Jǒn 13

Jisos o/soo Byiká ḿbyí Bǎmgbán Emen

1Kyi/mû kyi/waa dyicí dyibónge ne dyijî-kyifen ńkyí Shwôm kyi-fyi. Jisos o/nyît o/fu, nkéré emen oo/fyi mú nyǐ odamîng ejíí ńnyín o-dim o-kâm Bonchí. Banet ḿbé ba/mû ḿbé emen ké ejíí ńnyín ba/mû ba-jê ng ǎ kángkáng nkéré, ne ba/jê ǎ tete ké ochíchí-nkuli kyikû.

2Jisos ne bǎmgbán emen ba/mû mbe ba-ryí i byiryíng-dyikurúku. Otu-Byibî-Barím o/mû oo/tóbê o-tî o/fu, Júdas mú wǎn-Sámon-Esakáryot nké o/chi o-chi ba-kám Jisos.

3Jisos o/nyît o/fu, Bonchí emen oo/fé ǎ nyǐ kángkáng byěm ké abwô emen. O/nyît to o/fu, Osówo nké o/twóm ǎ nyǐ, ne nyǐ mu o-bwa ng esim to o-kâm Osówo. 4Jisos o-bûu kâng nensang ké ókpákpúrúk mú ba/mû mbe ba-ryí i byiryíng. O-pii nkyû emen, o-yip ogbugbu o-sît ké osín. 5O-chi kâng omu o-fé ké kaǎcáng-abwô esoo, ne o-kpet esoo bǎmgbán emen byiká, o-shî ng kámbyí ké ogbugbu ámu mú o/sît ké osín. 6O-ba-ribi kyikit-Sámon-Pyíta, ne Pyíta o-raa ne nyǐ o/fu, Otu Kyítá, *chí wo nké ada mě esoo byiká*.

7Jisos o-faa ǎ o/fu, wo a*fí a-nyît ng kántîk ńkyí me mu n-chi i* nké a/chi a-nyît ké nkéré mú mu o-bâ.

8Pyíta o-sét ǎ wááng o/fu, wo aa*ba/chi a-soo byiká ejí ne banyá*.

Jisos o-faa o/fu, â me n*da ǒ esoo byiká ḿbyí eyên* wo aa*ba/chi a-chîkyú ḿgbán ejí*.

9Sámon o-faa o/fu, Otu Kyítá, *dachi a-soo byiká ejí nké nke* nké soo to abwô ejí ne dyishí.

10Jisos o-sét ǎ o/fu, nang yeě nké oo/kôo omu, onet ámu o/firi kpárádádát byiko byimúmú, oo*kôo to omu* kyi*da/shwôm byiká emen nké nke nké odasoo*. Ben ashí amúmú bamu kpárádádát, kyi*da/shwôm onet obónge*. 11Ké ebóng, Jisos o/mû mu o-nyît ng onet mú mu o-bâ ebachi ba-kám ǎ nyǐ. Nkyí nké kyi/chi ǎ ne o-raa o/fu, ben ashí amúmú bamu kpárádádát, kyi*da/shwôm onet obónge*.

12Ńdyí Jisos oo/soo kámbé byiká, o/yip nkyû emen ámu o-chîfé, ne o-bwa esim o-da-kyú me ké kyikit emen ńkyí o/mû o/kyú ké ókpákpúrúk. O-bí kámbé o/fu, ben bamu ba-nyît ng dyishí ne kyikû-chwǒm ńkyí me n/chi běn něen kántîk? 13Ben bamu ba-kó ng mě ntánge byiraa-Osówo ne Otu Kyítá. Ńkyí bamu ba-kó ng mě éné nkyi kanong, ké nǎ, me n-chi i ntánge byiraa-Osówo ne Otu Kyítá. 14Nké â me mú mu běn Otu Kyítá enen ne ntánge byiraa-Osówo enen, nn/soo běn byiká, ben to ba-man ba-kûsoo barî byiká. 15Me nn/chi ńkyín n-tông běn bukwóp, eringe nyí ben to badachi kerededet ńkyí me nn/chi běn ben. 16Me mu n-sét ng běn ntûntû n/fu, ósóng o*fí nang obónge mú o/rêe o-shwôm bonchí emen*. Onet-kyitwóm to o*fí nang obónge mú o/rêe o-shwôm onet mú o/twóm ǎ*. 17Kántîk ben ba-kú ba-nyît ng ntûntû mún. Bunyîn-dyityém bu/chi bu-kyú ne ben, â bamu ba-chi i kánkyí.

18Me n*fí n-raa ng kyi-kim ne ben ashí amúmú*. Me mu n-nyît ng banet ḿbé me nn/cá. Nké ejá-Osówo nyí ba/sáng kyísí e-man e-kyú ntûntû eringe nyí e/raa e/fu, onet mú o/ryí byiryíng ejí oo/bírî mě esim. 19Me mu n-sét ng běn ńkyín něen kántîk ne kyi-kûchi, eringe nyí ké nkéré mú kii/chi, ben ba/chi ba-bángê ne me ne atyém enen ba/fu, Me Mu Nyǐ Mú Me Mu. 20Me mu n-sét ng běn ntûntû n/fu, nang yeě nké mu o-koo ng onet nang orá mú me mu n-twóm m o-tî kanong, onet ámu mu o-koo ng mě to, ne nang yeě nké mu o-koo ng mě, onet ámu mu o-koo ng to Osówo mú o/twóm mě.

Jisos o/sét kyi-kim ne Dyikâm Emen ńdyí Júdas o/chi o-chi ba-kám ǎ

(Mátyuu 26:20-25; Mâk 14:17-21; Lûk 22:21-23)

21Ńdyí Jisos o/raa ńkyín dyityém emen dyi*da ǎ echînyîn* ne o-raa wááng o/fu, mu n-sét ng běn ntûntû n/fu, onet obónge ké burwám enen o/chi o-chi ba-kám mě.

22Bǎmgbán emen ba-tún barî achi ké bushú, onet mú nyǐ o/raa kyi-kim ne nyǐ mbé ba*fí ba-nyît ng*. 23Ḿgbán obónge ké burwám-bǎmgbán emen mú odajê Jisos o/mû o/kyú o-kim ne Jisos. 24Sámon Pyíta o-me kâng ḿgbán ámu bubwô, ne o-sét ǎ o/fu, bí ǎ onet mú nyǐ mu o-raa ng kyi-kim ne nyǐ.

25Ne ḿgbán ámu kâng o-tín o-jêem Jisos ké kakim ne o-bí ǎ o/fu, yeě wo amu a-raa ng, ǎ Otu Kyítá.

26Jisos o-faa o/fu, onet mú n/chi n-tip berêt ké kasu m-bwa ne mǔ n-kye ǎ, ányi nyǐ. Ne Jisos o-yip kyicê-berêt o-tip ké kasu, ne o-bwa ne nkyí o-kye Júdas mú wǎn-Sámon-Ésakáryot. 27Ńdyí Júdas o-koo ng berêt ámu o-bâ, Sátan o-waa o-nung ǎ ké byiko. Jisos o-sét Júdas o/fu, ńkyí amu a-wâa ng edachi, chi kánkyí babap. 28Onet nang obónge ké banet ḿbé ba/mû ba/kyú ké ókpákpúrúk ámu o/mû o*fí mú o/mû mu o-nyît ng dyishí ne kyikû-chwǒm ńkyí kyi/chi ne Jisos o-raa něen ne Júdas*. 29Bakíri ba/mû ba-kabe ng ba/fu, katô Jisos o/mû mu o-sét ng Júdas o/fu, oda-ré chwǒm ńkyí mbé ba/mû ba-ryuu ng ké dyijî. Katô okye banet-byikpu chwǒm, ké nǎ, Júdas nké o/mû o-níbî ng kiimbam ńkyí akpuga efé.

30Júdas o/koo berêt ámu, o-waa o-byí ké abe ányi. Kyi/mû ne buchú.

Jisos o/kye Kyije ńkyí Kyifyîfî

31Ké nkéré mú Júdas oo/dim, Jisos o-raa o/fu, kántîk, busa ḿbú Wǎn-Onet boo/tông kyíjí gbúúl. Kántîk, busa ḿbú Osówo boo/tông to kyíjí gbúúl ké bubwô ḿbú Wǎn-Onet. 32Nké â busa ḿbú Osówo boo/tông kyíjí gbúúl ké bubwô ḿbú Wǎn-Onet, éné kâng Osówo nké o/chi o-tông busa ḿbú Wǎn-Onet kyíjí gbúúl. Ne o/chi o-chi éné abe abe. 33Bwǎn ejí, me mm*ba/chi n-chîkyú ne ben ka-bwon*. Ben ba/chi ba-kû mě ekyé. Nké me mu n-sét ng běn kántîk ńkyí m/mû n/sét banet-Jûs n/fu, ben baa*man ece ké kyikit ńkyí me mu n-wâa ng*. 34Nyín něen kyije ńkyí kyifyîfî ńkyí mu n-kyâ běn. Kyú n̂g ne kyijé ne barî. Eringe nyí me nn/kyú ne kyijé ne ben, eringe ányi to nké ben badaman ba-kyú ne kyijé ne barî. 35Â ben bamu ne kyijé ne barî, banet kángkáng kâng ba/chi ba-nyît ba/fu, ben ba-chi i bǎmgbán ejí.

Jisos o/sét o/fu, Pyíta o/chi o-né ǎ

(Mátyuu 26:31-35; Mâk 13:27-31; Lûk 22:31-34)

36Sámon-Pyíta o-bí Jisos o/fu, wo amu a-wâa ng nyá, ǎ Otu Kyítá.

Jisos o-faa o/fu, wo aa*man ece ne me ké kyikû kántîk* ké kyikit ńkyí mu n-wâa ng*. Nké a/chi a-bâ ne me ké kyikû ké nkéré mú mu o-bâ.

37Pyíta o-bí ǎ o/fu, ebóng kyi/chi ńkyí me mm*man ebê ne wo ké kyikû kántîk* ǎ Otu Kyítá*. Me mm/kpá byiko ḿbyí ndakpú ké dyishí eyên.

38Jisos o-faa o-bí ǎ o/fu, wo ntûntû aa/kpá byiko ḿbyí adakpú ké dyishí ejí dí. Me mu n-sét ng ǒ ntûntû n/fu, ne otúkwa o-kûkó, wo a/chi a-né mě kampén kachât a/fu, wo aa*nyît mě*.

Currently Selected:

Jǒn 13: BKY

Highlight

Copy