PURA' 26
26
Lepo Su Luk Inan Papu' Tuhan
(Pur 36.8–38)
1“Idi do' nganau' Lepo su luk inan papu' Tuhan ratnan pulu' pekatu kibung ratnan kibung pu luk inuper idi luk do'. Idi ayuneh mebata' melaco, sia' merirem, idi sia' melidang luk tibaruh do'-do' dengan melaikat karub. 2Idi kikadang sepekatu kibung ineh tudu' ngedepeh, idi pipangneh medepeh. Idi amung kibung ineh mepad tari. 3Do' nutum limeh pekatu kibung petutum. Kudeng ineh teh limeh pekatu kibung luk baken. 4Do' iko nganau' tuda'-tuda' lalid kibung luk bata' melaco iring sebuleng kibung luk limeh tutum ineh. Idi nganau' kudeng ineh luun iring kibung luk limeh tutum ineh teh. 5Do' nganau' limeh ngepulu' lalid paped sepekatu kibung luk limeh tutum ineh, idi teh limeh ngepulu' lalid paped sepekatu kibung luk limeh tutum ineh teh. 6Idi teh do' nganau' limeh ngepulu' ood ratnan amas, ku nutum dueh pekatu kibung ineh pad ineh mangun ku Lepo su luk inan papu' Tuhan.
7“Idi do' nganau' ducungneh ratnan pulu' aceh pekatu kibung luk inau' ratnan buluh amék. 8Idi amung ineh mepad kirayeh, ieh ineh tudu' depeh setangal kikadangneh, idi medepeh bétneh. 9Do' nutum limeh pekatu kibung ineh petutum. Kudeng ineh teh anem pekatu luk baken. Idi tutum luk keanem do' ieh lapien lepi' dueh munung tanga' ineh. 10Idi do' nganau' limeh ngepulu' lalid paped sepekatu kibung luk baken ineh teh. 11Idi do' nganau limeh ngepulu' ood tekaling, idi nuet ood ineh bang lalid kibung ineh, pad dueh kibung ineh mangun ku sebuleng ducung. 12Nima' ela tutum seluk keanem tekito pesulak pa keted Lepo. 13Idi semikuh pa selipa, idi semikuh pa selipa tekito pekop Lepo ku mapen ineh.
14“Idi do' nganau' dueh papen Lepo ineh teh, sebuleng ratnan kubil dumba deléi luk inau' mesia', idi sebuleng ratnan kubil luk do', ku papen luk pa luun.
15“Idi do' nganau' tuda'-tuda' kayuh ku tulang ratnan kayuh pirur kuan Lepo ineh. 16Idi kikadang sepekatu kayuh ineh, dueh depeh setangal, idi pipangneh semikuh setangal. 17Idi do' anid-anid kayuh ineh uen nap pad ideh miak petutum. 18Do' nganau' dueh ngepulu' kayuh ku tulang kuan iring pa kabing busat aco, 19idi apat ngepulu' alen pirak pa liangdeh, dueh alen nan sepekatu kayuh. 20Idi nganau' dueh ngepulu' kayuh ku tulang kuan iring luk pa tinueh busat aco, 21dengan apat ngepulu' alen pirak, dueh alen pa liang sepekatu kayuh. 22Idi iring pa keted, ieh ineh pa acep aco, do' nganau' anem pekatu kayuh ku tulang, 23idi dueh kayuh anid lidung. 24Idi kayuh luk ku lidung ineh tinutum rat pa beneh macing pa luun. Idi kayuh luk ku dueh lidung miak ruen kudeng ineh. 25Ngaceku ineh, inan ualuh pekatu kayuh ku tulang dengan pulu' anem alen pirak, dueh pa beneh anid-anid kayuh ineh.
26“Idi do' nganau' pulu' limeh atang ratnan kayuh pirur, limeh pekatu kuan selipa Lepo ineh, 27idi limeh pekatu kuan selipa, idi limeh pekatu kuan iring luk pa keted pa acep aco. 28Idi atang luk nan uned, do' ieh macing nan amung kayuh ineh, rat paped selipa suet paped selipa. 29Idi teh do' iko ngakep amung kayuh ineh ku amas, idi nganau' amung kelabung su atang ineh pana' ratnan amas, idi ngakep amung atang ineh ku amas. 30Do' iko mudut Lepo ineh maya' ayu luk bida'Ku namu déi' luun pegkung ineh.
31“Idi do' nganau' aceh dicing ratnan kibung luk do', idi kibung pu luk inuper, idi luk ayu bata' melaco, sia' merirem, idi sia' melidang, tibaruh do'-do' ku melaikat karub. 32Idi ngekito ineh ku ood amas nan apat diri kayuh pirur luk kikep ku amas, idi apat alenneh ratnan pirak. 33#Ibr 6.19; 9.3–5 Idi do' ngekito dicing ineh pa liang ood luk iang apo, idi ngerareng Pati' Pejani' luk inan dueh batu luk tebalad ineh pa keted dicing ineh. Idi dicing ineh ku alad arang Su luk Meligan dengan Su luk Meluun Ligan. 34Idi ngerareng kakeb su luk inan pedo' ineh pa luun Pati' Pejani'. 35Idi bal selipa Su luk Meluun Ligan ineh, do' iko ngerareng méja pa tinueh busat aco, idi kukud dawan ineh petutup iring luk pa kabing busat aco.
36“Idi munung tanga' Lepo ineh do' nganau' aceh dicing, ratnan kibung pu luk do', idi luk inuper, ayuneh bata' melaco, sia' merirem, idi sia' melidang; idi luk tibaruh. 37Idi do' nganau' kuan dicing ineh limeh pekatu diri kayuh pirur, uen ngakep ku amas. Idi amung oodneh pana' amas, idi do' ngurai limeh alen tekaling kuan diri ineh.
Currently Selected:
PURA' 26: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
