PURA' 30
30
Méja Luk Inan Ngeseb Uar Luk Do' Buen
(Pur 37.25–28)
1“Do' iko nganau' aceh méja luk inan ngeseb uar luk do' buen ratnan kayuh pirur. 2Do' ieh apat lebping, semikuh kadangneh, idi semikuh pipangneh. Idi kidita'neh dueh sikuh, idi do' unganeh pekatu luun ineh. 3Idi ieh uen ngakep ku amas luk do', do' luunneh, iringneh, idi amung unganeh. Idi do' ieh ruen belipid amas pekelibut. 4Idi do' nganau' dueh kelabung amas pa liang belipid ineh pekop iringneh, su luk inan kayuh birir, pad ieh miak uen mirir. 5Do' iko nganau' kayuh luk ku mirir ineh ratnan kayuh pirur, idi ngakep neneh ku amas. 6Idi do' nganau' méja ineh pa atun dicing luk tekito pa atun Pati' Pejani' luk petutup ku kakeb su luk inan pedo' luk pa luun Pati' Pejani' ineh, ieh ineh su luk inanKu papu' namu. 7Idi do' Arun ngeseb umau luk do' buen anid-anid pekak luun méja ineh, kareb ieh pangeh nengasa' dawan. 8Kudeng ineh teh kareb ieh nutud lapung ineh pa malem, do' ieh ngeseb uar luk do' buen. Dalan ngeseb umau luk do' buen ineh lutep macing ku anak inul. 9Aleg muyuh ngeseb uar luk do' buen luk na petulu, baré luk sabpen, idi baré luk kenen, luun bubpun ineh. Idi aleg muyuh ngutang baré luk rupen luunneh. 10Selak sekua' do' Arun ngisit dara' luk barén ku ngiu' sala' idi nguit pedo' luun apat unga bubpun ineh. Sekua' selak do' ieh nganau' pedo' luun bubpun ineh arang muyuh macing ku anak inul. Do' bubpun ineh meligan tu-tu pa kiungKu.”
Usin Uli' Kuan Lepo Su Luk Inan Papu' Tuhan
11Kebala Tuhan ni Musa, 12“Kareb iko ngiap nelun Israil, do' anid-anid deléi maré inan Tuhan usin ku uli' ulundeh, pad na dereh macing nedeh kareb iko ngiap nedeh. 13#Pur 38.25–26; Mat 17.24 Anid-anid burur luk semuet bang iap ineh na miak na maré usin uli', maya' berat luk litep. Do' ideh maré ineh mangun ku aceh baré kuanKu. Anid-anid burur, 14ieh ineh luk semuet bang iap lemulun luk ulunneh dueh ngepulu' lak mela, na miak na maré usin uli' ineh. 15Idi lun luk do' na maré mela, idi lun luk masi' na miak ngetanga' baré ineh kareb ideh maré usin ku uli' ulundeh. 16Do' ngalap usin ini kuan kekamen Tuhan ineh rat nelun Israil, idi maré ineh ngaceku kekamen bang Lepo su luk inan papu' Tuhan ineh. Ieh ineh usin uli' ulundeh, pad Ui ngerawé idi matar nedeh.”
Bigan Tekaling
17Kebala Tuhan ni Musa, 18#Pur 38.8 “Do' iko nganau' aceh bigan ratnan tekaling, idi kukudneh pana' tekaling. Idi nganau' ineh arang Lepo su luk inan papu' Tuhan dengan bubpun. Idi nganau' abpa' bang ineh. 19Idi do' Arun idi anak-anakneh maru' ticu' idi kukuddeh ku abpa' luk bang bigan ineh, 20kareb nateh ideh semuet bang Lepo su luk inan papu' Tuhan, idi kareb nateh ideh amé' matun bubpun pian maré baré akan kuan Tuhan, pad ideh na maté. 21Idi do' ideh maru' kukud idi ticu'deh, pad ideh na maté. Idi ini aceh ukum luk meruked kuan pupudeh macing ku anak inuldeh.”
Umau Ku Ngumau
22 #
Pur 37.29
Kebala Tuhan ni Musa, 23“Do' iko ngalap luk do' buen, ieh ineh umau mur* #30.23 Mur, ieh ineh aceh ilu' luk do' buen ratnan kayuh. luk mepulut, iwa' kati, idi anit kayuh luk mepaci' luk do' buen, apat kati setangal, keriburo luk do' buen apat kati setangal, 24idi anit kadingau iwa' kati (maya' berat luk litep), idi umau saitun, segilin. 25Idi ratnan ineh do' iko nganau' umau luk ku ngumau, ieh ineh aceh umau luk meligan luk uen muar mepad kudeng umau luk do' buen. 26Idi dengan ineh do' iko ngumau Lepo su luk inan papu' Tuhan, Pati' Pejani', 27méja dengan amung repapehneh, kukud dawan ineh dengan amung repapehneh teh, méja luk nan ngeseb uar luk do' buen ineh, 28bubpun luk nan ngeseb dengan amung repapehneh, idi bigan dengan kukudneh. 29Do' iko ngeligan amung ineh pad ineh meligan tu-tu. Anun-anun luk mekaneh ku ineh miak meligan.
30“Do' ngumau ni Arun dengan anak-anakneh ku umau ineh, idi ngeligan nedeh pad ideh mangun ku imam kuanKu. 31Do' mada' nelun Israil, kebalamu, ‘Umau ini mangun ku umau luk meligan kuanKu macing ku anak inul muyuh. 32Aleg ngumau nelun baken ku ineh. Idi aleg muyuh makai umau luk mepad puar. Umau ineh meligan kuanKu. 33Idé luk nganau' umau luk mebuen mepad kudeng ini, idi nganau' pa luun burur lun luk na tabpen, ieh ineh duken buro rat arang pupuneh.’ ”
Uar Luk Do' Buen
34Kebala Tuhan ni Musa, “Lapenmu luk do' buen, ieh ineh ilu' para', kerukub girig, idi ilu' luk mebuen dengan tutud uar, amung ineh mepad kinula'. 35Idi do' iko muar ineh ku aceh tutud luk do' buen, mepad kudeng nganau' umau luk do' buen. Idi do' ieh uen muar ku tucu' pad ieh meligan. 36Do' iko tupeh sebuang ineh idi nguit ineh amé' bang Lepo su luk inan papu' Tuhan, su luk inanKu amé' nemuyuh. Idi ngisak ineh pa atun Pati' Pejani'. Idi uar luk do' buen ineh meligan kuan muyuh. 37Aleg nganau' uar ineh kuan burur muyuh sebuleng. Do' uar ineh uen ngeligan kuanKu. 38Idé-idé luk nganau' uar luk kudeng ineh kuan bururneh sebuleng, kali' rungen ieh duken buro rat arang pupuneh.”
Currently Selected:
PURA' 30: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
