UKUM 23
23
Tuda'-Tuda' Aco Rayeh
1Kebala Tuhan ni Musa, 2“Mada' kuan lun Israil kudeng ini: Ini aco rayehKu luk uen muyuh ngeletep mangun ku tebubpun luk meligan. 3#Pur 20.8–10; 23.12; 31.15; 34.21; 35.2; Bad 5.12–14 Anem aco kinioneh muyuh miak ngakem, iamo' aco luk ketudu' muyuh ngato erur muyuh pa kiung Tuhan, su luk inan amung muyuh tudo. Ieh ineh Aco luk inan Mudeng kuan aceh tebubpun sembayang. Idi kekamen anun-anun pana' aleg muyuh nganau'. 4Idi ini amung aco rayeh Tuhan, luk ruen muyuh ngeletep bang kareb luk petulu.
Aco Rayeh Paska Idi Irau Ruti Luk Na Linamud
(Iap 28.16–25)
5 #
Pur 12.1–13; Bad 16.1–2 “Idi bulan luk pun-pun ieh ineh pulu' apat aco bulan ineh, kareb macep aco inan Aco Rayeh Paska Tuhan. 6Idi pulu' limeh aco bulan ineh, ieh ineh Irau Ruti luk Na Lamud kuan Tuhan. Do' muyuh kuman ruti luk na linamud tudu' aco kinioneh. 7#Pur 12.14–20; 23.15; 34.18; Bad 16.3–8 Idi kareb aco luk pun-pun ineh, inan aceh tebubpun sembayang. Aceh kekamen anun-anun pana' muyuh na miak nganau'. 8Idi tudu' aco kinioneh do' muyuh maré baré luk sabpen kuan Tuhan. Idi aco luk ketudu' ineh pana' inan aceh tebubpun sembayang. Aceh kekamen anun-anun pana' muyuh na miak nganau'.
9-10“Kareb muyuh semuet bang bawang luk barénKu nemuyuh, idi muyuh ngula' uli'neh, do' maré sengangel runguh padé luk litu' muyuh pun-pun ineh kuan imam. 11Idi do' imam nicul sengangel ineh pa kiung Tuhan, pelé muyuh petulu kuan Tuhan. Idi do' imam nicul ineh kareb abud Aco luk inan Mudeng ineh. 12Idi kareb aco luk inan nicul angel ineh, do' muyuh maré aceh anak dumba luk ulun selak idi luk do', barén sabpen kuan Tuhan, 13idi teh baré akan segatang banak luk rinabur ku umau, barén sabpen ku aceh buen luk do' kuan Tuhan, idi aceh baré rupen ratnan abpa' anggur seseréi' kinula'neh. 14Idi aleg muyuh kuman ruti idi padé luk kiriki idi padé baruh kareb aco luk inan muyuh nguit baré ineh kuan Allah muyuh. Ini aceh dalan luk meruked kuan muyuh macing ku anak inul bang amung su luk inan muyuh mudeng.
Irau Pangeh Ranih
(Iap 28.26–31)
15“Idi kareb aco luk kenebpa muci ratnan Aco luk inan Mudeng ineh, ieh ineh aco luk inan muyuh maré padé mangun ku baré luk tidulen, do' muyuh ngiap macing tudu' minggu, 16ieh ineh limeh ngepulu' aco macing pekak kenebpa pangeh tudu' minggu ineh, idi kareb aco ineh do' muyuh maré kuan Tuhan aceh baré akan luk mebaruh. 17Idi do' muyuh nguit dueh balad ruti rat ruma' muyuh mangun ku aceh baré luk tidulen, ieh ineh inau' ratnan segatang banak. Do' ieh tinaken puar ku lamud mangun ku baré luk pun-pun kuan Tuhan. 18Idi perapu dengan ruti ineh teh do' muyuh maré tudu' anak dumba luk do' luk ulun selak, idi aceh sapi' pegawa' luk do', idi teh dueh amék luk do'. Amung ineh barén sabpen kuan Tuhan perapu dengan baré akan idi luk rupen, idi baré luk sabpen, mangun ku aceh buen luk do' kuan Tuhan. 19Do' muyuh maré aceh amék deléi barén ngaceku sala', idi dueh anak dumba luk ulun selak ku baré luk nguit pedo'. 20Idi do' imam nicul ineh perapu dengan ruti baré luk pun-pun ineh, mangun ku baré luk tidulen pa kiung Tuhan. Idi amung ineh perapu dengan dueh anak dumba ineh mangun ku baré luk meligan kuan Tuhan luk miak barén imam. 21#Pur 23.16; 34.22; Bad 16.9–12 Idi kareb aco ineh teh do' nganau' aceh tebubpun rayeh, ieh ineh aceh tebubpun sembayang kuan muyuh, idi na ngakem, mepad kudeng Aco luk inan Mudeng. Ieh ineh aceh dalan luk meruked kuan inul muyuh iapeh-iapeh pana' su luk inandeh.
22 #
Uk 19.9–10; Bad 24.19–22 “Idi kareb muyuh ngeranih uli' tana' muyuh, aleg muyuh ngeranih macing iring lati' muyuh. Idi aleg muyuh ngamung luk neketecan ratnan perinien muyuh. Iamo' do' ieh tacin kuan lun masi' idi lun sakai. Ui ini Tuhan Allah muyuh.
Irau Umak Lak
(Iap 29.1–6)
23-24“Bulan luk ketudu', aceh aco bulan ineh, do' inan aceh aco luk inan mudeng kuan muyuh, mangun ku aceh terawé dengan luk uen nguni, dengan aceh tebubpun sembayang. 25Aleg muyuh ngakem kareb aco ineh. Iamo' do' muyuh maré baré akan kuan Tuhan.
Aco Rayeh Luk Nguit Pedo'
(Iap 29.7–11)
26-27“Kareb pulu' aco bulan luk ketudu' ineh, ieh ineh aco rayeh luk nguit pedo'. Do' nganau' aceh tebubpun sembayang kuan muyuh, idi ngebeneh niat muyuh idi maré baré akan kuan Tuhan. 28Idi kareb aco ineh aleg muyuh ngakem, ngaceku ineh aco luk nguit pedo', pad nganau' luk nguit pedo' kuan muyuh pa kiung Tuhan Allah muyuh. 29Idi ngaceku ineh idé luk na nengebeneh niatneh idi mawa' na kuman kareb aco ineh, do' ieh duken buro rat arang pupuneh. 30Idi idé luk ngakem kareb aco sineh, idi Tuhan ngaté neneh rat arang pupuneh. 31Idi ini aceh ukum luk meruked kuan inul muyuh, iapeh-iapeh su luk inandeh. 32#Uk 16.29–34 Rat kareb aco macep iwa' aco bulan ineh macing aco macep kenebpa, ieh ineh aco luk inan muyuh mudeng. Idi do' muyuh ngebeneh niat muyuh idi mawa' na kuman.
Aco Rayeh Lepo
(Iap 29.12–40)
33-34“Kareb pulu' limeh aco bulan luk ketudu' ini, do' inan Aco Rayeh Lepo kuan Tuhan tudu' aco kinioneh. 35#Bad 16.13–15 Idi kareb aco luk pun-pun ineh, ieh ineh tebubpun sembayang. Aleg muyuh ngakem bang aco sineh. 36Idi tudu' aco kinioneh do' muyuh maré kuan Tuhan tuda'-tuda' baré akan. Idi kareb aco luk kewaluh, do' muyuh nganau' aceh tebubpun sembayang kuan muyuh, idi maré tuda'-tuda' baré akan kuan Tuhan. Idi ini aco sembayang. Aleg muyuh ngakem bang aco sineh.
(37“Idi ini amung aco rayeh Tuhan, luk uen muyuh ngeletep ku tebubpun sembayang, pelé muyuh maré kuan Tuhan tuda'-tuda' baré akan, ieh ineh baré luk sabpen, baré luk kenen, baré luk kereten, idi baré luk rupen, anid-anid aco maya' kinula' luk litep bang aco sineh; 38amung ineh baken ratnan Aco luk inan Mudeng, idi baken ratnan amung baré muyuh, jani' muyuh, idi amung baré luk ratnan katu niat luk muyuh pian maré kuan Tuhan.)
39“Idi teh kareb pulu' limeh aco bulan luk ketudu', kareb muyuh pangeh nengamung amung uli' tana' muyuh, do' muyuh nganau' aceh lawé rayeh kuan Tuhan tudu' aco kinioneh. Idi kareb aco luk pun-pun do' inan aco luk inan mudeng. Idi kareb aco luk kewaluh pana', do' muyuh ucu' teh. 40Idi kareb aco luk pun-pun, do' muyuh ngalap tuda'-tuda' bua' buyo, angat-angat piasau, angat-angat luk mula' don, idi bulu' rat tangeb abpa'. Idi do' muyuh mawang niat pa kiung Tuhan Allah muyuh tudu' aco kinioneh. 41Idi tudu' aco kinioneh, do' muyuh nganau' lawé rayeh ini kuan Tuhan. Ieh ineh aceh ukum luk meruked kuan inul muyuh. Idi bulan luk ketudu' do' muyuh nganau' ineh. 42Tudu' aco kinioneh do' amung muyuh lun Israil tudo bang lepo, 43#Pur 23.16; 34.22 pad among inul muyuh kali' ineh muci. Ngaceku Ui pangeh nengecuk nelun Israil tudo bang lepo ineh kareb Ui nenated nedeh remuat rat bang bawang Masir. Ui ini Tuhan Allah muyuh.”
44Kudeng ineh luk bila Musa kuan amung lun Israil, ratnan amung aco rayeh luk litep Tuhan.
Currently Selected:
UKUM 23: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.