PURA' 40
40
Ratnan Mudut Idi Ngeligan Lepo Su Luk Inan Papu' Tuhan
1Idi kebala Tuhan ni Musa, 2“Aceh aco bulan aceh, do' iko nganau' Lepo su luk inan papu' Tuhan. 3Idi bang ineh do' iko ngerareng Pati' Pejani' ineh idi nganau' dicing pa atunneh. 4Idi do' iko nguit méja ineh amé' bang Lepo ineh, idi ngerareng luunneh amung repapehneh. Idi teh do' iko nguit kukud dawan ineh amé' bang Lepo idi nganau' lapungneh luunneh. 5Do' ngerareng méja amas luk inan ngeseb luk do' buen ineh pa atun Pati' Pejani'. Idi nganau' dicing munung tanga' Lepo su luk inan papu' Tuhan. 6Idi nganau' bubpun luk inan ngeseb baré ineh pa atun Lepo ineh. 7Idi do' iko ngerareng bigan luk inan sibaru' ineh arang Lepo dengan bubpun ineh, idi nganau' abpa' bang ineh. 8Idi do' nganau' dicing libut natad ineh, idi nganau' dicing tanga'neh teh.
9“Idi do' ngumau Lepo idi amung repapehneh ku umau luk ku ngumau ineh, pad amung ineh meligan. 10Idi teh do' iko ngumau bubpun dengan amung repapehneh, idi ngeligan ineh, pad bubpun ineh meligan tu-tu. 11Idi kudeng ineh teh, do' ngeligan bigan luk inan sibaru' perapu dengan kukudneh.
12“Idi do' nguit ni Arun idi anak-anakneh amé' munung tanga' Lepo su luk inan papu' Tuhan, idi maru' nedeh ku abpa'. 13Idi do' iko ngayung ni Arun ku ayung imam, idi ngumau idi ngeligan neneh, pad ieh mangun ku imam kuanKu. 14Idi teh do' nguit anak-anakneh idi nganau' kuyu'deh, 15idi ngumau nedeh ineh mepad kudeng iko nengumau tamandeh, pad ideh miak ngakem kekamen imam kuanKu. Idi ideh luk pangeh inumau ineh mangun ku imam luk meruked macing ku anak inul.”
16Idi Musa nenganau' amung kekamen ineh maya' kudeng luk bila Tuhan neneh. 17Idi aceh aco bulan aceh, lak luk kedueh, pangeh ideh neremuat rat bang bawang Masir, idi ideh nenganau' Lepo su luk inan papu' Tuhan. 18Idi Musa nengerareng amung alenneh, idi nenaped amung kayuh tulangneh, idi ieh nenganau' amung atangneh, idi nenaped amung dirineh. 19Idi ieh malad papen ineh pa luun Lepo. Idi ieh nengerareng papen luk pa luunneh, maya' kudeng luk bila Tuhan. 20Idi ieh nengalap dueh batu luk tebalad ineh, idi nengerareng ineh bang Pati' Pejani', idi ieh nengusong kayuh birir nan kelabung pati' ineh, idi ieh nengerareng kakeb su luk inan pedo' pa luunneh. 21Idi Pati' Pejani' ineh pana' inuitneh semuet bang Lepo. Idi ieh nenganau' dicing luk ku ngelinged ineh. Kudeng ineh lawéneh ngasa' Pati' Pejani' ineh maya' kudeng luk bila Tuhan.
22Idi ieh nenganau' méja ineh bang Lepo pa tinueh busat aco, bal alad dicing. 23Idi ieh nengerareng ruti luk barén kuan Tuhan luunneh, maya' kudeng luk bila Tuhan. 24Idi ieh nenganau' kukud dawan bang Lepo petutup méja ineh, pa kabing busat aco. 25Idi ieh nenutud amung lapung ineh pa kiung Tuhan, maya' kudeng luk bila Tuhan. 26Idi ieh nenganau' bubpun amas ineh bang Lepo, pa atun alad dicing ineh. 27Idi ieh nengeseb luk sabpen luk do' buen luun ineh, maya' kudeng luk bila Tuhan. 28Idi ieh nengekito dicing munung tanga' Lepo ineh. 29Idi bubpun luk inan ngeseb ineh rirengneh pa atun dicing ineh. Idi ieh nengeseb baré luk sabpen pa luunneh, idi ieh nemaré baré luk kenen, maya' kudeng luk bila Tuhan. 30Idi ieh nengerareng bigan luk inan sibaru' ineh arang Lepo dengan bubpun ineh, idi ieh nenganau' abpa' bang ineh. 31Musa idi Arun dengan anak-anakneh nemaru' ticu' idi kukuddeh ku abpa' luk bang bigan ineh. 32Idi kareb ideh semuet bang Lepo, idi kareb ideh amé' iring bubpun, ideh sibaru' maya' kudeng luk bila Tuhan. 33Musa nenganau' dicing libut Lepo idi bubpun ineh. Idi ieh neniting dicing munung tanga' natad ineh. Idi ieh nemangeh amung kekamen ineh.
Laput Pa Luun Lepo Su Luk Inan Papu' Tuhan
(Iap 9.15–23)
34 #
1 Rac 8.10–11; Yes 6.4; Yeh 43.4–5; Lin 15.8 Idi laput Rayeh Tuhan nemapen Lepo su luk inan papu' Tuhan, pad ieh mepanu' ku ineh, 35pad Musa na miak semuet bang Lepo ineh. 36Idi kareb laput ineh nekemikit rat pa luun Lepo ineh, idi amung lun Israil nenalan. 37Iamo' seruked laput ineh na nekemikit, idi ideh pana' nateh nalan rat ieneh. 38Idi laput Rayeh Tuhan ineh idi pa luun Lepo kareb aco macang. Iamo' kareb medacem inan apui luk ngacang pa luun Lepo ineh su siren amung lun Israil ruked ideh nalan.
Currently Selected:
PURA' 40: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
