Jǒn 12

Ba/pwó Jisos Bakút ké Byiká, ké Bétányi

(Mátyuu 26:6-13; Mâk 14:3-9)

1Dyijî-kyifen ńkyí Shwôm kyi/mû kyi/waa ací nyâchât ké nkéré mú Jisos o/dim o-wâa Bétányi, oshê mú onyinchéng mú odabángê Lázáros, mú Jisos o/jwóbê ǎ ké bukyû, o/mû o-kyú u. 2Ba/rám ǎ byiryíng-dyikurúku ányi. Máta nké o/kye kámbé byiryíng. Lázáros o/mû ké burwám-banet ḿbé ba/ryí byiryíng ámbyi ne Jisos. 3Méryi o-yip kâng ókpúmá-bakút ḿbé badanyîn kyinung, ḿbé badashwane to kasî, ne ba/chi kámbé ké babî-kyichí ḿbé badakó nât. O-bírî bakút ámbe o-pwó Jisos ké byiká, ne o-yip eji emen o-shî kámbyí. Bunyîn-kyinung ḿbú bakút ámbe bu-sú ké kyise kyimúmú. 4Júdas-Esakáryot mú o/mû ké burwám-bǎmgbán-Jisos, nyǐ mú o/mû mu o-bâ ebachi ba-kám Jisos, o-raa o/fu, 5ebóng ńkyí ba*da/shee bakút-kyinung ḿbén ké égot-akpuga-syílyíba ne kyicê* ba-yip akpuga ányi ba-kye banet-byikpu*. 6Nyǐ o/raa ńkyín, ké nǎ, nyǐ o-chi i onet-kajii, *chí ké bubwô ḿbú nyǐ mu o-kérê ng kyi-kim ne banet-byikpu*. Nyǐ nké o/mû o-níbî ng kiimbam ńkyí mbe ba-fâ akpuga, ne o/mû o-fwam m efîm akpuga nyí ba/mû ba-fâ ké nkyí.

7Nké Jisos o/raa o/fu, mîng n̂g ǎ, eringe nyǐ oo/tî ńkyí nyǐ mu ne nkyí ké dyicí ńdyí bada mě eryii. 8Ben kángkáng nkéré banet-byikpu mbe ké burwám enen, nké me mm*ba/chi n-kyú ne ben kángkáng nkéré*.

Banet-Jûs ba/nam Lázáros Dyiju

9Bujê-banet-Jûs ba/jwo ba/fu, Jisos mu ké Bétányi. Mbé ba-dim kâng ba-wâa áku. Mbé ba/ce, *chí ké bubwô ḿbú Jisos nké nke* nké mbé ba/ce to Lázáros eri mú Jisos o/jwóbê ǎ ké bukyû. 10Batu-banchi kyifen-Osówo ba-tóbê kâng eringe nyí mbé ba/chi ba-ju Lázáros to. 11Ké ebóng, ké dyishí-Lázáros nké banet-Jûs chwóó ba-kú ba-bángê e ne Jisos ne atyém ebe, ba-né ng ecen ne banet-ashí ebe.

Jisos o/nung ké Jerúsélem ne Akpee

(Mátyuu 21:1-11; Mâk 11:1-11; Lûk 19:28-40)

12Ké orî-dyicí, bujê-banet chwóó ḿbé baa/bê dyijî-kyifen ńkyí Shwôm ba/jwo ba/fu, Jisos mu o-bâ ké Jerúsélem. 13Mbé ba-yip achiche-bayêp ba-dim edakwárê ne nyǐ, ba-kpet ekwán ba/fu, kpee n̂g Osówo. Ojware okyú ne onet mú mu o-bâ ké bubwô ḿbú Otu Kyítá. Osówo ojware Otu mú banet-Ézerel.

14Jisos o-ri kaanyam-atû, o-yú o-kyú ké nké, kerededet wǎ eringe ejá-Osówo nyí ba/sáng kyísí e/fu, 15*dachi a-shî, ǎ oshê mú Záyon*. Otu eyên nké mu o-bâ něen, mu o-yú u ké kyisu-kaanyam-atû.

16Ké nkéré ámu, bǎmgbán emen ba*da/nyît eringe ńkyín kyi/byí*. Nké ké nkéré mú Osówo oo/jwóbê Jisos o-jâ ne nyǐ ké busan ḿbú ragerage, mbé ba/zîim ba/fu, ejá-Osówo nyí ba/sáng kyísí e/raa ńkyín kyi-kim ne nyǐ, ne nkyí nké mbé ba/chi ǎ éné.

17Bujê-banet ḿbé ba/mû ne Jisos ké nkéré mú nyǐ o/kó Lázáros o-byí ké dyikun ne o-jwóbê ǎ ké bukyû ba/mû baa/sét ńkyí kyi/chi. 18Ké bubwô ámbu nké bujê-banet ba/dakwárê ne nyǐ, ké ebóng, mbé baa/jwo ba/fu, nyǐ nké o/chi kiǐtí-akat ńkyín. 19Banet-ncibi mú Fárasyî ba-kpet eraa ne barî ba/fu, kû n̂g eri ba/fu, be byi*fí byi-man n echi nang chwǒm*. Kû n̂g eri eringe nyí ejíí emúmú e-kú e-cen n ne nyǐ ké kyikû.

Kyicê-Banet ḿbé ba*fí Banet-Jûs* ba/kyé Kyikit ńkyí Jisos mu

20Kyicê-banet ḿbé ba*fí banet-Jûs* ba/mû ké burwám-banet ḿbé ba/ce Jerúsélem Osówo efé ké nkéré mú dyijî-kyifen ánkyi. 21Mbé ba/bê ba-kâm Fyílip mú o/mû o/fím Bét-Sáda ké Gályílyi, ne ba-sét ǎ ba/fu, bonchí, be byimu byi-ryuu ng byi/fu, byi-ri ng Jisos.

22Fyílip o/dim o-da-sét Ánduru, ne mbé ashí afee ba-dim ba-da-sét Jisos. 23Jisos o-faa kámbé o/fu, nkéré oo/fyi kántîk mú badakye Wǎn-Onet kiǐtí-ofê. 24Me mu n-sét ng běn ké ntûntû n/fu, osang-kyichí o-waa ng kǎnchí tete ba-fé kámú kyísí o-kpú. Nké â o/kpú kâng o-byí, o-zím m esang chwóó. 25Nang yeě nké dyikpen emen ndyi dyi-jê ng ǎ, dyikpen emen ándyi dyi/chi dyi-tánê ǎ. Nang yeě nké dyikpen emen ké ejíí ńnyín ndyi dyi-sa ng ǎ kafâ, onet ámu o/chi o-tî kándyí ké dyikpen ńdyí ne banyá. 26Nang yeě nké mu o-ryuu ng o/fu, nyǐ o-kyú u mě ḿgbán, onet ámu o-man o-cen ne me ké kyikû, eringe nyí ḿgbán ejí o/chi o-kyú ne me to ké kyikit ńkyí me mu. Bonchí ejí o/chi o-kpee onet mú mu ḿgbán ejí.

Jisos o/raa kyi-kim ne Bukyû Emen

27Kántîk nké dyityém ejí dyi/firi ké afaníkong, nké me n-raa ng ebóng. Ányi me n-raa ng n/fu, Kyítá, *damîng kyikim-nkéré ńkyín kyi-bâ kyi-kâm mě aa*? Nké nkyí nké kyi/chi ne me m-bâ n/fu, n-nung ng ké kyikim-nkéré ńkyín ńkyí afaníkong. 28Kyítá, bâ ne akpee a-kye dyizîn eyên.

Ne ejá e-fím kyíbóng e-raa e/fu, me mm/bê ne akpee n-kye dyizîn ejí, ne n/chi n-chîchi éné.

29Bujê-banet ḿbé mbe ányi cip ba/jwo ejá ányi, ne ba-kpet eraa ba/fu, etare nké e/sá.

Banet bakíri ba/fu, orím mú onong nké o/raa ne nyǐ.

30Nké Jisos o/raa ne mbé o/fu, *chí ké bubwô ejí nké ejá ńnyín něen e/raa* nké ké bubwô enen. 31Kántîk nké nkyi nkéré mú Osówo odapan ejíí mpan. Kántîk nké Osówo odaró Otu-Byibî-Barím mú mu otu mú ejíí ńnyín. 32Ké nkéré mú baa/yip mě kyíbóng, me n/chi m-kpaa kángkáng banet n-fé ké byiko. 33Jisos o/tông dyizong-bukyû ḿbú nyǐ o/chi o-kpú, ké ńkyí nyǐ o/raa éné.

34Bujê-banet ámbe ba-faa ba/fu, Nwet-Byije eten mu o-sét ng bě o/fu, onet mú Osówo o/kúng ǎ butu o-kpen n ne banyá. Kyi-cen n nǎ kâng ne wo a-kûraa a/fu, Wǎn mú Onet ba-man ba-yip ǎ kyíbóng. Wǎn-Onet mún ányi yeě.

35Jisos o-faa kámbé o/fu, kiinwángé kyi/chi kyi-kyú ne ben kyi-ca kashú ké kaǎnyín-nkéré. Cen n̂ ba-ca kashú ké ba/tôong ne kiinwángé, eringe nyí kyifip kii*ba/chi kyi-kâm běn*. Ké nǎ, onet mú mu o-cen n ké kyifip oo*nyît kyicê ńkyí nyǐ mu o-wâa ng*. 36Bángê ê kâng ké kiinwángé ne atyém enen ké ba/tôong ne kiinwángé, eringe nyí badakyú banet ḿbé kiinwángé.

Banet-Jûs ba*da/bángê ne Jisos ne Atyém Ebe*

Ńdyí Jisos oo/raa ńkyín o-dim o-da-rem, eringe nyí mbé baa*ri ǎ*. 37Nang ké nyǐ oo/chi biǐtí-akat ḿbyín kángkáng ké achi ebe chíchí, mbé ba*da/bángê ne nyǐ ne atyém ebe* 38eringe ńkyí Azáya mú o/mû mkpábé mú odasét byiraa-Osówo o/sét kyidakyú ntûntû, o/fu, Otu Kyítá, yeě o/bángê ne dyityém emen ké kyitwóm ńkyí be byi/sét. Ebóng onet mú Otu Kyítá o/tông ǎ busa emen.

39Ké bubwô ḿbún, mbé ba/mû ba*da/man ebángê ne atyém ebe* ké ebóng, Azáya o/sét to o/fu, 40Osówo oo/chi achi ebe a*fí to a-rángê e* ne oo/cít atyém ebe, eringe nyí achi ebe aa*ba/chi a-ri chwǒm* ne atyém ebe aa*ba/chi a-nyît chwǒm*. Ne Osówo o-raa o/fu, ne mbé baa*ba/chi ba-bírî ba-kâm mě* eringe nyí n/chi n-chi kámbé ba-nyange*.

41Azáya o/raa ńkyín, ké nǎ, nyǐ o/ri busa ḿbú Jisos ne o-raa kyi-kim ne nyǐ.

42Nang ké nkyi éné, batu-ashí-banet-Jûs chwóó ba/bángê ké Jisos ne atyém ebe, nké ké bubwô ḿbú banet-ncibi mú Fárasyî, mbé ba*da/pem wááng kyi-kim ne nkyí* eringe nyí baa*ba/chi ba-fîm kámbé ké ékwâbashi ebe*. 43Ké ebóng, akpee nyí banet badakye kámbé a-nyîn n kámbé a-shwôm nyí Osówo odakye kámbé.

Ejá-Jisos e-pan n Banet Mpan

44Jisos o-raa ne ejá kyíbóng o/fu, nang yeě nké mu o-bángê e ne me ne dyityém emen o*fí o-bángê e ne me nké nke* nké mu o-bángê e to ne nyǐ mú o/twóm mě me. 45Nang yeě nké mu o-ri ng mě mu o-ri ng to nyǐ mú o/twóm mě me. 46Me mm/bê ké ejíí wǎ kiinwángé, n/fu, kángkáng banet ḿbé mbe ba-bángê e ne me ne atyém ebe ba*dachi ba-waa ké kyifip*. 47Nang yeě nké mu o-jwo ng kyitwóm ejí ne o*fí o-chi i eringe nyí kyi/sét* mm*ba/chi m-pan ǎ mpan*. Me m/bê ejíí enyii ké byibî, n*da/bê kányí mpan ebapan*. 48Nang yeě nké mu o-né ng mě, ne o*fí o-koo ng kyitwóm eji* mu ne onet mú o/chi o-pan ǎ mpan. Ejá nyí me nn/raa nké e/chi e-kyú ǎ wǎ onet mú odakét bampan ké nkuli kyikû-dyicí. 49Ké ebóng, me n*da/raa ké kakim ejí* nké Bonchí ejí mú o/twóm mě oo/kye mě busa ké ńkyí n/chi m-man n-raa ne m-man n-sét. 50Mu n-nyît ng to n/fu, busa emen ḿbú o/kye mbu bu-kyâ dyikpen ńdyí ne banyá. Ńkyí Bonchí ejí o/sét o/fu, me nsét, nkyí nké mu n-sét ng.

Currently Selected:

Jǒn 12: BKY

Highlight

Copy