توریت شریف: پَیدایش 39
39
1اسماعِیلیاں حضرت یُوسف کی خریدی کے مصر وِچ آندا سی- اُتھے اِک فوطِیفار نامی مِصری سی. او بادشاہ فرعون اگے اِک خادم، تے مُحافظاں نا سِپہ سالار سی- اُس حضرت یُوسف کی خریدی کِہندا سی۔
2رب حضرت یُوسف نال سی، اِس واسطے او اِک کامیاب آدمی بݨے- او اپݨے مصری مالک نے کہار رہننے سݨ۔ 3فوطِیفار تکیا کہ رب حضرت یُوسف نال سی، تے جِنہاں کماں کی او ہتھ لاݨے سݨ، اُنہاں وِچ رب برکت باݨا سی۔ 4اِس واسطے فوطِیفار نی نظراں وِچ او مقبُول ہوئی گئے، تے او ہی فوطِیفار نی خدمت کرݨ لغے۔ فِر فوطِیفار اپݨے کہرے نا سارا اختیار حضرت یُوسف کی دیئی شوڑیا، تے اپݨا سارا کُجھ اُنہاں نے حوالے کری شوڑیا۔ 5اُس ویلے تُوں لائی، رب حضرت یُوسف نی خاطر اُس مصری نے کہار برکت باݨ لغی پیا۔ اے برکت اُس نیاں ساریاں چیزاں پر سی جیہڑیاں کہرے وِچ تے زمین وِچ سݨ۔ 6اِس واسطے اُس اپݨا سارا کُج حضرت یُوسف نے ہتھے وِچ دیئی شوڑیا تے سوائے روٹی نے، جِس کی او کھائی کہنݨا سی، اُس کی اپݨی کُسے چیزے نی فکر نی رہی۔
حضرت یُوسف بہُوں سُہݨے تے چنگے سݨ۔ 7کُج عرصے بعد اِس طرح ہویا کہ فوطِیفار نی زناݨی نی خراب نظر حضرت یُوسف پر پئی گئی۔ فِر اُس اُنہاں کی آخیا کہ، «توں مہاڑے نال سو!»
8پر حضرت یُوسف انکار کری شوڑیا، تے اپݨی مالکن کی آخیا، «تکو! مہاڑے مالک کی مہاڑے ہوݨیاں کہرے نی کِسے چِیزے نی پرواہ نی- اُنہاں اپݨا سارا کُج مہاڑے ہتھے وِچ چائی دِتا۔ 9اِس کہرے وِچ مہاڑے کولوں بڑا کوئی وی نی- تے مالِک تُساں تُوں علاوہ کوئی چیز مہاڑے تُوں اولَے نی رخی، کِیئانکہ تُساں اُس نی زناݨی او- فِر میں تُساں نال اِتنا پہیڑا کم کِیئاں کراں، تے اللّٰہ تعالیٰ نا غُنہگار بݨاں؟» 10او ہر روز حضرت یُوسف نے پِچھے لغی رہݨی سی کہ تُوں مہاڑے نال سو۔ پر او ہمیشہ مُکرنے رہے-
11اِک دیہاڑے اِس طرح ہویا کہ حضرت یُوسف کہرے نا کم کرنے واسطے کہرے وِچ گئے، تے کہرے وِچ ہور کوئی نوکر نی سی۔ 12اُس عورت حضرت یُوسف نے کپڑے پغڑی کے اُنہاں کی آخیا، «مہاڑے نال سو!» پر او اُنہاں نے ہتھے وِچ کپڑے چھوڑی کے باہِر نسی گئے۔
13جس ویلے اُس زناݨی تکیا کہ او اپݨا کپڑا اُس نے ہتھے وِچ چھوڑی کے نسی گئے، 14تے اُس کَے کِیتا؟ اُس اپݨے نوکراں کی بُلائی کے آخیا، ”تکو! فوطِیفار اک عِبرانی کی اَساں نی عزت لُٹنے واسطے کہنی آیا! او مہاڑے کول سوݨے واسطے کہرے وِچ آئی گیا سی، تے میں چیخاں ماریاں۔ 15فِر جسلے اُس تکیا کہ میں ڈنڈ کِیتی، تے او اپݨا کپڑا مہاڑے کول چھوڑی کے باہر نسی گیا۔»
16فِر اُس زناݨی حضرت یُوسف نا کپڑا اُنہاں نے مالکے نے اچھݨے تک اپݨے کول رخیا۔ 17فِر اُس اے ساری کہاݨی اپݨے جݨے نال کیتی کہ، «اے عبرانی نوکر جیہڑا تُوں اَساں وِچ آندا، مہاڑی بے عزتی کرنے واسطے مہاڑے کول آیا! 18جس ویلے میں ڈنڈ بائی سی، تے فِر او اپݨا کپڑا مہاڑے کول چھوڑی کے نسی گیا سی۔»
19جہڑے ویلے حضرت یُوسف نے مالکے اپݨے کہرے آلی نیاں گلاں سُݨیاں، تے اُس کی بہُوں غصہ آیا۔ 20اُس حضرت یُوسف کی کہروں کَڈی کے قید خانے وِچ سٹوائی شوڑیا جتھے بادشاہ نے قیدی ڈکے وے سݨ۔ تے او اُتھے قید خانے وِچ رہݨ لغی پئے۔
21پر رب حضرت یُوسف نال سی تے اُنہاں اپر رحم کِیتا، تے قید خانے نے دروغے نی نظراں وِچ اُنہاں کی مقبول بݨایا۔ 22دروغے قید خانے نے ساریاں قیدیاں کی جیہڑے اُس ویلے قید وِچ سݨ حضرت یُوسف نے حوالے کری شوڑیا۔ او جیہڑا کُج وی کرنے سݨ، حضرت یُوسف نے حُکمے نال کرنے سݨ۔ 23جیہڑے کم حضرت یُوسف نے ہتھے وِچ سݨ، اُنہاں واسطے دروغہ بے فکر ہوئی گیا، اِس واسطے کہ رب حضرت یُوسف نال سی تے جیہڑا کُج او کرنے سݨ رب اُس وِچ اُنہاں کی ترقی دیݨا سی۔
Currently Selected:
توریت شریف: پَیدایش 39: phr
Highlight
Share
Copy
Want to have your highlights saved across all your devices? Sign up or sign in
Text (c) 2021 Noor-e-Kashmir
Audio (p) 2021 Noor-e-Kashmir
