U̍ku̍rɔ̍ yī Alɛrɔ̄ 14
14
Abɔ̍ɔ la Iko̍nīyum
1O̍ gba̍a lɛ i̍ngi̍ngɔ̍ɔ abɔ̍ɔ la ipwo̍gra yī Iko̍nīyum: Ipɔ̍ɔli ba̍la Iba̍nābasi gba̍a ga u̍nu̍ ogrēeyī yī Iju̍u ge̍ kɛlā yī Ɔwɔ de āchɛ. Āchɛ lyɛ̄mɛ̄ kpɛ̍ɛji nīi chɛ̄ku Ɔwɔ ma̍; Iju̍u tūla Ɛchɛkɔcha. 2Iju̍u ɛha̍ nīi i̍ chikpo̍ ge̍ē chɛ̄ ni̍ ma̍ ba̍ Ɛchɛkɔcha tū pīyeyīta̍ lɛlā yī āchɛ yī Iji̍sɔ̄ɔsi. 3Ipɔ̍ɔli ba̍la Iba̍nābasi chī hɔ̄ abɔ̍ɔ kpɛɛ la ɛbɛ ɔla̍ā kpɔ̍ɔ̍. E̍ kɛlā yī Ādā Iji̍sɔ̄ɔsi brii abɔ̍ɔ. Ādā ɔlɔjā de chabɔ̄ hīka ɛrɔ̄ yī uhwa ɔnɛ̄ɛhɛhi yī anu̍ ɔla̍ā ɔ̍lɔ - olēchi̍ lēchi̍ nɛ. O̍ de wɔhu̍ de alɛrɔ̄ yī nū nīi e̍ yɛ̍ɛ̄lā ɔlɛbɛ̍bi̍ ba̍la u̍ku̍rɔ̍ ɔlɛbɛ̍bi̍. 4Alipwo̍gra ɔla̍ā wa̍a̍ de iyī wā kɛ̄ɛpa. Ɛha̍ rɛ la ihi yī alɛrɔ̄ yī Ɔwɔ, ɛha̍ chī rɛ la ihi yī āchɛ yī Iju̍u.
5Ɛchɛkɔcha ba̍la Iju̍u ɛha̍ tūla alɛhu̍ yī wā miya tū alɛrɔ̄ yī Ɔwɔ nūma̍ yɛ ge̍ē ya̍ wā ɔjā, ngmo̍ wā la achāchɔ̄. 6E̍ de jo̍ōkū ma̍, e̍ gwɛ̍ɛnya pīya yī Ili̍si̍tra ba̍la Idɛ̍bɛ ba̍la ɔta̍kakatū yī ajɛ yī ɛbɛ ɔla̍ā. Ipwo̍gra nūma̍ wa̍a̍ hɔ̄ la ajɛ yī Iliko̍nīya. 7E̍ kā Wɔ̄kā Ɔlwɔnyɛ yī Ɔwɔ abɔ̍ɔ.
Abɔ̍ɔ la Ili̍si̍tra ba̍la Idɛ̍bɛ
8Abɔ̍ɔ la Ili̍si̍tra ɔngrɔ̄ɔ ɔha̍ kwi̍kpo̍ oko̍ōku̍ gbo abɔ̍ɔ. O̍ lɛ i̍ngɔ̍ɔ bū la yɛ̄gɛ̄grāa nīi e̍ ma̍ ɔ̄ ma̍; o̍ i̍ yɛɛ je̍ ni̍ lachi̍lachi̍. 9O̍ hɔ̄ abɔ̍ɔ ē plɛ̍ɛ̄lā nīi Ipɔ̍ɔli yɛ ē ka ma̍. Ipɔ̍ɔli ma̍ ɔ̄ chi̍i̍ ma̍, o̍ jo̍ōkū hīka ɔ̍lɔ de ɔtū che hɛ̄ɛbɛ ge̍ē lɛ cha̍cha̍. 10Ipɔ̍ɔli ka gbōō de ɔ̍ ka ɔ̍lɔ ge̍ nīichō yarɛ kpakpa! Ɔngrɔ̄ɔ ɔla̍ā nyɔ̄ gbru yarɛ ɔpɔ̄ɔpɛ̄, wu̍ ɛyɛ ta̍. 11Āchɛ ɛla̍ā ma̍ lɛlā nūma̍ ma̍, e̍ to̍ohwe̍e ka la oko̍o yī ɔcha yī Iliko̍nīya ka ɔ̍lɔ ge̍, wo̍o̍! Ɔwɔ ɛha̍ ɔ̍lɔ bū la ichō wā dikpo̍ba̍ aa̍ hɔ̄ ma̍ bāa āchɛ̄ɛchɛ a̍nɛ oo! 12Ɔpɔ̄ɔpɛ̄, e̍ de Iba̍nābasi re̍ka Isu̍usi. E̍ de Ipɔ̍ɔli re̍ka Ihɛ̍mɛ̄ɛsi. Wu̍chē oji̍ nɛ, anu̍ ē bī oko̍o ē kɛlā a̍nɛ. 13U̍nu̍ yī Isu̍usi ɔla̍ā nīi re̍ka ɔwɔ yī wā ma̍ kū la ikō. Oligbe yī Isu̍usi ɔla̍ā gāa ge̍ kpo̍ yɛna ba̍la īpū yī ɔchi̍ oli̍hi̍hi̍ ɛha̍ ga abɔ̍ɔ ga oko̍nɔ̄ɔpu bɛ̍ɛ̄nɛ̄. Anu̍ ba̍la āchɛ ɛla̍ā wa̍a̍ yɛ ē chikpo̍ ge̍ē de ɛjā ɛla̍ā pā Ipɔ̍ɔli ba̍la Iba̍nābasi ɔpɔ̄pā.
14Alɛrɔ̄ ɛla̍ā nīi re̍ka Iba̍nābasi ba̍la Ipɔ̍ɔli ma̍ wā ge̍ plɛ̍ɛ̄lā nīi āchɛ ɛla̍ā yɛ abɔ̍ɔ ge̍ē ya̍ ma̍, e̍ wɔ̍ɔ̄tū, hi̍ya iyī wā ɔjā otūlibi̍īyē. E̍ rɛ̄ɛnya wa̍a̍ ge̍ gatū ga lipu̍ yī āchɛ ɛla̍ā, tɔ̍ɔna ka de wa̍ hīka, 15“Oji̍ - ohu̍ nīi ala̍ yɛ ma̍ ē ya̍ i̍ngɔ̍ɔ ma̍? Je̍ka aa̍ alɔ - āchɛ̄ɛchɛ ɔlamu bāa ala̍ ma̍ nɛ! Alɔ wā ge̍ē ka ɛrɔ̄ yī Ɔwɔ ē de ala̍, hɛ̄ɛbɛ nīi ala̍ ge̍ē tu̍ la abɔ̄ hī a̍kpla yī lɛlā nūma̍ wa̍a̍, hɛ̄ɛbɛ nīi ala̍ ge̍ē pīya ūkpɔ̄tū ta̍ Ɔwɔ nīi - Ɔwɔ ɔhɔ̄leyī ma̍. Ɔwɔ nīi ya̍ ichō ba̍la ajɛ ba̍la li̍hu tūla ɛjāha̍ ɛjāha̍ wa̍a̍ nīi hɔ̄ la aa̍ ma̍ nɛ. 16I̍chɔ̍lɔ, Ɔwɔ pi̍ye̍mā hī āchɛ wa̍a̍ nīi e̍ yɛ ē ya̍ ɔjā nīi hi wā ɔtū ma̍. 17O̍ ē chī ya̍ ochi̍chi̍ iyī nū de wa̍ myɛ̄grāa-myɛ̄grāa bū la lɛhi nīi o̍ ē ya̍ tāa aa̍ ma̍. Wu̍chē oji̍ nɛ, anu̍ ē hrīwō de alɔ ē ya̍ nīi alɔ ē kpo̍ ɛjāyɛ̄rɔ̄ hwɔhi hwɔhi a̍nɛ. Anu̍ ē de ojōre̍ de alɔ, ē ya̍ nīi ūkpɔ̄tū lɛ alɔ yaya a̍nɛ.” 18Lɛlā nūma̍ wa̍a̍ nīi alɛrɔ̄ yī Ɔwɔ kɔ̄ka ma̍ i̍ ka ge̍ ku̍ āchɛ ɛla̍ā chi̍yɛ hī ɔpɔ̄pū nīi e̍ yɛ ge̍ē ya̍ ma̍ mɛ ni̍.
19Iju̍u ɛha̍ nīi bū la A̍ntīyɔ̄ɔki yī Ipisi̍diya ba̍la Iko̍nīyum ma̍ wā abɔ̍ɔ ge̍ ba̍ āchɛ ɛla̍ā tū nīi e̍ de chɛ̄ku wa̍. E̍ kū la lɛchɔ̄ ɔtɔ̍ɔ̄ta̍ ngmo̍ Ipɔ̍ɔli bɛ̍ɛ̄nɛ̄. E̍ pi ɔ̍ ge̍ ta̍gbo la ikō, je̍ka ɔ̍lɔ pīyaku̍ mɛ̍. 20A̍chi̍kpo̍ yī Iji̍sɔ̄ɔsi wā ge̍ gblāa ta̍kakatū ɔ̄ ma̍; o̍ nīichō, pīya ba̍la aa̍ ga ipwɔ̍ɔ̄lɛ̍. La eyī ɔnyɔ̄nyā yī nū, anu̍ ba̍la Iba̍nābasi pīya ga ipwo̍gra yī Idɛ̍bɛ bɛ̍ɛ̄nɛ̄.
Aa̍ Ipɔ̍ɔli ku̍chē ga A̍ntīyɔ̄ɔki yī Isi̍riya
21Ipɔ̍ɔli ba̍la Iba̍nābasi kā Wɔ̄kā Ɔlwɔnyɛ ɔla̍ā de Alidɛ̍bɛ. Āchɛ yɛ̄mɛ̄mɛ̄ chɛ̄ku lɛlā yī Ɔwɔ nīi e̍ ngū ma̍. E̍ ku̍chē bū abɔ̍ɔ bɛ̍ɛ̄nɛ̄ wā la Ili̍si̍tra ba̍la Iko̍nīyum ba̍la A̍ntīyɔ̄ɔki yī Ipisi̍diya. 22E̍ kɛlā de āchɛ yī Iji̍sɔ̄ɔsi yī ɛbɛ ɛla̍ā, ka ɛ̍lɛ ge̍ tū ūkpɔ̄tū kpɔ̍ɔ̍; ɛ̍lɛ ge̍ de ɔtū che Ɔwɔ brii. E̍ koko̍o de wa̍ ka aa̍ wa̍a̍, aɛ̍lɛ ge̍ē mi̍chi̍ yɛ̄mɛ̄mɛ̄ o̍bū gāa ɛbɛ yī Ɔchwɔ̄lɛ̍ Oro̍ōre̍ yī Ɔwɔ. 23E̍ hu ɛgabɔ̄ de ogrēeyī yī āchɛ yī Ɔwɔ ɛla̍ā wa̍a̍, jɔhā, chlɛ̄ɛmiyɛ de Ɔwɔ, o̍bū de wa̍ tū Ɔwɔ la abɔ̄. Wu̍chē oji̍ nɛ, anu̍ nīi e̍ de ɔtū che ɔ̍ a̍nɛ.
24E̍ ga i̍ngɔ̍ɔ wa̍a̍ la ajɛ yī Ipisi̍diya ma̍, e̍ wā ge̍ pīya ga Ipamfi̍liya. 25E̍ ka ɛrɔ̄ yī Ɔwɔ de āchɛ abɔ̍ɔ la Ipɛ̍ga. E̍ wā ge̍ pīya ga Ipwo̍gra yī Ata̍liya. 26E̍ tū wɔwu̍ bū abɔ̍ɔ ga A̍ntīyɔ̄ɔki yī Isi̍riya bɛ̍ɛ̄nɛ̄. Abɔ̍ɔ nīi ogrēeyī yī āchɛ yī Ɔwɔ de wa̍ tū Ɔwɔ la abɔ̄ ka ɔpiyɛ yī Ɔwɔ ɔ̍lɔ ge̍ hɔ̄ la u̍ku̍rɔ̍ yī ɛ̍lɛ a̍nɛ. U̍ku̍rɔ̍ ɔ̍lɔma̍ kwɛ̍ɛjī hɔ̄ ma̍ a̍nɛ.
27E̍ gbajɛ ga A̍ntīyɔ̄ɔki ɔpɔ̄ɔpɛ̄ ma̍, e̍ tu̍ ogrēeyī yī āchɛ yī Ɔwɔ la ɛbɛ ɔla̍ā grēeyī, koko̍o yī lɛlā lɔkɔ nīi Ɔwɔ bī āā ya̍ wa̍a̍, ba̍la ɔkɔ nīi Ɔwɔ lwāa ɔpɔ̄pū ta̍ de Ɛchɛkɔcha nīi e̍ ge̍ē je̍ Ɔwɔ ma̍. 28Aa̍ Ipɔ̍ɔli hɔ̄ abɔ̍ɔ kpɛɛ tāa āchɛ yī Iji̍sɔ̄ɔsi yī A̍ntīyɔ̄ɔki.
Currently Selected:
U̍ku̍rɔ̍ yī Alɛrɔ̄ 14: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
