Jǒn 15

Jisos nké mu Ochíchí-Dyisín-Kyichí

1Jisos o-chîraa o/fu, me nké mu ochíchí-dyisín-kyichí, ne Bonchí ejí nké mu ntûn dyisín-kyichí ándyi. 2Bonchí ejí mu o-két ng kyire nang kyirá ńkyí nkyi mě ké byiko, ńkyí kyi*fí kyi-zím m byirim* o-twóp ng. Ne mu o-nap ng kyire nang kyirá ńkyí nkyi kyi-zím m byirim o-tî wááng, eringe kyidakyú kpárám, kyi-kûzím byirim kyi-shwôm eringe nyí kyi/mû kyi-zím m. 3Bonchí ejí oo/nap běn o-tî kpárám dêndên ké kyitwóm ńkyí me nn/sét běn. 4Waa n̂g cibicibi ne me ké byiko, me to n/chi n-waa ne ben cibicibi ké byiko. Eringe nyí kyire kii*man ezím byirim ké byiko emen* â kyi*fí cibicibi ne dyisín-kyichí*. Eringe ebónge to ne ben, â ba*fí ba-cibi ng ne me*.

5Me nké mu dyisín-kyichí, ben ba-chi i byire. Nang yeě nké mu o-waa ng cibicibi ne me ké byiko, ne me to mu ne nyǐ ké byiko, onet ámu nké o/chi o-zím byirim chwóó. Ké nǎ, â me n*fí* ben baa*man echi chwǒm nang kyibónge*. 6Onet mú o*fí o-waa ng cibicibi ne me ké byiko* Bonchí ejí o-twóp ng ǎ kú wǎ kyire-kyichí, o-waa o-jwóm. Bonchí ejí o-kpaa ng azong-byire-kyichí ányi kyikit kyibónge, o-yip o-fé ké okwâ o-shí. 7Â ben bamu ba-waa ng mě ké byiko, ne byiraa ejí mbyi byi-waa ng běn ké atyém, bí n̂g nang ebóng ńkyí bamu ba-ryuu ng, Bonchí ejí o/chi o-kye běn kánkyí. 8Â ben bamu ba-zím m byirim chwóó, ányi ben bamu ba-kyâ Bonchí ejí akpee, ne ké bukwóp ḿbún, ben ba/firi bǎmgbán ejí. 9Eringe nyí me mu n-jê ng Bonchí ejí, éné to nké ben bamu ba-jê ng mě me. Waa n̂g ké kyijé ejí. 10Â ben bamu ba-tî ng byije ejí, ben ba/chi ba-waa ké kyijé ejí, wǎ eringe nyí me nn/tî byije ḿbyí Bonchí ejí, ne nn/waa ké kyijé emen.

11Me nn/sét běn ńkyín, eringe nyí bunyîn-dyityém ejí buda běn ewaa ké byiko, ne eringe nyí buda běn ekwárê kerededet. 12Kyije ejí nkyi něen, kû n̂g ejê barî wǎ eringe nyí ben bamu ba-jê ng mě. 13Kiǐtí-kyijé ńkyí onet odaman etông bacín emen kyi*da/shwôm dyikpen emen ekye ké ashí ebe*. 14Ben ba-chi i bacín ejí, â bamu ba-chi i ńkyí me mu n-sét ng běn. 15Me nn*kó běn to bǎmgbán ejí* ké nǎ, ḿgbán oo*nyît ńkyí bonchí emen mu o-chi i*. Nké n-kû ng běn ekó bacín ejí, ké nǎ, nn/sét běn kángkáng byěm ḿbyí me n/jwo ne Bonchí ejí. 16Ben ba*da mě ecá* me nké n/cá běn n-tî běn n/fu, ca n̂g ba-kûzím byirim chwóó ḿbyí byidawaa ne banyá. Ne Bonchí ejí kâng o/chi o-kye běn nang ebóng chwǒm ńkyí ben bamu ba-bí ng ǎ, â ba/kó dyizîn ejí. 17Ńkyín kâng nké me mu n-sét ng běn n/fu, kyú n̂g ne kyijé ne barî.

Busa-Dyityém ḿbú Ejíí

18Â ben bamu ba-sa ng ejíí dyityém, zîim m̂ ba/fu, me n/sa kányí dyityém kpá. 19Â ben ba/mû ba-chi i banet ḿbé ejíí ńnyín, ben kâng ba/mû ba/chi ba-kûjê ejíí wǎ banet emen. Nké me n/cá běn ké ejíí ńnyín, ben ba*fí to banet ḿbé ejíí. Ńkyín nké ben bamu ba-sa ng ejíí dyityém. 20Zîim m̂ ńkyí me n/sét běn n/fu, ósóng o*fí nang obónge mú odashwôm bonchí emen*. Â ejíí e/kye mě me busông, e/chi e-kye běn to busông. Â e/chi eringe nyí me n/sét, e/chi e-chi to eringe nyí ben ba/sét. 21Nké ejíí e/chi běn kángkáng byěm ḿbyín, ké ebóng, ben ba/já mě me, ké nǎ, nyǐ e*fí e-nyît ng ǎ nyǐ mú o/twóm mě*. 22Bonchí ejí o/mû oo*ba/chi o-fu kányí e/chi kyibî* â me m/mû n*da/bê m-ba-sét kányí*. Wǎ eringe nyí nkyi, nyǐ e*fí to ne chwǒm ńkyí edachîsét* kyi-kim ne byibî emen*. 23Nang yeě nké me mu n-sa ng ǎ dyityém, Bonchí ejí to mu o-sa ng onet ámu dyityém. 24Bonchí ejí o/mû oo*ba/chi o-fu kányí e/chi kyibî* â me m/mû n*da/chi biǐtí-akat ké bushú emen* ḿbyí nang onet obónge o*da/chi ne ne banyá*. Wǎ eringe nyí nkyi, nyǐ ee/ri ńkyí me n/chi. Me cibicibi ne Bonchí ejí byimu byi-sa ng kányí dyityém. 25Ńkyín kyi-man kyi-kyú éné, eringe nyí ńkyí ba/sáng ké Nwet-Byije-Músis ebe kyidakyú ntûntû, ba/fu, me n/sa kámbé dyityém dyikáá.

26Nchíchwábáng, ányi Busun-Osówo ḿbú budasét ntûntû, ḿbú mbu bu-fím m ne Bonchí ejí bu/chi bu-bâ. Me n/chi n-twóm kámbú bu-fím ké kyikit-Bonchí ejí bu-bâ bu-kâm běn. Ne mbú bu/chi bu-kûraa kyi-kim ne me. 27Ne ben to ba/chi ba-kûraa kyi-kim ne me, ké ebóng, ben baa/kyú ne me kyi-fím ké kiimkpet kyikû.

Currently Selected:

Jǒn 15: BKY

Highlight

Copy