PUDUT 39
39
Yusup Idi Awan Potipar
1Idi Yusup inuit lun Ismail iné' déi' Masir, idi nemasui neneh ni Potipar, seburur lun tareh raca', ieh ineh lun rayeh luk nginita raca'. 2#Kek 7.9 Idi Tuhan nengedengan ni Yusup, pad ieh inan peruan bang luk amung-amung. Idi ieh tudo bang ruma' tuanneh luk lun Masir ineh. 3Idi tuanneh nekali' idi Tuhan ngedengan ni Yusup, pad ieh inan peruan bang luk amung-amung. 4Idi Potipar mawang niat neneh. Idi ieh nengiding neneh ngimet bang ruma'neh. Idi amung-amung binawehneh biréneh bang palad Yusup. 5Rat pad sineh Tuhan nengeperuan tetek ruma' lun Masir ineh ngaceku Yusup. Idi Tuhan nengeperuan amung-amung luk ieh kuan, do' luk bang ruma', idi do' luk déi' lati' pana'. 6Idi amung-amung luk ieh kuan biré Potipar bang palad Yusup, pad ieh na mesusa' ratnan anun-anun, iamo' ieh ngerawé akanneh sebuleng mo'.
Idi Yusup ineh do' ayu idi metaga. 7Mio rat pangeh ineh idi awan tuanneh ineh nileng neneh, kebalaneh, “Do' iko pamung rudap denganku.” 8Iamo' Yusup ara', kebalaneh, “Idi tuan na mesusa' ratnan anun-anun luk bang ruma'neh, iamo' amung-amung luk ieh kuan pangeh biréneh bang paladku. 9Idi bang ruma' ini seburur pana' na luk meluun rayeh rat negku. Idi tuan na sikal ngado binawehneh rat negku, iamo' ratnan iko sebuleng ngaceku iko awanneh. Kudeng apehké ui miak nganau' dat luk kudeng ini rayeh, pad ui nganau' sala' pa kiung Allah?” 10Sagan pana' decur ineh mutuh ni Yusup anid-anid aco, idi Yusup ara' pamung rudap denganneh.
11Idi bang seaco Yusup nesemuet bang ruma' sikal nganau' kekamenneh, idi seburur pana' nateh bang ruma' kareb ineh. 12Idi decur ineh nengakem kuyu' Yusup, kebalanneh, “Do' iko pamung negku.” Iamo' Yusup nengelengu kuyu'neh luk inimet decur ineh idi ieh nupun buro rat bang ruma'. 13Kareb decur ineh nekali' Yusup ineh nenecan kuyu'neh bang paladneh, idi ieh nupun buro rat bang ruma'. 14Idi ieh nenawar amung lun duken luk bang ruma'neh idi kebalaneh nedeh, “Siruh, awanku nengalap seburur lun Iberani tudo dengan tau. Idi ieh sikal ngigu' netau, ngaceku ieh iné' negku sikal pamung negku, iamo' ui nengitang. 15Idi kareb ieh neninger arodku, idi ieh nenecan kuyu'neh su inanku, idi neburo rat bang ruma'.”
16Idi ieh nenganung kuyu' Yusup ineh pad tuanneh macing. 17Idi ieh nemada' neneh ratnan bala ineh, kebalaneh, “Demulun lun Iberani luk inuitmu iné' tudo netau, iné' negku sikal ngigu' negku. 18Iamo' kareb ui nengitang idi ieh nenecan kuyu'neh negku, idi nupun buro rat bang ruma'.”
19Kareb tuan Yusup neninger bala ineh, idi ieh pelaba useh. 20Idi ieh nengecuk ngakem ni Yusup, idi nenuet neneh bang tutup su luk inan raca' nutup lunneh luk mesala', idi Yusup tudo déi'. 21#Kek 7.9 Iamo' Tuhan nengedengan ni Yusup, idi Ieh nengeperuan neneh, pad lun rayeh luk nginita tutup ineh mawang niat neneh. 22Idi ieh nemaré amung-amung lun bang tutup ineh bang palad Yusup. Idi amung-amung kekamen bang tutup ineh bang imet Yusup teh. 23Idi lun rayeh luk nginita tutup ineh, na mesusa' ratnan anun-anun luk bang imet Yusup, ngaceku Tuhan idi dengan Yusup, pad amung-amung kekamenneh inan peruan teh.
Currently Selected:
PUDUT 39: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
