PUDUT 40
40
Yusup Mada' Ilung Nupi Lun Tinutup
1Muci ratnan ineh lun luk maré luk rupen kuan raca' Masir idi lun rayeh lun luk nganau' ruti nemaré ét niat kuan raca'. 2Idi ieh pelaba useh nedidueh, 3idi ieh nenuet nedidueh bang tutup su luk inan Yusup ineh, ieh ineh tutup luk bang ruma' lun rayeh luk nginita raca'. 4Idi didueh mio bang tutup ineh. Idi lun rayeh nengecuk ni Yusup ngasa' nedidueh. Idi ideh tudo bang tutup tuda'-tuda' io.
5Idi bang aceh malem didueh nenginupi, ieh ineh lun rayeh luk maré luk rupen idi lun rayeh luk nganau' ruti ineh. Idi nupi didueh na mepad ilung. 6Idi kareb Yusup nacing nedidueh pekak uka-uka ngikak nedidueh, idi ieh nekali' nedidueh mesusa'. 7Idi kebalaneh nedidueh, “Ngudehké ayu medueh mesusa' bang aco sini?”
8Kebala didueh neneh, “Kai dueh pangeh nenginupi, iamo' seburur pana' nateh luk miak kali' ilungneh.”
Idi kebala Yusup nedidueh, “Allah mo' luk miak ngegala' ineh. Do' mada' nupi medueh negku.”
9Idi kebala lun rayeh lun luk maré luk rupen ineh, “Bang nupiku inan aceh lawa anggur luk pa kiungku. 10Idi anggur ineh inan teluh angat. Kareb angat ineh nginulih, idi busakdeh nelusad, idi bua'deh pangeh melak. 11Idi sangkir raca' inan bang paladku. Idi ui nengalap bua' anggur ineh idi nemag ineh bang sangkir raca', idi nemaré ineh neneh.”
12Idi kebala Yusup, “Ini ilungneh: teluh angat ineh, ieh ineh teluh aco. 13Teluh aco teh raca' miak ngikit namu idi ngelubed namu amé' bang kekamenmu luk atun. Idi iko miak maré sangkir raca' ineh bang paladneh, mepad kudeng luk atun, kareb iko lun luk maré luk rupen ineh. 14Iamo' do' iko ngerawé negku kareb ini mangun kuanmu, do' iko méi' negku, idi maré bala rat negku kuan raca', idi nutun ngeruat negku rat bang tutup ini. 15Ngaceku ui ini tiban lemulun rat bang bawang lun Iberani. Idi tungé' pana' na ui nenganau' anun-anun luk inandeh nenutup negku bang tutup ini.”
16Idi kareb lun rayeh lun luk nganau' ruti ineh nekali' ilung nupi ineh do', idi ieh nepebala ni Yusup teh, “Ui pana' inan nupi. Ui nenguit teluh tayen luk panu' ku ruti luun uluhku. 17Idi bang tayen ineh inan puar-puar ruti luk kenen raca', idi suit nacing nekuman ineh.”
18Idi kebala Yusup neneh, “Ini ilung nupi ineh: teluh tayen, ieh ineh teluh aco. 19Teluh aco teh raca' miak ngaleb uluhmu, idi ngekito bururmu luun kayuh pad suit macing kuman uangmu.”
20Pangeh teluh aco, ieh ineh aco luk inan raca' tinganak, ieh nenganau' irau kuan amung-amung lun tarehneh. Idi ieh nengeruat lun rayeh lun luk maré luk rupen idi lun rayeh lun luk nganau' ruti ineh rat bang tutup, idi nenguit nedidueh amé' pa kiung amung-amung lun tarehneh. 21Idi raca' nengelubed lun rayeh lun luk maré luk rupen ineh kuan kekamenneh luk atun. 22Iamo' lun rayeh lun luk nganau' ruti ineh tikitoneh, maya' kudeng luk bila Yusup neneh. 23Idi na lun rayeh lun luk maré luk rupen ineh ngerawé Yusup, iamo' ieh nekelupan neneh.
Currently Selected:
PUDUT 40: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
