PURA' 31
31
Lun Luk Mileh Mudut Lepo Su Luk Inan Papu Tuhan
(Pur 35.31—36.1)
1Kebala Tuhan ni Musa, 2“Ui pangeh nemili' ni Besalel Uri ratnan inul Hur luk pupu Yahuda. 3Ui pangeh nemanu' neneh ku Roh Allah idi ileh luk meriput ratnan amung kekamen ticu' — 4pad nganau' arit luk do', ratnan amas, pirak, idi tekaling, 5idi arit batu luk meraga rangen su inanneh, idi arit kayuh, dengan amung kekamen luk kudeng ineh. 6Ui pangeh nengeletep ni Aholiab Ahisamak ratnan inul Dan, pad ieh ngedengan ni Besalel. Idi teh Ui pangeh nemaré ileh luk meriput kuan tukang-tukang, pad ideh miak nganau' amung luk bida'Ku namu. 7Miak ideh nganau' Lepo su luk inan papu' Tuhan, Pati' Pejani', kakeb su luk inan pedo', dengan amung repapeh Lepo ineh, 8méja ineh dengan amung repapehneh, kukud dawan luk ratnan amas luk do' dengan amung repapehneh teh, su luk inan ngeseb tutud luk do' buen, 9bubpun su luk inan maré baré luk sabpen dengan amung repapehneh, bigan luk inan sibaru' dengan kukudneh, 10amung ayung imam luk ku ayung Arun idi anak-anakneh bang kekamen imam ineh, 11umau luk ku ngumau idi uar luk do' buen, kuan Su luk Meligan. Idi do' ideh nganau' ineh maya' kudeng luk pangeh bilaKu namu.”
Aco Luk Inan Mudeng
12Kebala Tuhan ni Musa, 13“Mada' nelun Israil, ‘Matar do'-do' AcoKu luk inan Mudeng, ngaceku ineh aceh tanu' arangKu dengan muyuh idi amung inulmu, Ui ini Tuhan luk ngeligan nemuyuh. 14Do' matar Aco luk inan Mudeng, ngaceku aco ineh meligan. Idé luk na nginita aco sineh idi ngakem, na miak na ieh uen ngaté. 15#Pur 20.8–11; 23.12; 34.21; 35.2; Uk 23.3; Bad 5.12–14 Do' muyuh ngakem anem aco kinioneh. Iamo' aco luk ketudu', ieh ineh Aco luk inan Mudeng luk linigan kuanKu. Idé luk ngakem kareb aco sineh na miak na uen ngaté. 16Do' amung lun Israil nginita aco sineh mangun ku aceh tanu' pejani'. 17#Pur 20.11 Ieh ineh aceh tanu' luk meruked arangKu dengan lun Israil. Ngaceku Ui ini Tuhan pangeh nemudut langit idi tana' bang anem aco kinioneh. Idi Ui nucu' aco luk ketudu' idi nengato erurKu.’ ”
18Idi pangeh Tuhan nepebala ni Musa déi' luun Pegkung Sinai, idi Ieh nemaré neneh dueh balad batu luk inan pejani', luk inayud bua' ticu' Allah.
Currently Selected:
PURA' 31: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
