PURA' 27
27
Bubpun
(Pur 38.1–7)
1“Idi do' nganau' aceh bubpun luk apat lebping ratnan kayuh pirur, limeh sikuh kadangneh, idi limeh sikuh pipangneh, idi teh teluh sikuh dita'neh. 2Idi do' iko nganau' unga anid lidungneh. Idi do' unga ineh mulang rat su ineh. Idi ngakep amung ineh ku tekaling. 3Idi teh do' iko nganau' belanga' inan ngerareng abuh, idi luk ku ngook abuh, bigan, serupang, idi su luk inan bareh. Idi do' nganau' amung repapeh ineh ratnan tekaling. 4Idi nganau' teripin tekaling. Idi anid lidungneh do' nganau' apat kelabung tekaling. 5Idi nganau' ineh pa liang iring bubpun, pad macing tangalneh. 6Idi do' iko nganau' kayuh pirur ku mirir bubpun ineh, idi ngakep neneh ku tekaling. 7Idi nuet kayuh birir ineh bang kelabung ineh, pekop iring bubpun ineh, pad ieh miak uen mirir. 8Idi nganau' neneh melubang ratnan bangar, maya' kudeng ayu luk bida'Ku namu déi' luun pegkung.
Natad Lepo Su Luk Inan Papu' Tuhan
(Pur 38.9–20)
9“Do' nganau' natad Lepo su luk inan papu' Tuhan, idi ngalad ineh ku dicing ratnan kibung pu luk inuper. Kikadang dicing luk pa kabing busat aco, dueh ngepulu' limeh depeh. 10Idi dueh ngepulu' diri ineh perapu alenneh ratnan tekaling, iamo' amung ood idi repit diri ineh ratnan pirak. 11Kudeng ineh teh pa tinueh busat aco. 12Kikadang dicing luk pa acep aco pulu' dueh depeh setangal, dengan diri idi pulu' alen. 13Kudeng ineh teh pipang pa atun natad pa busat aco ineh pulu' dueh depeh setangal. 14-15Pekop munung tanga' do' inan teluh depeh teluh sikuh dicing, dengan teluh diri idi teluh alen. 16Idi tanga' natad ineh inan aceh dicing limeh depeh kikadangneh, ratnan kibung pu luk inuper, ayuneh bata' melaco, sia' merirem, idi sia' melidang luk tibaruh, dengan apat diri idi apat alen. 17Amung diri pekelibut ineh do' su tutumneh inan bakar pirak, idi ooddeh ratnan pirak teh. Idi alen-alendeh ratnan tekaling. 18Kikadang natad ineh dueh ngepulu' limeh depeh. Pipangneh pulu' dueh depeh setangal. Idi kidita'neh medepeh semikuh dengan dicing ratnan kibung pu luk do'. Idi alen-alenneh ratnan tekaling. 19Idi amung repapeh kuan Lepo ineh, dengan papek luk inan ngabet dicing, idi papek luk inan ngabet dicing natad pana', ruen ratnan tekaling.
Ratnan Ngasa' Lapung
(Uk 24.1–4)
20“Do' iko ngecuk nelun Israil nguit amé' namu umau saitun luk meluun do' ku umau lapung, pad lapung ineh miak uen nutud anid alem. 21Idi bang Lepo su luk inan papu' Tuhan ineh bal selipa dicing luk pa atun Pati' Pejani, do' Arun temina' dengan anak-anakneh pa kiung Tuhan rat malem macing pekak. Idi ini aceh ukum luk meruked kuan lun Israil pad macing ku anak inul.
Currently Selected:
PURA' 27: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
