UKUM 24
24
Ratnan Ngasa' Lapung
(Pur 27.20–21)
1Kebala Tuhan ni Musa, 2“Ngecuk nelun Israil ineh nguit amé' namu umau saitun luk tipeh idi metaro ruen bang amung-amung lapung, pad amung lapung ineh miak mulun kidi-kidi. 3Idi do' Arun temina' ku amung lapung ineh bal dicing luk pa atun Pati' Pejani' ineh luk bang Su luk Meluun Ligan, rat malem macing pekak pa kiung Tuhan. Idi ini aceh ukum luk meruked. 4Idi do' Arun temina' ku amung lapung ineh luk luun kukudneh luk ratnan amas luk tinuno, pa kiung Tuhan kidi-kidi.
Ruti Luk Barén Kuan Allah
5 #
Pur 25.30
“Idi do' iko ngalap anem gatang banak idi nganau' ineh ku ruti pulu' dueh balad. 6Idi do' iko ngerareng ruti ineh pa kiung Tuhan luun méja amas luk tinuno, dengan dueh atur, ieh ineh anem balad ruti seatur. 7Idi pa luun dueh atur ineh do' ngerareng umau luk do' buen luk meligan mangun ku aceh terawé ratnan ruti ineh, ieh ineh aceh baré akan kuan Tuhan. 8Idi anid-anid Aco luk inan Mudeng, do' Arun temina' ku ineh pa kiung Tuhan kidi-kidi. Idi ineh mangun kuan lun Israil ku aceh pejani' luk ruked-ruked. 9#Mat 12.4; Mrk 2.26; Luk 6.4 Idi ruti ineh mangun ku babpat Arun idi anak-anakneh, idi miak kenendeh bang aceh su luk meligan. Ngaceku ineh luk meluun ligan kuanneh ratnan amung baré luk sabpen kuan Tuhan. Idi ini aceh ukum luk meruked.”
Ukum Kuan Lemulun Luk Nguyo Ngadan Tuhan
10Idi inan aceh deléi, tinanneh lun Israil, tamanneh lun Masir, idi ieh nacing arang lun Israil. Idi ieh nepekedaluh inan aceh lun Israil su luk inandeh nelupo. 11Idi ieh nenguyo ngadan Tuhan ineh dengan kediman teh. Idi ideh nenguit neneh iné' papu' ni Musa. Idi ngadan tinanneh Selomit Dibri ratnan inul Dan. 12Idi ideh nenipa neneh bang tutup pad ideh kali' pian Tuhan.
13Kebala Tuhan ni Musa, 14“Nguit lemulun luk nguyo ineh remuat rat su luk inandeh nelupo. Do' amung lun luk pangeh neninger neneh ineh ngerareng ticu'deh luun uluhneh, idi do' lun mula' mitung neneh ku batu. 15Idi teh mada' kuan lun Israil: Idé-idé luk nguyo Allahneh, ieh miak mabeh sala'neh, 16idi miak pitayen. Do' lun sakai idi lun kuan bawang, bitungin ku batu kudeng ieh nguyo ngadan Tuhan.
17 #
Pur 21.12
“Idé-idé luk ngaté aceh lemulun miak pitayen. 18Idi idé-idé luk ngaté pung lun baken, ieh miak maré libalneh, pung libal pung.
19“Idé-idé luk ngurat burur lun denganneh, idi maya' kudeng luk inau'neh, kudeng ineh teh luk miak ruen kuanneh, 20#Pur 21.23–25; Bad 19.21; Mat 5.38 putul libal putul, mateh libal mateh, lipen libal lipen. Anun dat luk icingneh kuan burur lun baken, kudeng ineh teh luk ruen luun bururneh. 21Idé-idé luk ngaté pung, ieh miak maré libalneh. Iamo' idé luk ngaté lemulun, ieh miak pitayen teh. 22#Iap 15.16 Idi ukum ini kuan amung muyuh, do' kuan lun sakai, idi lun kuan bawang, ngaceku Ui ini Tuhan Allah muyuh.”
23Idi Musa nengecuk nelun Israil, idi ideh nenguit lun luk nguyo ineh remuat rat su luk inandeh nelupo, idi nemitung neneh ku batu macing maté. Idi lun Israil nenganau' kudeng ineh maya' kudeng luk bida' Tuhan ni Musa.
Currently Selected:
UKUM 24: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.