barén kuan Allah. Idi Arun dengan amung lun rayeh Israil pana' nacing idi nekuman peruyung dengan iban Musa pa kiung Allah.
Lun Luk Mutut Besara' Kinikit
(Bad 1.9–18)
13Kenebpa idi Musa nemutut besara' lun mula', rat pekak macing malem. 14Kareb Yitro nenier amung kekamen Musa ineh, idi keburi'neh, “Anun luk ruenmu kuan lun mula' ineh? Ngudeh iko sebuleng mo' mutut ukum ini, idi amungdeh tuped pa kiungmu rat pekak macing malem?”
15Idi kebala Musa, “Ui nganau' kudeng ini, ngaceku lun mula' macing negku pad kali' pian Allah. 16Idi kudeng dueh burur pekedaluh, idi didueh amé' papu' negku pad ui mutut ukum luk matu kuan didueh, idi mada' nedidueh ratnan dalan idi ukum Allah.”
17Iamo' kebala Yitro, “Na do' kudeng luk inau' mineh. 18Iko iuk pelaba erur, do' iko idi pupu ini luk denganmu pana'. Ngaceku kekamen ini pelaba berat kuanmu, ini na mekatau'mu sebuleng. 19Iamo' nekini ninger iko balaku. Ui sikal ngayud namu. Idi Allah nengan namu! Idi iko tareh pupu ini pa kiung Allah. Iko nguit besara'deh pa kiung Allah. 20Petulu iko mada' nedeh ukum idi bada', idi mada' nedeh dalan luk petulu béndeh, idi amung kekamen luk miak ruendeh. 21Iamo' do' iko mili' tuda'-tuda' lun luk mileh mangun ku lun rayeh pa luun meribu burur, meratu burur, limeh ngepulu' burur, idi pulu' burur. Idi do' ideh lun luk matot inan Allah, idi luk inan merapet, ieh ineh lun luk na ngalap suap. 22Do' nima' nedeh megéi' mutut besara' arang lun mula'. Iamo' amung besara' luk rayeh miak itendeh amé' pa kiungmu. Iamo' amung besara' luk isuut, do' ieh uendeh mutut. Kudeng ineh idi kekamenmu meran. Do' ideh ngalap babpat kekamen denganmu. 23Kudeng iko nganau' luk kudeng ineh, maya' bala Allah, idi iko miak tuman ngimet kekamen ini, idi amung pupu ini miak muli' dengan pedo'.”
24Idi Musa neninger bala Yitro ineh. 25Idi rat arang lun Israil ineh ieh nemili' tuda'-tuda' lemulun luk mileh, kinikitneh mangun ku lun rayeh pa luun meribu burur, meratu burur, limeh ngepulu' burur, idi pulu' burur. 26Idi ideh megéi' mutut besara' arang pupu ineh. Idi besara' luk rayeh itendeh amé' pa kiung Musa. Iamo' besara' luk isuut uendeh mutut.
27Pangeh ineh Musa nenima' ibanneh ineh muli' amé' bang bawangneh sebuleng.
Currently Selected:
PURA' 18: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
