Ilu̍uku 14
14
Iji̍sɔ̄ɔsi nyiya ɔngrɔ̄ɔ ɔha̍
1I̍chi̍chɛ ɔha̍ la Ɔ̄chī Ɔmyɛ̍nyɛ̍, Iji̍sɔ̄ɔsi ga wɔlɛ̍ yī ɔlɛhu̍ yī Āchɛ yī Ifa̍rasīi ɔha̍ gāa ge̍ē re̍ ojōre̍. Āchɛ gblāa abɔ̍ɔ ē deyīrɛ Iji̍sɔ̄ɔsi bāa ogrigri ma̍. 2Ɔngrɔ̄ɔ ɔha̍ nīi mi gbīgbigbī la ikpo̍ ba̍la abɔ̄ ma̍ wā abɔ̍ɔ dikpo̍ba̍ Iji̍sɔ̄ɔsi. 3Iji̍sɔ̄ɔsi che āchɛ ongū Lihɔ yī Iju̍u ba̍la Āchɛ yī Ifa̍rasīi ɛla̍ā ikpo̍ bɛ̍ɛ̄nɛ̄ hīka, “Lihɔ yī alɔ ma̍ chɛ̄ ka ɔ̄chɛ ɔ̍lɔ ge̍ nyiya obo̍chi̍ la Ɔ̄chī Ɔmyɛ̍nyɛ̍ kɛ̄ɛ o̍ i̍ chɛ̄ ni̍?”
4Āchɛ ɛla̍ā i̍ chɛ̄ kɛlɛ̄lā ni̍. Iji̍sɔ̄ɔsi wā ge̍ de ɔngrɔ̄ɔ ɔla̍ā nyiya, ka de ɔ̍ nīi o̍ pīya bɛ̍ɛ̄nɛ̄. 5Iji̍sɔ̄ɔsi che āchɛ ɛla̍ā ikpo̍ du̍mɔ̍ hīka, “Ɔ̄nyɛ hɔ̄ amu lipu̍ yī ala̍ nīi ɔyi̍ yī nū ɔnɔ̄ngrɔ̄ɔ kɛ̄ɛ yɛna yī nū ge̍ ngma̍ ta̍tū la wɔ̄gɔ̄ la Ɔ̄chī Ɔmyɛ̍nyɛ̍ nīi i̍ ge̍ē wu̍ ɔ̄ ngmɛ̍ɛchɛ ɔpɔ̄ɔpɛ̄ ni̍ ma̍?”
6Ɔ̄chɔ̄chɛ lipu̍ yī wā i̍ hīya anu̍ ɔkɔ yī lɛlā nūma̍ mɛ ni̍.
Ala̍ e̍e nāa iyī ala̍ ke̍ke̍ni̍ ɔ̄kɔ̄kū ni̍
7Iji̍sɔ̄ɔsi ma̍ lɔkɔ nīi āchɛ nīi wā la wɔga ɔla̍ā ma̍ yɛ ē hyāhɔ̄ la ɛbɛ ɔnɔ̄kɔ̄kū ɔnɔ̄kɔ̄kū ma̍. Wu̍chē yī ɔla̍ā, o̍ kɛlā de wa̍ la wɔ̄chīije hīka, 8“Ala̍ ma̍ ko̍ō! Ɔ̄chɛ ge̍ hī ala̍ ɛra̍ ga wɔga yī ɔnyā, ala̍ e̍e gāa ge̍ hyāhɔ̄ la ɛbɛ nīi - ɔnɔ̄kɔ̄kū gɔ̄ga ma̍ ni̍. Ɔha̍ni̍, ɔlɔjā ka de ɔ̄chɛ ɔnɔ̄kɔ̄kū ɔha̍ nīi ga awɔ ɔgɔ̄ga ma̍ ka ɔ̍lɔ ge̍ wā i̍ngi̍ngɔ̍ɔ. 9Bū la ɛbɛ ɔla̍ā, a̍dāwɔ̄lɛ̍ nīi hī ala̍ āchɛ ɛpɛpa ɛra̍ ma̍ ge̍ē da wɔ hīka aɔ̍lɔ ge̍ tu̍ nīi ɔ̄chɛ ɔla̍ā ɔ̍lɔ ge̍ hyāhɔ̄ la ɛbɛ ɔla̍ā pi̍i̍. Bū la ɛbɛ ɔla̍ā, a de ē ya̍ liwēyī-liwēyī, chōo̍chē pīya ge̍ē hɔ̄ la ɛbɛ onīchi̍chɛ̍ bɛ̍ɛ̄nɛ̄. 10Ɔkɔkɔ yī ɔla̍ā, e̍ ge̍ hī wɔ ɛra̍ i̍ngɔ̍ɔ, gāa ge̍ hyāhɔ̄ la ɛbɛ onīchi̍chɛ̍, hɛ̄ɛbɛ nīi a̍dāwɔ̄lɛ̍ ge̍ wā ge̍ da wɔ hīka, ‘Ɔya, nīichō wā ge̍ hɔ̄ ma̍ la ɛbɛ ɔnɛ̄ɛhɛhi nūma̍.’ Onūma̍ ge̍ē bī otūlichō ge̍ē de wɔ la īkprī yī āchɔga ehēhī wa̍a̍ a̍nɛ. 11Wu̍chē oji̍ nɛ, ɔ̄chaha̍-ɔ̄chaha̍ nīi ge̍ nāa iyī nū ke̍ke̍ni̍, e̍ ge̍ē nāa anu̍ tɛ̍bɛ̍lɛ̍. Ɔ̄chɛ nīi ge̍ chī nāa iyī nū tɛ̍bɛ̍lɛ̍, e̍ ge̍ē bī ɔ̄ gāa ichō ke̍ke̍ni̍.”
12Iji̍sɔ̄ɔsi pīya kpa̍ta̍ ka de ɔ̄chɛ nīi yɛ ē ya̍ wā wɔga ma̍ bɛ̍ɛ̄nɛ̄ hīka, “Ma̍ ko̍ō! A ge̍ē hī āchɛ ɛra̍ yī ojōre̍ kɛ̄ɛ wɔga ɔyɔ̍ɔ̄ya̍ ɔha̍ ma̍, a ā hī aɛ̍ɛya awɔ, kɛ̄ɛ aɛ̍nɛ̍ yī wɔ, kɛ̄ɛ alipwɔ̍ɔma yī wɔ, kɛ̄ɛ āchɛ ɔgbwɔdu bāa awɔ ɔlɔjā ma̍ ni̍. Nɛ̄ni̍ aa̍ titi ge̍ē hī wɔ ɛra̍ yī wɔga īchāha̍. Bū la ɛbɛ ɔla̍ā, o̍ re̍ka e̍ kla̍ awɔ ure̍ yī ɔjā nīi a ya̍ de wa̍ ma̍ mɛ̍. 13A ge̍ yɛ ē yɛ̍ɛ̄lā ɔha̍ i̍ngɔ̍ɔ, alyeklo̍ ba̍la eku̍ku, āchɛ nīi kwa̍ābɔ̄ oko̍ōku̍, kwi̍kpo̍ oko̍ōku̍ ma̍, ba̍la āchɛ epriyī aa̍ nīi a ge̍ē hī wā ɛra̍ a̍nɛ. 14Bū la ɛbɛ ɔla̍ā, a ge̍ē nāa ɔpiyɛ ɔlamu-ɔlamu. Wu̍chē oji̍ nɛ, aa̍ ma̍ i̍ ge̍ē kla̍ awɔ ure̍ mɛ ni̍. Ɔwɔ ge̍ē kla̍ awɔ ure̍ hwɔhi hwɔhi yɛ̄grāa nīi āchɛ ɛnɛ̄ɛhɛhi ge̍ē hye̍ēyī la okū ma̍ a̍nɛ.”
Wɔ̄chīije yī wɔga ɔnɔ̄kɔ̄kū ɔha̍
(Ima̍tiyu 22:1-10)
15Ɔngrɔ̄ɔ ɔha̍ lipu̍ yī āchɛ ɛla̍ā nīi gblāa abɔ̍ɔ la ɛbɛ yī ojōre̍ ɔla̍ā ma̍ plɛ̍ɛ̄lā ɔla̍ā nīi Iji̍sɔ̄ɔsi yɛ ē ka ma̍. O̍ ka de Iji̍sɔ̄ɔsi bɛ̍ɛ̄nɛ̄ hīka, “Ɔwɔ̄wīyā yī āchɛ nīi ge̍ē gblāa la wɔga ɔyɔ̍ɔ̄ya̍ yī ɛbɛ yī Ɔchwɔ̄lɛ̍ Oro̍ōre̍ yī Ɔwɔ ē re̍ ɔjā ma̍ ge̍ē lɛ kana̍ ma̍ ēēe?”
16Iji̍sɔ̄ɔsi ka de ɔ̍ hīka, “Ma̍ ko̍ō! Ɔngrɔ̄ɔ ɔha̍ yɛ ge̍ē ya̍ wɔga ɔnɔ̄kɔ̄kū ɔha̍. O̍ ka de āchɛ yɛ̄mɛ̄mɛ̄ ka ɛ̍lɛ ge̍ wā. 17Yɛ̄grāa yī wɔga ɔyɔ̍ɔ̄ya̍ ɔla̍ā de gbajɛ ma̍, o̍ de ɔ̍chɛ̍ yī nū tɛ̄rɔ̄ hu āchɔga ɛla̍ā; ɛ̍lɛ ge̍ yewā gɛ, ma̍a anɔ̍lɔ de ɔjāha̍-ɔjāha̍ ti̍kpo̍ tu̍chɛ̄ mɛ̍! 18Ɔ̍chɛ̍ yī nū gāa ge̍ ka ma̍, ɔnyɔnyɛ kū la oko̍o ɔpɔ̄pīya ɔpɔ̄ɔpɛ̄. Ɔ̄chɛ ɔrāarāa ka de ɔ̍chɛ̍ yī nū ɔla̍ā hīka, anɔ̍lɔ ra̍ ajɛ yī yɛrɔ̄ ɔha̍; anɔ̍lɔ ge̍ē gāa ge̍ē ma̍ ɔ̍lɔ la eyī o̍bū. Ɔ̍lɔ ge̍ chu̍chu̍u! Ɔ̍lɔ ge̍ pi̍ye̍mā hī i̍wɔ̄wā mɛ ni̍ yī anu̍. 19Ɔha̍ ka hīka, anɔ̍lɔ ra̍ ɔbi̍yɛna igwo̍; aa̍ nīi anɔ̍lɔ pīya yɛ ma̍ yɛ gāa ge̍ē ma̍ ɛ̍lɛ ē ma̍ a̍nɛ. Ɔ̍lɔ ge̍ chu̍chu̍u! Ɔ̍lɔ ge̍ pi̍ye̍mā hī i̍wɔ̄wā mɛ ni̍ yī anu̍. 20Ɔha̍ gba̍a ka hīka, anɔ̍lɔ e̍e wu̍ ɔnyā owo̍ōwu̍ ma̍, anɔ̍lɔ i̍ yɛ abɔ̍ɔ ge̍ē gbajɛ ē wā mɛ ni̍. 21Ɔ̍chɛ̍ yī ɔngrɔ̄ɔ ɔla̍ā ku̍chē pīya ge̍ de koko̍o i̍ngɔ̍ɔ wa̍a̍ de abā yī nū. Ɔtū ngurangura ya̍ ɔngrɔ̄ɔ ɔla̍ā kpɛ̍ɛji. O̍ da ɔ̍chɛ̍ yī nū hīka ɔ̍lɔ ge̍ pīya ngla̍ ga o̍gra ba̍la ɔpɔ̄pū yī u̍kpu̍fi̍ye̍ ɔha̍lɔha̍ wa̍a̍ abɔ̍ɔ la ipwo̍gra ɔla̍ā. Ɔ̍lɔ ge̍ bī alyeklo̍, ba̍la eku̍ku āchɛ nīi kwi̍kpo̍ oko̍ōku̍ - kwa̍ābɔ̄ oko̍ōku̍ ma̍, ba̍la epriyī wā la wɔlɛ̍ yī anu̍. 22Bɛ̍ɛ̄nɛ̄, ɔ̍chɛ̍ yī nū cha wā ge̍ koko̍o de ɔ̍ ka anɔ̍lɔ ya̍ lɔkɔ nīi ɔ̍lɔ ka ma̍ mɛ̍; ɛbɛ ɔ̍lɔ chī e̍e hōhī we̍. 23Abā yī nū gba̍a ka ɔ̍lɔ ge̍ pīya ga ɔpɔ̄pū yī yɛrɔ̄ ba̍la ɔgu ɔha̍lɔha̍ wa̍a̍. Ɔ̍lɔ ge̍ ka de āchɛ, ya̍ lɛbɛ nīi ɛ̍lɛ ge̍ wā mwɛbɛ, hɛ̄ɛbɛ nīi wɔlɛ̍ yī anu̍ ɔ̍lɔ ge̍ mōmu la āchɛ. 24Anɔ̍lɔ ge̍ē koko̍o ē de ɔ̍lɔ; āchɛ ɛla̍ā wa̍a̍ nīi anɔ̍lɔ hī ɛ̍lɛ ɛra̍ o̍bū ma̍, ɔ̄chɔ̄chɛ lipu̍ yī ɛ̍lɛ i̍ ge̍ē de oko̍o ē tū ojōre̍ yī wɔga ɔyɔ̍ɔ̄ya̍ yī anu̍ gɛ ni̍.”
Akanya nīi hɔ̄ la ode pīya a̍chi̍kpo̍ yī Iji̍sɔ̄ɔsi ma̍
(Ima̍tiyu 10:37-38)
25Āchɛ lyɛ̄mɛ̄ kpɛ̍ɛji nīi tīkpo̍ tāa Iji̍sɔ̄ɔsi ma̍. O̍ pīya kpa̍ta̍ da wa̍ hīka, 26“Ala̍ ma̍ ko̍ō! I̍ ɔ̄chaha̍-ɔ̄chaha̍ ge̍ē wā dikpo̍ba̍ u ji, ē de pīya a̍chi̍kpo̍ yī u ē mɛ a̍ni̍. Ɔ̍chi̍kpa̍kpa̍, ɔlɔjā ta̍ a̍dā yī nū ba̍la ɛ̍nɛ̍ yī nū, ta̍ ɔnyā yī nū ba̍la ayi̍ yī nū gba̍a ta̍ iyī anu̍ ɔlɔjā. 27Ɔ̄chɛ nīi o̍ ge̍ hla̍ anu̍ la ɔyɛ ba̍la ami, ɔlɔjā i̍ ge̍ chikpo̍ yī akanya ɔmɔ̍ɔ̄ma̍ ni̍, ɔ̍lɔma̍ o̍ i̍ ge̍ē re̍ka a̍chi̍kpo̍ yī u ē mɛ ni̍. 28Ɔ̄chɛ ge̍ yɛ ge̍ē gwo̍ u̍nu̍ olichīichō ɔha̍, je̍ka o̍ ge̍ē hyāhɔ̄ kichi̍ lɔkɔ nīi okpo ge̍ē bi̍ tū ɔ̄ ma̍ o̍bū? Je̍ka o̍ ge̍ē ma̍ hīka anɔ̍lɔ ka̍a lɛ okpo nīi - ɔ̍lɔ ge̍ē jɛ̄ u̍ku̍rɔ̍ ɔla̍ā ma̍ o̍bū? 29O̍ i̍ ge̍ ya̍ i̍ngɔ̍ɔ o̍bū ni̍, ɔ̍lɔma̍ o̍ ge̍ē gwo̍ wɔlɛ̍ olichīichō ɔla̍ā nīi o̍ de owu̍tu yī nū tū la ajɛ ma̍ ē mɛ ni̍. Bū la ɛbɛ ɔla̍ā, āchɛ nīi ge̍ē ma̍ lɛlā ɔla̍ā ma̍ ge̍ē ya̍ ɔ̄ la oko̍o: 30Ɔ̍lɔ ge̍ yii̍s! Ɔngrɔ̄ɔ nūma̍ ɔ̍lɔ yɛ ē gwo̍ wɔlɛ̍, ɔ̍lɔ i̍ chī gwo̍ ɔ̍lɔ mɛ gɛ ni̍! 31Ɔchwɔ̄lɛ̍ ɔha̍ ge̍ nīichō la āchɛ u̍nɔ ohu che ɛrwɔ̄ yɛ gāa lɛwu̍ dikpo̍ba̍ ɔchwɔ̄lɛ̍ ɔha̍ nīi bī āchɛ u̍nɔ ohu ɛpa che igwo̍ bɛ̍ɛ? Je̍ka o̍ ge̍ē hyāhɔ̄ jiya anu̍ ma̍ wa̍a̍ hīka anɔ̍lɔ ka̍a lwɔhu̍ ge̍ē kplɛ̍wu̍ tāa ɔchwɔ̄lɛ̍ ɔla̍ā mɛ o̍bū? 32O̍ i̍ ge̍ lwɔhu̍ i̍ngɔ̍ɔ gɛ ni̍ mɛ̍, o̍ ē de ɔ̄chɛ ē tɛ̄rɔ̄ hu ɔchwɔ̄lɛ̍ ɔla̍nū ge̍ē ra̍ābɔ̄ yī lɛwu̍ ogboba̍ ē de ɔ̍ yɛ̄grāa nīi o̍ e̍e yɛ hwɛɛ we̍ ma̍. 33I̍ngi̍ngɔ̍ɔ nīi lɛlā yī ala̍ lɛ a̍nɛ. Ɔ̄chɔ̄chɛ yī ala̍ i̍ ge̍ē re̍ka a̍chi̍kpo̍ yī u mɛ ni̍, ɔ̍chi̍kpa̍kpa̍ ɔlɔjā tu̍ hī ɔjāha̍-ɔjāha̍ wa̍a̍ nīi o̍ lɛ ma̍.
Wɔnyɛ yī ɔmā i̍ ge̍ hɔ̄ gɛ ni̍ bɛ̍ɛ
(Ima̍tiyu 5:13; Ima̍aki 9:50)
34“Ɔmā lwɔnyɛ. Wɔnyɛ yī ɔmā i̍ ge̍ chī hɔ̄ gɛ ni̍, kana̍ nīi ɔ̄chɛ ge̍ē ya̍ nīi o̍ ge̍ē lɛ ɔmɔ̄ɔmā mɛ we̍ ma̍? 35O̍ i̍ chī hwɔhi de ajɛ kɛ̄ɛ limū o̍bo̍bū ni̍; ode chīyenū ji bɛ̍ɛ̄nɛ̄ nɛ. Ala̍ ge̍ tū arɔ̄ ɔplɛ̍ɛ̄lā ma̍, ala̍ ē po̍ gɛ!”
Currently Selected:
Ilu̍uku 14: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
