Ilu̍uku 10
10
Iji̍sɔ̄ɔsi de āchɛ ohu ɛta̍ che igwo̍lɛpa Tɛ̄rɔ̄
1La okwi̍ihi yī ɔla̍ā, Ādā Iji̍sɔ̄ɔsi gba̍a hu āchɛ ohu ɛta̍ che igwo̍lɛpa, de wa̍ tɛ̄rɔ̄ ga ɔcha. O̍ ku̍ wā ba̍ ɛpɛpa, ka ɛ̍lɛ ge̍ īcha yɔbū de anu̍ ga ipwo̍gra-mipwo̍gra ba̍la ɛbɛha̍-ɛbɛha̍ wa̍a̍ nīi anu̍ ɔlɔjā ge̍ē gāa we̍ ma̍. 2O̍ koko̍o de wa̍ hīka, “Ala̍ ma̍ gɛ ko̍ō! I̍kri̍wu̍ ɔchɔ̄chiya gbo amu kpɛ̍ɛji, alu̍ku̍rɔ̍ chī lɛ bāa ɔkplɛ̄ɛ̄ ma̍. Ala̍ ā ra̍ābɔ̄ de ādā nīi lɛ i̍kri̍wu̍ ɔchɔ̄chiya ma̍ hɛ̄ɛbɛ nīi o̍ ge̍ de alu̍ku̍rɔ̍ mwɛbɛ tɛ̄rɔ̄ wā la i̍kri̍wu̍ ɔchɔ̄chiya yī nū. 3Ala̍ ā pīya ga ɛbɛ nīi tū ala̍ ɛrɔ̄ ma̍ gɛ! Ala̍ ā kwɛ̍ri̍ya̍tū gɛ hīka, n yɛ ē de ala̍ tɛ̄rɔ̄ gāa lipu̍ yī āchɛ; ɔla̍ā lɛ bāa ayɛ̍ɛ̄nyīyɛrɔ̄ nīi gāa ge̍ ta̍tū lipu̍ yī odomu̍u yɛ̄mɛ̄mɛ̄ ma̍. 4Ala̍ e̍e bī i̍kpli̍iba, kɛ̄ɛ liba ɔbɔjā tū, kɛ̄ɛ wɔkpa̍ ochelikpo̍ ni̍. Ala̍ e̍e ku̍ chi̍yɛ rɛ da ɔ̄chɔ̄chɛ o̍be la ɔpɔ̄pū ni̍. 5Wɔlɛ̍ ɔha̍lɔha̍ nīi ala̍ ge̍ē nyā gāa ma̍, ɔjā nīi ala̍ ge̍ē ka rāarāa ma̍ re̍ka, ‘Ogbodɔ̍dɔ̍ ge̍ hɔ̄ la wɔlɛ̍ nūma̍.’ 6Ɔ̄chɛ nīi chikpo̍ yī ogbodɔ̍dɔ̍ ma̍ ge̍ hɔ̄ abɔ̍ɔ, ɔpiyɛ yī ogbodɔ̍dɔ̍ nīi ala̍ de ma̍ ge̍ hɔ̄ ba̍la ɔlɔjā. O̍ i̍ ge̍ chī lɛ i̍ngɔ̍ɔ ni̍, ala̍ chōo̍chē de ɔpiyɛ yī ala̍ nāa. 7Wɔlɛ̍ ūkpo̍he nīi ala̍ ge̍ē nyā gāa ma̍, ala̍ ā hɔ̄ abɔ̍ɔ kpɛ̍ɛ. Ojōre̍ ba̍la ɔjā ɔgwɔ̍ɔ̄gwa̍ nīi e̍ ge̍ de de ala̍, ala̍ ā nāa. Wu̍chē oji̍ nɛ, olu̍ku̍rɔ̍ ē re̍ ɛpiyabuna yī abɔ̄ yī u̍ku̍rɔ̍ yī nū. Ala̍ e̍e pīya bū la wɔlɛ̍ ɔha̍ ge̍ hɔ̄ la ɔha̍ bɛ̍bɛ̍bɛ̍ ni̍. 8Ala̍ ge̍ ga ipwo̍gra ɔha̍lɔha̍ nīi e̍ ge̍ ya̍ ala̍ wɔga, ala̍ re̍ ɔjāmɔjā nīi e̍ de gblāa de ala̍ ma̍. 9Ala̍ ā nyiya aliyē oko̍ōku̍ abɔ̍ɔ. Ala̍ ā koko̍o de alipwo̍gra ɔla̍ā hīka, ‘Ɔchwɔ̄lɛ̍ Oro̍ōre̍ yī Ɔwɔ de lɛ kurɛkurɛ bla̍a ala̍ mɛ̍.’ 10Ala̍ ā ge̍ chī ga ipwo̍gra ɔha̍ nīi āchɛ i̍ ge̍ chikpo̍ yī ala̍ abɔ̍ɔ ni̍, ala̍ yɛ ga ɔpɔ̄pū yī u̍kpu̍fi̍ye̍ yī wā nīi ala̍ ge̍ ka de āchɛ hīka, 11‘Ala̍ ma̍ gɛ ko̍ō! Obubu yī ajɛ yī ipwo̍gra yī ala̍ nūma̍ nīi ba̍ alɔ la ikpo̍ ma̍, alɔ de ɔ̍ ngū gblāa amu pīyeyīta̍ ala̍ mɛ̍ oo. Ala̍ ā lɛ ɔbɔ̄bla! Ɔchwɔ̄lɛ̍ Oro̍ōre̍ yī Ɔwɔ de lɛ kurɛkurɛ mɛ̍ oo!’ ” Iji̍sɔ̄ɔsi gba̍a ka de wa̍ hīka, 12“N ge̍ē koko̍o ē de ala̍! I̍chi̍chɛ Nīi Ɔwɔ Ge̍ē Hlɛ̍ɛ̄pɔ̄ Ma̍, o̍ ge̍ē mlɛ̍ha̍ yī Aliso̍dɔm pɛtɛpɛtɛ ē hi̍ alipwo̍gra ɔla̍ā.
Ipwo̍gra i̍chɛ̄ ku Ɔwɔ ni̍
(Ima̍tiyu 11:20-24)
13“I̍īyo̍ de awɔ ipwo̍gra ɔla̍ā nīi re̍ka Iko̍rāsin ma̍. I̍īyo̍ de awɔ ipwo̍gra yī Ibɛsa̍yi̍da! Lɛlā ɔlɛbɛ̍bi̍ nīi n ya̍ la ala̍ ipwo̍gra ɛla̍ā ma̍, o̍ ge̍ hɔ̄ i̍ngɔ̍ɔ de ipwo̍gra yī Ita̍ya ba̍la Isa̍yi̍dɔn nɛ bɛ̍ɛ? Nɛ̄ni̍ e̍ ke̍ ge̍ pīya hyāhɔ̄ la ajɛ, kpo̍ a̍chiyɔ̄pa̍ tū, kpo̍ i̍bi re̍tū, chabɔ̄ hīka aɛ̍lɛ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ gbi̍chɛ-gbi̍chɛ mɛ̍. 14I̍chi̍chɛ Nīi Ɔwɔ Ge̍ē Hlɛ̍ɛ̄pɔ̄ Ma̍, o̍ ge̍ē mlɛ̍ha̍ yī Alita̍ya ba̍la Alisa̍yi̍dɔn pɛtɛpɛtɛ ē hi̍ ala̍ alipwo̍gra ɛla̍ā. 15Awɔ ipwo̍gra ɔla̍ā nīi re̍ka Ikapa̍num ma̍! Re̍ka a chikpo̍ ge̍ē nāa iyī wɔ ē gāa ichō ke̍ke̍ni̍ bɛ̍ɛ̄nɛ̄ ni̍? Ɔ̍lɔma̍, Ɔwɔ ge̍ē hɛ̍ wɔ abɔ̄ ta̍tū gāa ayekū oli̍gba̍o̍ pɛtɛɛ!”
16Iji̍sɔ̄ɔsi koko̍o de a̍chi̍kpo̍ yī nū bɛ̍ɛ̄nɛ̄ hīka, “Ɔ̄chɛmɔ̄chɛ nīi ge̍ darɔ̄ku lɛlā yī ala̍, o̍ re̍ka ɔlɔjā darɔ̄ku lɛlā yī u. Ɔ̄chɛ nīi ge̍ chī ta̍ ala̍, o̍ re̍ka ɔlɔjā ta̍ ami titi. Ɔ̄chɛ nīi ge̍ chī ta̍ u mɛ̍, o̍ re̍ka ɔlɔjā ta̍ ɔ̄chɛ nīi de u tɛ̄rɔ̄ ma̍.”
Ɔchɔ̄chā yī alɛrɔ̄ ohu ɛta̍ Chigwo̍lɛpa ɛla̍ā
17Āchɛ ohu ɛta̍ che igwo̍lɛpa ɛla̍ā nīi Iji̍sɔ̄ɔsi de wa̍ tɛ̄rɔ̄ ma̍ cha la ɔwɔ̄wīyā-ɔwɔ̄wīyā wā ge̍ ka de Iji̍sɔ̄ɔsi hīka, “Ādā be̍e! Yapri̍ija ɔdwɔ̄bi̍ ē de otūlichō de alɔ ke̍e̍ nīi alɔ ē bī riyī yī wɔ ē ka ē tāa aa̍ ma̍.”
18Iji̍sɔ̄ɔsi ka de wa̍ bɛ̍ɛ̄nɛ̄ hīka, “Ala̍ ma̍ gɛ ko̍ō! N ma̍ Isa̍tan nīi - ɔchwɔ̄lɛ̍ yī yapri̍ija ma̍ nīi o̍ ha̍ābɔ̄ bāa ɔla̍ yī yakpla̍ ma̍ bū abɔ̍ɔ la ichō mɛ̍. 19Ala̍ ma̍ ko̍ō! N de wɔhu̍ de ala̍ mɛ̍. Ala̍ ge̍ de ikpo̍ ba̍ yɛgwā kɛ̄ɛ yɛna, o̍ i̍ ge̍ē ya̍ ala̍ ɔjɔ̄jā mɛ ni̍. Wɔhu̍ nīi n de de ala̍ ma̍ kla̍ wɔhu̍ yī Isa̍tan nīi oluji ma̍ ɔkɔ̍ɔ̄kla̍ pɛtɛpɛtɛ. 20Ala̍ e̍e wɔ̄wīyā wu̍chē lɔkɔ nīi yapri̍ija ɔdwɔ̄bi̍ wa̍a̍ de otūlichō de ala̍ ma̍ ni̍. Ɔwɔ̄wīyā nīi ala̍ ge̍ē wīyā ma̍, ala̍ ā wīyā wu̍chē yī riyī yī ala̍ nīi tū abɔ̍ɔ la īpū la ɛbɛ yī Ɔwɔ ma̍.”
Iji̍sɔ̄ɔsi wɔ̄wīyā kpɛ̍ɛji
(Ima̍tiyu 11:25-27; 13:16-17)
21Yɛ̄grāa ɔla̍ā, Uhu Ɔnɛ̄ɛhɛhi yī Ɔwɔ ya̍ nīi Iji̍sɔ̄ɔsi wɔ̄wīyā kpɛ̍ɛji. Iji̍sɔ̄ɔsi kɛlā bɛ̍ɛ̄nɛ̄ hīka, “A̍dā yī u! Awɔ - Ādādā yī ichō ba̍la ajɛ wa̍a̍ a̍nɛ. N da wɔ o̍be kpɛ̍ɛji, wu̍chē oji̍ nɛ, ɔjā nīi a de trɛ̍ba hī āchɛ ojye̍ēyī jyɛ̍ɛ̄lā ma̍, a de chabɔ̄ ke̍e̍ hu̍ āchɛ i̍je̍ ɔjɔ̄jā ni̍. Ēē Ādā! Lɔkɔ nīi a chikpo̍ ma̍ nīi a ya̍ a̍nɛ.
22“A̍dā yī u de ɔjāha̍-ɔjāha̍ wa̍a̍ de u mɛ̍. Ɔ̄chɔ̄chɛ i̍ je̍ ɔ̄chɛ nīi ami Ɔyi̍ wɛ ma̍ ni̍, ɔ̍chi̍kpa̍kpa̍ A̍dā yī u. Ɔ̄chɔ̄chɛ i̍ chī je̍ ɔ̄chɛ nīi A̍dā wɛ ma̍ ni̍, ɔ̍chi̍kpa̍kpa̍ Ɔyi̍ yī nū ba̍la āchɛ nīi Ɔyi̍ chikpo̍ ge̍ē chabɔ̄ yī nū hu̍ wā ma̍.”
23Iji̍sɔ̄ɔsi pīya iyɔ̄bū ta̍ a̍chi̍kpo̍ yī nū, ka de wa̍ fi̍yɛ̍ hīka, “A̍hōhi ge̍ - iyī ala̍ nīi ma̍ ɔjā nīi ala̍ yɛ ma̍ ē ma̍ ma̍! 24Wu̍chē oji̍ nɛ, n ge̍ē koko̍o de ala̍! Āchɛ ɔkɛrɔ̄ yī Ɔwɔ yɛ̄mɛ̄mɛ̄ ba̍la ɛchwɔ̄lɛ̍ yɛ̄mɛ̄mɛ̄ chikpo̍ ge̍ ma̍ ɔjā nīi ala̍ yɛ ma̍ ē ma̍ ma̍, e̍ i̍ ma̍ ni̍. E̍ chikpo̍ ge̍ē plɛ̍ɛ̄lā nīi ala̍ yɛ ma̍ ē po̍ ma̍, e̍ i̍ po̍ ni̍.”
Olisame̍riya nīi - ɔ̄chɛ ɔnɛ̄ɛhɛhi ma̍
25Ɔngrɔ̄ɔ ɔha̍ nīi - ɔ̄chɛ ongū Lihɔ yī Iju̍u ma̍ nīichō yarɛ bɛ̍ɛ̄nɛ̄. O̍ chikpo̍ ge̍ē trɛ̍ɛda ē gwō Iji̍sɔ̄ɔsi la ikpo̍ yī lɛlā ochōche. O̍ che Iji̍sɔ̄ɔsi ikpo̍ hīka, “Ɔngūlɛ̄lā be̍e! Oji̍ nīi n ge̍ē ya̍ o̍bū nīi n ge̍ē lɛ ɔhɔ̄leyī i̍mɔ̄mɛni̍ ma̍/?”
26Iji̍sɔ̄ɔsi wā ge̍ che ɔ̍ ikpo̍ bɛ̍ɛ̄nɛ̄ hīka, “Kana̍ nīi e̍ ka tū la īpū yī Lihɔ yī Imo̍sīisi ma̍? Kana̍ nīi ala̍ ē ka ochi̍chi̍ yī nū de āchɛ ma̍?”
27Ɔngrɔ̄ɔ ɔla̍ā hīya anu̍ ɔkɔ bɛ̍ɛ̄nɛ̄ hīka, “Ɔjā nīi Lihɔ yī Ɔwɔ ka ma̍ re̍ka, ‘Yɔ̍ɔhɔtū yī Ādā Nīi - Ɔwɔ yī wɔ ma̍ la ūkpɔ̄tū yī wɔ wa̍a̍, ba̍la uhu yī wɔ wa̍a̍, ba̍la wɔhu̍ yī wɔ wa̍a̍, ba̍la ɛri̍ya̍ yī wɔ wa̍a̍. Yɔ̍ɔhɔtū yī ɔ̍nyīmɔ̄chɛ yī wɔ bāa awɔ ɔlɔjā ma̍.’ ”
28Iji̍sɔ̄ɔsi hīya anu̍ ɔkɔ hīka ɔ̍lɔ ka grāa kpɛ̍ɛji. Ɔ̍lɔ ge̍ gāa ge̍ ya̍ i̍ngɔ̍ɔ gɛ, ma̍a ɔ̍lɔ ge̍ē lɛ ɔhɔ̄leyī.
29Ɔngrɔ̄ɔ ɔla̍ā chikpo̍ ge̍ē chabɔ̄ hīka anɔ̍lɔ ka kpakpa. Wu̍chē yī ɔla̍ā, o̍ che Iji̍sɔ̄ɔsi ikpo̍ hīka ɔ̄nyɛ ɔ̍lɔ che re̍ka ɔ̍nyīmɔ̄chɛ yī anu̍ ma̍?
30Iji̍sɔ̄ɔsi hīya anu̍ ɔkɔ hīka, “Ma̍ ko̍ō! Ɔngrɔ̄ɔ ɔha̍ pīya bū la Ijɛru̍sālɛm yɛ gāa Ijɛ̍rīko. Ebu̍ūwī ɛdwɔ̄bi̍ ɛha̍ ku̍ ɔ̄, ya̍ tāa anu̍ ɛbɛ̍bɛ̍-ɛbɛ̍bɛ̍ abɔ̍ɔ la ɔpɔ̄pū. E̍ gba ɔ̍ āɛ̄jā otūlibi̍īyē, gwō ɔ̄ lijē dwɔ̄bi̍-dwɔ̄bi̍, pīya hī ɔ̄ gbo abɔ̍ɔ hɛ̍ ko̍ōku̍. 31Bāa lɛlā ɔha̍ ma̍, ɔngrɔ̄ɔ ɔha̍ nīi - oligbe yī Ɔwɔ ma̍ wā ge̍ ga abɔ̍ɔ la ɔpɔ̄pū ɔla̍ā pi̍i̍. O̍ ma̍ ɔ̄chɛ ɔla̍ā gbo abɔ̍ɔ ma̍, o̍ nyā ga la ɛkū pīya hī ɔ̄. 32Ɔngrɔ̄ɔ ɔha̍ nīi - a̍chi̍kpo̍ yī aligbe yī Ɔwɔ ma̍ gba̍a wā ge̍ ga aba̍bɔ̍ɔ. Anu̍ titi nyā ga la ɛkū pīya hī ɔ̄. 33Olisame̍riya ɔha̍ nīi yɛ ē ga la ɔpɔ̄pū ɔla̍ā ma̍ yɛ ge̍ hɛ̍ta̍ la anu̍ bɛ̍ɛ̄nɛ̄. O̍ ma̍ ɔngrɔ̄ɔ ɔla̍ā ma̍, o̍ mlɛ̍ha̍ de ɔ̍ kpɛ̍ɛji. 34O̍ gāa dikpo̍ba̍ ɔ̍. O̍ de yanɔ̄ ba̍la ɛ̍mwɔ̄ kla̍ anu̍ la ɔjā nīi e̍ ya̍ ɔ̄ wa̍a̍ ma̍, de ɔ̄pa̍ wā ɔ̄ wa̍a̍. O̍ de ɔngrɔ̄ɔ ɔla̍ā nāa che la ɛbɛ̍ obīho̍ yī anu̍ ɔlɔjā wa̍a̍ ge̍ chɛ̄ ga u̍nu̍ ɔha̍ nīi āchɔga ē chā ma̍. O̍ hɔ̄ abɔ̍ɔ deyīrɛ ɔ̍. 35Ɔ̄chī ɔ̍mɛpa yī nū, o̍ wu̍ okpo yī isi̍li̍ba ɛpa de ɔ̄chɛ odeyīrɛ u̍nu̍ yī āchɔga ɔla̍ā. Ɔ̍lɔ ge̍ deyīrɛ ɔ̄chɛ okwi̍īyē ɔla̍ā hwɔhi hwɔhi de anu̍. Anɔ̍lɔ ge̍ē ku̍chē ē ga abɔ̍ɔ la ɔpɔ̄pū ɔla̍ā ma̍, anɔ̍lɔ ge̍ē kla̍ ɔ̍lɔ ure̍ yī ɔjāha̍-ɔjāha̍ wa̍a̍ nīi ɔ̍lɔ ge̍ē bi̍ tū ɔngrɔ̄ɔ ɔla̍ā ma̍.”
36Iji̍sɔ̄ɔsi che ɔ̄chɛ ongū Lihɔ yī Iju̍u ɔla̍ā ikpo̍ bɛ̍ɛ̄nɛ̄ hīka, “Lipu̍ yī āchɛ nūma̍, ɔ̄nyɛ gbla awɔ ɔ̄chɛ nīi - ɔ̍nyīmɔ̄chɛ yī ɔngrɔ̄ɔ ɔla̍ā nīi uwī gwō ɔ̄ lijē ma̍?”
37Ɔ̄chɛ ongū Lihɔ yī Iju̍u ɔla̍ā hīyɔkɔ hīka ɔ̍lɔ - ɔ̄chɛ nīi - ɔ̍lɔ jyɛ̍ɛ̄lā tāa ɔ̍lɔ ma̍ nɛ.
Bū la ɛbɛ ɔla̍ā Iji̍sɔ̄ɔsi ka de ɔ̍ hīka, “Ɔ̍lɔma̍, pīya gɛ, nīi a ā ya̍ i̍ngi̍ngɔ̍ɔ!”
Iji̍sɔ̄ɔsi ga ɛbɛ yī aa̍ Ima̍ta ba̍la Imeri̍
38Iji̍sɔ̄ɔsi ba̍la a̍chi̍kpo̍ yī nū wā ge̍ pīya la ɛyɛ yī wā ɔla̍ā bɛ̍ɛ̄nɛ̄. E̍ yɛ wa̍a̍ ge̍ gbajɛ la ipwo̍gra ɔha̍. Ɔnyā ɔha̍ nīi re̍ka Ima̍ta ma̍ hī Iji̍sɔ̄ɔsi ɛra̍ ga wɔlɛ̍ yī nū. 39Ima̍ta lɛ ɔɔ̍nɛ̍ ɔnɔ̄nyā ɔha̍ hɔ̄ abɔ̍ɔ re̍ka Imeri̍. Imeri̍ ma̍ pīya hyāhɔ̄ abɔ̍ɔ la apli̍kpo̍ yī Iji̍sɔ̄ɔsi yɛ ē plɛ̍ɛ̄lā nīi o̍ ē ngū ma̍. 40Ɔjā nīi anu̍ Ima̍ta yɛ ē ya̍ ma̍ de ya̍ ɔ̄kɔ̄kū de ɔ̍ ma̍, ūkpɔ̄tū ti̍ya anu̍ tū. O̍ gāa ge̍ ka de Iji̍sɔ̄ɔsi bɛ̍ɛ̄nɛ̄ hīka, “Ādā be̍e! A ma̍ ɔɔ̍nɛ̍ yī u ɔnɔ̄nyā nīi tu̍ hī u nīi n yɛ aa̍ ē ya̍ u̍ku̍rɔ̍ lōru̍u-lōru̍u mɛ̍/. Kɛ̄ɛ kana̍ ma̍? Ka de ɔ̍ gɛ nīi o̍ ge̍ wā ge̍ tū u wɔbɔ̄!”
41Ādā Iji̍sɔ̄ɔsi hīya anu̍ ɔkɔ hīka, “Ima̍ta! Ima̍ta! A ē de ē hi̍yɛ̄ngura yī lɛlā yɛ̄mɛ̄mɛ̄ ɔ̄kɔ̄kū. Ūkpɔ̄tū ē ti̍ya awɔ ē tū wu̍chē yī ɛjā ɛla̍ā ɔ̄kɔ̄kū. 42Ɔjā ūkpo̍he - ɔjā ɔkwɔ̍ɔkɔ de wɔ a̍nɛ. Imeri̍ ma̍ ya̍ onīi hwɔhi ma̍ mɛ̍. Ɔ̄chɔ̄chɛ i̍ ge̍ē nu̍ ɔ̄ anu̍ gɛ ni̍.”
Currently Selected:
Ilu̍uku 10: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
