PURA' 24
24
Jani' Ini Litep
1Kebala Tuhan ni Musa, “Mudik iko idi amé' papu' Negku dengan Arun, Nadab, Abihu, idi tudu' ngepulu' lun rayeh Israil, idi tekeradung sembayang rat mado. 2Idi iko sebuleng amé' muneng Negku. Iamo' aleg kuma' baken amé' muneng. Idi aleg lun mula' mudik pegkung pana'.”
3Musa iné' mada' nelun mula' amung bala Tuhan. Idi amungdeh peranga' nengor bala ineh, kebaladeh, “Amung ukum ini luk bila Tuhan, kai miak maya'!” 4Idi Musa nengayud amung bala Tuhan. Idi pekak uka-uka, ieh nenganau' aceh bubpun su buten irang surud ineh, idi ieh nenaped pulu' dueh batu maya' kinula' pulu' dueh pupu Israil. 5Idi ieh nengecuk tuda'-tuda' anak adi' lun Israil idi ideh nengeseb baré kuan Tuhan, idi ngeret tuda'-tuda' sapi' deléi mangun ku baré luk nguit pedo' inan Tuhan. 6Musa nengalap sebuang dara' ineh idi ieh nenganau' ineh bang tuda'-tuda' bigan, idi sebuang ratnan dara' ineh nekumubpurneh bubpun ineh. 7Idi ieh nengalap surat pejani' ineh, idi ieh nemaca' ineh pedingeren pupu ineh. Idi kebaladeh, “Amung luk bida' Tuhan ineh, kai miak maya'.”
8 #
Mat 26.28; Mrk 14.24; Luk 22.20; 1 Kor 11.25; Ibr 10.29; 9.19–20 Pangeh ineh Musa nengalap dara' ineh, idi ieh nengisak ineh luun pupu ineh, idi nepebala, “Ini dara' pejani' luk litep Tuhan kuan muyuh kareb Ieh nemaré amung ukum ini.”
9Idi Musa mudik dengan Arun, Nadab, Abihu, idi tudu' ngepulu' lun rayeh Israil. 10Idi ideh nenier Allah lun Israil. Idi pa liang kukudNeh inan aceh luk kudeng tapin ratnan batu luk mebata' langit. 11Allah na nengukum nelun luk nguyut pupu Israil ineh. Iamo' kareb ideh kali' Neneh, idi ideh nekuman idi nengirup.
Musa Déi' Pegkung Sinai
12Idi kebala Tuhan ni Musa, “Mudik iko teh amé' papu' Negku, idi tudo tungé'. Ui sikal maré namu dueh batu tebalad, ieh ineh bala idi ukum luk pangeh inayudKu ku mada' nedeh.” 13Idi Musa nenalan dengan rurumneh Yusak, idi didueh mudik pegkung Allah ineh. 14Idi kebala Musa nelun rayeh-rayeh ineh, “Nganét ieni muyuh pad kai lemubed. Arun idi Hur idi dengan muyuh. Idé luk inan luk tunin, do' amé' matun nedidueh.”
15Musa mudik, idi laput netemurun nemapen pegkung ineh. 16Idi rasat Allah mudeng luun Pegkung Sinai ineh, idi anem aco kinioneh laput nemapen pegkung ineh. Idi aco luk ketudu', Tuhan nenawar ni Musa ratnan uned laput ineh. 17Rasat Allah melagan mepad kudeng apui luk ngeseb buduk pegkung ineh su siren lun Israil. 18#Bad 9.9 Idi Musa nesemuet uned-uned laput ineh idi numak pegkung ineh. Idi ieh netudo luun pegkung ineh apat ngepulu' aco idi apat ngepulu' dacem kinioneh.
Currently Selected:
PURA' 24: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
