PURA' 37
37
Ratnan Nganau' Pati' Pejani'
(Pur 25.10–22)
1Idi Besalel nenganau' Pati' Pejani' ineh ratnan kayuh pirur. Kikadangneh dueh sikuh setangal, pipangneh semikuh setangal, idi kidita'neh semikuh setangal. 2Idi kikepneh ku amas luk do', pa luun idi bang lubang. Idi ieh nenganau' luun ineh belipid amas pekelibut. 3Idi ieh nengurai apat kelabung amas luun apat kukudneh, dueh selipa, idi dueh selipa. 4Idi ieh nenganau' kayuh pirur ku birirneh, kikepneh ku amas. 5Idi kayuh birir ineh sinuetneh bang kelabung pekop pati' ineh. 6Idi teh ieh nenganau' kakeb su luk inan pedo' ineh ratnan amas luk do', kikadangneh dueh sikuh setangal, pipangneh semikuh setangal. 7Idi ieh nenganau' dueh melaikat karub ratnan amas, ieh ineh ratnan amas luk tinuno, 8idi sebuleng melaikat karub pekop paped kakeb ineh petatem luun ineh. 9Idi kiung didueh petutup. Idi ilad didueh tegerayap mapen kakeb su luk inan pedo' ineh.
Ratnan Nganau' Méja Luk Inan Ruti Luk Barén Kuan Tuhan
(Pur 25.23–30)
10Idi ieh nenganau' aceh méja ratnan kayuh pirur, dueh sikuh kikadangneh, semikuh pipangneh, idi semikuh setangal kidita'neh. 11Idi ieh nengakep ineh ku amas luk do' idi nenganau' belipid amas pekelibut ineh. 12Idi ieh nenganau' libutneh belipid kiar palad pipangneh, idi iringneh ieh nenangau' belipid amas pekelibut. 13Idi ieh nenganau' kuan méja ineh apat kelabung amas, idi ieh nenganau' kelabung ineh anid-anid lidung su luk inan kukudneh. 14Idi ieh nenganau' kelabung ineh muneng iring belipid ineh. 15Idi ieh nengalap kayuh pirur idi nengakep ineh ku amas, pad méja uen mirir ku ineh. 16Idi ieh nenganau' amung repapeh luk pa luun méja ineh, ieh ineh bigan, sangkir, busi', idi sikuan. Idi amung ineh inau' ratnan amas luk do'.
Ratnan Nganau' Kukud Dawan
(Pur 25.31–40)
17Ieh nenganau' aceh kukud dawan ratnan amas luk do'. Ieh nenganau' puet idi batangneh ratnan amas luk tinuno, idi busak-busakneh dengan busak luk nateh nelusad pana', tekapit nan batang ineh. 18Idi ieh nenganau' anem rangat ineh inan iringneh, teluh rangat mulang rat pa selipa idi selipa. 19Anid anem rangat ineh inan teluh busak badam ayuneh, dengan busak luk nateh nelusad. 20Idi kukud dawan ineh pana' inan apat busak mepad kudeng busak badam ayuneh, dengan busak luk nateh nelusad. 21Idi inan aceh busak luk nateh nelusad, anid pa liang dueh rangat ineh. 22Idi busak luk nateh nelusad, idi amung rangatneh, idi kukud dawan ineh, tekapit ratnan aceh amas luk tinuno idi do'. 23Idi ieh nenganau' tudu' dawan kuan kukud dawan ineh idi apitneh, idi su luk inan bareh apui pana', ratnan amas luk meluun do'. 24Idi ieh nenganau' amung ineh ratnan limeh ngepulu' anem kati amas luk meluun do'.
Ratnan Nganau' Méja Inan Ngeseb Luk Sabpen Luk Do' Buen
(Pur 30.1–5)
25Idi ieh nenganau' aceh méja inan ngeseb luk sabpen luk do' buen ratnan kayuh pirur. Idi ieh nenganau' ineh apat lebping, semikuh kikadangneh, idi semikuh pipangneh. Idi kidita'neh dueh sikuh, idi unganeh pekatu luun ineh. 26Idi ieh nengakep ineh ku amas luk do', luunneh, iringneh, idi amung unganeh. Idi ieh nenganau' belipid amas pekelibut. 27Idi ieh nenganau' dueh kelabung amas pa liang belipid ineh pekop iringneh, su luk inan kayuh birir, pad ieh miak uen mirir. 28Idi ieh nenganau' kayuh luk ku mirir ineh ratnan kayuh pirur kikep ku amas.
Ratnan Nganau' Luk Ku Ngumau Idi Luk Sabpen Luk Do' Buen
29 #
Pur 30.22–38
Idi ieh nenganau' luk ku ngumau idi luk sabpen luk meluun do' buen, luk pinuar lun luk mileh muar luk do' buen.
Currently Selected:
PURA' 37: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
