Ilu̍uku 12

Iji̍sɔ̄ɔsi ta̍ a̍chi̍kpo̍ yī nū ɔna

(Ima̍tiyu 10:26-27)

1U̍nu̍u̍nɔ chu̍nɔ yī āchɛ̄ɛchɛ grēeyī gblāa abɔ̍ɔ kpɛɛ nīi āchɛ yɛ ē tīichō che ɔ̍nyīnū. Iji̍sɔ̄ɔsi kɛlā tāa a̍chi̍kpo̍ yī nū yɔbɔ̄ɔbū hīka, “Ala̍ gbō iyī ala̍ hī ɔjā obī ibrɛ̍ɛdi nōnū yī Āchɛ yī Ifa̍rasīi! Lɛlā ɔka ɔha̍ chōo̍chē ya̍ ɔha̍ yī wā ɔla̍ā nīi n yɛ ē ka a̍nɛ. 2Ɔjāha̍-ɔjāha̍ nīi ge̍ kla̍ ya̍kla̍, o̍ ge̍ē lwāa ē ta̍āpāapɛ̄ we̍. Lɛlā ɔtrɛ̍ba ɔha̍lɔha̍ wa̍a̍ ge̍ē hi̍yɛchɛ we̍. 3Wu̍chē yī ɔla̍ā, lɛlāmɛlā nīi a ge̍ kɔ̄ka lɛ̍bɛ̍ba, o̍ ge̍ē hi̍yɛchɛ nīi āchɛ po̍ mwɔlɛ̍-mwɔlɛ̍. Ɔjāha̍-ɔjāha̍ nīi a ge̍ ki̍ya̍cha̍ yī nū la lɛ̍bɛ̍ba chī ge̍ hi̍yɛchɛ hwōō la o̍gra nīi āchɛ ē po̍.

Ɔ̄nyɛ ngma̍ la otūuhwi yī Nū ma̍

(Ima̍tiyu 10:28-31)

4“Aɛ̍ɛya ami, ala̍ ma̍ gɛ ko̍ō! Ala̍ e̍e tūuhwi yī āchɛ nīi e̍ de ibi̍īyē ɔlamu ē ngmo̍ mɛ ma̍ ni̍. Wu̍chē oji̍ nɛ, e̍ i̍ ge̍ē ya̍ ala̍ ɔjɔ̄jā nīi dwɔ̄bi̍ hi̍ ɔla̍ā ma̍ ē mɛ ē gɛ ni̍. 5N ge̍ē chabɔ̄ yī ɔ̄chɛ nīi ala̍ ge̍ē tūuhwi yī nū ma̍ ē hu̍ ala̍. Ala̍ ā tūuhwi yī Ɔwɔ. Wu̍chē oji̍ nɛ, o̍ ge̍ de ibi̍īyē ɔlamu ngmo̍ mɛ, o̍ chī gba̍a lwɔhu̍ ge̍ē ku̍ ɔ̄chɛ ta̍tū ga ayekū oli̍gba̍o̍ mɛ. Lēchi̍, n ge̍ē koko̍o ē de ala̍! Ala̍ ā tūuhwi yī nū!

6“Je̍ka a̍bɔ̄chɔ̍ɔ̄rā ɛrwɔ̄, e̍ ē de ē re̍ iko̍bo ɛpa ɔbɔbɔ? Ɔwɔ i̍ ē chī mwanyī hī ūkpūkpo̍he lipu̍ yī a̍gba̍ana ɔbɔbɔ nūma̍ ni̍. 7Ūkpō yī inyɛ̄lɛ̄hu̍ yī ala̍, Ɔwɔ de ɔ̍ kɔ̄ka lūkpō-lūkpō mɛ̍. Wu̍chē yī ɔla̍ā, ala̍ e̍e tūuhwi ni̍; ma̍a ala̍ - ɔjā ɔlamu-ɔlamu pɛtɛpɛtɛ hi̍ u̍nu̍u̍nɔ chu̍nɔ yī a̍gba̍ana bāa a̍bɔ̄chɔ̍ɔ̄rā ma̍ nɛ.

Lɛlā yī Ikra̍yisi ode kɔ̄ka hi̍yɛchɛ

(Ima̍tiyu 10:32-33; 12:32; 10:19-20)

8“N ā koko̍o de ala̍ hwōō! Ɔ̄chaha̍-ɔ̄chaha̍ nīi ge̍ de ka hi̍yɛchɛ gbra la ɔgbādu yī āchɛ hīka anɔ̍lɔ - ɔ̄chɛ yī amɔ̍lɔ nɛ, ami Ɔyi̍ yī Ɔngrɔ̄ɔ titi ge̍ē ya̍ i̍ngi̍ngɔ̍ɔ ē de ɔlɔjā abɔ̍ɔ la īkprī yī ayɛ̍ɛ̄chɛ̄rɔ̄ yī Ɔwɔ. 9Ɔ̄chɛmɔ̄chɛ nīi ge̍ē chī hi̍hi̍yo̍ gbra la ɔgbādu yī āchɛ ka anɔ̍lɔ i̍ ɔ̄chɛ yī amɔ̍lɔ ni̍, i̍ngi̍ngɔ̍ɔ nīi ami Ɔyi̍ yī Ɔngrɔ̄ɔ titi ge̍ē ta̍ ɔlɔjā abɔ̍ɔ la īkprī yī ayɛ̍ɛ̄chɛ̄rɔ̄ yī Ɔwɔ a̍nɛ.

10“Ɔ̄chɛ nīi ge̍ kɛlā abi̍ ɔha̍ ku̍ Ɔyi̍ yī Ɔngrɔ̄ɔ, Ɔwɔ ge̍ē de ē kɔ̄ de ɔlɔjā mɛ. Ɔ̄chɛ nīi ge̍ chī kɛlā ɔha̍ abi̍ ku̍ Uhu Ɔnɛ̄ɛhɛhi yī Ɔwɔ, Ɔwɔ i̍ ge̍ē de ē kɔ̄ de ɔlɔjā ni̍.

11“Āchɛ ge̍ē bī ala̍ ē gāa lɛpɔ̄ la u̍nu̍ ogrēeyī yī wā kɛ̄ɛ ɛbɛ yī ɔchwɔ̄lɛ̍ kɛ̄ɛ ɛgabɔ̄ ma̍, ala̍ e̍e hi̍yɛ̄ngura yī ɔjā nīi ala̍ ge̍ē hīyɔkɔ kɛ̄ɛ ē ka ma̍ ni̍. 12Wu̍chē oji̍ nɛ, Uhu Ɔnɛ̄ɛhɛhi yī Ɔwɔ ge̍ē ngū ala̍ ɔjā nīi ala̍ ge̍ē ka yɛ̄grāa ɔla̍ā ma̍.”

Wɔ̄chīije yī ɔlwɔdu ɔha̍ nīi hi̍īchī ma̍

13Bɛ̍ɛ̄nɛ̄, ɔngrɔ̄ɔ ɔha̍ abɔ̍ɔ lipu̍ yī ɔgbādu ɔla̍ā da Iji̍sɔ̄ɔsi hīka, “Ɔngūlɛ̄lā, chu̍chu̍u ka de ɔɔ̍nɛ̍ yī u ɔnɔ̄ngrɔ̄ɔ gɛ nīi o̍ ge̍ de ɔjā u̍gū nīi a̍dā yī alɔ pīyaku̍ hī ɔ̄ de alɔ ma̍ kɔ̄kɔ̄ ba̍la ami.”

14Iji̍sɔ̄ɔsi hīya anu̍ ɔkɔ hīka, “Ɔngrɔ̄ɔ! Ɔ̄nyɛ hu u ka amɔ̍lɔ ge̍ re̍ka olihiyo kɛ̄ɛ ɔ̄chɛ ɔkɔ̄ ɔjā u̍gū de ala̍ ma̍?” 15Iji̍sɔ̄ɔsi koko̍o de alɔgbādu ɔla̍ā wa̍a̍ bɛ̍ɛ̄nɛ̄ hīka, “Ala̍ ā du̍mɔ̍-du̍mɔ̍! Ala̍ ā gbō iyī ala̍ hī ānyānyi ita ɔha̍lɔha̍ wa̍a̍! Wu̍chē oji̍ nɛ, i̍ ɔjā nīi ɔ̄chɛ lɛ wa̍a̍ ma̍ re̍ka ɔhɔ̄leyī olēchi̍ lēchi̍ yī ɔ̄chɛ a̍ni̍, ɔlɔjā ge̍ gbɔ̄gbwɔdu bāa ɔjɔ̄jā ma̍.”

16Iji̍sɔ̄ɔsi kɛlā de wa̍ la wɔ̄chīije bɛ̍ɛ̄nɛ̄ hīka, “Ala̍ ma̍ ko̍ō! Ɔngrɔ̄ɔ ɔha̍ lɛ ajɛ yī yɛrɔ̄ nīi ɛjā nīi o̍ ē nyi abɔ̍ɔ ma̍ ē wa̍ hwɔhi kpɛ̍ɛji. 17O̍ ka de iyī nū hīka, kana̍ kpa̍a nīi anɔ̍lɔ ge̍ē ya̍ ma̍? Anɔ̍lɔ i̍ ma̍ ɛbɛ yɛ amu ge̍ē de ɛjāyɛ̄rɔ̄ yī anu̍ ē gblāa ni̍ oo! 18O̍ ka bɛ̍ɛ̄nɛ̄ ka anɔ̍lɔ je̍ ɔjā nīi anɔ̍lɔ ge̍ē ya̍ ma̍ mɛ̍. Anɔ̍lɔ ge̍ē de u̍ku̍na ɛnɛ̄chɛ̄ yī anu̍ ē kpo̍ gbo, nīi anɔ̍lɔ ē chōo̍chē gwo̍ enīpīpɛ̄ ɛha̍ nīi - ɛ̍lɛ ge̍ē lɛ ke̍ke̍ni̍-ke̍ke̍ni̍ ma̍. Abɔ̍ɔ nīi anɔ̍lɔ ge̍ē kpo̍ ɛjā nīi anɔ̍lɔ ge̍ kpo̍ la yɛrɔ̄ wa̍a̍ ma̍ ge̍ē gblāa a̍nɛ. 19Bɛ̍ɛ̄nɛ̄ ma̍, anɔ̍lɔ ge̍ē ka ē de iyī anu̍ hīka, ‘Hiyo̍a̍, Ɔgangrɔ̄ɔ! A lɛ ɛjā ɛnɛ̄ɛhɛhi nīi ge̍ē jɛ̄ wɔ lɛmiyɛ lɛ̍yi̍ ɛmɛ̍ɛmla̍a ma̍ mɛ̍! Nāa ɔhɔ̄leyī tɛ̍bɛ̍lɛ̍ gɛ! Ro̍ōre̍ nīi a ā gwɔ̍ɔ̄gwa̍ nīi a ā ya̍ ɔwɔ̄wīyā gɛ!’ 20Bū la ɛbɛ ɔla̍ā Ɔwɔ da ɔ̍ du̍mɔ̍ hīka, ‘Awɔ oli̍bobo ɔ̄chɛ ɔla̍ā! I̍chɛ la otu̍ nūma̍ nīi n ge̍ē de ɔhɔ̄leyī yī wɔ ɔla̍ā nāa ē hī wɔ a̍nɛ. Bɛ̍ɛ̄nɛ̄ ma̍, ɔ̄nyɛ chī ge̍ē lɛ ɛjā nūma̍ wa̍a̍ nīi a kpo̍ tɔ̄chi̍ rɛ de iyī awɔ ɔlɔjā ke̍e̍ ma̍?’ ”

21Iji̍sɔ̄ɔsi de ɔ̍ chlɛhu̍ bɛ̍ɛ̄nɛ̄ hīka, “Ala̍ ma̍ ko̍ō! I̍ngi̍ngɔ̍ɔ nīi lɛlā yī āchɛ nīi ē de wɔdu ogbōgbo yī wā lā ke̍e̍ de iyī aa̍ ɛlɛjā ma̍ lɛ a̍nɛ. Wu̍chē oji̍ nɛ, e̍ i̍ gbwɔdu la īkprī yī Ɔwɔ ni̍.”

De ɔtū che Ɔwɔ

(Ima̍tiyu 6:25-34)

22Iji̍sɔ̄ɔsi ka de a̍chi̍kpo̍ yī nū bɛ̍ɛ̄nɛ̄ hīka, “Ɔla̍ā - ohu̍ nīi n yɛ ē koko̍o ē de ala̍ a̍nɛ: Ala̍ e̍e hi̍yɛ̄ngura yī ɔjā nīi ala̍ ge̍ē re̍ ē wōwi ma̍, kɛ̄ɛ ɔjā nīi ala̍ ge̍ē tū la ibi̍īyē ma̍ ni̍. 23Wu̍chē oji̍ nɛ, ɔhɔ̄leyī - ɔjā ɔlamu-ɔlamu pɛtɛpɛtɛ hi̍ ojōre̍ nɛ. Ibi̍īyē chī gba̍a - ɔjā ɔlamu-ɔlamu pɛtɛpɛtɛ hi̍ ɔjā otūlibi̍īyē nɛ. 24Ala̍ i̍ ma̍ a̍gba̍ana ni̍? Ida̍agri̍ma bɛ̍ɛ? E̍ i̍ ē nyi ɔjɔ̄jā ni̍, e̍ i̍ ē chī kpo̍ ɔjɔ̄jā la yɛrɔ̄ ni̍. E̍ i̍ lɛ ɛbɛ ode ɔjā gbōgbō kɛ̄ɛ u̍ku̍na ɔha̍lɔha̍ ni̍. Ɔwɔ ē bī wā la ojōre̍ a̍nɛ. Ala̍ chī - ɔjā ɔlamu-ɔlamu pɛtɛpɛtɛ hi̍ a̍gba̍ana nɛ. 25Ala̍ ge̍ yɛ ē hi̍yɛ̄ngura yī lɛlā nūma̍ i̍ngɔ̍ɔ, o̍ re̍ka ala̍ ē hɔ̄ kpɛɛ ē mɛ u̍uma? 26Ala̍ i̍ ge̍ bī ɔla̍ yī lɛlā ɔlɛpi̍nyɛ̍ mɛ ni̍, oji̍ - ohu̍ nīi ala̍ ē hi̍yɛ̄ngura yī lɛlā ehēhī ma̍? 27Īpū yī a̍chi̍ ɛha̍ bɛ̍ɛ? Je̍ka ala̍ ma̍ lɔkɔ nīi e̍ ē jɛ̄ ma̍? E̍ i̍ ē chī ya̍ u̍ku̍rɔ̍ ni̍. E̍ i̍ ē chī gɔ̍ ɔjɔ̄jā tū iyī wā la ibi̍īyē ni̍. N ā koko̍o de ala̍! Iso̍lōmɔn nīi gbwɔdu ɛbɛ̍bɛ̍-ɛbɛ̍bɛ̍ ma̍, o̍ i̍ lɛ ɔjā otūlibi̍īyē ɔha̍lɔha̍ nīi li̍hi̍hi̍ bɔ̄ɔkɔ nīi īpū a̍chi̍ oli̍hi̍hi̍ ɛla̍ā lɛ ma̍ ni̍. 28Ɔwɔ ē ya̍ a̍chi̍ ɛla̍ā e̍kre̍biya nīi e̍ ē li̍hi̍hi̍ i̍ngɔ̍ɔ a̍nɛ. A̍chi̍ ɔbɔbɔ nīi ge̍ gblāa ma̍ i̍chɛ ji nīi e̍ ē de wa̍ kwɔla̍ i̍chi̍chi̍ ma̍? Anu̍ nīi Ɔwɔ i̍ ge̍ē jo̍ōkū hwɔhi hwɔhi ē de ɔjā otūlibi̍īyē de ala̍ ni̍ a̍nɛ? Ala̍ ē de ɔtū che Ɔwɔ pi̍nyɛ̍ kpa̍a! 29Ala̍ e̍e hi̍yɛ̄ngura ka hīka, ‘Oji̍ nīi alɔ ge̍ē re̍ ma̍?’ Kɛ̄ɛ ‘oji̍ nīi alɔ ge̍ē gwa̍ ma̍’ ni̍? 30Ɔla̍ā wa̍a̍ - ɔjā nīi āchɛ i̍je̍ Ɔwɔ ni̍ yī yɛchɛ nūma̍ ē gāla̍ ma̍ bī aa̍ a̍nɛ. Ɔwɔ A̍dā yī ala̍ ɔlɔjā jo̍ōkū ka ɔjā nūma̍ wa̍a̍ ɛ̍lɛ ku̍ ala̍ ɔkɔ. 31Ala̍ ā nāa lɛlā yī Ɔchwɔ̄lɛ̍ Oro̍ōre̍ yī Ɔwɔ kwɔ̄bū la ɔhɔ̄leyī yī ala̍; ma̍a anu̍ ɔlɔjā ge̍ē kwɔgu yī ɛjā ehēhī nūma̍ wa̍a̍ ē de ala̍!

Wɔdu yī Ɛbɛ yī Ɔwɔ

(Ima̍tiyu 6:19-21)

32“Ala̍ lɛ bāa ribi yī ayɛ̍ɛ̄nyīyɛrɔ̄ ma̍; ala̍ e̍e tūuhwi ni̍. O̍ lɛ Ɔwɔ A̍dā yī ala̍ wɔnyɛ kpɛ̍ɛji nīi o̍ ge̍ē de ɛbɛ yī Ɔchwɔ̄lɛ̍ Oro̍ōre̍ yī nū de ala̍ ma̍. 33Ala̍ ā de āɛ̄jā yī ala̍ kpo̍ ra̍, nīi ala̍ ge̍ de okpo yī nū kɔ̄ de alyeklo̍ gɛ! Ala̍ ā ya̍ ɔjā ode okpo gbōgbō nīi i̍ ge̍ē nōnu ni̍ ma̍ de iyī ala̍ gɛ! Ala̍ ā de wɔdu yī ala̍ wa̍a̍ gbō la ɛbɛ yī Ɔwɔ la ɛbɛ nīi ɔjɔ̄jā i̍ ē hlɛ̍ɛ̄mɛ̄ ni̍ ma̍! Wu̍chē oji̍ nɛ, uwī ɔha̍lɔha̍ i̍ ē gbajɛ ē gāa abɔ̍ɔ ni̍; lɛla ɔha̍lɔha̍ i̍ ē chī gāa abɔ̍ɔ ge̍ē re̍ ɔjɔ̄jā mɛ ni̍. 34Wu̍chē oji̍ nɛ, ɛbɛ nīi wɔdu yī ɔ̄chɛ wa̍a̍ ge̍ lā ma̍, abɔ̍ɔ nīi ūkpɔ̄tū yī nū lā gāa a̍nɛ.

Eyī ode kōkū

35“Ala̍ ā ti̍bi̍īyēchɛ̄ tīgbē yī ɔjāha̍-ɔjāha̍! Ala̍ ā de ɔjā ku̍ la owu! Ala̍ ā mwɔla̍ tū otīnīkā! 36Ala̍ ā ya̍ bāa a̍chɛ̍ yī ɔngrɔ̄ɔ ɔha̍ nīi yɛ ē gbēyī yī abā yī wā nīi ge̍ē cha ē bū la wɔga yī ɔngrɛ̄ba̍ ɔha̍ ma̍. O̍ ge̍ wā ge̍ de abɔ̄ ku ɔpu ɔpɔ̄ɔpɛ̄, e̍ ge̍ē lwāa anu̍ ē de ɔ̍. 37A̍hōhi ge̍ - iyī a̍chɛ̍ ɛla̍ā nīi abā yī wā wā ge̍ ma̍ wā nīi e̍ yɛ ē gbēyī i̍ngɔ̍ɔ! Lēchi̍, n ā koko̍o de ala̍! Abā yī wā ge̍ē tu̍ ɔjā ku̍ owu, ē de wa̍ ē hyāhɔ̄ la ɛbɛ ore̍ ojōre̍ yī anu̍ ɔlɔjā ē chōo̍chē chrāa aa̍ ɛrɔ̄. 38O̍ ge̍ ro̍ōre̍ka o̍ cha la iyārōtu̍ ɔha̍ātā, kɛ̄ɛ otu̍ obūrɔ̍ɔ̄chī wā ge̍ ma̍ wā nīi e̍ yɛ ē gbēyī yī nū i̍ngɔ̍ɔ, a̍hōhi ge̍ - iyī wā gihi gɔbū! 39Ala̍ lɛ ɔbɔ̄bla yī lɛlā nūma̍ gɛ! O̍ ge̍ re̍ka ɔlɔjā yī wɔlɛ̍ je̍ yɛ̄grāa nīi uwī ge̍ē wā ma̍ nɛ, o̍ i̍ ge̍ē chɛ̄ nīi uwī wā la u̍nu̍ yī nū ni̍. 40Wu̍chē yī ɔla̍ā, ala̍ titi, ala̍ ā de eyī kōkū! Ma̍a Ɔyi̍ yī Ɔngrɔ̄ɔ ge̍ē wā la yɛ̄grāa pi̍i̍ nīi ala̍ i̍ yɛ ē deyīche ɔ̍ ni̍ ma̍.”

Ɔ̍chɛ̍ ɔnɛ̄ɛhɛhi kɛ̄ɛ ɔdwɔ̄bi̍

(Ima̍tiyu 24:45-51)

41Ipi̍ta che Iji̍sɔ̄ɔsi ikpo̍ bɛ̍ɛ̄nɛ̄ hīka, “Ādā! Alɔ nūma̍ ke̍e̍ nīi a chā alɔ wɔ̄chīije nūma̍ ma̍ kɛ̄ɛ āchɛ wa̍a̍?”

42Ādā Iji̍sɔ̄ɔsi hīyɔkɔ bɛ̍ɛ̄nɛ̄ hīka, “Ɔ̄nyɛ re̍ka ɔ̍chɛ̍ ɔnɛ̄ɛhɛhi gba̍a je̍ lɛlā ma̍? Ɔ̍chɛ̍ oli̍ngɔ̍ɔ nīi abā yī nū ge̍ē de a̍chɛ̍ yī nū ehēhī tū ɔ̄ la abɔ̄ hɛ̄ɛbɛ nīi o̍ ē de ojōre̍ ē de wa̍ yɛ̄gɛ̄grāa a̍nɛ. 43A̍hōhi ge̍ iyī ɔ̍chɛ̍ ɔla̍ā, nīi o̍ ge̍ re̍ka abā yī nū chā wā ge̍ ma̍ nīi o̍ yɛ ē ya̍ i̍ngɔ̍ɔ! 44Lēchi̍-lēchi̍, n ā koko̍o de ala̍! Abā yī nū ge̍ē de ɔjāha̍-ɔjāha̍ yī nū wa̍a̍ kpo̍ tū ɔ̄ la abɔ̄ bɛ̍ɛ̄nɛ̄. 45Ɔ̍chɛ̍ yī nū ɔla̍ā ge̍ chī ya̍ ka chāa! Abā yī anu̍ ma̍ ɔ̍lɔ yɛ abɔ̍ɔ ge̍ē chɔ̄cha ɛnyɛnya kɛ̄ɛ! Bū la ɛbɛ ɔla̍ā, o̍ ge̍ē kū la ogwō a̍chɛ̍ yī abā yī nū, anāngrɔ̄ɔ ba̍la anānyā ɛla̍ā lijē. O̍ ge̍ē pra̍a ē tū ojōre̍ ba̍la ɔjā ɔgwɔ̍ɔ̄gwa̍ kpɛ̍ɛ ē de wīyɔ̄jā. 46Bɛ̍ɛ̄nɛ̄ ma̍, abā yī nū ge̍ē wā ge̍ē cha i̍chi̍chɛ ɔha̍ nīi o̍ i̍ kwɛ̍ri̍ya̍tū ɔ̄ ni̍ ma̍, bū ɔ̄ obōbū lwɛ̍ɛ̍. Bɛ̍ɛ̄nɛ̄ ma̍, abā yī nū ge̍ē ya̍ tāa anu̍ ɛbɛ̍bɛ̍-ɛbɛ̍bɛ̍, ē nāa anu̍ ē tū la ichi̍ ɔmɔ̍ɔ̄ma̍ bāa āchɛ i̍pɔ̍ɔkɔ yī ɔ̄chɛ ni̍ ma̍.

47“Ɔ̍chɛ̍ nīi ge̍ je̍ ɔjā nīi abā yī nū chikpo̍ ma̍, nīi o̍ i̍ ge̍ chī ti̍bi̍īyēchɛ̄ de ɔjā ɔ̍lɔma̍ ya̍ ni̍, abā yī nū ge̍ē gwō ɔ̄ lijē la a̍grɛ̄chi̍ dwɔ̄bi̍-dwɔ̄bi̍. 48Ɔ̍chɛ̍ i̍ ge̍ je̍ ɔjā nīi abā yī nū chikpo̍ ma̍ ni̍, o̍ ge̍ yɛ̍ɛ̄lā yī lijē, abā yī nū ge̍ē gwō ɔ̄ lijē gbōgbo ē grāa. Ɔ̄chɛ nīi a de ɔjā mwɛbɛ de ɔ̍ ma̍, anu̍ nīi a ē chikpo̍ mwɛbɛ ē bū la abɔ̄ yī nū a̍nɛ. Onīi a de mwɛbɛ gɔ̄ga de ɔ̍ ma̍, anu̍ nīi a ē chikpo̍ mwɛbɛ ē gɔ̄ga la abɔ̄ yī nū a̍nɛ.

Ɔla̍tu̍tu̍

(Ima̍tiyu 10:34-36)

49“N wā ge̍ē mwɔla̍ ē tū yɛchɛ. Ɔ̄chɛ pīya ka o̍ u̍tu yɛ ē chɔ̄chɛ̄ mɛ̍. 50N lɛ yenyi ohōhu olichi̍chi̍ ɔha̍ nīi n yɛ amu ge̍ē nāa ma̍. N hɔ̄ la īlāanyī gba̍a̍, kpɛɛ nīi o̍ ge̍ē hɛ̍ ga o̍bū. 51Ala̍ je̍ka amɔ̍lɔ wā, bī ogbodɔ̍dɔ̍ ge̍ē de yɛchɛ? N ā koko̍o de ala̍! I̍ i̍ngɔ̍ɔ ni̍; ode āchɛ hwō ta̍ hī ɔ̍nyīnū nīi n wā a̍nɛ. 52Obū la u̍ma̍ama ga iyɔ̄bū, wɔma nīi ge̍ lɛ āchɛ ɛrwɔ̄, e̍ ge̍ē de iyī wā hwōta̍: Āchɛ ɛta̍ ge̍ē ka ɔdwɔ̄bi̍ yī āchɛ ɛpa; ɛpa ge̍ē ka ɔdwɔ̄bi̍ yī ɛta̍. 53A̍dā ɛha̍ ge̍ē ka ɔdwɔ̄bi̍ yī ayi̍ yī wā anāngrɔ̄ɔ, ayi̍ anāngrɔ̄ɔ chī ge̍ē ka ɔdwɔ̄bi̍ yī a̍dā yī wā. Ɛ̍nɛ̍ ge̍ē ka ɔdwɔ̄bi̍ yī ayi̍ yī nū anānyā; ayi̍ anānyā chī ge̍ē ka ɔdwɔ̄bi̍ yī ɛ̍nɛ̍ yī wā. Ɛ̍nɛ̍ ɔlwɔlɛ̍ ge̍ē ka ɔdwɔ̄bi̍ yī anyā yī ayi̍ yī wā; anyā yī ayi̍ chī ge̍ē ka ɔdwɔ̄bi̍ yī ɛ̍nɛ̍ yī wā ɔlwɔlɛ̍.”

Yɛ̄grāa ojo̍ōje̍

(Ima̍tiyu 16:2-3)

54Iji̍sɔ̄ɔsi gba̍a koko̍o de wa̍ hīka, “Ala̍ ge̍ ma̍ akpɔ̍ɔwɔ nīi yɛ ē gu ē gblāa la wāā yɛnɔ ɔ̄nɛ̄ mɛ̍, ala̍ ē ka ɔ̍lɔ yɛ amu ge̍ē hrīwō mɛ̍. O̍ ē chī hā i̍ngɔ̍ɔ. 55Ala̍ ge̍ chī ma̍ nīi ijija yɛ ē bū la ihi̍yajɛ mɛ̍, ala̍ ē ka ɔ̍lɔ ge̍ē hɛ̍puu. O̍ ē chī lɛ i̍ngɔ̍ɔ. 56Ala̍ āchɛ ɔkɛlā ɔha̍ chōo̍chē ya̍ ɔha̍ ɛla̍ā! Ala̍ ē ma̍ ajɛ ba̍la akpɔ̍ɔwɔ ē je̍ ochi̍chi̍ yī lɛlā, oji̍ chī - ohu̍ nīi ala̍ i̍ ē je̍ ochi̍chi̍ lɛlā ɔchabɔ̄ yī yɛ̄grāa nūma̍ gɛ ni̍ ma̍?

Lɛ oko̍o ɔgɔ̄grāa ba̍la oluji yī wɔ

(Ima̍tiyu 5:25-26)

57“Oji̍ - ohu̍ nīi ala̍ i̍ ē jo̍ōkū yī lɛlā nīi lɛ kpakpa ma̍ la abɔ̄ yī ala̍ ni̍ ma̍/? 58Ɔ̄chɛ ge̍ hī wɔ lɛpɔ̄ bī wɔ yɛ gāa ɛbɛ yī lɛpɔ̄, chɛ̄rī nīi a ā de lɛlā ɔla̍ā ka chlɛhu̍ ba̍la anu̍ yɛ̄grāa nīi ala̍ e̍e yɛ la ɔpɔ̄pū we̍ ma̍. Nɛ̄ni̍, o̍ ge̍ē pi wɔ kpēlēkpēlē gāa iyɔ̄bū yī alihiyo; alihiyo chī ge̍ē wa̍ābɔ̄ la awɔ ē de idege̍ri. Bɛ̍ɛ̄nɛ̄ ma̍, idege̍ri ē bī ɔ̄ ge̍ē tū igbakɔbɔ. 59Abɔ̍ɔ nīi a ge̍ē tū kpɛɛ nīi a de ɔkwɛ̍ɛjī yī okpo nīi e̍ hɛ̍ wɔ ma̍ a̍nɛ.”

Currently Selected:

Ilu̍uku 12: YBASR

Highlight

Copy