Mâk 14

Banet-Jûs ba/nam Jisos Dyiju

(Mátyuu 26:1-5; Lûk 22:1-2; Jǒn 11:45-53)

1Ké nkéré ámu, ací a/mû a/waa afee ne dyijî-kyifen ńkyí Shwôm ne ńkyí Berêt kyi-fyi. Batu-banchi kyifen-Osówo ne bantánge Byije-Músis ba/mû mbe ba-kyé ng bukwóp ḿbú badakám Jisos ké kyikit ńkyí banet baa*ri kámbé* mbé ba-da-ju. 2Ké ebóng, mbé ba/mû mbe ba-raa ng ne barî ba/fu, byi*dachi byi-chi kánkyí ké nkéré mú dyijî* eringe banet baa*ba/chi ba-kye bě bunwa*.

Ba/pwó Jisos Bakút ké Dyishí, ké Bétányi

(Mátyuu 26:6-13; Jǒn 12:1-8)

3Ké nkéré Jisos mu o-ryí i byiryíng ké kyise ńkyí Sámon mú o/mû o-rwôm m kyibî-orwôm, ké Bétányi, onyinyi obónge o/banung ké kyise ánkyi ne ókpúmá-bakút ḿbé badanyîn kyinung, ḿbé badashwane kasî. Ba/chi bakút ámbe ké babî-kyichí ḿbé badakó nât. Onyinyi ámu o-sé kiinkíbí-ókpúmá ámu, ne o-bírî bakút ámbe o-pwó Jisos ké dyishí. 4Nké banet bakíri ḿbé ba/mû ányi kafâ ka/kpet esa kámbé. Ba-kpet eraa ne barî ba/fu, ebóng onyinyi mún o/bên bakút ḿbén. 5Ké ebóng, ba/mû ba/chi ba-shee kámbé akpuga a-shwôm nang biimbam byichât. Ba-yip akpuga ányi ba-kye banet-byikpu. Ne ba-bîn mú onyinyi ámu kanong kanong.

6Nké Jisos o/raa ne mbé o/fu, mîng n̂g ǎ. Ebóng bamu ba-kyâ ǎ afaníkong. Oo/chi mě chwǒm ńkyí kyinong kyinong. 7Ké ebóng, kángkáng nkéré, banet-byikpu mbe ké burwám enen, mú nang nkéré orá nké kyi/nyîn běn, ben ba-man n echwáp kámbé. Nké me mm*ba/chi n-kyú ne ben kángkáng nkéré*. 8Nyǐ oo/chi ńkyí odaman echi. Oo/pwó mě bakút-kyinung ké byiko, o-nap kámbyí kpá ne nkéré o-kûfyi mú badaryii kámbyí. 9Ké ntûntû, me mu n-sét ng běn n/fu, nang nyá ké ejíí emúmú nké ba-kú ba-sét ng Bǎmpém ḿbé Banong, ba/chi ba-sét ńkyí nyǐ oo/chi ké ozîim emen.

Júdas o/bángê o/fu, Nyǐ o-chi i ba-kám Jisos

(Mátyuu 26:14-16; Lûk 22:3-6)

10Ne Júdas-Esakáryot kâng mú o/mû ḿgbán to ké burwám-bǎmgbán-Jisos ḿbé ashí diǐkpú ne afee o-dim o-kâm batu-banchi kyifen-Osówo, eringe nyí nyǐ o/chi o-kám Jisos o-kye kámbé. 11Ké nkéré mbé ba/jwo kánkyí, kyi/nyîn kámbé kanong kanong, ne ba-ryí ocím ba/fu, mbé ba-kyâ ǎ akpuga. Júdas o-kpet ekyé kâng bukwóp ḿbú bunong ḿbú odachi ba-kám Jisos.

Jisos ne Bǎmgbán Emen ba/ryí Byiryíng-Dyijî-Kyifen ńkyí Shwôm

(Mátyuu 26:17-25; Lûk 22:7-14, 21-23; Jǒn 13:21-30)

12Ké mbwôp kashú-dyicí-dyijî-kyifen ńkyí Berêt, dyicí ándyi nké badaju byisu-etám-ebû ké dyijî-kyifen ńkyí Shwôm, bǎmgbán-Jisos ba-bí ǎ ba/fu, kyikit kyirá ńkyí wo amu a-ryuu ng a/fu, be byida-rám byiryíng-dyijî ḿbyí adaryí.

13Jisos o-twóm kâng bǎmgbán emen ashí afee. O-sét kámbé o/fu, ca n̂g ké kafâ-Jerúsélem. Onyinchéng obónge mú o/tû katí-omu ké dyishí o/chi o-kwárê ne ben, ca n̂g ne nyǐ ké kyikû. 14Nang nyá nké nyǐ o/nung, sét n̂g oyén-kyise ánkyi ba/fu, ntánge byiraa-Osówo o/fu, nfût mú emen mu nyá mú nyǐ ne bǎmgbán emen badaryí byiryíng-dyijî. 15Nyǐ o/chi o-tông běn kâng kiimbâng-nfût kyíbóng-enyóng ńkyí baa/nap kángkáng byěm ba-tî. Ányi nké ben ba/chi ba-kpá byiko ké kángkáng byěm ba-tî bě.

16Bǎmgbán emen ámbe ba-dim ba-da-nung ké oshê ámu, ne ba-ri kángkáng byěm eringe nyí Jisos o/sét kámbé. Ba-rám byiryíng-dyijî ándyi ányi.

17Ké nkéré dyikurúku dii/fyi, Jisos o/bê ne bǎmgbán emen ḿbé ashí diǐkpú ne afee. 18Ńdyí mbe ba-ryí i byiryíng, Jisos o-raa ne mbé o/fu, mu n-sét ng běn ntûntû n/fu, onet obónge ké burwám enen o/chi o-chi ba-kám mě. Onet mú mu o-ryí i byiryíng ne me.

19Bǎmgbán emen ba-firi bafip báfip, ne ba-kpet Jisos ebí ké onet ké onet ba/fu, me dí.

20Jisos o-faa kámbé o/fu, onet ámu mu ké burwám enen ḿbú ashí diǐkpú ne afee, mú mu o-tip ng berêt ké dyicáng dyibónge ne me. 21Ké ebóng, Wǎn-Onet o/chi o-kpú wǎ eringe ejá-Osówo nyí ba/sáng kyísí e/sét kyi-kim ne nyǐ. Nké kyi/chi kyi-bên kanong kanong ne onet ámu mú o/chi o-chi ba-kám Wǎn-Onet. Kyi/mû kyi-chi i onet ámu kanong kyi-shwôm, â ba/mû ba*da ǎ efwon*.

Byiryíng ḿbyí Otu Kyítá

(Mátyuu 26:26-30; Lûk 22:15-20; 1 Koríntyan 11:23-25)

22Ńdyí mbe ba-ryí i byiryíng, Jisos o-yip berêt o-fé nshwam o-kó Osówo asǎma, ne o-ját kámú o-kye bǎmgbán emen. Ne o-raa o/fu, koo n̂g ba-ryí. Nyín enyam-byiko ejí.

23O-yip to mmîk-bato, ne ké nkéré oo/kó Osówo asǎma, o-yip kámú o-kye bǎmgbán emen. Mbé ashí amúmú ba-jwáp. 24Jisos o-raa ne mbé o/fu, nyín baróng ejí ḿbé ba/chi ba-byí mě ké byiko, ké dyishí ńdyí banet chwóó. Mbé nké ba/chi ba-chi ocím mú Osówo o/ryí ne banet ne o-sem byiko emen o-shwane. 25Me mu n-sét ng běn n/fu, mm*ba/chi n-chîjwáp bato ḿbén* tete ké dyicí ńdyí n/chi n-chîjwáp bato ḿbé bafyîfî ké Butu ḿbú Osówo.

26Ne ké nkéré baa/kwán okwan obónge, ba-dim ké kaku ńké Ólif.

Jisos o/sét o/fu, Pyíta o/chi o-né ǎ

(Mátyuu 26:31-35; Lûk 22:31-34; Jǒn 13:36-38)

27Jisos o-raa ne mbé o/fu, ben ashí amúmú ba/chi ba-né mě, ké ebóng, ejá-Osówo nyí ba/sáng kyísí e/fu, Osówo o/chi o-ju mbâm ebû, ne ebû e/chi e-pwôo byiryibyiryi. 28Nké ké nkéré mú Osówo oo/jwóbê mě ké bukyû, n/chi m-bwóp běn kashú n-dim ḿbú Gályílyi.

29Pyíta o-faa ǎ o/fu, me mm*ba/chi m-mîng ǒ ne banyá* nang ḿbé áku kángkáng ba/mîng ǒ.

30Jisos o-raa ne Pyíta o/fu, ntûntû nké me mu n-sét ng ǒ n/fu, buchú ḿbú kurún, ne otúkwa o-kó kampén kafee, wo a/chi a-né mě kampén kachât.

31Ne Pyíta o-faa shwanshwan o/fu, â nang nkyi ńkyí ndaman m-kpú ne wo, mm*ba/chi n-né ǒ*.

Bǎmgbán emen ḿbé áku to kángkáng ba-fu eringe ebónge.

Jisos o/fé Nshwam ké Kyikit ńkyí badakó Geséményi

(Mátyuu 26:36-46; Lûk 22:39-46)

32Ba-dim ba-ribi ké kyikit ńkyí badakó Geséményi, ne Jisos o-sét bǎmgbán emen o/fu, kyú n̂g me nyín, me n-fé kpá nshwam.

33Ne o-kpî kâng Pyíta ne Jêmsyi ne Jǒn ba-dim ne nyǐ. Ofong mú mu o-kédê ng ǎ ne káryúryú byi-tát ǎ boonenbwǎn ké byiko. 34Ne o-sét bǎmgbán emen o/fu, bafip baa/sú mě ké dyityém éné wǎ m-kpú u. Kyú n̂g nyín ba-kûbám.

35Nyǐ o-king o-ca ké kashú kaǎnyín, o-bírî o-tyem kyísí. O-fé nshwam o-kye Osówo o/fu, â kyi/mû kyi-nwa ng echi, kyikim-nkéré ńkyí nyǐ mu o-bâ busông eri kyi/mû kii*ba/chi kyi-bâ*. 36O-fé nshwam o/fu, Kyítá, wo a-man n echi kángkáng byěm. Fîm mě ké mmîk-busông eri mún ejwáp. Nké chi ńkyí wo amu a-ryuu ng. *Dachi ńkyí me mu n-ryuu ng*.

37Ne o-bwa kâng esim o-ba-ri bǎmgbán emen ámbe ashí achât ké ba-kú ba-rê ng. O-raa ne Pyíta o/fu, Sámon, a-kú a-rê ng dí. Aa*man ekyú achi fúú nang ké kaǎnyín-nkéré*? 38Ne o-raa ne mbé o/fu, kû n̂g ebám ba-fâ nshwam, eringe nyí baa*ba/chi ba-nung ké okan*. Atyém enen nyi a-ryuu ng a/fu, nyǐ a-chi i, nké enyam-byiko enen nké nyi kyeekyee.

39Ne o-chîbwa esim o-da-fé nshwam wǎ eringe nyí o/mû o/fé. 40Ne o-bwa kâng esim o-kâm bǎmgbán emen ámbe. O-ri kámbé ba-kú ba-rê ng. Ba*da/man ebâa achi* ne ba*da/nyît ńkyí bada ǎ esét*.

41Ké nkéré mú o/bwa esim ké kampén kachât, o-raa ne mbé o/fu, ben ba/tôong ba-rê ng ba-jáng ng? Kyi/kwárê. Nkéré oo/fyi. Kan n̂ achi ba-ri, ba-kú ba-kám m Wǎn-Onet ba-kye ké abwô nyí banet-byibî. 42Bûu n̂g nensang byi-dim. Kan n̂ achi ba-ri. Onet mú mu o-bâ echi ba-kám mě o/firi fáráng nyín.

Ba/kám Jisos

(Mátyuu 26:47-56; Lûk 22:47-53; Jǒn 18:3-12)

43Jisos o/mû o/tôong o-raa ng ké nkéré mú Júdas mú o/mû ké burwám-bǎmgbán emen ḿbé ashí diǐkpú ne afee o/baribi. Bujê-banet ba/mû ne nyǐ ké kyikû, ne bushwám ne byikim-echí, ḿbé batu-banchi kyifen-Osówo ne bantánge Byije-Músis ne bakínkán-banet-Jûs ba/twóm. 44Onet mú mu o-bâ ebachi ba-kám Jisos o/mû oo/sét banet ámbe ekap nyí nyǐ o/chi o-tông kámbé ne ba-kám Jisos. O-sét kámbé o/fu, onet mú me n/chi n-rwâm ǎ o-chi i onet mú ben bamu ba-ryuu ng. Kám m̂ ǎ ba-dim ne nyǐ. Bám m̂ ǎ kanong kanong.

45Ńdyí Júdas o-ribi ng oribíng o-bâ, o-dim o-kâm Jisos, o-kó ǎ, ntánge byiraa-Osówo, ne o-rwâm ǎ. 46Banet ámbe ba-kám kâng Jisos. Ba-níbî ǎ kanong kanong. 47Nké onet obónge mú o/mû o/bwom ányi to o/zú kashwám emen o-kpet ósóng mú nchi kyifen-Osówo o-két butông. 48Jisos o-raa kâng ne banet ámbe o/fu, nkyi ńkyí ben bada mě ebakám ne bushwám ne byikim-echí éné wǎ me n-chi i onet-kajii? 49Kángkáng ací me m/mû ne ben n-tángê e ké kiǐtí-kyise-kyifen-Osówo echi, ben ba*da mě ekám*. Nké ejá-Osówo nyí ba/sáng kyísí e-man e-chi wǎ eringe nyí e/sét.

50Ne bǎmgbán emen ashí amúmú ba-chêe ba-mîng ǎ.

51Wǎn-kyisat obónge mú o/bwá kyídí-okpówo ké byiko o/mû o-câ ne Jisos ké kyikû. Banet ámbe ba-kan ǎ ekám. 52Nké nyǐ o/chêe o-dim osíndyíbang o-mîng kyídí-okpówo emen.

Ba/pan Jisos Mpan ké Esuk nyí Eryên nyí Banet-Jûs

(Mátyuu 26:57-68; Lûk 22:54-55, 63-71; Jǒn 18:13-14, 19-24)

53Ba-kúng Jisos kâng ba-dim ne nyǐ ké kyise-otu-nchi kyifen-Osówo ńkyí kángkáng batu-banchi kyifen-Osówo ne bakínkán-banet-Jûs ne bantánge Byije-Músis ba/mû mbe ba-cibi ng. 54Pyíta o-nyábê ng o-câ ne mbé ké kyikû tete o-da-nung ké kyibám ńkyí otu-nchi kyifen-Osówo ámu. O-kyú me ányi ne bambâm kyibám ánkyi mu o-jwaa ng okwâ. 55Batu-banchi kyifen-Osówo ne kángkáng banet-Jûs ḿbé esuk nyí eryên ba-kan ekyé bantûesé ḿbé badasét ejá-mpan ba-bât Jisos, eringe nyí bada ǎ eju. Nké ba*da/ri nang obónge*. 56Ké ebóng, bantûesé chwóó ba/sét kyisédéng ba-bât Jisos. Nké ejá ebe e*da/tyeem*.

57Kyicê-banet bakíri ba-bûu kâng nensang, ba-sét odîp mún ba-bât Jisos 58ba/fu, be byi/jwo ǎ ńdyí o/raa o/fu, me m-bú ng kiǐtí-kyise-kyifen-Osówo echi ńkyín ńkyí banet ba/bi, ne ké ací achât, n/chi m-bi ńkyí baa*bi ké abwô*. 59Nké nang mbé ba*da/man echi ejá ebe e-tyeem*.

60Otu-nchi kyifen-Osówo ámu o-bûu nensang o-bwom ké bushú ebe kángkáng, ne o-bí Jisos o/fu, a*fí ne ejá nyí adafaa kyi-kim ne byiraa ḿbyí ba/sét něen ba-bât ǒ dí.

61Nké Jisos o/waa pyêp. O*da/faa nang ojá*. Otu ámu o-chî ǎ ebí o/fu, wo nké amu Wǎn-Osówo mú Osówo o/kúng ǎ butu? Osówo mú byimu byi-kyâ ǎ akpee?

62Jisos o-faa ǎ o/fu, âa, me nyǐ mú Osówo o/kúng ǎ butu. Ne ben kángkáng ba/chi ba-ri Wǎn-Onet ké oo/kyú me ké kyicê-bubwô-etyebéng-Osówo mú kángkáng busa, ne ké nkéré o-kú o-bâ ké ófíbí mú kyíbóng.

63Otu ámu o-tî ágbádá ké byiko o-ját, ne o-raa o/fu, byi*fí to byi-ryuu ng ntûesé okíri*. 64Ben kángkáng ba/jwo byibî-byiraa emen ḿbyí o/raa. Ben ba/kabe nǎ.

Mbé ashí amúmú ba-faa dyirwom dyibónge ba/fu, Jisos, *chí onet mú onong*. Baju ǎ.

65Banet bakíri ba-kpet eshú Jisos akorong ké byiko. Ba-cít ǎ achi, ne ba-kpet ǎ edíp, ba-bí ǎ ba/fu, sét bě onet mú o/díp ǒ. Bambâm kyibám-otu ámu ba-níbî ǎ ba-kpet ǎ edíp akwâ.

Pyíta o/né Jisos

(Mátyuu 26:69-75; Lûk 22:56-62; Jǒn 18:15-18, 25-27)

66Pyíta o/mû o/tôong ányi ké kyibám, ké nkéré wǎsíng-onyinyi obónge mú mu ḿgbán-otu-nchi kyifen-Osówo o/babwom ányi. 67Ńdyí o/ri Pyíta mu ányi o-jwaa ng okwâ, o-tún ǎ dííng, ne o-raa o/fu, wo to a/mû a-cen n ne Jisos mú o/fím Názáret.

68Nké Pyíta o/né kánkyí. O-faa o/fu, me n*fí n-nyît ng dyishí-chwǒm ńdyí wo amu a-raa ng*. Pyíta o-byí kâng o-dim ké mpúbi. Ké abe ányi, otúkwa o-waa o-kó.

69Mú wǎsíng-onyinyi ámu mú ḿgbán-otu o-ri Pyíta ányi, ne o-kpet esét banet ḿbé ba/mû ányi o/fu, nyǐ mu ké burwám-banet-Jisos. 70Nké Pyíta o-chîné kánkyí.

Ké kaǎnyín-nkéré, banet ḿbé ba/mû ányi ba-kpet esét Pyíta ba/fu, nkyi ké kafâ, wo amu ké burwám ebe, ké ebóng, wo to a-chi i onet-Gályílyi.

71Pyíta o-kpet esem kâng Osówo, o-kó ng Osówo o/fu, kyi/bát Osówo ofé mě ké busông, â me n*fí n-sét ng ntûntû*. Me n*fí n-nyît ng onyinchéng ámu* mú ben bamu ba-raa ng kyi-kim ne nyǐ*.

72Ké abe ányi, otúkwa o-kó ké kampén kafee. Pyíta o-waa o-zîim eringe nyí Jisos o/mû o/sét ǎ o/fu, ne otúkwa o-kó kampén kafee, wo a/chi a-né mě kampén kachât. Ne o-sêe ne bukyû.

Currently Selected:

Mâk 14: BKY

Highlight

Copy