U̍ku̍rɔ̍ yī Alɛrɔ̄ 13
13
Ɔwɔ tū Iba̍nābasi ba̍la Isɔ̍ɔli ɛrɔ̄
1Yɛ̄grāa ɔla̍ā, āchɛ ɔkɛrɔ̄ yī Ɔwɔ ba̍la āchɛ ongū āchɛ lɛlā tū abɔ̍ɔ la ogrēeyī yī āchɛ yī Ɔwɔ nīi hɔ̄ la A̍ntīyɔ̄ɔki ma̍. Aa̍ hɔ̄ ma̍ a̍nɛ: Iba̍nābasi, ba̍la Isi̍mīyɔn nīi re̍ka Onōbi̍ ma̍, ba̍la Ilu̍sīyɔsi nīi - Olisayiri̍in ma̍, ba̍la Ima̍nɛn nīi jɛ̄ la apli̍kpo̍ yī Ihɛ̍rɔ̄ɔdi ma̍, ba̍la Isɔ̍ɔli. 2Yɛ̄grāa ɔha̍, e̍ gblāa abɔ̍ɔ yɛ ē ya̍ otūlichō de Ɔwɔ, ē chlɛ̄ɛmiyɛ; Uhu Ɔnɛ̄ɛhɛhi yī Ɔwɔ de wa̍ ka ɛ̍lɛ ge̍ hwō Iba̍nābasi ba̍la Isɔ̍ɔli de anu̍, hɛ̄ɛbɛ nīi ɛ̍lɛ ge̍ ya̍ u̍ku̍rɔ̍ nīi - anɔ̍lɔ hī ɛ̍lɛ ɛra̍ ma̍.
3Aa̍ wa̍a̍ chlɛ̄ɛmiyɛ jɔhā de Ɔwɔ. E̍ wā ge̍ de abɔ̄ che Iba̍nābasi ba̍la Isɔ̍ɔli lɛhu̍ bɛ̍ɛ̄nɛ̄ ma̍, e̍ de wa̍ tɛ̄rɔ̄ pīya.
Abɔ̍ɔ la Isa̍yi̍prɔ̄ɔsi
4Iba̍nābasi ba̍la Isɔ̍ɔli pīya hī A̍ntīyɔ̄ɔki bɛ̍ɛ̄nɛ̄. Uhu Ɔnɛ̄ɛhɛhi yī Ɔwɔ chī de wa̍ tɛ̄rɔ̄ a̍nɛ mɛ̍ɛ̍! E̍ gbajɛ ga Iselu̍siya ma̍, e̍ tū wɔwu̍ bū abɔ̍ɔ ga ajɛ yī Isa̍yi̍prɔ̄ɔsi. Li̍hu ta̍kakatū ɔcha yī Isa̍yi̍prɔ̄ɔsi wa̍a̍. 5E̍ gbajɛ la ipwo̍gra yī Isa̍lāmisi ma̍, e̍ kɛlā yī Ɔwɔ de āchɛ abɔ̍ɔ la u̍nu̍ ogrēeyī yī Iju̍u. Ijɔ̍ɔn Ima̍aki yɛ abɔ̍ɔ ba̍la aa̍ bāa ɔ̄chɛ otū wā wɔbɔ̄ ma̍.
6E̍ ga hɛ̍ ajɛ yī Isa̍yi̍prɔ̄ɔsi ārɛ̄ wa̍a̍ ga Ipwo̍gra nīi re̍ka Ipa̍fōosi ma̍. E̍ gāa ge̍ hɛ̍ta̍ la olija ɔha̍ nīi re̍ka Iba̍a̍ Iji̍sɔ̄ɔsi ma̍ abɔ̍ɔ. O̍ warīmɛ̄ ka anɔ̍lɔ - ɔ̄chɛ ɔkɛrɔ̄ yī Ɔwɔ nɛ. Riyī yī olija ɔla̍ā re̍ka E̍līmasi la oko̍o yī Igri̍iki. O̍ chī - Iju̍u nɛ. 7Ɔya yī ɔchwɔ̄lɛ̍ yī ajɛ yī Isa̍yi̍prɔ̄ɔsi wa̍a̍ nɛ. Ɔchwɔ̄lɛ̍ ɔla̍ā re̍ka Isɛ̍gīyusi Ipɔ̄lusi. O̍ jyɛ̍ɛ̄lā kpɛ̍ɛji. O̍ hī Iba̍nābasi ba̍la Isɔ̍ɔli ɛra̍ dikpo̍ba̍ iyī nū. Wu̍chē oji̍ nɛ, o̍ chikpo̍ ge̍ē plɛ̍ɛ̄lā yī Ɔwɔ. 8E̍līmasi olija ɔla̍ā i̍ chɛ̄ de wa̍ ni̍. O̍ i̍ chikpo̍ nīi ɔchwɔ̄lɛ̍ ɔla̍ā ge̍ chɛ̄ku lɛlā yī Ɔwɔ nīi e̍ yɛ ē ka ma̍ ni̍. 9Uhu Ɔnɛ̄ɛhɛhi yī Ɔwɔ chī mu Isɔ̍ɔli iyē mɛ̍ɛ̍! Isɔ̍ɔli nūma̍ nīi e̍ ē hī ɔ̄ ka Ipɔ̍ɔli a̍nɛ. O̍ ma̍ olija ɔla̍ā chi̍i̍, 10da ɔ̍ hīka, “Awɔ ɔyi̍ yī Ɔngūwɛ̄gā nīi rɛ ma̍ ma̍! Ɔjā ɔnɛ̄ɛhɛhi ɔha̍lɔha̍ wa̍a̍ ta̍ wɔ anyī! I̍ji̍yēyī ɔdwɔ̄bi̍ ita yī ɔha̍lɔha̍ wa̍a̍ mu wɔ iyē rɛ aa̍ a̍nɛ! Myɛ̄grāa-myɛ̄grāa, a ē chikpo̍ ge̍ē de ɔpɔ̄pū olēchi̍ lēchi̍ yī Ɔwɔ ē pīya arīmɛ̄! 11Ɔwɔ ge̍ē he itābɔ̄ yī nū tū wɔ u̍ma̍ama, a ge̍ē de priyī! A i̍ ge̍ē ma̍ ɛbɛ ɔlɛgēdēgēdē ni̍ yɛ̄grāa ɔha̍ yɛ̍yɛ̍ o̍bū bɛ̍ɛ̄nɛ̄!”
Ɔpɔ̄ɔpɛ̄, eyī de da E̍līmasi obū nīi o̍ ku abɔ̍ɔ ē gāla̍ ɔ̄chɛ nīi ge̍ē de abɔ̄ ku̍ ɔ̄ ma̍. 12Ɔchwɔ̄lɛ̍ ɔla̍ā ma̍ lɛlā nūma̍ nīi ya̍ ma̍, o̍ chɛ̄ku Ɔwɔ. Lɛlā yī Ādā nīi e̍ yɛ ē ngū ma̍ de ya̍ ɔ̄ lɛbɛ̍bi̍ ɔlamu ɔlamu.
Abɔ̍ɔ la A̍ntīyɔ̄ɔki yī Ipisi̍diya
13Ipɔ̍ɔli ba̍la alikpɛ̍ɛ yī nū pīya la wɔwu̍ bū la Ipa̍fōosi ga Ipɛ̍ga la ɔcha yī Ipamfi̍liya. Ijɔ̍ɔn Ima̍aki ku̍ pīya hī wā abɔ̍ɔ, ku̍chē ga Ijɛru̍sālɛm. 14Aa̍ Ipɔ̍ɔli wā ge̍ pīya bū la Ipɛ̍ga wā la A̍ntīyɔ̄ɔki yī Ipisi̍diya. E̍ pīya ga u̍nu̍ ogrēeyī yī Iju̍u yī ɛbɛ ɔla̍ā la Ɔ̄chī Ɔmyɛ̍nyɛ̍ ge̍ hyāhɔ̄ abɔ̍ɔ. 15Alɛhu̍ yī u̍nu̍ ogrēeyī ɔla̍ā wā ge̍ kɛlā bū la īpū yī Lihɔ yī Imo̍sīisi ba̍la īpū nīi āchɛ ɔkɛrɔ̄ yī Ɔwɔ ta̍ ma̍ bɛ̍ɛ̄nɛ̄. E̍ kwɛ̍ɛjī ma̍, alɛhu̍ yī u̍nu̍ ogrēeyī ɔla̍ā tɛ̄rɔ̄ hu Ipɔ̍ɔli ba̍la Iba̍nābasi: Ɛ̍lɛ ka̍a lɛ lɛlā ɔha̍ nīi ɔ̍lɔ ge̍ē ya̍ nīi aa̍ ē lɛ brii ma̍ ge̍ē ka ē de aa̍ oo! Ɛ̍lɛ ge̍ kɔ̍ɔ̄ la ɔ̍lɔ gɛ!
16Ipɔ̍ɔli nīichō yarɛ bɛ̍ɛ̄nɛ̄. O̍ ya̍ wā la abābɔ̄, kū la lɛlā la ɔkɔ̄ka bɛ̍ɛ̄nɛ̄ hīka, “Aya̍ali̍sɛ̄rɛli wa̍a̍, ba̍la ala̍ āchɛ nīi ē ya̍ otūlichō yī Ɔwɔ ma̍! Ala̍ darɔ̄ku! 17Ɔwɔ yī Ali̍sɛ̄rɛli nūma̍ hu aa̍ ɔ̍kɔ̄kū yī alɔ ohōhu. O̍ de Ali̍sɛ̄rɛli pīya ɔcha ɔnɔ̄kɔ̄kū yɛ̄grāa nīi e̍ gblāa bāa āchɔga la I̍jīipu ma̍. Bū la wɔhu̍ ɔnɔ̄kɔ̄kū yī nū, o̍ de wa̍ bī ngmɛ̍ɛchɛ hī ɔcha yī I̍jīipu ke̍e̍. 18Lipu̍ lɛ̍yi̍ ohu ɛpa ke̍e̍, Ɔwɔ mlɔtū kpɔ̍ɔ̍ yɛ ē deyīrɛ wa̍ abɔ̍ɔ lipu̍ a̍chi̍ chukuru. 19O̍ de ɔcha arāapa chāajɛ abɔ̍ɔ la ajɛ yī Ike̍nāan, de ajɛ ɔla̍ā nāa kɔ̄ de Ali̍sɛ̄rɛli. 20Yɛ̄grāa nūma̍ wa̍a̍ gbajɛ la u̍nɔ lɛ̍yi̍ che lɛ̍yi̍ ohu ɛpa che igwo̍.
“O̍bū nīi Ɔwɔ wā ge̍ de ɛgabɔ̄ de wa̍; kpɛɛ ge̍ ku yɛ̄grāa yī ɔ̄chɛ ɔkɛrɔ̄ yī Ɔwɔ nīi re̍ka Isa̍mūɛli ma̍. 21E̍ wā ge̍ chikpo̍ yī ɔchwɔ̄lɛ̍ oro̍ōre̍ ma̍, Ɔwɔ de ɔngrɔ̄ɔ ɔha̍ nīi re̍ka Isɔ̍ɔli ma̍ de wa̍. Ɔyi̍ yī Iki̍isi nīi bū la wɔma yī Ibɛ̍njāmɛn ma̍ nɛ. Isɔ̍ɔli re̍ ɔchwɔ̄lɛ̍ yī wā lɛ̍yi̍ ohu ɛpa. 22Ɔwɔ de ɔ̍ nāa ma̍, o̍ de Ide̍bīidi re̍ ɔchwɔ̄lɛ̍ yī wā. Lɛlā nīi Ɔwɔ ka ku̍ Ide̍bīidi ma̍ hɔ̄ ma̍ a̍nɛ. ‘Ide̍bīidi ɔyi̍ yī Ije̍si, n ma̍ ɔ̄ wa̍a̍ mɛ̍. Ita yī ɔ̄chɛ nīi hi um ɔtū ma̍ hɔ̄ aa̍ a̍nɛ. Anu̍ ge̍ē yɛ̍ɛ̄lā nīi n chikpo̍ ka o̍ ge̍ē ya̍ ma̍ a̍nɛ.’ 23Ala̍ ma̍ gɛ! Bū la wɔma yī Ide̍bīidi nūma̍ pi̍i̍ nīi Ɔwɔ de Ɔhɔ̍ɔnyɛta̍ de Ali̍sɛ̄rɛli re̍ka Iji̍sɔ̄ɔsi ga lɔkɔ nīi Ɔwɔ choko̍o ma̍ a̍nɛ. 24O̍bū nīi Iji̍sɔ̄ɔsi wu̍tu yī u̍ku̍rɔ̍ yī nū la ɔyɔ̍ɔ̄ya̍ ma̍, Ijɔ̍ɔn ka ɛrɔ̄ yī Ɔwɔ de Ali̍sɛ̄rɛli wa̍a̍ hīka, ‘Ala̍ ā pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ nīi ala̍ ge̍ hu yenyi.’ 25Yɛ̄grāa nīi Ijɔ̍ɔn yɛ ge̍ē kwɛ̍ɛjī la u̍ku̍rɔ̍ nīi o̍ wā ge̍ē ya̍ ma̍, o̍ kɛlā ɔha̍ de āchɛ wa̍a̍. O̍ che wa̍ ikpo̍ ‘Ala̍ u̍tu gbɛri̍ya̍ ka amɔ̍lɔ - ɔ̄nyɛ nɛ ma̍/? I̍ ami chī ɔ̄chɛ nīi ala̍ yɛ ē gbēyī a̍ni̍! Ɔlɔjā yɛ amu yewā la okwi̍ihi yī u. Ami i̍ ngma̍ lɛbɛ ge̍ē wā orī hī wɔkpa̍ ochelikpo̍ yī nū ɔbɔbɔ ni̍.’
26“Aɛ̍nɛ̍ yī u - wɔma yī A̍brahāam, ba̍la ala̍ āchɛ nīi ē ya̍ otūlichō yī Ɔwɔ ma̍! Alɔ nīi Ɔwɔ de ɛrɔ̄ yī ɔhɛ̍ta̍ nūma̍ tɛ̄rɔ̄ hu alɔ a̍nɛ. 27Āchɛ nīi gblāa la Ijɛru̍sālɛm ma̍ ba̍la alɛhu̍ yī wā i̍ chī jo̍ōkū ka Iji̍sɔ̄ɔsi ɔ̍lɔ - Ɔhɔ̍ɔnyɛta̍ a̍ni̍. E̍ i̍ u̍tu jo̍ōje̍ ochi̍chi̍ yī lɛlā yī āchɛ ɔkɛrɔ̄ yī Ɔwɔ nīi e̍ ē ma̍ la Īpū yī Ɔwɔ myɛ̄grāa-myɛ̄grāa la Ɔ̄chī Ɔmyɛ̍nyɛ̍ ma̍ ni̍. E̍ chī ya̍ nīi lɛlā yī āchɛ ɔkɛrɔ̄ yī Ɔwɔ de grāa bū la onīi e̍ hɛ̍ Iji̍sɔ̄ɔsi ɔpīyaku̍ ma̍. 28E̍ i̍ mɔ̍ɔ̄ma̍ lɛlɛ̄lā nīi ngma̍ nīi o̍ ge̍ē pīyēku̍ ni̍, e̍ ka Ipa̍yi̍lēeti ɔ̍lɔ ge̍ de ɔ̍lɔ ngmo̍! 29E̍ de lɛlā ɔha̍lɔha̍ wa̍a̍ nīi Īpū yī Ɔwɔ ka ku̍ ɔ̄ ma̍ ya̍ wa̍a̍ ma̍, e̍ de ɔ̍ hrāa hī ɔchi̍ ɔhrɛ̍ɛpa ge̍ nyi la u̍nwɔ̍wu̍ ɔha̍. 30Ɔwɔ chī de ɔ̍ hye̍ēyī la okū ke̍e̍ mɛ̍. 31Yɛ̄grāa yɛ̄mɛ̄mɛ̄, o̍ wā dikpo̍ba̍ āchɛ nīi tīkpo̍ ba̍la anu̍ bū la Iga̍līli ge̍ chɛ̄ la Ijɛru̍sālɛm ma̍ nīi e̍ ma̍ ɔ̄. Aa̍ re̍ka itɛ̍ɛhi̍yɛ̍ yī nū de āchɛ yī I̍sɛ̄rɛli u̍ma̍ama a̍nɛ. 32Aa̍ nīi alɔ bī Wɔ̄kā Ɔlwɔnyɛ yī nū nūma̍ ge̍ de ala̍ a̍nɛ. Oko̍o nīi Ɔwɔ che de aa̍ ɔ̍kɔ̄kū yī alɔ ma̍ hɔ̄ ma̍ a̍nɛ. 33Ɔwɔ chī de ya̍ i̍ngɔ̍ɔ de alɔ nīi - wɔma yī wā ma̍ mɛ̍. Wu̍chē oji̍ nɛ, o̍ de Iji̍sɔ̄ɔsi hye̍ēyī la okū wā la ɔhɔ̄leyī mɛ̍. O̍ lɛ lɔkɔ nīi Īpū yī Ejē yī Ɔkɔ̄kā ɔ̍mɛpa ka ma̍,
“ ‘Awɔ - Ɔyi̍ yī u nɛ.
N de pīya A̍dā yī wɔ i̍chɛ mɛ̍.’
34Ɔwɔ de Ɔyi̍ yī nū hye̍ēyī la okū mɛ̍; o̍ i̍ ge̍ē ku̍chē de ē wɔ̄wa ge̍ē gbo̍ ē gɛ ni̍. Lɛlā nīi Ɔwɔ ka ku̍ ɔla̍ā ma̍ hɔ̄ ma̍ a̍nɛ:
‘N ge̍ē de ɔpiyɛ ɔnɛ̄ɛhɛhi ɔla̍ā nīi
gba̍a - olēchi̍ lēchi̍ ma̍ de wɔ
lɔkɔkɔ nīi n choko̍o de Ide̍bīidi ma̍.’
35O̍ gba̍a ka la Īpū yī Ejē Ɔkɔ̄kā ɔha̍ hīka,
‘A i̍ ge̍ē chɛ̄ nīi ibi̍īyē yī Ɔ̄chɛ yī
wɔ lēchi̍ lēchi̍ ē de wɔ̄wa ni̍.’
36Ide̍bīidi ya̍ u̍ku̍rɔ̍ nīi Ɔwɔ chikpo̍ ma̍ hwɔhi hwɔhi la yɛ̄grāa yī nū. O̍ pīyaku̍ nīi e̍ de ɔ̍ nyi la ɛbɛ nīi e̍ nyi aa̍ ɔ̍kɔ̄kū yī nū ma̍. Ibi̍īyē yī nū chī de wɔ̄wa tū abɔ̍ɔ la ajɛ. 37Ɔ̄chɛ nīi Ɔwɔ de ɔ̍ hye̍ēyī la okū ma̍, ibi̍īyē yī nū i̍ wɔ̄wa ni̍. 38Aɛ̍nɛ̍ yī u! Ala̍ ā po̍ ochi̍chi̍ yī lɛlā nū gɛ! Bū la abɔ̄ yī Iji̍sɔ̄ɔsi nūma̍ nīi ɛrɔ̄ yī lɛlā ɔdwɔ̄bi̍ ode kɔ̄kɔ̄ wā dikpo̍ba̍ ala̍ hɔ̄ nīi alɔ yɛ ē ka ē de ala̍ a̍nɛ. 39Lihɔ yī Imo̍sīisi i̍ hɛ̍ ala̍ ta̍ mɛ ni̍. Ala̍ ā jo̍ōkū gɛ hīka, ɔ̄chaha̍ ɔ̄chaha̍ nīi ge̍ de ɔtū che Iji̍sɔ̄ɔsi, ɔlɔjā ge̍ē lɛ ɔhɛ̍ta̍ hī lɛlā ɔdwɔ̄bi̍ wa̍a̍. 40Ala̍ ā du̍mɔ̍ du̍mɔ̍ bɛ̍ɛ̄nɛ̄, hɛ̄ɛbɛ nīi lɛlā nīi āchɛ ɔkɛrɔ̄ yī Ɔwɔ ka ma̍ ge̍ e̍e ya̍ ala̍ ni̍. 41E̍ ka hīka,
‘Ala̍ ma̍ ko̍ō, ala̍ āchɛ ochi̍hi̍ya̍ yī lɛlā yī Ɔwɔ!
O̍ ge̍ lɛ ala̍ lɛbɛ̍bi̍, nīi ala̍ ge̍ ku̍!
Wu̍chē oji̍ nɛ, n ge̍ē yɛ̍ɛ̄lā ɔha̍ la ɔ̄chī yī ala̍.
Ɔ̄chɛ ɔha̍ ge̍ kɔ̄ka ochi̍chi̍ yī nū de ala̍, ala̍ i̍ ge̍ē chɛ̄ ni̍.’ ”
42Ipɔ̍ɔli ba̍la Iba̍nābasi yɛ ē ngmɛ̍ɛchɛ ē pīya ē hī u̍nu̍ ogrēeyī ɔla̍ā ma̍, āchɛ ɛla̍ā ra̍ābɔ̄ de wa̍ ka ɛ̍lɛ ge̍ ku̍chē wā ge̍ ka de aa̍ yɛ̍yɛ̍ la Ɔ̄chī Ɔmyɛ̍nyɛ̍ ɔ̍mɛpa. 43Ogrēeyī kwɛ̍ɛjī bɛ̍ɛ̄nɛ̄ ma̍, āchɛ pīya. Iju̍u ɛha̍ ba̍la Ɛchɛkɔcha ɛha̍ nīi de pīya āchɛ yī Iju̍u ma̍ pɛ̍ ku aa̍ Ipɔ̍ɔli. Alɛrɔ̄ nūma̍ kɛlā de āchɛ ɛla̍ā wa̍a̍ mla aa̍ ɔtū ka ɛ̍lɛ ge̍ gblāa kpɔ̍ɔ̍ lipu̍ yī uhwa ɔnɛ̄ɛhɛhi nīi Ɔwɔ ɔ̍lɔ de de ɛ̍lɛ ma̍.
44La Ɔ̄chī Ɔmyɛ̍nyɛ̍ ɔmɛpa, alipwo̍gra ɔla̍ā mi̍ya hī ajajɛ wā ge̍ē plɛ̍ɛ̄lā yī Ɔwɔ. 45Āchɛ yī Iju̍u ma̍ yɛ̄mɛ̄ yī āchɛ nūma̍ ma̍, e̍ tū wā uji gba̍a̍. E̍ ka bɛ̍ɛ̄nɛ̄ ka, arīmɛ̄ nīi Ipɔ̍ɔli ɔ̍lɔ yɛ ē wu a̍nɛ, pra̍a anu̍ ɛcha̍. 46Ipɔ̍ɔli ba̍la Iba̍nābasi kɛlā ga iyɔ̄bū iyɔ̄bū kpɔ̍ɔ̍. E̍ da wa̍ bɛ̍ɛ̄nɛ̄ ka, “O̍ ngma̍ nīi alɔ ge̍ kɛlā yī Ɔwɔ ē de ala̍ Iju̍u yɔbɔ̄ɔbū; onūma̍, ala̍ chī hi̍hi̍yo̍. Ala̍ chōo̍chē yɛ gbɛri̍ya̍ ka ɔhɔ̄leyī i̍mɔ̄mɛni̍ ɔ̍lɔ i̍ ngma̍ la ala̍ ni̍. O̍ lɛ i̍ngɔ̍ɔ ma̍, alɔ ge̍ē pi̍ye̍mā hī ala̍ ē pīya ē dikpo̍ba̍ Ɛchɛkɔcha bɛ̍ɛ̄nɛ̄. 47Wu̍chē oji̍ nɛ, i̍ngɔ̍ɔ nīi Ādā koko̍o de alɔ ka aɛ̍lɛ ge̍ ya̍ a̍nɛ. O̍ ka hīka,
“ ‘Ala̍ ma̍ gɛ ko̍ō! N de ala̍ lā,
hɛ̄ɛbɛ nīi ala̍ ge̍ē de pīya ɛbɛ
ɔlɛgēdēgēdē de Ɛchɛkɔcha,
hɛ̄ɛbɛ nīi ala̍ ge̍ē re̍ka ɔpɔ̄pū yī
ɔhɛ̍ta̍ de yɛchɛ wa̍a̍.’ ”
48Ɛchɛkɔcha wa̍a̍ plɛ̍ɛ̄lā nūma̍ ma̍, e̍ lɛ ɔwɔ̄wīyā kpɛ̍ɛji. E̍ da Ɔwɔ o̍be wu̍chē yī ɛrɔ̄ yī nū. Āchɛ nīi Ɔwɔ de abɔ̄ ku wa̍ nīi ge̍ē gāa ɔhɔ̄leyī i̍mɔ̄mɛni̍ ma̍ de pīya āchɛ yī Iji̍sɔ̄ɔsi.
49Lɛlā yī Ādā mīyanya ta̍ ɛbɛbɛ ta̍ wa̍a̍ abɔ̍ɔ la ajɛ yī ɛbɛ ɔla̍ā. 50Āchɛ yī Iju̍u gāa ge̍ ba̍ alɛhu̍ yī ipwo̍gra ɛla̍ā tū ba̍la anyā ɛha̍ nīi - āchɛ ɛnɛ̄kɛ̄kū gba̍a yɛ ē ya̍ otūlichō yī Ɔwɔ ma̍. E̍ kū la lɛlā abi̍ ɔya̍ tāa alɛrɔ̄ yī Ɔwɔ nūma̍, de wa̍ kpo̍ nū hī ajɛ yī ɛbɛ ɔla̍ā. 51Ipɔ̍ɔli ba̍la Iba̍nābasi gwō obubu yī ikpo̍ yī wā gblāa abɔ̍ɔ de āchɛ ɛla̍ā, pīya hī wā ga Iko̍nīyum. 52A̍chi̍kpo̍ yī Iji̍sɔ̄ɔsi nīi chī gblāa abɔ̍ɔ la A̍ntīyɔ̄ɔki ma̍ lɛ ɔwɔ̄wīyā kpɛ̍ɛji. Uhu Ɔnɛ̄ɛhɛhi yī Ɔwɔ mu wa̍ iyē omōmu.
Currently Selected:
U̍ku̍rɔ̍ yī Alɛrɔ̄ 13: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
