Ilu̍uku 11

Ɔhā ojōji nīi Ādā ngū āchɛ ma̍

(Ima̍tiyu 6:9-13; 7:7-11)

1Yɛ̄grāa ɔha̍, Iji̍sɔ̄ɔsi yɛ ē jɔhā abɔ̍ɔ la ɛbɛ ɔha̍. O̍ kwɛ̍ɛjī la ɔhā ojōji ma̍, a̍chi̍kpo̍ yī nū ɔha̍ da ɔ̍ hīka, “Ādā, ngū alɔ ɔhā ojōji lɔkɔ nīi Ijɔ̍ɔn ngū a̍chi̍kpo̍ yī nū ma̍ gɛ/.”

2Iji̍sɔ̄ɔsi ka de wa̍ bɛ̍ɛ̄nɛ̄ hīka, “Ala̍ ge̍ē jɔhā de Ɔwɔ ma̍, ala̍ ā ka hīka,

“ ‘Ɔwɔ A̍dā yī alɔ!

Otūlichō ge̍ - iyī riyī ɔnɛ̄ɛhɛhi yī wɔ.

Ɔchwɔ̄lɛ̍ Oro̍ōre̍ yī wɔ ge̍ yewā.

3De ojōre̍ nīi ge̍ē jɛ̄ alɔ lɛmiyɛ mɔ̄chīmɔ̄chī ma̍ de alɔ.

4De lɛlā ɔdwɔ̄bi̍ yī alɔ wa̍a̍ kɔ̄ de alɔ.

Wu̍chē oji̍ nɛ, alɔ ē de lɛlā abi̍ nīi āchɛ ya̍ alɔ ma̍ ē kɔ̄ de wa̍.

A ā de alɔ tū la ɔmama̍ olichi̍chi̍ ni̍.’ ”

5Iji̍sɔ̄ɔsi wā ge̍ da wa̍ bɛ̍ɛ̄nɛ̄ hīka, “Ala̍ ma̍ gɛ ko̍ō! Ɔ̄chɛ ɔha̍ lipu̍ yī ala̍ ge̍ ga wɔlɛ̍ yī ɔya anu̍ ɔha̍ la iyārōtu̍, gāa ge̍ de ɔya anu̍ ɔla̍ā hīka, ‘Ɔya chu̍chu̍u de ākpā yī ibrɛ̍ɛdi ɛta̍ kpla̍ ami! 6Ma̍a ɔya ami ɔha̍ yɛ gāa ɛyɛ, nyā wā abɔ̍ɔ la wɔlɛ̍ yī u. N i̍ chī lɛ ɔjɔ̄jā hɔ̄ abɔ̍ɔ ge̍ē ta̍ ɔ̄ oko̍o ni̍’ 7A ge̍ de ka i̍ngɔ̍ɔ, ɔha̍ni̍ ɔya awɔ ɔla̍ā hīyɔkɔ ē bū abɔ̍ɔ la u̍nu̍ hīka aɔ̍lɔ ge̍ e̍e ya̍ anu̍ i̍mɛ̄nyɛ̄ ni̍! Ɔpu ɔ̍lɔ gōgū mɛ̍. Anu̍ ba̍la aɛ̍pɛ̄ yī anu̍, aɛ̍lɛ gbwɔlā mɛ̍. Anɔ̍lɔ i̍ yɛ abɔ̍ɔ ge̍ē nīichō mɛ ni̍. 8Bū la ɛbɛ ɔla̍ā, o̍ re̍ka ɔya wɔ ɔla̍ā i̍ wu̍chē yī lɛya nīi ala̍ re̍ ma̍ de ɔjā de wɔ ji ni̍. A ge̍ chī kū abɔ̍ɔ ē ku abɔ̄ ɔpu kpɛɛ, ɔla̍ā ge̍ē hu̍ nīi ɔya awɔ ē nīichō ge̍ē de ɔjā ɔla̍ā nīi ku̍ wɔ ɔkɔ ma̍ ē de wɔ. 9Wu̍chē yī ɔla̍ā, n ge̍ē koko̍o ē de ala̍! Ala̍ ā chikpo̍ yī ɔjā, ma̍a ala̍ ge̍ē nāa, ala̍ ā gāla̍, ma̍a ala̍ ge̍ē ma̍; ala̍ ā de abɔ̄ ku ɔpu, ma̍a e̍ ge̍ē lwāa anu̍ ē de ala̍. 10Wu̍chē oji̍ nɛ, ɔ̄chɛmɔ̄chɛ nīi ge̍ē chikpo̍ yī ɔjā, o̍ ge̍ē nāa. Ɔ̄chɛ nīi ge̍ē gāla̍ ɔjā, o̍ ge̍ē ma̍. Ɔ̄chɛ nīi ge̍ de abɔ̄ ku ɔpu, e̍ ge̍ē lwāa anu̍ ē de ɔlɔjā. 11A̍dā yī ɔ̄chɛ ɔha̍ hɔ̄ abɔ̍ɔ lipu̍ yī ala̍ nīi o̍ ge̍ re̍ka ɔyi̍ yī nū chikpo̍ yī ɛbɛ̍yēenyi nīi o̍ ge̍ē chōo̍chē de yɛgwā de ɔyi̍ yī nū? 12Kɛ̄ɛ ɔyi̍ ge̍ chikpo̍ yī ajūgū ma̍, o̍ ē chōo̍chē de yɛna āpɛ̄wu̍ ē de ɔ̍? 13Ala̍ āchɛ̄ɛchɛ nīi - āchɛ ɔdwɔ̄bi̍ ma̍, je̍ ɔjā ɔnɛ̄ɛhɛhi odōde de ayi̍ yī ala̍! Ɔwɔ A̍dā nīi hɔ̄ la ichō ma̍ ge̍ē kɔ̄ Uhu Ɔnɛ̄ɛhɛhi yī Ɔwɔ ē de āchɛ nīi chikpo̍ ma̍ kana̍ ma̍ ēēe!”

Iji̍sɔ̄ɔsi ba̍la Ibɛ̍sɛ̄buli

(Ima̍tiyu 12:22-30; Ima̍aki 3:20-27)

14Iji̍sɔ̄ɔsi yɛ ē nū yapri̍ija ɔdwɔ̄bi̍ ɔha̍ nīi ē de ɔ̄chɛ ē gwōko̍o ma̍ hī ɔngrɔ̄ɔ ɔha̍. Yapri̍ija ɔdwɔ̄bi̍ ɔla̍ā bīyɛchɛ hī ɔngrɔ̄ɔ ɔla̍ā ɔpɔ̄ɔpɛ̄ ma̍, o̍ de kɛlā ke̍e̍. Āchɛ ɛla̍ā wa̍a̍ nīi grēeyī ma̍ de kpo̍ kwi̍ibū ɔlamu-ɔlamu. 15Āchɛ ɛha̍ chōo̍chē ka hīka Ibɛ̍sɛ̄buli nīi - ɔ̍lɔ ɔlɛhu̍ yī yapri̍ija wa̍a̍ ma̍ ɔ̍lɔ de wɔhu̍ de Iji̍sɔ̄ɔsi nīi ɔ̍lɔ ē nū yapri̍ija ɔdwɔ̄bi̍ i̍ngɔ̍ɔ ē mɛ a̍nɛ.

16Āchɛ ɛha̍ ma̍ chikpo̍ ge̍ē ma Iji̍sɔ̄ɔsi ē ma̍ hɛ̄ɛbɛ ge̍ē ku̍ ɔ̄. E̍ ka hīka Iji̍sɔ̄ɔsi ɔ̍lɔ ge̍ yɛ̍ɛ̄lā ɔlɛbɛ̍bi̍ chabɔ̄ hīka, Ɔwɔ ɔ̍lɔ chɛ̄ku ɔ̍lɔ gɛ. 17Iji̍sɔ̄ɔsi je̍ ɛri̍ya̍ ogbōgbō yī ūkpɔ̄tū yī wā wa̍a̍ ɔpɔ̄ɔpɛ̄. O̍ da wa̍ hīka, “Ala̍ ma̍ ko̍ō! Ɔcha ūkpo̍he ɔha̍lɔha̍ nīi ge̍ de iyī nū yi̍ya, kplɛ̍wu̍ tāa iyī nū, ɔcha ɔla̍ā i̍ ge̍ē ri̍yɛchɛ ē mɛ ni̍. U̍kpu̍fi̍ye̍ ūkpo̍he ɔha̍lɔha̍ nīi ge̍ de iyī nū yi̍ya, kplɛ̍wu̍ tāa iyī nū, u̍kpu̍fi̍ye̍ ɔla̍ā i̍ ge̍ē rɛ brii ē mɛ ni̍. 18I̍ngi̍ngɔ̍ɔ nīi lɛlā yī Isa̍tan lɛ a̍nɛ. Āchɛ nīi Isa̍tan re̍ ɔchwɔ̄lɛ̍ yī wā wa̍a̍ ma̍ ge̍ kū la lɛwu̍ okpo̍ōkpo̍ tāa iyī wā ma̍, kana̍ nīi ɔchwɔ̄lɛ̍ oro̍ōre̍ yī nū ge̍ē ri̍yɛchɛ ē mɛ ma̍? Ala̍ ka hīka, Ibɛ̍sɛ̄buli ɔ̍lɔ de wɔhu̍ de amɔ̍lɔ nīi amɔ̍lɔ ē nū yapri̍ija ɔdwɔ̄bi̍ mɛ a̍nɛ? 19O̍ ge̍ Ibɛ̍sɛ̄buli - ohu̍ nīi ami ē ya̍ i̍ngɔ̍ɔ ē mɛ a̍nɛ ma̍. Oji̍ nīi a̍chi̍kpo̍ yī ala̍ ma̍ ē chī bī nū yapri̍ija ɔdwɔ̄bi̍ ma̍? A̍chi̍kpo̍ yī ala̍ ɛlɛjā de chabɔ̄ mɛ̍ hīka, lɛlā yī ala̍ ɔla̍ā ɔ̍lɔ i̍ ku̍ ni̍. 20O̍ ge̍ chī bū la wɔhu̍ yī Ɔwɔ nīi ami yɛ ē nū yapri̍ija ɔdwɔ̄bi̍ mɛ a̍nɛ. Ɔ̍lɔma̍ ɔla̍ā chabɔ̄ hīka Ɔchwɔ̄lɛ̍ Oro̍ōre̍ yī Ɔwɔ wā dikpo̍ba̍ ala̍ mɛ̍!

21“Ɔla̍ga̍ba̍ ge̍ bī ɛjālɛ̄wu̍ la iyē yɛ ē gbō wɔlɛ̍ yī nū ogbōgbō, āɛ̄jā yī nū wa̍a̍ ē gblāa abɔ̍ɔ ke̍e̍ ē de ɔ̍. 22Yɛ̄grāa nīi ɔ̄chɛ ɔha̍ nīi ja̍ga̍ba̍ hi̍ ɔ̄ ma̍ ge̍ wā ge̍ ya̍ tāa anu̍ de ɔ̍ gwō mɛ̍, o̍ ē de ɛjālɛ̄wu̍ ɛla̍ā nīi ɔlɔjā de ɔtū che ma̍ ē kpo̍. O̍ ē de ɛjā wa̍a̍ nīi o̍ nāa abɔ̍ɔ ma̍ ē kpo̍ kɔ̄.

23“Ɔ̄chɛmɔ̄chɛ nīi i̍ ge̍ ɔya ami ni̍, ɔ̍lɔma̍ ɔlɔjā - oluji yī u nɛ. Ɔ̄chɛmɔ̄chɛ nīi i̍ ge̍ tu̍ ɔjā tu̍chɛ̄ tāa ami ni̍, o̍ re̍ka ɔlɔjā yɛ ē kpo̍ ɔ̄ okpo̍ōkpo̍ mīyanya.

Oku̍chē yī yapri̍ija ɔdwɔ̄bi̍

(Ima̍tiyu 12:43-45)

24“Yapri̍ija ɔdwɔ̄bi̍ ge̍ ngmɛ̍ɛchɛ hī ɔ̄chɛ, o̍ ē ti̍yaha ē ga la ɔcha ɔha̍ nīi lɛ kprūkprū ma̍, ē gāla̍ ɛbɛ ɔmyɛ̍nyɛ̍ ɔha̍. O̍ i̍ ge̍ ma̍ ɛbɛbɛ gɛ ni̍, o̍ ē ka ē de iyī nū hīka anɔ̍lɔ ge̍ē ku̍chē gāa wɔlɛ̍ yī anu̍ nīi anɔ̍lɔ pīya hī ɔ̍lɔ ma̍. 25O̍ ge̍ ku̍chē wā mɛ̍, o̍ ē ma̍ ɔngrɔ̄ɔ ɔla̍ā bāa u̍nu̍ nīi lɛ cha̍cha̍cha̍ nīi e̍ de ɔ̍ gbɔ̍ɔ̄gbla̍a lɔ̄lā ma̍. 26Bū la ɛbɛ ɔla̍ā, o̍ ē ku̍chē pīya ge̍ē bī yapri̍ija arāapa ɛha̍ nīi dwɔ̄bi̍ hī anu̍ ɔlɔjā ma̍ wā. E̍ wā ge̍ē tū abɔ̍ɔ la ɔ̄chɛ ɔla̍ā bɛ̍ɛ̄nɛ̄. Bū la ɛbɛ ɔla̍ā, iyī ogwīihi nūma̍ ē de ē dwɔ̄bi̍ de ɔngrɔ̄ɔ ɔla̍ā hi̍ ɔrāarāa pɛtɛpɛtɛ bɛ̍ɛ̄nɛ̄.”

Ɔwɔ̄wīyā nīi - olēchi̍ lēchi̍ ma̍

27Iji̍sɔ̄ɔsi kɛlā ɔla̍ā kwɛ̍ɛjī ma̍, ɔnyā ɔha̍ ka grāa anu̍ bū abɔ̍ɔ lipu̍ yī ɔgbādu ɔla̍ā hīka, “A̍hōhi ge̍ - iyī ɔnyā nīi ma wɔ de amɛ̄ pī wɔ ma̍.”

28Iji̍sɔ̄ɔsi hīya anu̍ ɔkɔ hīka, “Ehe̍, ma̍ gɛ ko̍ō! Āchɛ nīi ē plɛ̍ɛ̄lā yī Ɔwɔ ē de otūlichō de ɔ̍ ma̍, aa̍ - ala̍hōhi olēchi̍ lēchi̍ a̍nɛ.”

Lɛlā ɔlɛbɛ̍bi̍ ɔmɔ̍ɔ̄ma̍ nīi ē hla̍ āchɛ ma̍

(Ima̍tiyu 12:38-42)

29Āchɛ yɛ ē ha̍du ē tū Iji̍sɔ̄ɔsi ɔ̄kɔ̄kū ma̍, o̍ ka bɛ̍ɛ̄nɛ̄ hīka, “Āchɛ yī yɛchɛ nūma̍ dwɔ̄bi̍ kpa̍a! E̍ ē chikpo̍ yī lɛlā ɔlɛbɛ̍bi̍ nīi ge̍ chabɔ̄ hīka Ɔwɔ ɔ̍lɔ chɛ̄ ma̍. Ɔha̍lɔha̍ chī i̍ ge̍ē hɔ̄ de wa̍ i̍ngɔ̍ɔ ni̍, ɔ̍chi̍kpa̍kpa̍ lɛlā yī Ijo̍na. 30Lɔkɔ nīi Ijo̍na re̍ka lɛlā ode chabɔ̄ hu̍ Alini̍nīfɛ ma̍, i̍ngi̍ngɔ̍ɔ nīi Ɔyi̍ yī Ɔngrɔ̄ɔ ge̍ē re̍ka lɛlā ode chabɔ̄ hu̍ āchɛ yī yɛchɛ nūma̍ a̍nɛ. 31I̍chi̍chɛ Nīi Ɔwɔ Ge̍ē Hlɛ̍ɛ̄pɔ̄ Ma̍, Ɔchwɔ̄lɛ̍ Ɔnɔ̄nyā yī Ɛcha yī Ihi̍yajɛ ge̍ē nīichō yarɛ ē klɛpɔ̄ tāa āchɛ yī yɛchɛ nūma̍! Wu̍chē oji̍ nɛ, anu̍ bū abɔ̍ɔ la ɛbɛ i̍ba̍ni̍ i̍gboni̍ ɔla̍ā pɛtɛɛ wā ge̍ plɛ̍ɛ̄lā ojo̍ōje̍ ka̍ka̍ yī Iso̍lōmɔn. N ā koko̍o de ala̍! Onīi hɔ̄ ma̍ ma̍ gla Iso̍lōmɔn ta̍ pɛtɛpɛtɛ! 32I̍chi̍chɛ Nīi Ɔwɔ Ge̍ē Hlɛ̍ɛ̄pɔ̄ Ma̍, Alini̍nīfɛ ge̍ē nīichō yarɛ ē klɛpɔ̄ tāa ala̍! Wu̍chē oji̍ nɛ, e̍ po̍ ɛrɔ̄ yī Ɔwɔ nīi Ijo̍na ka ma̍, e̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ yī wā. N ā koko̍o de ala̍! Onīi hɔ̄ ma̍ ma̍ gla Ijo̍na ta̍ pɛtɛpɛtɛ!

Ɛbɛ ɔlɛgēdēgēdē yī ibi̍īyē

(Ima̍tiyu 5:15; 6:22-23)

33“Ɔ̄chɔ̄chɛ i̍ ē mwɔla̍ ē tū otīnīkā ē de nāa ē trɛ̍ba kɛ̄ɛ ē nāa ē tū lipu̍ yī u̍kpu̍ūhā ni̍. O̍ ē de ē che la okpōkōlō hɛ̄ɛbɛ nīi āchɛ ge̍ chɛ̄ wā ma̍ nīi e̍ ge̍ē ma̍ ɛbɛ ɔlɛgēdēgēdē. 34Īkprī re̍ka otīnīkā yī ibi̍īyē yī ɔ̄chɛ a̍nɛ. Īkprī ge̍ lɛ chra̍da̍da̍ mɛ̍, o̍ re̍ka ibi̍īyē wa̍a̍ hɔ̄ la ɛbɛ ɔlɛgēdēgēdē. Īkprī ge̍ chī dwɔ̄bi̍, o̍ re̍ka ibi̍īyē wa̍a̍ hɔ̄ la ɛbɛ odobū. 35Ala̍ ā du̍mɔ̍-du̍mɔ̍ nīi ɛbɛ ɔlɛgēdēgēdē yī ibi̍īyē yī ala̍ ge̍ e̍e de pīya ɛbɛ odobū ihihi ni̍. 36O̍ ge̍ re̍ka ibi̍īyē yī ala̍ wa̍a̍ lɛ gēdēgēdē, nīi ɛbɛbɛ i̍ ge̍ dobū ni̍, ɔ̍lɔma̍ ibi̍īyē yī ala̍ wa̍a̍ ge̍ē ho̍ōhu̍ bāa ɔnya̍ri̍nya̍ri̍ ma̍. O̍ ge̍ē lɛ bɔ̄ɔkɔ nīi otīnīkā chɔ̄chɛ̄ ē ho̍ōhu̍ rɛ ɔ̄chɛ ma̍.”

Ɔpɔ̄pū ɔdwɔ̄bi̍ yī āchɛ yī Ifa̍rasīi ba̍la āchɛ ongū Lihɔ yī Iju̍u

(Ima̍tiyu 23:1-36; Ima̍aki 12:38-40)

37Iji̍sɔ̄ɔsi wā ge̍ kwɛ̍ɛjī lɛlā ɔkɔ̄ka ma̍, ɔngrɔ̄ɔ yī Ifa̍rasīi ɔha̍ hī ɔ̄ ɛra̍ yī ojōre̍ ga wɔlɛ̍. O̍ pīya gāa ge̍ hɔ̄ abɔ̍ɔ ge̍ē re̍ ojōre̍ bɛ̍ɛ̄nɛ̄. 38Ɔngrɔ̄ɔ yī Ifa̍rasīi ɔla̍ā ma̍ hīka Iji̍sɔ̄ɔsi ɔ̍lɔ i̍ na abɔ̄ lɔkɔ nīi e̍ ē ya̍ o̍bū re̍ ojōre̍ ni̍ ma̍, o̍ lɛ ɔ̍ lɛbɛ̍bi̍ gba̍a. 39Wu̍chē yī ɔla̍ā, Ādā Iji̍sɔ̄ɔsi ɔlɔjā da ɔ̍ hīka, “Ala̍ Āchɛ yī Ifa̍rasīi ē de okwi̍ihi yī ɔgba̍galā ba̍la u̍kpu̍ūhā yī ala̍ ē nɔ̄na gblɛ̍ɛgblɛ̍ɛgblɛ̍ɛ; lipu̍ yī ala̍ ɛlɛjā chī mōmu la ānyānyi ba̍la lɛlā ɔdwɔ̄bi̍. 40Ali̍bobo āchɛ! I̍ Ɔwɔ nīi ya̍ okwi̍ihi ma̍ ya̍ lipu̍ a̍ni̍? 41Ala̍ ā de ɔjā nīi tū la ɔgba̍galā ba̍la u̍kpu̍ūhā yī ala̍ ma̍ de alyeklo̍ gɛ; ma̍a ɔjāha̍-ɔjāha̍ wa̍a̍ ge̍ē de ē lɛ cha̍ri̍cha̍ri̍ ē de ala̍.

42“I̍īyo̍ de ala̍ Āchɛ yī Ifa̍rasīi! Ala̍ ē de wāā ūkpo̍he lipu̍ yī igwo̍ yī ɛjā bāa īpū eni̍pī gɛnɛgɛnɛ ɛha̍ nīi re̍ka imi̍nti ba̍la iru̍u ba̍la ɛha̍ yī wā ma̍ ē kɔ̄ de Ɔwɔ. Ɛjā bāa lɛpɔ̄ ɔhɔ̍ɔ̄hɛ̍ kpakpa ba̍la ɔhɔtū ɔlɔ̄lɛ de Ɔwɔ ma̍, ala̍ chī wa̍ābɔ̄ la aa̍ lā ga ɛkū. O̍ ngma̍ nīi ala̍ ge̍ ya̍ ɛjā nūma̍ wa̍a̍, nīi ala̍ ge̍ e̍e ta̍ ɔha̍ lā ga ɛkū ni̍.

43“I̍īyo̍ de ala̍ Āchɛ yī Ifa̍rasīi! Igblɛ̍chi̍ nīi e̍ de lā ke̍e̍ de āchɛ ɔnɔ̄kɔ̄kū ma̍, anu̍ nīi ala̍ chikpo̍ ge̍ē hyāhɔ̄ la anu̍ la u̍nu̍ ogrēeyī a̍nɛ. O̍be ɔdɔ̄da pu̍ kpɛ̍ɛ̍ de ala̍ la o̍gra lɛ ala̍ wɔnyɛ ka̍ka̍ka̍ a̍nɛ. 44I̍īyo̍ de ala̍! Ala̍ lɛ i̍ngɔ̍ɔ ke̍e̍ bāa u̍nwɔ̍wu̍ yī okū nīi e̍ i̍ hu ɔ̍ ukɔ̄ ni̍ nīi āchɛ ē yɛɛ ē ga la anu̍ ji ma̍.”

45Ɔ̄chɛ ongū Lihɔ yī Iju̍u ɔha̍ ka bɛ̍ɛ̄nɛ̄ hīka, “Ɔngūlɛ̄lā! A yɛ ē kɛlā nūma̍ ma̍, a yɛ abɔ̍ɔ ē cha̍ alɔ ɛcha̍ i̍ngi̍ngɔ̍ɔ/.”

46Iji̍sɔ̄ɔsi hīya anu̍ ɔkɔ ɔpɔ̄ɔpɛ̄ hīka, “I̍īyo̍ de ala̍ āchɛ ongū Lihɔ yī Iju̍u i̍ngi̍ngɔ̍ɔ! Ala̍ ē kpo̍ iho̍ ɔlyɛnu̍ nīi lichi̍chi̍ la obōbī ma̍ ē che āchɛ la agbīihi; ala̍ ɛlɛjā i̍ ē chī nā oyi̍kɔ̄bɔ̄ ūkpo̍he kpaa ē tū wā wɔbɔ̄ la iho̍ ɔla̍ā obōbī ni̍. 47I̍īyo̍ de ala̍! Ala̍ ē gbla̍a u̍nwɔ̍wu̍ yī āchɛ ɔkɛrɔ̄ yī Ɔwɔ nīi a̍dā yī ala̍ kpo̍ ngmo̍ ma̍ ya̍ hwɔhi hwɔhi. 48Ɔla̍ā re̍ka ala̍ chɛ̄ hwɔhi hwɔhi ku lɛlā nīi aa̍ ɔ̍kɔ̄kū yī ala̍ ya̍ ma̍. Wu̍chē oji̍ nɛ, aa̍ kpo̍ āchɛ ɔkɛrɔ̄ yī Ɔwɔ ngmo̍; ala̍ chī gbla̍a u̍nwɔ̍wu̍ yī wā ya̍. 49Ɔla̍ā - ohu̍ nīi Lɛlā Ojo̍ōje̍ yī Ɔwɔ kɛlā nīi hɔ̄ ma̍ ma̍ a̍nɛ: ‘N ge̍ē de āchɛ ɔkɛrɔ̄ yī u ba̍la alɛrɔ̄ yī u ē tɛ̄rɔ̄ hu wa̍. Ɛha̍, e̍ ge̍ē kpo̍ wā ngmo̍; ɛha̍, e̍ ge̍ē ya̍ tāa aa̍ dwɔ̄bi̍-dwɔ̄bi̍.’ 50Wu̍chē yī ɔla̍ā, Ɔwɔ ge̍ē de ichi̍ de ala̍ alyɛchɛ nūma̍, wu̍chē yī āchɛ ɔkɛrɔ̄ yī Ɔwɔ nīi e̍ yɛ ē ngmo̍ gbi̍chɛ-gbi̍chɛ bū la owu̍tu yī yɛchɛ ma̍; 51bū la ɔpīyaku̍ yī E̍bɛ̄ɛli kpɛɛ ge̍ chɛ̄ la iyī Ijakara̍ya nīi e̍ ngmo̍ la ɔprɛ̍ɛpa yī ɛbɛ ode ɔjā pā Ɔwɔ ba̍la u̍kwee̍ nīi re̍ka Ɛbɛ Ɔnɛ̄ɛhɛhi ma̍. Lēchi̍, n ā koko̍o de ala̍! Ɔwɔ ge̍ē de ichi̍ ē de alyɛchɛ nūma̍ wu̍chē yī wā wa̍a̍.

52“I̍īyo̍ de ala̍ āchɛ ongū Lihɔ yī Iju̍u! Ala̍ de ɔyi̍ yī igbɔ̄gɔ̄rɔ̄ yī ɛbɛ yī lɛlā ojo̍ōje̍ nāa trɛ̍ba. Ala̍ ɛlɛjā i̍ chī chɛ̄ yɛ gāa ni̍. Ala̍ i̍ chī chɛ̄ nīi āchɛ nīi ge̍ē chɛ̄ gāa ma̍ ē chɛ̄ gāa ni̍.”

53Iji̍sɔ̄ɔsi pīya hī ɛbɛ ɔla̍ā ma̍, Āchɛ yī Ifa̍rasīi ba̍la āchɛ ongū Lihɔ yī Iju̍u wa̍a̍ kū la ɔka alābi̍ tāa anu̍ bɛ̍ɛ̄nɛ̄. E̍ ē che ɔ̍ ikpo̍ yī lɛlā yɛ̄mɛ̄mɛ̄. 54E̍ chikpo̍ nīi o̍ ge̍ē kɛlā ɔha̍ ɔdwɔ̄bi̍ hɛ̄ɛbɛ nīi e̍ ge̍ē jɔ̍ɔkɔ ē gblɛlā tāa anu̍.

Currently Selected:

Ilu̍uku 11: YBASR

Highlight

Copy