PURA' 35
35
Ukum Ratnan Aco Luk Inan Mudeng
1Musa nengecuk amung lun Israil mepamung, idi kebalaneh nedeh, “Ini amung bala luk icuk Tuhan ruen muyuh. 2#Pur 20.8–11; 23.12; 31.15; 34.21; Uk 23.3; Bad 5.12–14 Anem aco muyuh miak ngakem. Iamo' aco luk ketudu' ineh meligan, ieh ineh aceh Aco luk inan Mudeng kuan Tuhan. Idé luk ngakem kareb aco sineh, ieh miak pitayen. 3Aleg muyuh nutud apui su luk inan muyuh mudeng kareb Aco luk inan Mudeng ineh.”
Binaweh Luk Barén Kuan Tuhan
(Pur 25.1–9)
4Idi Musa nepebala kuan amung lun Israil, “Ini luk bila Tuhan: 5Do' muyuh maré aceh baré kuan Tuhan. Anid-anid lun luk mawang niat, miak nguit baré amas, pirak, idi tekaling, 6idi kibung luk bata' melaco, sia' merirem, idi sia' melidang, kibung pu luk inuper, idi buluh amék, 7idi kubil dumba deléi luk inau' mesia', kubil luk do', idi kayuh pirur; 8umau lapung, umau luk do' buen ku ngumau, uar luk do' buen; 9bau burur, idi batu baken luk meraga luk ku kuyu' Imam Rayeh idi kakeb ruuk.
Repapeh Lepo su Luk Inan Papu' Tuhan
(Pur 39.32–43)
10“Idi amung tukang luk mileh arang muyuh, do' amé' idi nganau' amung luk bida' Tuhan: 11Lepo ineh, dengan papenneh, oodneh, tulangneh, atangneh, dirineh, idi amung alenneh; 12Pati' Pejani' dengan kayuh birirneh, kakeb su luk inan pedo', dicing luk ku alad kakeb; 13méja ineh perapu dengan birirneh idi amung repapehneh, idi ruti ubur ineh; 14kukud dawan dengan repapehneh, lapungneh, idi umau luk kuan lapung ineh; 15méja luk inan ngeseb uar luk do' buen perapu birirneh, umau luk ku ngumau, uar luk meluun do' buen; dicing tanga' Lepo ineh; 16bubpun luk inan ngeseb baré perapu dengan teripin tekaling, kayuh birir idi amung repapehneh, bigan luk inan sibaru' dengan kukudneh; 17dicing natad, perapu dirineh idi alenneh, dicing tanga' natad ineh; 18amung papek Lepo dengan abet kuan Lepo idi natadneh, 19idi amung ayung luk do' kuan imam-imam luk ku ayungdeh bang Su luk Meligan, idi amung ayung luk meligan luk ku ayung Arun imam ineh, idi amung ayung anak-anakneh ineh.”
Lun Israil Nguit Luk BarénDeh
20Idi amung lun Israil nuli'. 21Idi amung lun luk nesigio niat nenguit luk barén inan Tuhan piduten ku Lepo su luk inan papu' Tuhan. Idi teh ideh nenguit amung luk petulu kuan kekamen Tuhan idi luk ku nganau' ayung imam. 22Idi idé-idé luk meran niat, do' deléi idi decur, nenguit gerusang, abé, susing, bané, idi ayung amas luk baken. Idi ideh nengeligan ineh kuan Tuhan. 23Idi anid-anid lemulun luk inan kibung luk bata' melaco, sia' merirem, idi sia' melidang, kibung pu luk inuper, idi buluh amék, idi kubil dumba deléi luk inau' mesia', idi kubil luk do', inuitdeh iné' neneh. 24Idi idé luk miak nguit aceh baré ratnan pirak idi tekaling, inuitdeh barén kuan Tuhan. Idé luk inan kayuh pirur ku ngedengan pudut ineh, inuitdeh. 25Idi amung decur luk mileh nenguit luk inuperdeh ineh, ieh ineh nuper luk bata' melaco, sia' merirem, idi sia' melidang, idi nuper pu. 26Idi teh ideh nenguper buluh amék. 27Idi lun rayeh-rayeh nenguit bau burur idi batu baken luk meraga ruen luun kuyu' imam luk meligan idi kakeb ruuk; 28idi luk do' buen, umau lapung, umau luk ku ngumau, idi umau luk ku ngeseb uar luk do' buen. 29Idi amung lun Israil luk nesigio niat nenguit barédeh kuan amung kekamen luk bida' Tuhan ni Musa.
Lun Luk Mudut Lepo Su Luk Inan Papu' Tuhan
(Pur 31.1–11)
30Kebala Musa nelun Israil, “Tuhan pangeh nemili' besalel Uri ratnan inul Hur, luk pupu Yahuda. 31Ieh nemanu' neneh ku Roh Allah idi ileh luk meriput ratnan amung kekamen ticu', 32pad nganau' arit luk do' ratnan amas, pirak, idi tekaling, 33idi arit batu luk meraga rangen su inanneh, idi arit kayuh, dengan amung kekamen luk kudeng ineh. 34Idi Tuhan nemaré neneh ileh mada' nelun baken, do' ieh, idi Aholiab Ahisamak ratnan inul Dan. 35Idi didueh pinu'Neh ku ileh ngakem amung kekamen lun mileh, ieh ineh, ngarit, nganau' kekamen luk do' ayu, ngebaruh kibung luk bata' melaco, sia' merirem, idi sia' melidang, idi teh nganau' nuper pu, idi teh amung kekamen luk kudeng ineh.
Currently Selected:
PURA' 35: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
