PURA' 23
23
Putut Besara' Luk Mesiri
1 #
Pur 20.16; Uk 19.11–12; Bad 5.20 “Aleg iko nguit bala luk mebalih. Idi aleg iko ngedengan lemulun luk dat idi mangun ku lun nekali' luk na matu. 2Aleg iko maya' bala lun mula' nganau' luk dat. Idi aleg iko mangun ku lun nekali' luk mebaken maya' lun mula' ineh, pad na maya' luk matu. 3#Uk 19.15 Idi teh aleg iko ngeran sala' lun masi' pa kiung lun luk mutut besara'.
4 #
Bad 22.1–4
“Kudeng iko kali' sapi' lun luk museh namu idi keladai luk meraruh, do' iko ngelubed neneh dengan mesaget. 5Kudeng iko kali' keladaineh meluka' ngaceku berat babehneh, aleg iko nima' neneh. Do' iko nengan neneh idi ngiding luk baben keladai ineh.
6 #
Uk 19.15; Bad 16.19 “Aleg mutut besara' lun masi' maya' dalan luk na mesiri. 7Aleg iko ngadu' lemulun dengan mebalih. Idi aleg maré ukum maté kuan lemulun luk na mesala' idi luk matu. Ngaceku Ui ngukum lemulun luk nganau' luk kudeng ineh. 8Idi teh aleg iko ngalap suap, ngaceku suap ineh muser mateh lemulun luk mileh, idi ngekilu' bala lemulun luk matu.
9 #
Pur 22.21; Uk 19.33–34; Bad 24.17–18; 27.19 “Idi teh, aleg iko ngedereh nelun sakai. Muyuh kali' niat lun sakai, ngaceku muyuh pana' mangun ku lun sakai bang bawang Masir atun.
Lak Luk Ketudu' Idi Aco Luk Ketudu'
10 #
Uk 25.1–7
“Idi anem lak kinioneh do' iko nganau' lati' idi kabun pana', idi ngalap uli'neh. 11Iamo' lak luk ketudu' aleg nganau' lati' idi kabun luun tana'mu ineh, pad lun luk masi' miak kuman luk mulun su ineh. Idi elaneh miak kenen pung luk meliput. Kudeng ineh teh kabun anggurmu idi saitunmu.
12 #
Pur 20.9–11; 31.15; 34.21; 35.2; Uk 23.3; Bad 5.13–14 “Do' iko ngakem anem aco kinioneh. Iamo' aco luk ketudu' aleg iko ngadem, pad sapi' idi keladaimu pana' miak ucu'. Idi demulun idi sakaimu pana' miak ngato erurdeh.
13“Ui ini Tuhan. Do' ninger amung balaKu. Aleg sembayang nan allah luk baken, idi aleg neten ngadandeh.
Teluh Irau Luk Rayeh
(Pur 34.18–26; Bad 16.1–17)
14“Teluh kua' selak do' iko nganau' aco rayeh kuanKu. 15#Pur 12.14–20; Uk 23.6–8; Iap 28.17–25 Bang bulan Abib, ieh ineh bulan luk inanmu remuat rat bang bawang Masir, do' nginita Aco Rayeh kuman Ruti luk Na Lamud, maya' kudeng luk bida'Ku namu. Tudu' aco kinioneh do' iko kuman ruti luk na lamud. Aleg amé' pa kiungKu dengan palad luk na uang.
16 #
Uk 23.15–21; Iap 28.26–31 #Uk 23.39–43 “Do' iko nginita Aco Rayeh Ngeranih teh, ieh ineh kareb pun ngeranih.
“Idi teh do' ngerawé Aco Rayeh Lepo kareb udung lak, kareb iko ngamung uli' rat bang lati'mu. 17Do' amung lun deléi amé' pa kiung Tuhan Allah teluh kua' selak.
18“Aleg iko maré ruti luk inan lamud dengan pung luk kereten kuanKu. Idi aleg nima' lemak ratnan luk biré Negku ketecan macing kenebpa.
19 #
Bad 26.2; Pur 34.26; Bad 14.21 “Amung bua' luk pun ilap ratnan lati'mu do' nguit semuet bang ruma' Tuhan Allahmu.
“Aleg iko nanek anak dumba kian amék ku rata tinanneh.
Jani' Idi Bada'
20“Ui ngecuk aceh melaikat amé' pa kiungmu pad matar namu idi nguit namu macing su luk tinina'Ku ineh. 21Ninger idi maya' balaneh. Idi aleg muyuh metueh rat neneh, ngaceku na ieh maré do' ku sala' muyuh. Ngaceku ngadanKu idi neneh. 22Iamo' kudeng iko maya' balaneh, idi nganau' amung luk bida'Ku, idi Ui miak metueh ratnan amung bunu'mu. 23MelaikatKu ineh miak nalan pa atunmu, pad nguit namu semuet bang bawang lun Amori, lun Hiti, lun Prisi, lun Kanaani, lun Hiwi, idi lun Yebusi. Idi Ui miak ngaté nedeh. 24Aleg iko ngubur idi tekeradung pa kiung allahdeh ineh, idi sembayang nedeh. Aleg iko maya' lawé sembayangdeh ineh. Iamo' do' iko ngusag akangdeh, idi mila' amung ulungdeh. 25Kudeng muyuh sembayang inan Tuhan Allah muyuh, idi Ui miak ngeperuan nemuyuh ku akan idi luk rupen muyuh. Idi Ui ngado amung ét rat arang muyuh. 26Bang bawangmu na decur luk musul anak idi luk na anak. Ui miak maré ulunmu mekadang.
27“Ui nganau' pupu luk sikal metueh rat namu matot Negku. Idi Ui miak ngagap pupu luk ulekmu. Idi Ui nganau' amung bunu'mu buro rat namu. 28Idi teh Ui ngagau bunu'mu, idi ngusu amung lun Hiwi, lun Kanaani, idi lun Hiti rat pa atunmu. 29Idi baken bang selak mo' Ui ngusu nedeh, pad bawang ineh na dat ali, idi pad pung luk meliput na pelaba ula'. 30Dengan ulai-ulai Ui miak ngusu nedeh, pad muyuh iuk amé' mula' idi ngalap bawang ineh. 31Ui nganau' lakan bawangmu rat Abpa' Pisui#23.31 Abpa' Pisui, ieh ineh Abpa luk Mesia'. macing Abpa' Pirat, idi rat Abpa' Rayeh macing su luk ali-ali. Ui maré lun bang bawang ineh bang imetmu, pad iko ngusu nedeh rat pa kiungmu. 32Idi aleg iko nganau' jani' kuandeh idi kuan amung akangdeh. 33Aleg ideh tudo bang bawangmu, pad ideh na nganau' namu mesala' Negku. Kudeng iko sembayang inan akangdeh, kali' rungen iko mekaneh abpung.”
Currently Selected:
PURA' 23: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
