Mâk 13
13
Jisos o/raa kyi-kim ne eringe nyí ba/chi ba-bên Kiǐtí-Kyise-Kyifen-Osówo echi
(Mátyuu 24:1-2; Lûk 21:5-6)
1Ńdyí Jisos o-kú o-byí i ké kiǐtí-kyise-kyifen-Osówo echi o-dim, ḿgbán emen obónge o/fu ǎ, ké ntûntû, ǎ ntánge byiraa-Osówo, bunong ḿbú aká ńnyín ne ḿbú byise ḿbyín boo*nwa kafwa efé*.
2Jisos o-faa ǎ o/fu, amu a-ri ng biǐtí-byise ḿbyín? Buká nang bubónge boo*ba/chi bu-chîwaa ké kyikit emen ńkyí mbu*. Ba/chi ba-bú kányí kángkáng ba-pwó kyísí.
Afaníkong ne Busông
(Mátyuu 24:3-14; Lûk 21:7-19)
3Ké nkéré Jisos o/mû o/kyú me ké kaku ńké badakó Ólif, o-bírî kashú ké kyicê ńkyí kiǐtí-kyise-kyifen-Osówo echi, Pyíta ne Jêmsyi ne Ánduru ba/bí ǎ ké booju ba/fu, 4sét bě, nkéré orá mú byěm ḿbyín byi/chi byi-chi. A-sét bě to ekap nyí e/chi e-tông e/fu, nkéré oo/fyi mú kángkáng byěm ḿbyín byidachi.
5Jisos o-kpet esét kámbé o/fu, kû n̂g ebám byiko enen, eringe onet nang obónge oo*nîm běn*. 6Banet chwóó ba/chi ba-bâ ké dyizîn ejí ba-kûraa ba/fu, dǐi, me nké mu onet mú Osówo o/kúng ǎ butu. Ne mbé ba/chi ba-nîm banet chwóó. 7Ofong o*dachi o-kédê běn* â ba/jwo kyi-kim ne byití ḿbyí byi/firi nyín jwángjwáng* nang bapem kyi-kim ne byití ḿbyí tete*. Azong-byěm ányi a-man a-chi. Nké kyi*da/byí kyi/fu, nkuli kyikû-nkéré oo/fyi*. 8Oshê ne oshê ba/chi ba-kûnwa ne barî. Batu ne batu ba/chi ba-kûkye barî bunwa. Esí e/chi e-náng ké kángkáng byikit, ne esong to e/chi e-róng. Nké byěm ḿbyín ányi kiimkpet kyikû-busông.
9Ben ba-man ba-kûbám byiko enen. Banet bakíri ba/chi ba-kám běn ba-da-fé ké esuk. Ba/chi ba-mín běn ké byise-ékwâbashi ḿbyí banet-Jûs, ne ben ba/chi ba-bwom ké bushú-batu-ashí ne ḿbú batu-eshê ké bubwô ejí, eringe nyí badasét kámbé Bǎmpém ḿbé Banong. 10Banet ba-man ba-sét kpá kángkáng banet ḿbé ké ejíí Bǎmpém ḿbé Banong. 11Nké â nkéré mú baa/kám běn ba-da-fé ké esuk, *da n̂g echi ba-kérê ne nkéré o-kûfyi* kyi-kim ne ńkyí ben ba/chi ba-sét*. Nké sét n̂g nang ebóng ńkyí Osówo o/chi o-kye běn ké nkéré ámu. Ké ebóng, *chí ben nké ba/chi ba-raa*. Busun-Osówo nké bu/chi bu-raa. 12Banet ba/chi ba-kûníbî bwǎn-bané ebe ba-kyâ banet ba-ju ng. Banchí-bwǎn ba/chi ba-chi to bwǎn ebe dyizong ándyi. Bwǎn ba/chi ba-bírî banchí ne bané esim, ba-chi banet ba-ju kámbé. 13Ben ba/chi ba-kûsa kángkáng banet kafâ ké bubwô ejí. Nké nang yeě nké o/ryí ofit tata o-kpú, Osówo o/chi o-nyii ǎ.
Kiinchi Bushî-Chwǒm-Ociring
(Mátyuu 24:15-28; Lûk 21:20-24)
14Ben ba/chi ba-ri chwǒm-ociring ńkyí kyidachi bushî ké kii/bwom ké kyikit ńkyí kyi/mû kii*ba/chi kyi-bwom*. Onet mú mu o-kó ng, okó o-jwo dyishí kanong kanong. Ké nkéré ámu kâng, banet ḿbé mbe ké Judyâ ba-man ba-chêe ba-jâ ké eku. 15Onet mú mu kyíbóng-kyise emen o*dachi o-shû kyísí* o-nung ké kyise o/fu, nyǐ o-da ng ekúng nang chwǒm kyibónge o-dim ne nkyí*. 16Onet to mú mu ké kyifát o*dachi o-fu, nyǐ o-bwa ng esim ké kyise o-da-kúng kyídí emen*. 17Nké kyi/chi kyi-bên kanong kanong ne banyinyi ḿbé mbe ne afít ne ḿbé ba/tôong ba-kyâ bwǎn abî, ké nkéré ámu. 18Fé n̂g nshwam ba-kye Osówo ba/fu, byěm ḿbyín byi*dachi byi-chi ké nkéré mú kyifang*. 19Ké ebóng, afaníkong nyí ací ányi a/chi a-bên kanong kanong a-shwôm nang ará nyí ejíí nyi e-nyît ng kyi-fím ké nkéré mú Osówo o/chi ejíí tata kyi-ribi kántîk. Dyizong-chwǒm ńdyín to dii*ba/chi dyi-chîchi*. 20Nké Otu Kyítá oo/shwô ací ányi. Â o/mû o*da/shwô kányí* nang onet obónge o/mû oo*waa okpó*. Nyǐ oo/shwô ací ányi ké dyishí-banet emen ḿbé nyǐ o/cá.
21Nké â onet nang orá o/fu běn, kû n̂g etún, nyín něen onet mú Osówo o/kúng ǎ butu. Kakíri o-fu běn, kû n̂g etún, dǐi nyǐ áku i, *da n̂g echi ba-bángê*. 22Ké ebóng, bannîm banet ba/chi ba-byí ba/fu, mbé nké Osówo o/kúng kámbé butu, ne bamkpábé to ba/chi ba-byí ḿbé badasét byisédéng éné wǎ mbé mbe ba-sét ng ké bubwô ḿbú Osówo. Mbé ba/chi ba-kûtông ekap ne akat, eringe nyí badanîm banet ḿbé Osówo o/cá kámbé, â ba-man n enîm. 23Nké bám m̂ byiko enen. Me nn/sét běn kángkáng byěm ḿbyín kpá ne byi-kûchi.
Obê mú Wǎn-Onet
(Mátyuu 24:29-31; Lûk 21:25-28)
24Â nkéré ámu mú afaníkong ányi oo/man, óbyísû o/chi o-róng kyifip, otukáku to oo*ba/chi o-chîsan*. 25Ékpére e/chi e-fím kyíbóng e-róng kyísí, ne busa to ḿbú bu/mû bu-níbî ng byěm ḿbyín kyíbóng bu/chi bu-náng. 26Ne Wǎn-Onet o/chi o-byí kâng ké ófíbí o-kpet ebê ne kiǐtí-busa ne kiǐtí-busan ḿbú ragerage. 27Nyǐ o/chi o-twóm barím emen ḿbé banong ba-ca kángkáng bakô-ejíí ba-da-kpî banet ḿbé Osówo o/cá kámbé ba-tî kyikit kyibónge, kyi-fím ké bukô-ejíí ḿbún tata kyi-ribi ḿbú áku.
Chwǒm ekwâa kyi-kim ne Kyichí ńkyí badakó Fyîk
(Mátyuu 24:32-35; Lûk 21:29-33)
28Mîng n̂g kyichí ńkyí badakó fyîk, ńkyí nkyi wǎ kyifem kyi-tángê běn chwǒm. Ké nkéré byire emen bii/bwá aku ne byi-kpet ebyet eshǎan, ben ba-nyît ng ba/fu, kyifang kyi/firi jwángjwáng. 29Dyizong dyibónge to ké nkéré mú ben baa/ri byěm ḿbyín byi-kú byi-chi i, nyît n̂g to ba/fu, nkéré mú Wǎn mú Onet o/firi jwángjwáng mú odakpet. 30Zîim m̂ ńkyín. Kángkáng byěm ḿbyín byi-man byi-chi ne kángkáng banet ḿbé mbe kántîk ké ejíí ba-kpú kpók. 31Bubóng ne esí byi/chi byi-man, nké ejá ejí ee*ba/chi e-waa kyísí ne banyá*.
Onet o*fí mú odanyît Dyicí* nang Ochíchí-Nkéré ámu*
(Mátyuu 24:36-44)
32Onet nang obónge o*fí mú odanyît dyicí ándyi* nang ochíchí-nkéré mú dyicí ándyi dyi/chi dyi-bâ*. Nang barím ḿbé banong ḿbé kyíbóng ba*fí ba-nyît ng*. Nang Wǎn-Osówo o*fí o-nyît ng*. Bonchí ejí kǎnchí nké mu o-nyît ng. 33Bám m̂ byiko ba-tún n achi, ké ebóng, ba*fí ba-nyît ng nkéré mú nkéré ámu o/chi o-bâ*. 34Kyi/chi kyi-kyú wǎ onyinchéng mú mu o-wâa ng bucen. Ké nkéré o-kú o-dim m, o-mîng bǎmgbán emen ké kakim ebe. O-kye ḿgbán emen nang orá bǎmkpóngé ḿbé odachi. O-sét to mú mbâm kyise emen o/fu, okûbám. 35Ben to kû n̂g ebám kâng, ké ebóng, ben ba*fí ba-nyît ng nkéré mú oyén-kyise odafyi*. Nang o-fyi ng ké dyikurúku o, nang ké kyirê-buchú o, nang ké etúkwa nyí kashú o, nang ké dyicófóróng o. 36Â o/byí běn kiǐmút, o*dachi o-kâm běn ba-kú ba-rê ng*. 37Ńkyí mu n-sét ng běn kâng, mu n-sét ng kángkáng banet n/fu, bám m̂.
Currently Selected:
Mâk 13: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
