PURA' 36
36
1“Do' Besalel, Aholiab idi amung lun luk mileh luk nepimaran Tuhan ileh pad nganau' amung kekamen luk do' ayu bang Su luk Meligan ineh, ngimun ngakem maya' amung luk icuk Tuhan.”
Lun Israil Nguit Mula' Luk Barén
2Musa nenawar ni Besalel, Aholiab, idi amung lun luk mileh luk nepimaran Tuhan ileh, idi amung lun luk nesigio niat, pad ideh amé' nganau' kekamen ineh. 3Idi ideh nengalap rat ni Musa amung baré luk biré lun Israil ku mudut Su luk Meligan. Iamo' lun Israil nateh nugka' maré baré ni Musa anid-anid pekak. 4Idi nacing amung lun luk mileh luk nganau' kekamen ineh, 5idi kebaladeh ni Musa, “Lun ini pelaba ula' uit, mela ratnan luk icuk Tuhan.”
6Idi Musa nengecuk nelun mula' ineh ugka' maré baré kuan Su luk Meligan ineh. Idi ideh nugka' maré. 7Ngaceku petap repapeh kuan amung kekamen ineh. Inan teh elaneh.
Ideh Nganau' Lepo Su Luk Inan Papu' Tuhan
(Pur 26.1–37)
8Idi amung lun luk mileh ineh nenganau' Lepo su luk inan papu' Tuhan ratnan pulu' pekatu kibung bata' melaco, ratnan pu luk inuper, idi ratnan kibung luk bata' melaco, sia' merirem, idi sia' melidang, luk tibaruh ku melaikat karub. 9Idi kikadang sepekatu kibung ineh tudu' depeh, idi pipangneh medepeh. Amung kibung ineh mepad tari. 10Ideh nenutum limeh pekatu kibung. Kudeng ineh teh limeh pekatu kibung luk baken. 11Idi ideh nenganau' tuda'-tuda' lalid kibung luk bata' melaco iring sebuleng kibung luk limeh tutum ineh. Idi ideh nenganau' kudeng ineh teh luun iring kibung luk limeh tutum ineh teh. 12Idi ideh nenganau' limeh ngepulu' lalid paped sepekatu kibung luk limeh tutum ineh teh, idi teh limeh ngepulu' lalid paped sepekatu kibung luk baken luk limeh tutum ineh. 13Idi ideh nenganau' limeh ngepulu' ood ratnan amas ku nutum dueh pekatu kibung ineh pad ineh mangun ku Lepo su luk inan papu' Tuhan.
14Idi ideh nenganau' ducungneh ratnan pulu' aceh pekatu kibung luk inau' ratnan buluh amék. 15Idi amung ineh mepad kirayeh, ieh ineh, tudu' depeh setangal kikadangneh, idi bétneh medepeh. 16Idi ideh nenutum limeh pekatu kibung ineh. Kudeng ineh teh anem pekatu kibung luk baken. 17Idi ideh nenganau' limeh ngepulu' lalid paped sepekatu kibung, idi teh limeh ngepulu' lalid paped sepekatu kibung luk baken ineh teh. 18Idi ideh nenganau' limeh ngepulu' ood tekaling ku nutum ineh mangun ku sebuleng papen. 19Idi ideh nenganau' dueh papen Lepo ineh teh, sebuleng ratnan kubil dumba deléi luk inau' mesia', idi sebuleng ratnan kubil luk do', ku papen luk pa luun.
20Idi ideh nenganau' tuda'-tuda' kayuh ku tulang ratnan kayuh pirur kuan Lepo ineh. 21Kikadang sepekatu kayuh ineh dueh depeh setangal, idi pipangneh semikuh setangal. 22Idi anid-anid kayuh ineh tinap, pad ideh miak petutum. 23Idi ideh nenganau' dueh ngepulu' kayuh ku tulang kuan iring pa kabing busat aco, 24idi apat ngepulu' alen pirak pa liangdeh, dueh alen nan sepekatu kayuh. 25Ideh nenganau' dueh ngepulu' kayuh ku tulang pa tinueh busat aco, 26dengan apat ngepulu' alen pirak dueh alen pa liang sepekatu kayuh. 27Idi iring pa keted, ieh ineh pa acep aco, ideh nenganau' anem pekatu kayuh ku tulang, 28idi dueh kayuh anid lidung. 29Idi dueh kayuh luk ku lidung ineh, tinutum rat pa beneh macing pa luun. Idi kayuh luk ku dueh lidung ineh inau' kudeng ineh teh. 30Idi kayuh tulang ineh ualuh pekatu dengan pulu' anem alen pirak, dueh pa beneh anid-anid kayuh ineh.
31Idi ideh nenganau' pulu' limeh atang ratnan kayuh pirur, limeh pekatu kuan Lepo ineh, 32idi limeh pekatu kuan selipa, idi limeh pekatu kuan iring pa keted luk pa acep aco. 33Idi atang luk nan uned ineh macing nan amung kayuh ineh rat paped selipa suet paped selipa. 34Idi amung kayuh ineh kikepdeh ku amas. Idi ideh nenganau' amung kelabung su atang ineh pana' ratnan amas, idi atang ineh pana' kikepdeh ku amas.
35Idi ideh nenganau' aceh dicing ratnan kibung pu luk do' idi luk inuper, idi luk ayu bata' melaco, sia' merirem, idi sia' melidang, tibaruh do'-do' ku melaikat karub. 36Idi ideh nenganau' apat diri ratnan kayuh pirur luk kikepdeh ku amas. Ood-ooddeh pana' ratnan amas. Idi ideh nengurai apat alen ratnan pirak. 37Idi munung tanga' Lepo ineh ideh nenganau' aceh dicing ratnan kibung pu luk do' idi luk inuper, ayuneh bata' melaco, sia' merirem, idi sia' melidang, idi luk tibaruh do'-do'. 38Ideh nenganau' kuan dicing ineh limeh pekatu diri perapu dengan amung ooddeh. Idi ideh nengakep papeddeh idi abetdeh ku amas. Idi ideh nengurai limeh alen tekaling kuan diri ineh.
Currently Selected:
PURA' 36: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
