PURA' 34
34
Balad Batu Luk Kedueh
(Bad 10.1–5)
1Kebala Tuhan ni Musa, “Ngelapag dueh balad batu baruh, mepad kudeng luk atun, idi Ui ngayud luun ineh amung bala luk luun dueh balad batu luk atun luk pangeh binila'mu. 2Do' iko temina' pekak uka-uka idi uké Pegkung Sinai, idi papu' Negku luun buduk pegkung ineh. 3Seburur pana' nateh miak maya' namu. Idi seburur pana' nateh miak silagan luun pegkung ineh, idi na dumba idi sapi' miak nakap akan libut pegkung ineh.” 4Idi Musa nengelapag dueh balad batu mepad kudeng luk atun. Idi pekak uka-uka ieh nuké Pegkung Sinai, maya' kudeng luk bila Tuhan neneh, idi ieh nenguit dueh balad batu ineh.
5Idi Tuhan netemurun bang aceh laput, idi tuped pelengit neneh, idi Ieh neneten ngadanNeh sebuleng, “Tuhan.” 6#Pur 20.5–6; Iap 14.18; Bad 5.9–10; 7.9–10 Idi Tuhan nenalan lemaba pa kiungneh, idi Ieh nengitang, “Ui ini Tuhan, Ieh ineh Allah, luk méi' idi mekatu, luk mekadang niat, luk meluun awa idi lutep maya' jani'. 7Ei'Ku ineh lutep kuan lun ribu-ribu idi Ui maré do' ku amung kuyo, dat, idi sala', iamo' na tu-tu Ui muit lemulun ratnan ukum, iamo' ngua' kuyo amung taman inan anak idi mupun, macing ku inul luk keteluh idi luk keapat.”
8Idi dengan mesaget Musa netekeradung, 9kesembayangneh, “O Tuhan, kudeng Iko méi' negku, do' Iko nalan arang kai. Sagan pana' pupu ini metueh niat, iamo' maré do' ku kuyo idi sala' kai, idi ngalap nekai mangun ku pupuMu.”
Tuhan Ngelio Pejani'Neh Teh
(Pur 23.14–19; Bad 7.1–5; 16.1–17)
10Kebala Tuhan, “Ui pejani' nan amung pupu Israil, idi pa kiung muyuh Ui nganau' tuda'-tuda' tanu' luk inan mawa luk na nangun bang aput tana' idi arang pupu baken. Idi amung pupu luk libut-libut muyuh miak nier luk ruen Tuhan, ngaceku luk ruenKu kuan muyuh melalud tu-tu. 11Do' iko ngimet amung ukum luk bida'Ku namu aco sini. Ui ngusu amung lun Amori, lun Kanaani, lun Hiti, lun Prisi, lun Hiwi, idi lun Yebusi rat pa kiungmu. 12Aleg perurum nelun luk bang bawang luk ulek muyuh ineh, pad ideh na mangun ku aceh abpung kuanmu. 13#Bad 16.21 Iamo' do' ngusag amung bubpundeh, mila' amung akangdeh, idi nebpeng amung ulungdeh.
14“Aleg iko sembayang inan allah baken, ngaceku Ui ini Tuhan luk temaruh. 15Idi aleg iko pejani' nelun luk bang bawang ineh. Ngaceku kareb ideh sembayang idi nguit luk barén inan allahdeh, idi kali' rungen ideh nguit namu, idi iko pana' kuman luk baréndeh lek. 16Idi kudeng anak deléimu ngaweh decur pupu ineh, kali rungen ideh nguit nedeh maya' allahdeh, pad ideh na lutep maya' Negku.
17 #
Pur 20.4; Uk 19.4; Bad 5.8; 27.15 “Idi aleg iko nganau' kuanmu sebuleng akang luk inurai.
18 #
Pur 12.14–20; Uk 23.6–8; Iap 28.16–25 “Idi do' iko ngimet Aco Rayeh Ruti luk Na Lamud. Tudu' aco kinioneh do' iko kuman ruti luk na lamud, maya' kudeng luk bilaKu, ieh ineh bang bulan Abib. Ngaceku bang bulan ineh iko nenalan rat bawang Masir.
19 #
Pur 13.2
“Idi amung anak deléi lemulun idi aya' luk atun ineh Ui kuan. 20#Pur 13.13 Idi do' anak keladai luk atun uen nguli' ku aceh anak dumba. Iamo' kudeng iko na nguli' ineh na miak na iko mutul dierneh. Idi do' muyuh nguli' anak deléi muyuh luk atun teh. Idi kareb ineh aleg selemulun amé' Negku dengan na nguit baré.
21 #
Pur 20.9–10; 23.12; 31.15; 35.2; Uk 23.3; Bad 5.13–14 “Anem aco mo' kinioneh iko ngakem. Iamo' aco luk ketudu' ineh, do' iko ucu'. Do' kareb ngelusu', do' kareb ngeranih, kudeng ieh aco sineh do' ucu'.
22 #
Uk 23.15–21; Iap 28.26–31; Uk 23.39–43 “Idi teh do' iko ngimet Irau pun Ngeranih, idi teh Irau Lepo kareb ngamung bua'.
23“Idi teluh kua' bang selak do' amung lun deléi luk arang muyuh macing pa kiungKu, ieh ineh Tuhan, Allah lun Israil. 24Kareb Ui pangeh nengusu pupu ineh rat pa kiungmu, idi Ui miak ngerayeh bawangmu, pad seburur pana' na luk melili ku bawangmu, kareb iko amé' matun Tuhan Allahmu teluh kua' selak.
25 #
Pur 12.10
“Idi aleg dara' baré luk kuanKu barénmu dengan aceh luk inan lamud. Idi aleg baré luk kirat kareb aco rayeh ketecan macing pekak.
26 #
Bad 26.2; 24.21 “Luk meluun do' ratnan peranih luk pun ratnan uli' tana'mu, do' itenmu amé' bang ruma' Tuhan.
“Idi aleg iko nanek anak amék ku rata tinehneh.”
27Idi kebala Tuhan ni Musa, “Iuden amung bala ini, ngaceku maya' uni bala ini, Ui pejani' namu idi nelun Israil.” 28Idi Musa idi dengan Tuhan apat ngepulu' aco apat ngepulu' dacem kinioneh. Na ieh kuman. Na ieh ngirup abpa'. Idi Musa nengayud amung bala pejani' ineh, ieh ineh ukum pulu' luun balad batu ineh.
Musa Musul Rat Luun Pegkung
29 #
2 Kor 3.7–16
Kareb Musa nusul rat luun Pegkung Sinai, ieh nengimet pulu' ukum ineh. Idi na ieh kali' kiungneh merasat kareb ieh pangeh nepegayam inan Tuhan. 30Kareb Arun idi amung lun Israil nenier ni Musa, ideh nekali' kiungneh merasat. Idi ideh matot amé' muneng neneh. 31Iamo' Musa nenawar nedeh, idi Arun dengan amung lun rayeh-rayeh iné' neneh. Idi Musa nepebala nedeh. 32Pangeh ineh amung lun Israil nepamung iné' neneh. Idi Musa nengacing amung bala luk bila Tuhan neneh déi' luun Pegkung Sinai. 33Kareb Musa pangeh nepebala nedeh, idi ieh nengebpu kiungneh. 34Iamo' anid kareb Musa amé' pa kiung Tuhan pian pegayam Neneh, idi ieh necan ebpu kiung ineh pad ieh remuat. Idi kareb ieh remuat, idi ieh mada' nelun Israil anun luk bila Tuhan neneh. 35Kareb lun Israil nier kiung Musa, kiungneh merasat, idi Musa ngebpu kiungneh pad ieh semuet idi pegayam inan Tuhan.
Currently Selected:
PURA' 34: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
