U̍ku̍rɔ̍ yī Alɛrɔ̄ 15
15
Ogrēeyī ɔha̍ nīi kū la Ijɛru̍sālɛm ma̍
1Āchɛ ɛha̍ bū la Ijudi̍ya wā abɔ̍ɔ la A̍ntīyɔ̄ɔki ge̍ ngū āchɛ yī Iji̍sɔ̄ɔsi lɛlā hīka ɔ̄chɛ ɔ̍lɔ i̍ ge̍ twɔ̍wu̍ lɔkɔ nīi Lihɔ yī Imo̍sīisi ɔ̍lɔ ka ma̍ ni̍, ɔlɔjā ɔ̍lɔ i̍ ge̍ē lɛ ɔhɛ̍ta̍ ē mɛ ni̍. 2Ipɔ̍ɔli ba̍la Iba̍nābasi i̍ chɛ̄ i̍ngɔ̍ɔ ni̍. E̍ ta̍ iyī wā ahu̍ kpɛ̍ɛ ɛbɛ̍bɛ̍. Wu̍chē yī ɔla̍ā, e̍ ka hīka Ipɔ̍ɔli ba̍la Iba̍nābasi ba̍la āchɛ ɛla̍ā ɛ̍lɛ ge̍ ga Ijɛru̍sālɛm ge̍ chikpo̍ po̍ la oko̍o yī alɛrɔ̄ yī Iji̍sɔ̄ɔsi ba̍la ɛgabɔ̄ yī ogrēeyī yī āchɛ yī Ɔwɔ abɔ̍ɔ.
3Ogrēeyī yī āchɛ yī Ɔwɔ mɔri̍mɔri̍ wā ge̍ de wa̍ tɛ̄rɔ̄ pīya bɛ̍ɛ̄nɛ̄. E̍ ga la ɔcha yī Ifoni̍siya ba̍la Isame̍riya koko̍o de wa̍ wa̍a̍ lɔkɔ nīi Ɛchɛkɔcha yɛ ē pīya ūkpɔ̄tū yī wā lā de Ɔwɔ ma̍. Āchɛ yī Iji̍sɔ̄ɔsi yī ɛbɛ ɛla̍ā wa̍a̍ lɛ ɔwɔ̄wīyā kpɛ̍ɛji nīi e̍ po̍ wɔ̄kā nūma̍ ma̍. 4E̍ gbajɛ ga Ijɛru̍sālɛm ma̍, ogrēeyī yī āchɛ yī Ɔwɔ mɔri̍mɔri̍ tūla alɛrɔ̄ yī Iji̍sɔ̄ɔsi ba̍la ɛgabɔ̄ wa̍a̍ ho̍ko̍o tū wā hwɔhi hwɔhi. E̍ koko̍o yī lɛlā nīi Ɔwɔ ya̍ gala abɔ̄ yī wā wa̍a̍ ma̍ de wa̍. 5Āchɛ yī Iji̍sɔ̄ɔsi nīi - Ifa̍rasīi ma̍ nīichō yarɛ ka Ɛchɛkɔcha titi ɛ̍lɛ ge̍ twɔ̍wu̍ wa̍a̍; ɛ̍lɛ ge̍ ka de ɛ̍lɛ nīi ɛ̍lɛ ge̍ ya̍ wa̍a̍ lɔkɔ nīi Lihɔ yī Imo̍sīisi ɔ̍lɔ ka ma̍ o̍bū.
6Alɛrɔ̄ yī Iji̍sɔ̄ɔsi ba̍la ɛgabɔ̄ yī ogrēeyī yī āchɛ yī Ɔwɔ ɔla̍ā pīya ge̍ lɛ ogrēeyī, miya lɛlā ɔla̍ā hwɔhi hwɔhi bɛ̍ɛ̄nɛ̄. 7E̍ yɛ ē ta̍ahu̍ kpɛɛ ma̍, Ipi̍ta nīichō yarɛ, koko̍o de wa̍ hīka, “Aɛ̍nɛ̍ yī u! Je̍ka aa̍ ala̍ jyɛ̍ɛ̄lā ɔla̍ā nīi Ɔwɔ ya̍ gala abɔ̄ yī u īchāha̍ ma̍? O̍ hī um ɛra̍ ka amɔ̍lɔ ge̍ gāa ge̍ kā Wɔ̄kā Ɔlwɔnyɛ yī anu̍ de Ɛchɛkɔcha, hɛ̄ɛbɛ nīi ɛ̍lɛ ge̍ po̍ chɛ̄ku anu̍. 8Ɔwɔ nīi ē je̍ ūkpɔ̄tū yī āchɛ̄ɛchɛ wa̍a̍ ma̍ de chabɔ̄ hīka Ɛchɛkɔcha ɛ̍lɛ ngma̍ la ɔchɛ̄ ku anu̍ titi. O̍ de Uhu Ɔnɛ̄ɛhɛhi yī nū de wa̍ lɔkɔ nīi o̍ de de alɔ ma̍. 9Alɔ ba̍la aa̍, ɔ̄chɔ̄chɛ i̍ hɔ̄ɔ̄hɔ̄ la eyī yī Ɔwɔ ni̍. Ɔwɔ de ūkpɔ̄tū yī wā na ngma̍ cha̍ri̍cha̍ri̍ wu̍chē lɔkɔ nīi e̍ chɛ̄ku ɔ̍ ma̍ mɛ̍. 10Bɛ̍ɛ̄nɛ̄ ma̍, oji̍ nīi ala̍ chikpo̍ ge̍ē ma Ɔwɔ ē ma̍ ma̍/? Ala̍ chikpo̍ ge̍ē nāa iho̍ nīi alɔ ɛlɛjā kɛ̄ɛ aa̍ ɔ̍kɔ̄kū yī alɔ i̍ bī mɛ ni̍ ma̍ ē che āchɛ nīi chɛ̄ku Ɔwɔ ma̍? 11Ehe̍e! Alɔ de ɔtū che ɔ̍ ma̍ anu̍ nīi alɔ lɛ ɔhɛ̍ta̍ bū la uhwa ɔnɛ̄ɛhɛhi yī Ādā Iji̍sɔ̄ɔsi a̍nɛ. I̍ngi̍ngɔ̍ɔ nīi aa̍ titi nāa ɔhɛ̍ta̍ a̍nɛ.”
12Āchɛ ɛla̍ā wa̍a̍ hɛ̍ gbɛ̄ɛ̄ gblāa abɔ̍ɔ ē plɛ̍ɛ̄lā nīi Ipɔ̍ɔli ba̍la Iba̍nābasi yɛ ē koko̍o ē de wa̍ ma̍ bɛ̍ɛ̄nɛ̄. E̍ koko̍o yī lɛlā ɔnɔ̄kɔ̄kū ba̍la i̍mamachi̍ wa̍a̍ nīi Ɔwɔ ya̍ gala abɔ̄ yī wā abɔ̍ɔ lipu̍ yī Ɛchɛkɔcha ma̍ de wa̍. 13E̍ kwɛ̍ɛjī la lɛlā ɔkɔ̄ka ma̍, Ije̍mēehi kɛlā bɛ̍ɛ̄nɛ̄ hīka, “Aɛ̍nɛ̍ yī u, ala̍ ā darɔ̄ku! 14Isa̍yi̍mɔ̄ɔn koko̍o de alɔ i̍gba̍a lɔkɔ nīi Ɔwɔ wā dikpo̍ba̍ Ɛchɛkɔcha la ɔrāarāa, lɔkɔ nīi Ɔwɔ hu āchɛ ɛha̍ lipu̍ yī wā ka ɛ̍lɛ ge̍ de pīya āchɛ yī anu̍ ma̍. 15Lɛlā nīi āchɛ ɔkɛrɔ̄ yī Ɔwɔ mwɔ̍ɔmu ma̍ ku kpɛ̍ɛji ba̍la lɛlā nūma̍. I̍ngɛ̍ɛ̄nɛ̄ nīi Īpū yī Ɔwɔ ka a̍nɛ:
16“ ‘Ādā ka hīka anɔ̍lɔ ge̍ē ku̍chē wā la ɔ̄chī iyɔ̄bū.
Anɔ̍lɔ ge̍ē gbla̍a ala̍āchɔ̄ yī
Ide̍bīidi nīi - ɔ̍lɔ chāajɛ ma̍ ē gwo̍.
Anɔ̍lɔ ge̍ē kpo̍ enīi - ɔ̍lɔ bɔ̄bīya
wa̍a̍ ma̍ ē bī ē gwo̍ ɔ̍lɔ.
17Bū la ɛbɛ ɔla̍ā, āchɛ ehēhī wa̍a̍ ɛ̍lɛ
ge̍ē kwɔgu yī anu̍ bɛ̍ɛ̄nɛ̄; tōtū la
Ɛchɛkɔcha nīi anɔ̍lɔ hī ɛ̍lɛ ɛra̍ nīi
ɛ̍lɛ de pīya āchɛ yī anu̍ ma̍.
18I̍ngɔ̍ɔ nīi Ādā ɔlɔjā nīi de lɛlā
nūma̍ wa̍a̍ chabɔ̄ ma̍ ka gbi̍chɛ gbi̍chɛ a̍nɛ.’
19“O̍ lɛ i̍ngɔ̍ɔ ma̍, lɛlā nīi ami gbɛri̍ya̍ ma̍ hɔ̄ ma̍ a̍nɛ: Alɔ ā ya̍ nīi o̍ ge̍ de yi̍chi̍chi̍ de Ɛchɛkɔcha nīi yɛ ē chɛ̄ku Ɔwɔ ma̍ ni̍. 20Ɔkɔkɔ yī ɔla̍ā, alɔ ā ta̍ īpū tɛ̄rɔ̄ hu wa̍ nīi alɔ ā ka de wa̍ hīka, e̍ ge̍ e̍e re̍ ɔjā nīi āchɛ de pā ɛchi̍yɛka ma̍ ni̍; wu̍chē oji̍ nɛ, o̍ i̍ lɛ cha̍ri̍cha̍ri̍ ni̍. E̍ ge̍ e̍e la̍ ɔ̍bɔ̍ɔ̄nyā ni̍. E̍ ge̍ e̍e re̍ ɛbɛ̍ nīi e̍ ngmo̍ ji i̍ hɛ̍ ɔ̄ yeyī hunū ni̍ ma̍ ni̍. E̍ ge̍ e̍e de oko̍o tū yeyī ni̍ lachi̍lachi̍. 21Wu̍chē oji̍ nɛ, e̍ yɛ abɔ̍ɔ ē ma̍ īpū yī Lihɔ yī Imo̍sīisi gbi̍chɛ gbi̍chɛ abɔ̍ɔ la u̍nu̍ ogrēeyī yī Iju̍u wa̍a̍ la ɔ̄chī Ɔmyɛ̍nyɛ̍. E̍ ē chī kɛlā yī nū la ipwo̍gra ɔha̍lɔha̍ wa̍a̍.”
Īpū nīi e̍ ta̍ tɛ̄rɔ̄ hu āchɛ yī ɛchɛkɔcha ma̍
22Alɛrɔ̄ yī Iji̍sɔ̄ɔsi ba̍la ɛgabɔ̄ tūla ogrēeyī yī āchɛ yī Ɔwɔ mɔri̍mɔri̍ wā ge̍ chɛ̄ bɛ̍ɛ̄nɛ̄ nīi e̍ ge̍ē de āchɛ ɛha̍ lipu̍ yī wā tɛ̄rɔ̄ ga A̍ntīyɔ̄ɔki tāa Ipɔ̍ɔli ba̍la Iba̍nābasi. E̍ hu Isa̍yi̍lāasi ba̍la Iju̍dasi nīi re̍ka Ibasa̍bāsi ma̍. Aa̍ āchɛ ɛpɛpa ɛla̍ā, āchɛ yī Iji̍sɔ̄ɔsi ē tū wā la ichō kpɛ̍ɛji.
23Ɛrɔ̄ nīi e̍ ka tū la īpū tɛ̄rɔ̄ hu wa̍ ma̍ hɔ̄ ma̍ a̍nɛ: “Alɔ alɛrɔ̄ yī Iji̍sɔ̄ɔsi tūla ɛgabɔ̄ ba̍la aɛ̍nɛ̍ yī ala̍ wa̍a̍ tɛ̄rɔ̄ yī ɔma̍kpɔɔ nūma̍ hu ala̍ nīi - aɛ̍nɛ̍ yī alɔ ma̍ a̍nɛ. Ala̍ nīi - āchɛ yī Iji̍sɔ̄ɔsi, Ɛchɛkɔcha gblāa la A̍ntīyɔ̄ɔki ba̍la Isi̍riya ba̍la Isili̍siya wa̍a̍ ma̍ nɛ. 24Alɔ po̍ hīka āchɛ ɛha̍ lipu̍ yī aɛ̍lɛ wā abɔ̍ɔ ge̍ kɛlā ɔha̍, de lɛlā yi̍chi̍chi̍ de ala̍, ya̍ nīi ūkpɔ̄tū ɔ̍lɔ ti̍ya ala̍ tū. Alɔ i̍ de wɔhu̍ de wa̍ i̍ngɔ̍ɔ ni̍. 25Wu̍chē yī ɔla̍ā nīi alɔ grēeyī wa̍a̍, chɛ̄ ge̍ē de āchɛ ē tɛ̄rɔ̄ hu ala̍ a̍nɛ. Alɛrɔ̄ yī alɔ ge̍ē tīkpo̍ ba̍la aɛ̍ɛya alɔ - Ipɔ̍ɔli ba̍la iba̍nābasi. 26Ipɔ̍ɔli ba̍la Iba̍nābasi mwanyī hī ɔpīyaku̍ yī wā, de iyī wā wa̍a̍ kwɔbɔ̄ lā de u̍ku̍rɔ̍ yī Ādā Iji̍sɔ̄ɔsi Ikra̍yisi. 27Āchɛ nīi alɔ de tɛ̄rɔ̄ ma̍, ɔha̍ re̍ka Iju̍dasi, ɔha̍ re̍ka Isa̍yi̍lāasi. E̍ ge̍ē ka la oko̍o ē de ala̍ i̍ngi̍ngɔ̍ɔ lɔkɔ nīi alɔ ka tū ma̍ la īpū ma̍. 28Uhu Ɔnɛ̄ɛhɛhi yī Ɔwɔ ba̍la alɔ titi i̍ chikpo̍ ge̍ē ya̍ nīi o̍ ē lichi̍chi̍ ē de ala̍ ni̍. Ɔ̍chi̍kpa̍kpa̍ ɛjā nūma̍: 29Ala̍ e̍e re̍ ɔjā nīi e̍ de pā ɛchi̍yɛka ma̍ ni̍. Ala̍ e̍e re̍ yeyī ni̍. Ala̍ e̍e re̍ ɛbɛ̍ nīi e̍ ngmo̍ ji i̍ hɛ̍ ɔ̄ yeyī hunū ni̍ ma̍ ni̍. Ala̍ ā de iyī ala̍ lā ke̍e̍ hī ya̍chi yī lɛlā ɔyɔ̍ɔ̄ya̍. Ala̍ ge̍ de iyī ala̍ lā ke̍e̍ hī ɛjā nūma̍ wa̍a̍, ala̍ ge̍ē ya̍ hwɔhi hwɔhi. Ala̍ hɔ̄lɛhi gɛ!”
30E̍ wā ge̍ de āchɛ ɛla̍ā tɛ̄rɔ̄ pīya ga A̍ntīyɔ̄ɔki bɛ̍ɛ̄nɛ̄. E̍ tu̍ āchɛ yī Iji̍sɔ̄ɔsi ɛla̍ā wa̍a̍ grēeyī de īpū ɔla̍ā de wa̍. 31Āchɛ ɛla̍ā de ɛrɔ̄ yī īpū ɔla̍ā ma̍ po̍ ma̍, e̍ lɛ ɔwɔ̄wīyā kpɛ̍ɛji; wu̍chē oji̍ nɛ, o̍ tū wā ūkpɔ̄tū yɛngrɔ̄ɔ gba̍a̍. 32Iju̍dasi ba̍la Isa̍yi̍lāasi chī - āchɛ ɔkɛrɔ̄ yī Ɔwɔ nɛ̄ mɛ̍! E̍ kɛlā kpradada de wa̍, tū wā wɔbɔ̄ nīi e̍ lɛ brii la ɔtū ode che Ɔwɔ ochōche.
33E̍ hɔ̄ abɔ̍ɔ kpɛ̍ɛ yɛ̍yɛ̍ o̍bū. Āchɛ yī Iji̍sɔ̄ɔsi yī ɛbɛ ɛla̍ā wā ge̍ ta̍ wā ɔhɔ̄lɛhi i̍chi̍chɛ ɔha̍ bɛ̍ɛ̄nɛ̄. E̍ ku̍chē cha wā dikpo̍ba̍ āchɛ nīi de wa̍ tɛ̄rɔ̄ ma̍. 34[Isa̍yi̍lāasi ma̍ chi̍i̍ ma̍, o̍ pīya hɔ̄ abɔ̍ɔ kpɔ̍ɔ̍.]
35Ipɔ̍ɔli ba̍la Iba̍nābasi ma̍ gblāa abɔ̍ɔ la A̍ntīyɔ̄ɔki kpɛɛ. Aa̍ ba̍la āchɛ ɛha̍ yɛ ē ngū āchɛ lɛlā, ē ka ɛrɔ̄ yī Ādā de āchɛ a̍nɛ.
Ipɔ̍ɔli ba̍la Iba̍nābasi hwō Ta̍ hī iyī wā
36Yɛ̄grāa ɔha̍ bɛ̍ɛ̄nɛ̄, Ipɔ̍ɔli da Iba̍nābasi hīka aɛ̍lɛ ge̍ ku̍chē ga ipwo̍gra wa̍a̍ nīi aɛ̍lɛ ka ɛrɔ̄ yī Ādā de āchɛ ma̍, gāa ge̍ ma̍ aɛ̍nɛ̍ yī aa̍ ɛla̍ā wa̍a̍; ɛ̍lɛ ka̍a lɛ kana̍ oo! 37Iba̍nābasi chikpo̍ ge̍ē bī Ijɔ̍ɔn Ima̍aki ē gāa. 38Ipɔ̍ɔli i̍ chikpo̍ nīi e̍ ge̍ē bī ɔ̄ ku iyī wā ni̍; wu̍chē oji̍ nɛ, Ijɔ̍ɔn i̍ chɛ̄ yɛ ba̍la aa̍ kpɛɛ ku ɔkwɛ̍ɛjī yī u̍ku̍rɔ̍ oli̍krɔ̍ɔ ni̍. O̍ ku̍chē pīya hī wā la Ipamfi̍liya. 39Ipɔ̍ɔli ba̍la Iba̍nābasi de yo̍ko̍o wu̍chē yī lɛlā nūma̍ ma̍, e̍ i̍ tīkpo̍ gɛ ni̍. Iba̍nābasi bī Ima̍aki; e̍ tū wɔwu̍ pīya ga Isa̍yi̍prɔ̄ɔsi. 40Ipɔ̍ɔli wā ge̍ hu Isa̍yi̍lāasi. Āchɛ yī Iji̍sɔ̄ɔsi yī ɛbɛ ɔla̍ā wa̍a̍ de wa̍ tū Ɔwɔ la abɔ̄ ka ɛ̍lɛ ge̍ hɔ̄ la ɔpiyɛ yī Ɔwɔ ma̍, e̍ wā ge̍ pīya bɛ̍ɛ̄nɛ̄. 41Ipɔ̍ɔli ga la Isi̍riya ba̍la Isili̍siya tū ogrēeyī yī āchɛ yī Ɔwɔ ɛla̍ā wa̍a̍ wɔbɔ̄ nīi e̍ ge̍ē lɛ brii.
Currently Selected:
U̍ku̍rɔ̍ yī Alɛrɔ̄ 15: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
