PURA' 39
39
Ratnan Nganau' Ayung Imam
(Pur 28.1–14)
1Idi ideh nenganau' amung ayung imam luk ngakem Su luk Meligan ineh, ratnan kibung bata' melaco, sia' merirem, idi sia melidang, luk inau' ratnan buluh dumba. Idi ideh nenganau' ayung imam kuan Arun maya' kudeng luk bila Tuhan ni Musa.
2Idi ideh nenganau' kuyu' imam ineh ratnan kibung pu luk inuper, amas, idi kibung luk bata' melaco, sia' merirem, idi sia' melidang, luk inau' ratnan buluh dumba. 3Idi ideh nenuno amas ineh tebalad idi melipi, idi nemuting ineh mangun ku lawet rireng nan arang kibung luk bata' melaco, sia' merirem, idi sia' melidang, idi arang kibung pu mangun ku aceh tebaruh luk do' ayu. 4Idi ideh nenganau' luun kuyu' imam ineh lalid tudung luk inabet, idi ieh ineh rinabar pekop papedneh. 5Ide abet awa' kuyu' imam ineh, inau' do'-do', idi pekatu dengan ineh, ieh ineh ratnan amas, kibung luk bata' melaco, sia' merirem, sia' melidang, idi kibung pu luk inuper, maya' kudeng luk bila Tuhan ni Musa. 6Idi ideh nengelilid bau burur ku amas idi nengayud ngadan anak-anak Yakub mepad kudeng etu. 7Idi ideh nengerareng mop lalid tudung kuyu' imam ineh, mangun ku terawé ratnan pulu' dueh pupu lun Israil, maya' kudeng luk bila Tuhan ni Musa.
Ratnan Nganau' Kakeb Ruuk
(Pur 28.15–30)
8Idi ideh nenganau' kakeb ruuk ineh ratnan kibung luk mepad kudeng ayu kuyu' imam luk tibaruh. 9Idi ieh apat lebping idi ieh lipi' dueh, kikadangneh murek, pipangneh pana' murek. 10Idi rirengdeh apat baris batu luk meraga. Luk pun-pun sengilung batu luk sia' merirem, sengilung batu luk mebirar, idi sengilung batu luk mesia'. 11Idi luk kedueh, sengilung batu luk bata' uduh, sengilung batu luk bata' langit, idi sengilung batu intan. 12Idi luk keteluh, sengilung batu luk mebata', sengilung batu luk sia' merirem, idi sengilung batu luk merirem. 13Idi luk keapat, sengilung batu luk bata' uduh, idi sengilung bau burur, idi sengilung batu mebirar. Idi amung batu ini ilub ku amas. 14Idi anid batu ini inan ngadan sebuleng anak Yakub, ku ngegala' ngadan pulu' dueh pupu Israil. 15Idi ideh nenganau' luun kakeb ruuk ineh ratai-ratai ratnan amas luk do' luk inuper. 16Idi ideh nenganau' dueh luk ku ngalub ratnan amas idi dueh kelabung amas, idi dueh kelabung ineh inau' pekop lidung kakeb ruuk ineh. 17Idi ideh nenutum dueh ratai ineh nan dueh kelabung pekop iring kakeb ruuk ineh. 18Idi ideh nenutum paped abet dueh ratai ineh nan lalid tudung kuyu' imam pa atun. 19Idi ideh nenganau' dueh kelabung amas idi rireng pekop paped kakeb ruuk, luun iring luk pa selipa kuyu' imam ineh. 20Idi teh ideh nenganau' dueh kelabung amas idi nenganau' ineh pa liang pekop lalid tudung kuyu' imam, idi muneng ku tutum idi pa luun abet awa' kuyu' imam, luk inuper do'-do'. 21Idi ideh nengabet kelabung kakeb ruuk nan kelabung kuyu' imam, ku abet luk bata' melaco, idi kakeb ruuk ineh na miak patad ratnan abet awa' kuyu' imam, maya' kudeng luk bila Tuhan ni Musa.
Ratnan Nganau' Ayung Luk Baken Kuan Imam
(Pur 28.31–43)
22Idi ideh nenganau' kuyu' buyor imam ratnan buluh dumba luk bata' melaco amung. 23Idi ayud dier kuyu' ineh peringuned, idi binuun iring ku kibung luk tibaruh, pad ieh na medarak. 24-26Idi ideh nenganau' luun lepi'neh ayu bua' delima ratnan kibung pu luk inuper idi kibung luk inau' ratnan buluh dumba luk bata' melaco, sia' merirem, idi sia' melidang, dengan karing-karing amas arangdeh, maya' kudeng luk icuk Tuhan ni Musa.
27Idi ideh nenganau' kuyu' kuan Arun idi anak-anakneh, 28idi teh sigar idi aduk ku abet uluh, idi siduar kamu' ratnan kibung pu luk inuper, 29idi abet awa' ratnan kibung pu luk inuper luk bata' melaco, sia' merirem, idi sia' melidang, idi tibaruh, maya' kudeng luk bila Tuhan ni Musa. 30Idi ideh nenganau' balad amas luk meligan ratnan amas luk do' luk inarit, “Linigan Kuan Tuhan.” 31Idi ideh nengabet ineh pa atun sigar ineh ku aceh abet luk bata' melaco, maya' kudeng luk bila Tuhan ni Musa.
Ideh Nemangeh Amung Kekamen
(Pur 35.10–19)
32Idi ideh nemangeh amung kekamen mudut Lepo su luk inan papu' Tuhan. Idi lun Israil nenganau' ineh, maya' kudeng luk bila Tuhan ni Musa. 33Idi ideh nenguit Lepo ineh iné' ni Musa dengan amung repapehneh, oodneh, idi amung kayuh tulangneh, atangneh, dirineh, idi amung alen, 34idi teh papen luk ratnan kubil dumba deléi luk inau' mesia', idi papen luk ratnan kubil luk do', idi kibung dicing teh; 35Pati' Pejani' perapu kayuh birirneh, idi kakeb su luk inan pedo', 36méja ineh perapu amung repapehneh, ruti luk barén kuan Tuhan, 37idi kukud dawan amas luk do' perapu amung lapungneh, idi amung repapehneh dengan umau lapung ineh, 38bubpun amas, umau luk ku ngumau, idi luk sabpen luk do' buen, idi kibung dicing tanga' Lepo, 39bubpun tekaling perapu teripin tekaling dengan kayuh birir idi amung repapehneh, bigan luk inan sibaru' idi kukudneh, 40amung kibung dicing natad ineh perapu amung dirineh idi alenneh, idi dicing tanga' natad, idi abetneh, papekneh, idi amung repapeh Lepo su luk inan papu' Tuhan, 41idi amung ayung imam luk pelaba do' kuan Su luk Meligan ineh, ieh ineh amung ayung luk meligan kuan Arun imam ineh idi kuan anak-anakneh. 42Lun Israil nenganau' ineh maya' kudeng amung luk bida' Tuhan ni Musa. 43Musa nenier amung kekamen ineh, idi amung ineh pangeh inau'deh maya' kudeng amung luk bila Tuhan. Idi Musa nengeperuan nedeh.
Currently Selected:
PURA' 39: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
